එක්තරා මවක් ඇගේ පුතුගේ පංති බාර ගුරුතුමියට මේ විදිහට ලිපියක් එවා තිබුණා. ” මේ ලිපිය ලියන මම සේනුල පුතාගේ අම්මා…හැමදාම පුතා ගෙදර එන විට මොනවා හෝ පුංචි දෙයක් පංතියෙන් හොරෙන් අරගෙන එනවා. ඔහු ගෙනෙන ලද දේවල් මම මේ සමග එවනවා. ගුරුතුමියට තෑග්ගක් විදිහට කියා මං මේ පාර්සලය පුතාට දුන්නා. මේ ගැන ඔබතුමියගේ අවධානය යොමු වෙනු ඇතැයි මං හිතනවා….ඇය ඒ විදිහට ලිපිය අවසාන කරල තිබුණා.
මේ තත්වය හරියට දෙකොන ඇවිලෙන විලක්කුවක් වගෙයි. දරැවාගේ ආත්ම ගරුත්වය එක් පැත්තකින්ද, වැරැද්දෙන් මුදවා ගැනීම තවත් පැත්තකින්ද විදිහට බොහොම සංකීර්ණ විදිහට මුහුණ දීමට සිද්ධ වෙන තත්වයක්.
එක්තරා පාසලක පළමු පංතියේ දරුවෙක් රුපියල්දහසක නෝට්ටුවක් රැගෙන ගොස් අයිස් පැකට්ටුවක් ඉල්ලා සිටියා. වෙලඳසැලේ අයිතිකරුට මෙහි කිසියම් අමුත්තක් දැනුනා. ඔහු මේ බව පාසලට දැනුම් දුන්නා. පාසලෙන් දෙමව්පියන් කැඳවා මේ ගැන විභාග කරද්දි පෙනී ගියේ ඔවුන්ගේ ව්‍යාපාරික ස්ථානයෙන් නිතරම මුදල් අස්ථානගත වෙන අතර ඒ ගැන සේවකයන් සැක කළ බවයි. කොහොම වුනත් මුදලාලි මහත්මයාගේ දුර දකින නුවණ නිසා දරුවාගේ වැරැද්ද මග හරවා ගන්න පුලුවන් වුනා. මේ විදිහට දරුවන් අත ගැවසෙන මුදල් ගැන සැකයක් ඇති වුනොත් ඒ ගැන වපර ඇසෙන් බලනවා නම් හොඳයි.
දරුවන් මල් වගේ වුනත් මේ මල් අතරත් නරක අතට හැරුන මල් තිබෙන්න පුළුවන්.දරුවා හොරකම් නොකරන්නේය යන සහතිකයට වඩා ඔහු ගැන සුපරික්ෂාවෙන් සිටින්න. ඔබේ මුදල් පසුම්බියේ තිබෙන මුදල ගැන දරුවාට සඳහන් කරන්න. අම්මා , තාත්තා උපයන මුදල් ගැන වැටහීමක් ලබා දෙන්න. එවිට මුදලේ වටිනාකම ගැන ලබන වැටහීම සමග වැරැදි කටයුතු වලින් ඔහු මිදෙනු ඇත.
දරුවා ආශ්‍රය කරන කණ්ඩායම ගැනත් මව් පියන් දැණුවත්වීම වැදගත්. අද වෙලඳපොල ඉතාම විසිතුරුයි. මේ නිසා ඔවුන්ටත් යම් යම් ආසාවන් ඇති වෙන අතර ඒ සඳහා මුදල් සොයනු ඇත. මේ සඳහා බලපෑම් දෙන මිතුරන්ද සිටිති. දරුවාගේ ඇසුර තුලින් ගොඩ නැගෙන මෙම අහිතකර තත්වයන්ගෙන් දරුවා මුදවා ගැනීමට නම් ඔහු ඇසුරු කරන මිතුරන් පිළිබඳවත් වැටහීමක් ලබා ගත යුතුමයි.
ඇතැම් අවස්ථාවල දරුවන් මව්පියන් නොමග යවා මුදල් ලබා ගනු ඇත. මේ වෙනුවෙන් ඔවුන් ඉදිරිපත් කරන්නේ පාසලේ අවශ්‍යතාවයක් හෝ සත්‍ය ලෙසින්ම වූ අවශ්‍යතාවය වෙනුවෙන් අදාල මුදලට වඩා වැඩි මුදලකි. එබැවින් නිතරම දරුවා ඉල්ලන දේ ලබා දීමෙන් පසුව ඒ ගැන පසු විපරම් කරන්න. ඔවුන්ගේ මිතුරන්ගේ මව්පියන්ගෙන් ඒ බව අසා දැනගත හැකිය. එසේ දැනගත් පසු දරුවාගෙන් ඒ ගැන විමසන්න. සමහර විට ඔහු මේ චෝදනාව ප්‍රතික්ෂෙපකරනු ඇත. එවන් අවස්ථාවලදී ඔබ අත ඇති තොරතුරු සමග ඔහු විසින් කරන ලද අකටයුත්ත පෙන්වා දෙන්න. එහෙත් කිසිම විටෙක වෙනත් අය සමග දරුවාගේ වැරුද්ද කියමින් චෝදනා නැගීම එතරම් ගැලපෙන දෙයක් නොවේ. දරුවාට මුදල් අවශ්‍ය නම් ඒ බව දෙමව්පියන්ට සැල කිරීමෙන් ලබා ගත හැකි බවත් එහි අවශ්‍ය හෝ අනවශ්‍ය බව අනුව මුදල පිලිබඳව තීන්දුවක් ගන්නා බව දරුවාට පවසන්න.
හොරකමට ලොකු කුඩා යැයි වෙනසක් නැත. හොරකම නම් හොරකමමය. මේ නිසා බාල කාලයේ පටන්ම හොරකම වෙතින් දරුවා මුදවා ගන්න. හොරකම පිලිබඳව ඇති ජනකතා , ජාතක කථා කියා දී දරුවාගේ චර්යාවන් ඒ අනුව හැඩ ගසන්න. තල හොරෙන් කෑ නිසා ගුරුතුමාගේ දඬුවමට වෛරය ගොඩ නගා ගත් කුමාරයා පසුව ගුරුවරයාට දඬුවම් කිරීමට සූදානම් වූ විට සොරකමෙන් කුමාරයා වලක්වා ගැනීමේ ආනිශංස ගැන කියා දුන් ආකාරය දරුවාටත් පහදා දෙන්න. විහිළුවට තම මිත්‍රයාගේ ඇඳුමක් සඟවා තැබීමේ විපාක ලෙසින් දිව්‍ය පුත්‍රයෙක්ව ඉපදුනක් ඇඳුමක් නොලද බව පෙන්වා දෙන්න. මෙම කථාන්දර මගින් ඔහුගේ චරිත සංවර්ධනය ගොඩ නැගෙනු ඇත.අද බන්ධනාගාරගතව සිටින උදවියගේ අතීත කතාවන් ගැන පවසා සොරකම් කළ විට ඇති වෙන විපාක දරුවාගේ හදවතට ඉතා සෙමින් සේන්දු කරන්න. එවිට එහි නපුරු විපාක ඔවුන් විසින්ම තේරුම් ගනු ඇත.
ඇතැම් දරුවන් යම් යම් දේ සොරකම් කළ විට මව්පියන් ඔවුන්ට දඬුවම් කිරීමෙන් නවතින්නේ නැත. ඔවුන් සමග ගොස් අදාල තැනැත්තාටත් දරුවා සොරෙකු බව පෙන්වා දෙනු ඇත. මෙය ඇත්තෙන්ම දරුවාගේ ආත්ම ගරුත්වයට හානියකි. සොරකමේ සුල මුල ඔබ සොයා ගැනීමෙන් පසුව ඒ ගැන දරුවාට අවබෝධ කර දෙන්න. අයිතිකරුවන්ට ඒ දේවල් ලබා දීම කිසිම වරදක් නැත ඒත් දරුවාගේ ආත්ම ගරුත්වය ගැනත් විශේෂ අවධානයක් දැක්විය යුතුමය. ඔබ වීරයෙකු සේ දරුවාගේ සොරකම් අල්ලා ගත් බවට උදම් ඇනිය යුතු නැත. දරුවාගේ සොරකම් වෙනුවෙන් අනුබල දීමද නොකළ යුතුම අතර මෙම දෙපැත්ත ඉතා සීරුවට ගලපා ගැනීමට තරම් නැණවත් විය යුතුය. පුංචි පුංචි සොරකම් දරුවා සමග වර්ධනය වෙන නිසා නියපොත්තෙන් පුළුවන් දේ පොරොවෙන් කපන තරන දක්වා වර්ධනය කර ගත යුතු නැත.
