අළුත උපන් පුංචි පැටියාට සුදුසුම රෙදි පිළි තෝරාගන්නේ මෙහෙමයි.

මවක් වීමට පෙරුම් පිරූ ඔබ දැන් ඒ පදවිය ලබන්නටයි සූදානම් වෙන්නේ. ඇඟිලි ගනිමින් ඒ දිනය වන තුරු බලා සිටිනවා වගේම ඊට සූදානම් වීමත් දැන් ඉතින් ඔබ කළ යුතුමයි. දින සති මාසවලට පෙරලිලා ඔබේ දෝතට කිරි කැටියා වඩින දිනයේ එයා පිළිගන්න ඕන කරන වටපිටාව වගේම එයාට සුදුසු ඇඳුම් පැළඳුම් පිළියෙල කරන්නත් අවස්ථාව දැන් උදා වෙලා. 

හුඟක් අම්මලා දරු පැටියට  ඕන කරන ඇඳුම් තමන්ගේම දෑතින් පිළියෙල කරගන්න කැමතියි. ඒ ඉතින් තමන්ගේ හැකියාව වගේම දරුවා වෙනුවෙන් තමන්ගේ දෑතින්ම පිළියෙල කරන ඇඳුම් සකස් කරාම හිතට දැනෙන ප‍්‍රීතිය වගේම මවගේ මේ සිතුවිලි දරුවාවත් නිර්මාණශීලිත්වයට එකතු කරන නිසා. දැනුම වගේම කාලය එක්ක සටන් කරන අම්මලා තමන්ට අහිමි කාලය නිසා දරුවා වෙනුවෙන් අවශ්‍ය ඇඳුම් පැළඳුම් මිලට ගන්නෙත්, දරුවා වෙනුවෙන්ම ඒවා සකස් කරලා තියෙන නිසා. ඒ වගේම මේ වගේ වෙලාවට හැකියාව ඇති ඥාති මිත‍්‍රාදීන්ගෙන් ලැබෙන සහය සුළු පටු නොවෙයි. 

ඒ කොහොම වුණත් අලුත උපන් බිළිඳාගේ සම ඉතාමත් මෘදුයි, සියුමැලියි. මලක් වගෙයි. ඉතින් මේ දරුවට අවශ්‍ය සුව පහසුව සැලසෙන විදියේ තෝරා ගැනීමක් කරන්නත් අපිට සිද්ධ වෙනවා. ඒක හින්ද තෝරා ගන්නා රෙදි සිනිඳු වෙන්න  ඕන. ඒ වගේම ඉක්මණින් තෙතමනය උරාගන්න පුළුවන් වෙන්නත්  ඕන. මේ නිසා වඩාත් සුදුසු වෙන්නේ මල් පීස් වගේ සිනිඳු රෙද්දක්. මේ රෙද්ද වඩාත් වැදගත් වෙන්නේ 100% ක්ම කපු රෙද්දක් නිසා. සිනිඳු වගේම සුව පහසුවත් ගෙන දෙනවා. 

ඒ වගේම දරුවාට සකසන ඇඳුම් ඝනකම් වාටි සහිත වීමත්, සිනිදු  සමට හානි දායක ලෙස බලපානවා. ඒ නිසා ඇඳුම් නිමා කිරීමේදී වාටි ඝනකම් නොවන ලෙසට හෝ පිටත පැත්තට සිටින සේ නිමා කිරීම වැදගත්. මේ පිටතට සිටින සේ සකස් කල වාටි හෝ මූට්ටු නොපෙනෙන හා නොදැනෙන ලෙසට මැහුම් ක‍්‍රම මගින් අලංකාර කර ගැනීමට හැකියි. 

ඒ වගේම පටි ඇල්ලීමේදී ඒවා බෙල්ල වටේ එතීම නිසා හුස්ම ගැනීමට අපහසු වීමට ඉඩ ඇති හෙයින් ඒවා යෙදීම නුසුදුසුයි. එසේම දිගට පවතින නූල් කෑලි හෝ නිමාවක් නැති ඇඳුම් වල පවතින නූල් පවා දරුවාගේ සමට අවහිරතා ඇති කරනවා මෙන්ම නූල් කැබලි වලට සම සිරීමට හෝ කැසීමට ලක්වීමට ඉඩ තිබෙනවා. මේ නිසා තුනීයට මසන ලද වාටි තිබිය යුතුවා මෙන්ම අනවශ්‍ය නූල් කැබලි කපා දැමීම සිදු කළ යුතුයි. 

එසේම ඇඳුම් මැසීමේදී අනවශ්‍ය ලෙසට රැලි පටි ඇල්ලීම කරන ලද/ රැලි වාටි යොදන ලද ඇඳුම් මෙන්ම විශාල රූප ඇප්ලික් කර සකස් කල ඇඳුම් බරින් වැඩිවා මෙන්ම දරුවාට අපහසුතා ඇති කරයි. එසේ හෙයින් සරල හා කුඩා රූප ඇප්ලික් කිරීම සමට ඇති කරන අපහසුතා වලක්වයි. එසේම තීන්ත ආලේප මගින් අඳින ලද රූප සහිත ඇඳුම් මගින් හමට ආසාත්මිකතා ඇති විය හැකියි. 

ලිහිල් ලෙස ගොතන ලද ඇඳුම්ද තෝරා ගැනීම නුසුදුසු වේ. එසේ වන්නේ ඒවායේ අත් වල හා පාද වල ඇඟිලි පැටලීම සිදු විට හැකියා මෙන්ම අනතුරුද සිදුවිය හැකි නිසයි. 

ඇඳුම් තෝරා ගැනීමේදී වඩාත් හිරට හෝ විශාලව තෝරා ගැනීමද ශරීරයට අපහසුතා ගෙන එයි. එසේම පහසුවෙන් ඇන්දවීමට මෙන්ම ඉවත් කිරීමටද පහසු ඇඳුම් තෝරාගත යුතුයි. 

ප‍්‍රමාණය පිළිබඳ සැලකිලිමත් විය යුතු වනවා සේම එකම ප‍්‍රමාණයකින් ඇඳුම් විශාල ප‍්‍රමාණයක් ගැනීමද අනවශ්‍යයි. ශීඝ‍්‍ර වර්ධනයක් සිදුවන නිසා එක ප‍්‍රමාණයකින් ඇඳුම් කුඩා ප‍්‍රමාණයක් පමණක් තෝරා ගැනීම වැදගත්. වැඩෙන විට ඒ හා සරිලන ලෙස ප‍්‍රමාණත්මක ලෙස ඇඳුම් තෝරාගැනීම කළ යුතුයි. මේ මගින් අනවශ්‍ය වියදම්ද අඩු වේ. 

නැපි තෝරා ගැනීමේදී මසා නිම කළ පසු අඟල් 22 ක් සිටින සේ තෝරාගැනීම/පිළියෙල කර ගැනීම තුලින් වැඩි කාලයක් ඒවා දරුවාට ඇන්දවිය හැකියි. 

ඇඳුම් සඳහා බොත්තම් යොදා ඇති විටද සැලකිලිමත් විය යුත්තේ ඒවා සමේ ගැටීම නිසා සම තුවාල විය හැකි නිසාය. එසේම මවගේ ඇඳුම් වල එනම් උඩුකය ආවරණය සඳහා බොත්තම් යොදා ඇති විට ඒවා පවා සමට හානිකර විය හැකි හෙයින් මවගේ ඇඳුම් වලට බොත්තම් ඇල්ලීමෙන් වැලකිය යුතුයි. 

ඇඳුම් තෝරාගැනීමේදී වර්ණය පිළිබඳවද සැලකිලිමත් විය යුතුයි. අලුත උපන් දරුවාට තෝරාගත යුත්තේ ලා පාටයි. මේ මගින් කිරි බීම අඩු වූ විට හෝ වෙනත් හේතුවක් නිසා කහ පැහැ වීම හඳුනා ගැනීමට පහසුවෙන් හැකිවනවා සේම, මුත‍්‍රා වල පැහැය, කක්කා වල පැහැයි හොඳින් බලා ගැනීමටද හැකි වන්නේ සුදු පැහැති ඇඳුමකදීයි. එසේම පෙකණියෙන් ඉස්ම ගලන හෝ ලේ එන විටක වුවද ගෑණු දරුවෙකුගේ යෝනිය මගින් රුධිර පිටවීමකදී වුවද එය පහසුවෙන් දැක හඳුනාගැනීමට ලා පාට ඇඳුම් තෝරාගැනීම තුලින් හැකිවනවා. එසේම ලා පාට ඇඳුම් ඇසටද ප‍්‍රිය මනාප බවක් ලබාදෙනවා. 

දේශගුණයට අනුවද සීතල දේශගුණයක් පවතින විට ඊට සුදුසු ලෙසත් උෂ්ණ දේශගුණයකදී ඊට සුදුසු ලෙසත් ඇඳුම් තෝරාගැනීම වඩාත් සුදුසුයි. 

රෙදි පිළි තෝරාගැනීම තුලින් සිරුරට ආවරණයක් සැපයීම මෙන්ම අලංකාරයක්ද ලැබෙන නමුත් අලුත උපන් බිළිඳුන්ගේ ලපටි මොලකැටි ස්වභාවය ඉස්මතු වන සේ සැහැල්ලු 100% ක් කපු රෙද්දෙන් නිර්මාණය කරන ලද ඇඳුම් තෝරාගැනීම තුලින් දරුවාට සැහැල්ලූවක් ලැබෙනවා. එසේ හෙයින් ඉහත කරුණු කෙරෙහි සැලකිල්ලක් යොමු කරන රෙදි පිළි තෝරාගැනීම දරුවාගේ සෞඛ්‍යයට මෙන්ම ඔබගේ පසුම්බියටද අනවශ්‍ය වියදම් ඉවත්වන සැහැල්ලුවක් ගෙනේවි.

 

විශේෂඥ මතය, අදහස සහ මූලික සටහන:

අයිරාංගනී ගගලගමුව

පවුල් සෞඛ්‍ය සේවා නිළධාරීනි

සෞඛ්‍ය වෛද්‍ය නිලධාරී කාර්යාලය

බුලත්සිංහල

 

 

අධ්‍යාපනික අතින් කොයිතරම් උසස් මට්ටමක හිටියත් අම්මෙක් වුණාම ඇති වන ගැටලූවලට අපි ළඟ පිළිතුරු නෑ. මව්පදවියත් එක්ක දහසකුත් එකක් ප්‍රශ්න මටත් ඇති වුණා. ඔය අතරෙදියි මව්වරුන් වෙනුවෙන්ම වෙන්වුණු පුවත්පතක සංස්කාරකවරිය විදියට සේවය කරන්න මට අවස්ථාව ලැබුණේ. අම්මා කෙනෙක් විදියට මට ඇති වෙන ගැටලූ අධ්‍යාපනය අතින්, මිල මුදල් අතින් ඉහළ, පහළ ඕනෑම තරාතිරමක හැම අම්මා කෙනෙක්ටම පොදුයි කියලා ඔය අතරෙදි මම තේරුම් ගත්තා. මගේ අත්දැකීම්, දරුවන් ගැන මට තියෙන ගැටලූ ගැන වෘත්තීමය සුදුසුකම් සහිත පුද්ගලයන් එක්ක සාකච්ඡ කරලා, සටහන් කරන්න මම හිතුවේ දහස් ගණනක් මව්වරුන්ට නිවැරදිම මගපෙන්වීම අවශ්‍ය බව දැණුනු නිසා.

LEAVE A REPLY

Please enter your comment!
Please enter your name here