‘කියවීම’ දරුවාට සමීප කරවීමට ක්‍රම 5ක්

‘කියවීම මිනිසා සම්පුර් න කරයි’ යන කියමන අප සියලු දෙනාම හොඳින් අසා ඇති වදනකි. තවද කුඩා කල සිට පොත පොතපතට ඇලුම් කරන, පොත පත කියවන දරුවාගේ දැනුම හා චින්තනමය කුසලතා, භාෂා කුසලතා දියුණු වන්නේ අප පුදුම කරමිනි. එමනිසා පොත පත කියවීම ඉතාමත් වැදගත් දෙයක් ලෙස හැඳින්විය හැකිය. තවද එය ඉගෙනීමේ කොඳුනාරටිය බඳු ය. 

දරුවා විධිමත් අධ්‍යාපනයට යොමු වූ විට දරුවා ප්‍රගුණ කරන විෂයන් වන සිංහල, විද්‍යාව, භාෂාවන්, ගණිතය හා ඉතිහාසය ආදි විෂයන්හි වඩාත්  හොද ප්‍රවීණතා පෙන්වීමට මෙන්ම භාහිර දෙනුම කෙරෙහිද දරුවාට අමතර පොතපත කියැවීම හා ඇසුරු කිරීම ඉතාමත් අත්‍යවශ්‍යවේ. නමුත් අද වන විට දරුවාන් කියවීමෙන් ඈත් වී යන බව බොහෝ විෂයන් හි ප්‍රවීණයන්ගේ අදහසයි. කියවීම වෙනුවට බොහෝ දරුවන්ට ආදේශක පැමිණ ඇති බව ඔවුන් පෙන්වාදෙයි. ඒ අතර ජංගම දුරකථන, වීඩියෝ ගේම්, අන්තර්ජාලය හා සමාජ මාධ්‍ය ආදී බොහෝ දේ ඇති බව ඔවුන්ගේ අදහසයි. 

දෙමව්පියන් වන ඔබෙන් ඔබේ දරුවා පොත පත කියවනවාද ඇසුවොත් බොහෝ දෙමව්පියන් ගේ පිළිතුර නැත යන්නයි. නමුත් ඔබ එහි වටිනාකම පිළිබඳ බොහෝ දැනුවත් වුවද දරුවා හට ඒ සඳහා නිසි මග පෙන්වීමක් කරවීම හා එය ප්‍රගුණ කරවීමට ඔබටද ගැටළුකාරී වී තිබිය හැකිය. ඔබ ඔබේ දරුවා කියවීම සඳහා යොමු කරන්නේ කෙසේද? දරුවන්ගේ කියවීමේ කුසලතා දියුණු කරන්නේ කෙසේද? මෙම ප්‍රශ්න වලට පිළිතුරු පහත ක්‍රම ක්‍රියාත්මක කිරීම තුළින් ඔබට ලඟා කරගත හැකිය. 

  1. දරුවාට කියවීම සඳහා පොත් තෝරා ගැනීමට අවස්ථාව දෙන්න. 

දරුවා කියවීමට යොමු කිරීමට ඔබට ප්‍රථමයෙන්ම කළ හැක්කේ දරුවා කැමති ලෙස කියවීම ආරම්භ කිරීමට දීමයි. ඕනෑම දෙයක් පටන් ගැනීමට කොතැනින් හෝ  එය පටන් ගත යුතු බව අප අසා ඇත. ඒ ආකාරයෙන්ම කියවීම ආරම්භ කිරීමට දරුවාට කොතැනින් හෝ කුමන පොතකින් හෝ ආරම්භ කිරීමට අවස්ථාව දෙන්න. දරුවාගේ මෙම ආරම්භය ඔහු හෝ ඇය මේ සඳහා ඇති අභිරුචිය වඩවනු ඇත. දෙමාපියව්පියන් වශයෙන් ඔබ දරුවාගේ මෙම තෝරා ගැනීමට ප්‍රථමයෙන්ම බාධා නොකරන්න. බොහෝ දෙමව්පියන් හට අවශ්‍ය වනුයේ දරුවා අධ්‍යාපනික පොතපත කියවීම වුවද, ඔබේ දරුවා වෙනත් කාණ්ඩයකට අයත් පොතක් තෝරා ගතහොත් ඒ පිළිබඳ ඔබ පසුතැවිලි නොවන්න. දෙතුන් වතාවක් එකම පොත කියෙව්වද  ඔබ ඒ පිළිබඳ පමණට වඩා නොසිතන්න. මෙම සංඥා වලින් කියවෙන්නේ දරුවා තුළ කියවීමට රුචියක් ඇති බවයි. කාලයත් සමග දරුවා නව පොතපත මෙන්ම සුදුසු පොත්පත් තෝරා ගැනීමට යොමු වනු ඇත.

  1. ඔබ දරුවාට කියවීමේ ආදර්ශයක් වන්න.

අවවාදයට වඩා ආදර් ශය උතුම් බව අප දන්නා කරුණකි. බොහෝ මට දෙමව්පියන් වන ඔබට ඔබගේ කාර්යබහුලත්වයත් සමඟ පොත්පත් සමඟ ගත කිරීමට කාලය ඉතාමත් අවම විය හැකිය. නමුත් ඔබ පොත්පත්වලට ආදරය කරන කෙනෙකු බව දරුවන් හට හැඟුන විට දරුවන් ද ඒ සඳහා යොමුවන්නේ නිතැතින්මය. කාලය ලැබුනු විට ඔබට දරුවන් සමඟ පොත්පත් කියවන්න. මසකට වරක් හෝ දරුවන්ට පොතක් මිලදී ගෙන ලබාදෙන්න. ඔබ දරුවාට ත්‍යාගයක් ලබාදෙන විට ඒ සඳහා පොත් පත් තෝරා ගන්න. මේ ආදී ලෙස ඔබ ද කියවීම සඳහා උනන්දු වන ඒ සඳහා කැප වෙන ආදර්ශමත් කෙනෙකු වීම තුළින් ඔබ අනුගමනය කරන ඔබේ දරුවාද ඒ සඳහා යොමු වනු ඇත. 

  1. සතියට එක්  දවසක රාත්‍රියක් කියවීම වීම සඳහා වෙන් කරන්න.

දිනපතා රාත්‍රියට රූපවාහිනිය නැරඹීම, video game සෙල්ලම් කිරීම ආදිය වෙනුවට සතියක එක් දිනයක් හෝ රාත්‍රී කාලය කියැවීමට වෙන් කරන්න. එදිනට රූපවාහිනිය, video game, ජංගම දුරකථන ඉවත් කර පවුලේ සියලු දෙනාම කියවීමට යොමු වන්න. මෙය පවුලේ නීතියක්, ක්‍රමවේදයක් කරගන්න. කෙටි කාලයක් ගතවන විට මෙය ඔබගේ පුරුද්දක් බවට පත් වනු ඇත.

මේ සඳහා විවිධ ක්‍රමවේද අනුගමනය කරන්න. සියලු දෙනාම වෙන් වෙන් ව කියවීම, වැඩිමල් සහෝදරියන් බාල සහෝදරයින්ට ඇසෙන ලෙස කියවීමට අවස්ථාව දීම, පවුලක් ලෙස පොදු කියවීම, හඬ නගා කියවීම ආදි ඕනෑම ක්‍රමවේදයක් අනුගමනය කරන්න.

  1. දරුවාට කුමක් හෝ දෙයක් දිනපතා ලිවීමට අවස්ථාව දෙන්න.

දරුවන් ලිවීමට පෙළඹුන විට ඔවුන්ට කියවීම අත්‍යවශ්‍ය බව වැටහෙනු ඇත. මන්ද ලිවීමට දරුවන්ගේ චින්තනය මෙන්ම සිතිමේ කුසලතා, භාෂා කුසලතා, අක්ෂර වින්‍යාසය ආදී බොහෝ දේ අවශ්‍ය වේ. දරුවාට සරල කතා ලිවීමට, කතන්දරයක් ගොඩනැගීමට, දින පොතක් ලිවීමට ඔබ අවස්ථාව ලබා දෙන්න. මෙයද දරුවා කියවීමට යොමු කිරීමට ඔබට හැකි තවත් එක් ක්‍රමවේදයකි.

  1. දරුවන් සමඟ පුස්තකාලයට යාමට කාලයක් වෙන් කරන්න.

ඔහු දරුවන් සමග සතියට එක් වතාවක් හෝ Park එකට, මුහුදු වෙරළට යනවා විය හැකිය. එමෙන්ම දරුවන් සමග එක් සතියක හෝ පුස්තකාලයට යාමට ද ඔබ සැලසුම් කරගන්න. දෙමව්පියන් බොහෝ විට මේ පිළිබඳ නොසිතනවා විය හැකිය. ඔබේ දරුවා ඔබ සමග අනෙකුත් ස්ථාන වලට යාමට ප්‍රිය කරනවා සේම ඔබ පුස්තකාලයට යාමද ආරම්භ කළහොත් දරුවා ඒ සඳහා ද කැමැති වනවා නොඅනුමානයි. ඒ තුළින් තුලින් දරුවාට පුස්තකාලය පෙන්වීම, පොත්පත් පෙන්වීම, පොත්පත් ලබා ගැනීම හා නැවත භාර දෙන  ආකාරය පෙන්වීම , පොත් තෝරා ගැනීම ආදී බොහෝ කුසලතා දියුණු වනවා මෙන්ම දරුවාගේ කියවීම කුසලතා දියුණු වීම හා අභිරුචිය වැඩි වීම කෙරෙහි ද රුකුල් දෙනු ඇත.

 

කථන හා භාෂා චිකිත්සක සජිනි පෙරේරා මහත්මිය විසිනි.  

 

අප වෙබ් අඩවියට වරින් වර ලිපි සපයන බාහිර ලියුම්කරුවන්ගේ ලිපි සියල්ල මෙම පොදු profile එක හරහා පල කෙරෙනු ඇත.

LEAVE A REPLY

Please enter your comment!
Please enter your name here