මෙම නම ඇසුරු පමණින් ඇතැමෙකුට මෙය අවබෝධ විය හැකිය. මෙය දරුවන් තුළ පවතින මානසික තත්ත්වයක් බව පළමුව කිව යුතුය. පවුලේ දරුවන්ගේ උපත ලැබූ පිළිවෙළ අනුව මැද දරුවන් තුළ පෙන්නුම් කරන සුලභ මානසික තත්ත්වයක් ලෙස Middle Child Syndrome තත්ත්වය හඳුන්වා දිය හැකිය.
අලුත විවාහ වූ දෙපලගේ පළමු සිහිනය දරුවෙකු තම පවුලට එකතු කර ගැනීමයි. එම සිහිනය සැබෑවක් කරමින් පවුලට පළමු ව එකතු වුන දරුවා වඩාත් වාසනාවන්ත විය හැකිය. මන්ද දෙමව්පියන්ට ඇති හැකි උපරිමයෙන් එම දරුවාට අවශ්‍ය සියලුම දේ ලබා දෙන අතර කිසිදු අඩුපාඩුවක් සිදු කරන්නේ නැත. කල්යත්ම පවුලට එකතු වන දෙවන දරුවා පළමු දරුවා තරම්ම සුවිශේෂී වුවත් එම දරුවාට ලැබෙන දේ නැවුම් හා පළමු දරුවා තරම්ම නොවනු ඇත. මේ අතරම පවුලට තුන්වන දරුවෙකු පැමිණියහොත් තත්ත්වය කෙසේ ද? ඒ වන විට පළමු දරුවා තරමක් තේරුමක් ඇති යම් වයස් සීමාවට පැමිණ දරුවකු විය හැකි අතර පවුලට පැමිණි තුන්වැනි දරුවා සමඟ දෙමව්පියන් බොහෝ කාර්යබහුල වනු ඇත. මෙම අවස්ථාවේදී ඔබේ දෙවැනි දරුවා එනම් මැද දරුවා හට ලබා දෙන හා දුන් අවධානයට කුමක් සිදුවේද? එය එම දරුවාගේ මානසික ක්‍රියාවලියට බලපාන්නේ කෙසේද යන්න ඔබ සිතුවාද?
- Middle Child Syndrome තත්ත්වය යනු කුමක්ද? එයට හේතු මොනවාද?
දෙමව්පියන් තම පළමු දරුවා වර්ධනය කරගැනීම සඳහා නොසෑහෙන වෙර දරනුයේ අත්දැකීම් අවම වීම හේතුවෙනි. තවද තමාට හැකි උපරිමය තම පලමු දරුවාට සලසන ඔබ ඔබේ දෙවන දරුවා පැමිණි විට ඔබ විඩාබර විය හැකිය. කල්යත්ම පවුලට තුන්වෙනි දරුවකු පැමිණියහොත් පවුලේ බාලයා කාගෙත් හුරතලා වෙද්දී පවුලේ දෙවැනි/ මැද දරුවාට ලැබෙන අවධානය අවම වීම මෙම මැද දරුවාගේ මානසික තත්ත්වයට බලපෑම මෙම තත්ත්වයට හේතු වන බව විද්‍යාත්මක පිළිගැනීමයි.
- මේ සඳහා බලපානු ලබන සැබෑ මානසික හේතු මොනවාද?
මේ පිළිබඳ ලියවී ඇති දේ පිරික්සන විට මෙයට හේතු වන වඩාත්ම වැදගත්ම සාධකය ලෙස හඳුන්වා දෙනු ලබන්නේ උපදින පිළිවෙල හා ලබන අත්දැකීම් දරුවාගේ පෞරුෂ කෙරෙහි බලපාන බවයි. පවුලේ මැද දරුවාගේ හැසිරීම කෙරෙහි දෙමව්පියන් දරුවන් හට සැලකූ ආකාරය, පවුලේ අනෙක් දරුවන් දක්වන ප්‍රතිචාර ආදි බොහෝ දේ හේතු වන බව කියවේ. උදාහරණ ලෙස පවුලේ පළමු දරුවා ශක්තිමත් වගකීම් සහගත වන අතර පවුලේ බාලයා වඩාත් හැඟුම්බර, රැකවරණය පතන කෙනෙකු විය හැකි අතර පවුලේ මැද දරුවා මෙම දෙකටම අතරමැදි තත්ත්වයක් පෙන්නුම් කිරීම කිරීමට හැකිය.
- මෙම දරුවන්ගේ පෞරුෂ ලක්ෂණ කෙබඳුද?
පවුලේ වැඩිමල් දරුවා වඩාත් වගකීම් සහගත වන අතර නිතර ජයග්‍රාහී මනසකින් යුතු අතර ඒ සඳහා මහත් උනන්දුවෙන් කටයුතු කරනු ලබන අතර පුළුල් දැක්මකින් යුතු වීම පෞරුෂ ලක්ෂණ පෙන්නුම් කරයි.
තවද බහුතරයක් පවුලේ මැද දරුවා නිතරම සෑම දෙයකටම අවධානය නොදෙන, ඉතාමත් සැහැල්ලුවෙන් කාලය ගත කිරීමට කැමැති, වගකීම් ගැනීමට මැලි පෞරුෂ ලක්ෂණ පෙන්නුම් කරන බව පරීක්ෂණ වලින් හඳුනාගෙන ඇති අතර පවුලේ බාලම දරුවා නිතරම රැකවරණය සොයන, අවධානය ලබා ගැනීමට කැමති පෞරුෂ ලක්ෂණවලින් යුතු බව කියැවේ. තවද මෙම පෙන්නුම් කරන ලබන පෞරුෂ ලක්ෂණ කෙරෙහි දරුවාගේ උපත් පිළිවෙල හා පරිසරයෙන් ලැබෙන අත්දැකීම ද එක් හේතුවක් වන බව කියවේ.
- මේ සඳහා පවුල තුළ කටයුතු කල යුතු ආකාරය කෙබඳුද?
දරුවන් දෙමවුපියන්ගේ අවධානය ලබා ගැනීමට මහත් කැමැත්තක් දක්වති. උදාහරණ ලෙස පවුලේ පළමු දරුවා යම් ජයග්‍රහණයක් ලබාගෙන පැමිණි විට ඔබ දෙමව්පියන් වශයෙන් ඔහු/ඇය අගය කරනු ලබන අතර ඒ අවස්ථාවේ ඔබේ තුන්වන දරුවා ඔබ අත තබාගෙන සිටිය හැකිය. එවිට ඔබේ මැද දරුවා කොහෙද? ඔබ නොසිතන්නට ඇති. නමුත් එම අවස්ථාවට ඔබේ මැද දරුවා ද යම් ආකාරයකින් සම්බන්ධ කරගත යුතුමය. මෙම පවුලේ ඇතිවන මෙවන් පසුබිම් හේතු කරගෙන ම දරුවාගේ නොසන්සුන් වීමට ඉඩකඩ පවතී.
තවද ඒ හේතුවෙන් පවුලේ මැද දරුවා තම අනෙකුත් සහෝදරයන්ට වඩා අවධානය ලබා ගැනීමට තරඟකාරීව හැසිරීම සිදුවේ. තවදුරටත් මෙම මානසික තත්වය වැඩිවූවොත් ඉච්ඡාභංගත්වයට පත්වීම සිදුවිය හැකිය. තවද ඔබ පවුලේ මැද දරුවාගේ සිතුවිලි අතර
- අයියා/අක්කාට අම්මා තාත්තා ආදරෙයි. මොකද එයා දක්ෂයි නේ
- මල්ලි/නංගිට අම්මා තාත්තා ආදරෙයි. මොකද එයා පොඩි නේ
- මට තමයි කවුරුත් ආදරේ නැත්තේ ආදී සිතුවිලි තිබිය හැකිය.
- Middle Child Syndrome වළක්වා ගනු ලබන්නේ කෙසේද?
මෙමගින් දරුවන් තුන්දෙනෙකු හෝ ඊට වැඩි පිරිසක් පවුල තුළ සිටීම ගැටලුවක් ලෙස කිසි ලෙසකත් පිළිගන්නේ නැත. නමුත් මෙහිදී අවධානය කරනු ලබන්නේ birth order එක හා පවුලේ සැලකුම් අනුව දරුවන්ගේ මනසේ සිදුවිය හැකි ගැටලුකාරී තත්ත්වය පිළිබඳ පමණි. දෙමාපියන් වශයෙන් ඔබ මේවා මෙතෙක් නොසිතුවා විය හැකිය. ඇතැම්විට ඔබ තුන්වන දරුවෙකු බලාපොරොත්තුවෙන් සිටිනවා විය හැකිය. එහෙමත් නැත්නම් ආපසු සිතන විට ඔබ අතින් මෙවන් දේ ඔබේ මැද දරුවාට සිදු වී තිබෙනවා විය හැකිය. එහෙම නැත්නම් ඔබ මවක, පියෙකු වීමට සිහින මවනවා විය හැකිය. ඔබ මේ පිළිබඳත් සිතන්න.
- පවුලට එකතු වන සෑම දරුවෙක්ම මහත් සම්පතකි.
- පවුලේ සෑම දරුවෙකුම එකම ආකාරයට අවධානය දෙන්න. ආදරය කරන්න. ප්‍රශංසා කරන්න.
- ඔබේ කාලයේ ඔබේ සියලුම දරුවන් සමඟ බෙදාගන්න.
- දරුවන් අතර නිසි වයස් පරතරයක් තබා ගැනීම ඔබට මෙය වඩාත් පහසු කරනු ඇත.
- දරුවාගේ වයසට සාපේක්ෂව වගකීම් ලබා දෙන්න.
- දරුවන් අතර සහෝදර බැඳීම් තහවුරු කෙරෙන ක්‍රියාකාරකම් සිදු කරන්න.
- මැද දරුවා පවුලේ පළමු දරුවාත් හා තුන්වැනි දරුවා සමඟ අතරමැදි වූ සැන්විච් එකක් වගේ යැයි පැවසිය හැකිය. මෙම තත්ත්වය ගැටලුකාරී නොවීමට කටයුතු සැලසුම් කරන්න.
- නිතර දරුවන්ගේ මානසික සෞඛ්‍ය පිළිබඳ සිතන්න.
කථන හා භාෂා චිකිත්සක සජිනි පෙරේරා මහත්මිය විසිනි.
