කිරි සිහිනයක නිමිති දැනගත් දිනයේ පටන් අම්මාගේ තාත්තාගේ එකම බලාපොරොත්තුව නිදුක් නිරෝගී දරුවෙක් දැකීමයි. ඒ නිසාම ඔවුන් කුස සිටින දරුවා වෙනුවෙන් කළ හැකි සියළුම සත්කාර ලබා ගන්නවා. ඒ වගේම පුංචි කිරි කැටියාගේ පෞරෂයත් මේ කාලයේ පටන්ම වර්ධනය කරන්න පුලුවන් බවත් අමතක කරන්න එපා.
ඔබේ සිතුවිලි ඉතා වැදගත්…
කිරි සිහිනය දකින දිනයට ඇඟිලි ගනින ඔබ මේ කාලයේදී යහපත් සිතුවිලිවලින්ම කාලය ගත කරන්න. අතීතයේදී පවා ගැබ්බර කාන්තාවක් වෙනුවෙන් නිතරම දකින්න සලසා දුන්නේ සුබ නිමිති පමණයි. කොටින්ම ආබාධ සහිත දරුවන් පවා දකින්න ඉඩක් ලබා දුන්නේ නැහැ. ලස්සන දරුවන්ගේ ඡායාරූපයක් නිදන ඇඳ ළග බිත්තියේ එල්ලා ගත්තා. මේ හැම දෙයින්ම බලාපොරොත්තු වුනේ ගැබ්බර මවගේ නෙතට සොඳුරු දර්ශන ලබා දීමටයි.
ආගමික කටයුතු…
ඔබ කුමන ආගමක වුනත් යහපත් සිතුවිලි ගොඩ නගන ආගමික වතාවත් වෙනුවෙන් යොමු වෙන්න. දෙමව්පියන්ගේ චර්යාවන් , සිතුවිළි නූපන් දරුවාගේ පවා මානසික වර්ධනයට හේතු වෙනවා. බුදුදහමට අනුව දරුවෙකු ලැබෙන්න සිටින මවත්, පියත් සිල්වත් වීම වැදගත්. බෝසත් කුමරු මව් කුස පිලිසිඳ ගත් ඇසළ පොහොය දිනයේ පවා මහමායා දේවිය සිල් අරගෙන සිටි බැව් බුද්ධ චරිතයේ සදහන් වෙනවා. යහපත් සිතුවිලිවලින්ම නින්දට ගිය මහමායා දේවිය දුටු සුබ සිහිනයේ නිමිත්ත වුනේ පින්වත් කුමරෙක් මව්කුස පිලිසිඳ ගැනීමයි.දරුවෙකු වෙනුවෙන් සිහින දකින කාලයේ පටන්ම ඔබ ආගමික වතාවත් වල යෙදෙමින් පිරිසිදු මානසිකත්වයකින් සිටීම ඉතාම වැදගත්.බොදු මාතාවක් නම් නින්දට පෙරාතුව පිරිත් සජ්ජායනා කරන්න.
ඉතින්…නෙතට පමණක් නොවෙයි, ගැබ්බර අම්මාගේ හදවතත් යහපත් සිතුවිලිවලින්ම ගොඩ නැගෙනවා නම් එයින් කිරිකැටියාගේ මනසටත් ඉතා හොඳ දායකත්වයක් ලැබෙනවා. කොටින්ම සෝෂාකාරී ශබ්ද ගැබ්ගත් කාන්තාවක් සිටින තැනකදී අනුමත කලේ නැහැ. කොටින්ම දරු නිමිත්තක් බලාපොරොත්තු කාන්තාවක් නිවසේ සිටිනවා නම් වහලයක, බිත්තියක ඇණයක් ගැසීමට පවා ඉඩ දුන්නේ නැහැ. එදා මෙහි විද්‍යාත්මක සත්‍යක් ගැන දැනසිටියේ නැහැ. අද වෙන විට ගර්භණීත්වය මුල් කර ගෙන විවිධ අධ්‍යනයන් සිදු කරන පර්යේෂකයින් පවා පෙන්වා දෙන අන්දමට ඝෝෂාකාරී සංගීතය ගැබිණි මවක් ජීවත්වෙන පරිසරයේදී මුදා හැරීම සුදුසුම නැහැ. කොටින්ම කොත්තු රොටී සකස් කරන විට ගැටෙන ශබ්දය පවා නුසුදුසු බැව් ඔවුන්ගේ අදහසයි.
ගීත අසන්න…
දරුවෙක් කුස දරණ කාලයේදී මිහිරි සංගීතයට සවන් දෙන්න.නමුත් වේග රිද්ම ඝෝෂාකාරී සංගීතයක් නම් සුදුසුම නැහැ. ශාන්ත රසයක් දැනෙන මිහිරි සංගීතයට සවන් දෙන්න. පොතක් පතක් කියවන විට වුනත් ඇගේ සිතුවිලි යහපත් වන කෘතියක් තෝරා ගැනීම වැදගත්. සෘන මානසිකත්වයට, පරාජිත ආකල්ප හෝ ශෝකාන්තයකින් අවසාන වෙන පොත් පත් මේ කාලයේදී නම් සුදුසු නැහැ. චිත්‍රපටයක් හෝ වෙනත් නාට්‍යක් බලන විට වුනත් ධනාත්මක සහ සිතට සතුටක් ලබා දෙන නිර්මාණ වෙනුවෙන් යොමු වෙන්න. අනවශ්‍ය අන්දමින් ඇගේ සිතට කලකිරීම, සාංකාව, දුක දැරීම සුදුසු නැහැ.
සංගීතය චිකිත්සාවක්…
සංගීතය මනස සුවපත් කරන භාවනාවක් බැව් නූතන ලෝකයේ විවිධ අධ්‍යනයන් මගින් පවා සනාථ වී තිබෙනවා.දරු නැළවිලි ගීතයක් ගයන්නට දරුවා බිහිවෙන තුරු සිටින්න අවශ්‍ය නැහැ. කුස අතගාමින් ගයන දරු නැළවිලි ගීතය නිසා ඔබේ කුසයේ සිටින දරුවාගේ නිර්මානශීලී චින්තනය අවදි වෙනවා. නැළවිලි ගීතයක ඇති රිද්මය කොටින්ම භාවනාවක්.ඒ නිසා ඔබ විවේකීව සිටින සෑම අවස්ථාවකදීම කුසය පිරිමදිමින් නැළවිලි ගීතයක් ගයන්න.
ඒ වගේම දරුවා නිදන තොටිල්ලට ඉහලින් චලනය වෙන විට මෘදු ස්වර නැගෙන සීනුවක් එල්ලා තබන්න. ඒ වගේම කාමරයේ බිත්ති අලංකාර වර්ණයකින් පින්තාරු කරන්න. බිත්ති පුරා මල්, අලංකාර සිතුවම් ඇති විට දරුවා අවදිව සිටින වේලාවට ඒ දෙස බපා සිටිනු ඇති. වර්ණ ගැන දරුවාට අවබෝධයක් නොමැති වුනත් නිතර නෙත ගැටෙන වර්ණ නිසා වර්ණ රටාවන්ගේ විසිතුරු බව දරුවාගේ මනසට යම් සහනදායී සිතුවිල්ලක් වෙනු ඇත.
ජීවිතයේ රිද්මය එයයි…
දරුවා කුස සැතපෙන කාලයේදී මව විසින් ගායනා කළ
” දොයි දොයි දොයි දොයිය බබා
බයි බයි බයි බයිය බබා….”
මේ නැළවිලි ගීතය තුළින් මවගේ හදවතේ රිද්මය දරුවා මැනවින් හඳුනා ගන්නවා. එය දරුවාගේ හදවතට සතුටක්.සතියක් පමණ වෙන දරුවාට වුනත් අම්මාගේ කටහඩ දිව්‍ය මන්තරයක්. ඒ නිසා නිතරම දරුවා මුහුණට සමීප කර ගෙන කතා කරන්න. අම්මාගේ පමණක් නොව තාත්තාගේ කටහඩත් දරුවාට ඉතාම වැදගත්. බොහෝ පියවරු බිලිඳු පැටියාට තමන්ගේ මුහුණ සමීප කරන්න බියක් දක්වනවා. පියාගේ මුහුනේ රැවුල පැටියාගේ මාදු මොලොක් මුහුණට දරන්න බැරි වෙතැයි සිතුවත් ඔබගේ ආමන්ත්‍රණය පැටියා බලාපොරොත්තුව සිටිනවා.
දරුවා හඩන්නේ බඩගින්නටම නොවෙයි…
පුංචි පැටියා හඩන විට අම්මා පැමිණෙන්නේ බඩගින්න හෝ මල පහ පිටි වී ඇතැයි යන විහ්වාසයෙන් වුනත් පුංචි පැටවුන් නිතරම අඩන්නේ මේ හේතුන් නිසාම නොවෙයි.ඒ නිසා දරුවා හඩන විට ඔබ විසින්ම අනුමාන ගොඩ නගා ගන්න එපා. බඩගිනි ඇති…කිරි ටිකක් දෙන්න ඕන…කියන නිගමනයට පැමිණෙන්න එපා. සමහර විට අම්මාගේ පැමිණීම දරුවාට අවශ්‍ය ඇති. ඒ නිසා දරුවා හඩන විට ප්‍රමාද නොවී ඔවුන් වෙතට යන්න.සිප වැළඳ ගන්න.තමන්ගේ ලෝකය ගැන දරුවාගේ හිතේ විශ්වාසයක් ඇති වෙන්නේ එවිටයි.
අම්මාගේ සුවඳ දරුවා හඳුනා ගන්නවා…
පුංචි පැටියා මුලින්ම හඳුනා ගන්නේ තමන්ගේ අම්මා.මවගේ කිරි සුවඳ වගේම ස්පර්ශය, කටහඩ පුංචි පැටයා ඉතා හොදින් හදුනනවා. මේ ගැන මවක් විදිහට ඔබටත් අත්දැකීම් ඇති. මොර ගහමින් හඩන දරුවා මවගේ පපුවට තුරුල් කර ගත් සැනින් ඇඩීම නවත්වනවා. ඒ නිසා ඔබ දරුවාට කිරි පොවන විට පැටියා පපුවට හොදින් තුරුල් කර ගන්න. අම්මාගේ උණුසුම තරම් ආරක්ෂාවක් දරුවාට තවත් නැහැ.ඔබේ ඇඟිලි තුඩු පැටියාගේ හිසකෙස් අතරින් යවමින් හිම පිරිමදින්න. ඉතා මෘදු ලෙසින් යටිපතුල් ස්පර්ශ කරන්න. මේ අන්දමින් ලැබෙන අම්මාගේ ස්පර්ශය නිසා දරුවාගේ මොළයේ ඇතැම් සෛල උත්තේජනය වෙනවා.
ඉතින්..දෙව්දත් වුනත් මවට උතුම් පුතෙක් බව ඇත්ත. ඒත් ඔබේ දරුවා ඔබට පමණක් නොව ලෝකයට වැදගත් චරිතයක් විය යුතුයි. පැටියා ලෝකයට බරක් නොවන්නට නම් ඔහු සාධු චරිතයක් වීම වැදගත්. ඒ වෙනුවෙන් වූ මග පෙන්වීම කිරි සිහිනයේ නිමිති දකින්නත් පෙරාතුවම පටන් ගන්න. ඔබටත් , ඔබේ පැටියාටත් ලෝකයට බරක් නොවී ජීවත් වෙන ශක්තිය සහ ධෛර්ය ලැබෙන්නේ එවිටයි.
