ළදරු ළමා අවධිය තුල අප විසින් ලබාදෙන්නා වූ නිවැරදි පෝෂණය එම දරුවාගේ අනාගතයට අප සිදු කරනු ලබන වටිනාම ආයෝජනයකි. මෙසේ වන්නේ ශීඝ‍්‍ර වර්ධනයක් සහිත කාල වකවානුවක් ළදරු අවධියේ වන හෙයිනි. මෙසේ හෙයින් පළමු මාස 6 මව් කිරෙන්ම පමණක් පෝෂණය කරන්නත්, මාස 6 ලැබූ වහාම අවශ්‍ය වන අමතර ශක්ති පරතරය වර්ධන අවශ්‍යතාවන් සම්පූර්ණ කිරීම සඳහා නිවැරදි පෝෂණයක් ලැබීමත් සිදු විය යුතුමයි.
මාස 6 සම්පූර්ණ වූ දරුවා වෙනුවෙන් අමතර ආහාර ආරම්භ කල යුතු වන්නේ ඒ වන විට වැඩෙන දරුවා සඳහා මව් කිරි පමණක් ප‍්‍රමාණවත් නොවන හෙයිනි. එමෙන්ම අවශ්‍ය කරන්නා වූ පෝෂණය සැපයීමේදී සෞඛ්‍යාරක්‍ෂිතව පිළියෙල කල පෝෂ්‍යදායී ගුණයෙන් අනූන වූ ආහාර වයසට ගැලපෙන ප‍්‍රමාණ වලින් නියමිත වේල් ගණනින් ලබාදීමෙන් ඔබේ දරුවා බුද්ධිමත් නිරෝගී ක‍්‍රියාශිලී දරුවකු බවට පත්වේ.
නිවැරදි ලෙස අමතර ආහාර ලබාදීමෙන් කායික වර්ධනය, මොළයේ වැඞීම ආදී කෘත්‍යන් නිසි පරිදි සිදුවීමෙන් දරුවා මනා සෞඛ්‍ය තත්ත්වයක් පවත්වාගෙන යාමේ හැකියාව ලබයි.
ක‍්‍රමයෙන් දරුවා සඳහා අමතර ආහාර ආරම්භ කිරීමේදී අපගේ ප‍්‍රධාන ආහාරය වන බත් වලින් සකසා ගත් තලපයකින් පටන් ගන්නා අතරම ක‍්‍රමයෙන් එම බත් තලපයේ ගුණාත්මකභාවය වැඩි කිරීම සඳහා අනෙකුත් පෝෂක පදාර්ථ අඩංගු ආහාර කාණ්ඩයන් මීට එකතු කරමින් මෙහි සංයුතිය වඩාත් පෝෂණීය බවින් වර්ධනය කරන්නා සේම ලබාදෙන්නා වූ ආහාර වේල් ගණනද වැඩි කිරීම කල යුතුයි. එසේම ප‍්‍රධාන ආහාර වේල් පමණක් ලබාදීම සෑහීමක් නොවන හෙයින් ප‍්‍රධාන වේල් වලට අමතරව කෙටි වේල් ද ආහාරයට එකතු කිරීම කල හැකියි. මෙසේ ආහාර ලබාදීමේ පිළිවෙත් සකසා ගැනීමේදී දරුවාගේ ආහාරයට කිරි ආහාර එකතු කිරීම මාස 7 අවසන් වන විට ආරම්භ කල හැකියි. කිරි ආහාර මගින් ප්‍රෝටීන වලට අමතරව කැල්සියම් වැනි ලවණ ලැබෙන හෙයින් අස්ථි වර්ධනයට මෙන්ම සෞඛ්‍ය ආරක්‍ෂාවටද වැදගත් වේ.
චීස්, යෝගට්, නැවුම් කිරි වැනි කිරි ආහාර වර්ග ආරම්භ කල යුත්තේ කුමන වයසේදීද?
ඒ කුමන ප‍්‍රමාණයන්ගෙන්ද?
අමතර ආහාර සමගින් දරුවාට මව්කිරි ලැබෙන හෙයින් කිරි ආහාර ලෙසින් යෝගට්, චීස්, මුදවාපු කිරි ආරම්භ කිරීම මාස 7 අවසානයේ පටන් ගත හැකියි.
ආරම්භයේදී එනම් මාස 7 අවසන් වන විට යෝගට් හෝ මුදවාපු කිරි/චීස් තේ හැඳි 2 ක් හෝ 3 ක් පමණ දිය හැකි අතර මේ ප‍්‍රමාණය මා 7 ½ දී පමණ තේ හැඳි 4 ක් පමණ අමතර කෙටි ආහාර වේලක් සඳහා ලබාදිය හැකියි. මෙසේ වැටීම සමග මාස 8 ආරම්භයේදී තේ හැඳි 6 ක් බමණ වනසේ වැඩි කල හැකියි. එමෙන්ම මේ වන විට පලතුරු මිශ‍්‍ර කොට එයට යෝගට් හෝ මුදවාපු කිරි එක්කර සාදාගත් ආහාරය අඬු කෝප්ප ½ ක් හෙවත් අතරමැදි වේලක් සඳහා දරුවාට ලබාදිය හැකියි. මෙසේ ලබාදෙන ප‍්‍රමාණය වැඩි කිරීම තුලින් පසුව යෝගට් 1 ක්ම දරුවාට ලබාදිය හැකියි. එසේම දරුවාට වයස අවුරුදු 2 ක් වන තුරු දිනකට මෙසේ කිරි ආහාර වේල් 1 ක් ලබාදීම සුදුසු වනවා. එසේම මුදවාපු කිරි ලබාදීමේදී සීනි එකතු කිරීම කිසිසේත් නොකල යුත්තක්. වසරක් වන විට දරුවාට ගිනි පෙට්ටියක ප‍්‍රමාණයේ චීස් කැබැල්ලක් ලබාදිය හැකියි.
නැවුම් කිරි පළමු වසර තුලදී අවශ්‍ය නොවන අතරම පසුව වුවද මව්කිරි ලබාදෙන හෙයින් අත්‍යාවශ්‍යයම නොවේ. එහෙත් වසරකට පසුව ලබාදීම කළ හැකි මුත් එය කෙටි ආහාර වේලකට සීමා කලයුතු අතරම කෙසේවත් උදෑසන පළමු ආහාරය කිරි වේලක් බවට පත් කර නොගැනීම තුලින් ඔබේ දරුවාගේ වර්ධනයට ලොකු බලපෑමක් ඇති කල හැකියි. උදෟසන අවදි වූ විගස දරුවනට ප‍්‍රධාන ආහාරයක් නොමැතිව කිරි වීදුරුවන් ලබාදීම තුලින් දරුවාගේ ආහාර රටාවට බරපතල බලපෑමක් එල්ලවීමට ඇති හෙයින් පාසැල් කාලයේදීද දරුවාගේ උදෑසන ආහාරය නොගෙන සිටීමට හේතුවක් විය හැකි වනවා මෙන්ම මේ හේතුකොට ගෙන දරුවා දුර්වල වීම, මතක ශක්තිය අඩු වීම ආදිය හේතු විය හැකිවා මෙන්ම ඉගෙනීමේදී මෙන්ම ක‍්‍රීඩා කිරීමේදීද අලස ගති ඇති විය හැකියි. එමෙන්ම දීර්ඝකාලීන ලෙස ආහාර මාර්ගය ආශ‍්‍රිත රෝගාබාධ වලට එනම් ගැස්ට‍්‍රයිටීස් වැනි තත්ත්වයන්ට කුඩා කාලයේ සිටම ගොදුරු වීමට ඉඩ කඩ ඇති වේ.
මෙසේ හෙයින් නැවුම් කිරි ලබාදීමේදී ක‍්‍රීඩාවකින් පසුව ලබාදෙන කෙටි ආහාර වේලකට මෙය ලබාදීම සුදුසු යැයි යෝජනා කල හැකියි. එසේම මෙය ඇබ්බැහි වීමක් බවට පත් නොවන ලෙසට පවත්වා ගැනීමද වැදගත් වේ.
වැඩෙන සිරුරකට අවශ්‍ය ප්‍රෝටීන අවශ්‍යතා මෙන්ම කැල්සියම්, විටමින් හා ලවණ බහුල ලෙස අඩංගු කිරි ආහාර කුඩා කල සිටම දරුවාගේ ආහාරය මෙලෙස එක්කර ගැනීමට හැකියාව ඇත්නම් ඔබේ දරුවාගේ අස්ථි වර්ධනය මෙන්ම ශක්තිමත්භාවයටද එය මහත් පිටුවහලක් වනු නොඅනුමානය.
විශේෂඥ මතය, අදහස සහ මූලික සටහන:
අයිරාංගනී ගගලගමුව
පවුල් සෞඛ්‍ය සේවා නිළධාරීනි
සෞඛ්‍ය වෛද්‍ය නිලධාරී කාර්යාලය
බුලත්සිංහල
