කම්මැලිකමෙන් දරුවා මුදවා ගැනීමට උපායන්

පුද්ගලයන් ජයග්‍රාහි හෝ කම්මැලියන් යැයි කණ්ඩායම් දෙකකට බෙදුවොත් මේ කණ්ඩායම් දෙකම කවදාවත් ස්ථාවර නැහැ.සදාකාලික කම්මැලි දරුවන් නැති බව දෙමව්පියන් විදිහට අපි දන්නවා. ඕනෑම දෙයක් පොරවෙන් කපනවාට වඩා නියපොත්තෙන් කඩන තැනදීම වලක්වා ගැනීම වැදගත්. ඒ නිසා නව යොවුන් දරුවන් අතරින් ඔබ දකින කම්මැලි,අලස, කුසීත ගති පැවැතුම් ඇත්නම් ඒ තත්වයෙන් දරුවා ගලවා ගැනීම නොපවාම කළ යුතුයි. නමුත් ඒ වෙනුවෙන් සීරුවෙන් අනුගමනය කළ යුතු උපායන් කීපයක් තිබෙනවා.

වැඩ කොටස් කරන්න

ඔබේ දරුවා යම් කාර්යක් එක දිගට කිරීමට අකමැත්තක් දක්වනවා නම් කුඩා වැඩ කොටස් ලබා දෙන්න. උදාහරණයක් විදිහට ඔබේ ගෙමිදුල වපසරිය විශාල නම් දරුවාට අතුගෑමට යම් කුඩා කොටසක් වෙන් කර දෙන්න. එය දරුවා අකමැත්තක් නොමැතිව කරනවා නම් සීරුවෙන් තවත් කුඩා කොටසක් එක් කරන්න.

පියවරෙන් පියවර කරන්න

ඒ වගේම කම්මැලි දරුවාට යම් කාර්යක් පියවරෙන් පියවර කිරීමට ඉඩ දෙන්න. අද දවසේම ඉටු කිරීමට නොහැකි කාර්යක් වෙනුවෙන් හෙට දවසත් ලබා දෙන්න. නමුත් අදාල දිනයේදී පවරන වැඩ කොටස හෙටට කල් තැබීම එතරම් සුදුසු කාර්යක් නොවේ.වැඩ කල් තැබීම කම්මැලි පුද්ගලයෙකුගේ ගති ලක්ෂනය් බැවින් දරුවාට හැකි හැම විටම අද කළ යුතු දේ අදම කිරීමට උපදෙස් ලබා දෙන්න.

අනාගතය ගැන චිත්‍ර රූප මවන්න

දරුවෙක් යනු හෙට දවසේ වැඩිහිටියෙක් බැව් අපි දන්නවා. දරුවෙකුට අනාගතය ගැන සැලසුමක් නොමැති වුනත් දෙමව්පියන් විදිහට දරුවාට අනාගතය ගැන අදහසක් ලබා දීම ඉතාම වැදගත්. පුතා හොදට ඉගෙන ගෙන…ලොකු රස්සාවක් කරලා…ලස්සන ගෙයක් හදා ගෙන…ලස්සනට ජීවත් වෙන දවසක් ගැන චිත්‍ර රූප මවා දෙන්න.

සාර්ථකත්වයේ වාසි

දැන් ඔබ දරුවාට අනාගතය ගැන දළ සැලැස්මක් හිතට එන්නත් කරන්න ඇති. මේ එන්නතේ වාසි ගැනත් දරුවාට කියා දෙන්න. සැබැවින්ම යම් රෝගයකට අපි එන්නතක් ලබා ගැනීම යම් අන්දමකින් වේදනාකාරී වුනත් ඒ නිසා ලැබෙන ප්‍රතිලාභ අමතක කළ යුතු නැහැ. ඒ වගේම අනාගතය වෙනුවෙන් දරුවා වර්තමානයේ යම් අන්දමකින් වෙහෙක් දැරීම අවශ්‍ය බවත් එයින් ලැබෙන ප්‍රතිලාභ ගැනත් දරුවාට පැහැදිලි ලෙසින් අවබෝධ කර දීම ඉතාම වැදගත්.

අසාර්ථක වීමේ අවාසි

දරුවන්ට සාර්ථකත්වයේ වාසි වගේම අසාර්ථක වුනොත් එයින් ලැබෙන අවාසි ගැනත් කියා දෙන්න. හාවා සහ ඉබ්බාගේ ධාවන තරගයෙන් හාවා පරාජයට පත් වුනේ තක්සේරුව  නිසා බැව් කියා දෙන්න. දරුවෙක් වුනත් අද කළ යුතු දෙය අදට නොකලොත් එයින් ලැබෙන අවාසි ගැනත් පැහැදිලිව කියා දීම ඉතාම වැදගත්.

එකවර එක් දෙයක්  (මල්ටි ටාස්කින් එපා) කිරීම

අද බොහෝ දෙමව්පියන් දරුවන් බහු කාර්ය යන්ත්‍රබවට පත් කිරීමට දරණ අසාර්ථක උත්සාහය නිසාමත් දරුවන් උදාසීන චරිත බවට පත් වීමට ඉඩ තිබෙනවා. එකවර එක් දෙයක් කිරීම නිසා අදාල කාර්යය සාර්ථකව කිරීමට වගේම වෙහෙසක් නොමැතිව අදාල කටයුත්ත ඉටු කිරීමට අවස්ථාව තිබෙනවා. ඒ වගේම එහි අවසාන ප්‍රතිඵලයත් සාර්ථක වීම අරුමයක් නොවෙයි. දෙමව්පියන් විදිහට ඔබ දරුවා බහු කාර්ය යනත්‍රයත් බවට පත් කිරීම වෙනුවට එක් වරකට එක් කාර්යක් සාර්ථකව ඉටු කිරීමට අවශ්‍ය ධෙර්ය ලබා දෙන්න.

නින්දෙන් අවදි වී යහනේ සිටීම මිතිත්තු දෙකක් තුල අවදි වෙන්න

ඔබේ දරුවා උදේ නින්දෙන් අවදි වී නිදි යහනෙන් ඇවිත් දවසේ කටයුතු පටන් ගන්නවා වෙනුවට ඇඳට වී අලසව සිටිනවා නම් ඔබේ දරුවා නොදැණුවත්ම කම්මැලි චරිතයක් බවට පත් වීමට ඉඩ තිබෙනවා. ඒ නිසා නි්නදෙන් අවදි වූ පසු නැවත නැවත නිදි යහනේ කාලය ගෙවනවා වෙනුවට දවසේ වැඩ කටයුතු පටන් ගැනීමට දරුවා යොමු කරන්න.

සාර්ථක අය අනුගමනය කරන්න

අද ලෝකයේ සාර්ථකත්වයට පත් පරමාදර්ශි චරිතයන් ගැන දුවාට කියා දෙන්න. ඔවුන්ගේ මේ ගමනේ ආරම්භය එක් කුඩා පියවරකින් බැව් වටහා දෙන්න. එවැනි සාර්ථක පුද්ගලයන්ගේ චරිතයෙන් ලබා ගන්නා ගුනාංඟයන්ගෙන් දරුවාගේ චරිතය පෝෂණය කරන්න.

අඳුරට එපා

සාමාන්‍ය අපේ ජන ජීවිතයට අනුව උදෑසන නිවසේ දොර ජනේල විවෘත කිරීම වාසනාව වගේම පවුලේ නිරෝගිබවට හේතුවක් විදිහට පිලිගැනෙන සම්මතයක්. උදේ පිරිසිදු වාතය අපට නැවුම් හුස්මක් ලබා දෙනවා. ඒත් ඔබේ නව යොවුන් දරුවා නිතරම අදුරේ ඉන්න කැමැති නම්, අඩුම වශයෙන් අදුරට කාමරයේ විදුලි බල්බයවත් දල්වා ගැනීමට උදාසීන නම් එය සැබෑම කම්මැලියෙකුගේ ගති ලක්ෂණයක්.ඒ නිසා දරුවාගේ කාමරයට හොදින් හිරු එළිය ලැබෙන සේ සැලසුම් කරන්න.

පිරිසිදු බව

ඔබේ දරුවා කුඩා වුනත් පිරිසිදු බව පුරුදු කරන්න. මුලුතැන්ගෙයි සින්ක් එකට උස වූ තැන පටන් තමා ආහාර ගත් පිගාන කෝප්පය සෝදන්න පුරුදු කරන්න. ඔබ අපේක්ෂා කරන පමණට ඒවා පිරිසිදු නොවුනත් දරුවාට පිරිසිදු බවේ මුල් පාඩම එතැනින් පටන් ගන්න.

අවට පිලිවෙල

පුද්ගලයෙක් දෙස බැලීමෙන්ම ඒ තැනැත්තාගේ චරිතය ගැන යම් ඉගියක් ලබා දෙන බැව් අපේ පිලිගැනීමයි. ඒ වගේම ඔබේ නව යොවුන් දරුවාගේ කාමරය ඉතාම අපිලිවෙල සහ අපිරිසිදුව ඇත්නම් ඔන්න දරුවාගේ කම්මැළිබව තහවුරු කරන ඉගියක්.

අඩුවෙන් ආහාර ගන්න. හිත නොව කුස පිරෙන්න

අද බොහෝ දරුවන් ආහාර වෙනුවෙන් දක්වන්නේ දැඩි ගිජුබවක්. අතීතයේදී මෙන් නොව අධික තෙල් සහ  ලුණු අඩංගු ආහාර නිසා දරුවන්ට නොදැනීම  නිදිමත ගතියක් ඇති වීම නිසා අනවශ්‍ය අන්දමින් ආහාර වෙනුවෙන් දරුවා ඇබ්බැහි කරන්න එපා.එය අනාගතයේදී බොහෝ කායික රෝග සඳහාද රතු එළියක් වීමට ඉඩ තිබෙනවා.ඒ නිසා නිතරම දරුවාගේ හිත පිරෙන ආහාර නොව කුස පිරෙන ආහාර වෙනුවෙන් යොමු වීම වැදගත්.

 

හිතට එන අදහසක් පත්තරයකින් පළ වුනාම ලැබෙන සතුට දන්නේ ඒ අත්දැකීම ලබන කෙනෙක් පමනයි. මේ නිසාම දන්නා කාලයේ පටන්ම ලියන්න ලැබෙන හැම මොහොතකම යමක් ලිව්වා. ඒවා පළ වුනා.දැනට මහවැලි ජාතික අධ්‍යාපන විද්‍යා පීඨයේ පුස්තකාලයාධිපතිනිය ලෙස සේවය කරන අතර ලේඛනය අමතක කරන්නේ නැහැ.කැළනිය විශ්ව විද්‍යාලයේ ශාස්ත්‍රපති උපාධිය සහ පේරාදෙණිය විශ්ව විද්‍යාලයේ කලා උපාධිය වෙනුවෙන් කිසිම අපහසුතාවයක් ඇති නොවුනේද ලිවීමේ කලාවට පිං සිදු වෙන්නයි.නිවස , රැකියාව සහ පවුල සමග වූ ගණුදෙණුව ලිවීමේ කලාවට හරස් නොවන සේ පවත්වා ගෙන යන අතර මගේ ජීවිතයට ලේඛනයත් නොදැනම බද්ධව තිබෙනවා විය හැකියි.

LEAVE A REPLY

Please enter your comment!
Please enter your name here