වැඩිය වෙහෙස මහන්සියක් නොමැතිව, සල්ලි වියදම් නොකට ඔබේ දරුවාගේ දැනුම වර්ධනය සදහා අවශ්‍ය පසුබිමක් සැකසිය හැකිය. දරුවෙකුට මාස 09ක් හා 12ක් වැනි කාලය තුල ගවේෂණයේ යෙදීමට අවස්තාව නොලැබුනොත් දරුවාගේ බුද්ධි වර්ධනයට බාධාවක් වන බව විද්වතුන්ගේ අදහසයි. ළමයා ස්වභාවයෙන්ම ගවේෂණයට කැමතියි. ඉතා කුඩා කාලයේදීම වුව දරුවාට භාෂාව එතරම් හැසිරවීමට නොහැකි වුවද ඔහුට පරිසරයේ සිදු වන දේවල් පිලිබදව කුතුහලයක් පවතී. කුඩා අවධියේදී දරුවාගේ අධ්‍යාපනය සම්පුරයෙන්ම ගවේෂණය මත රැදී පවතී.
ළමයින් තමන් විසින් යම් යම් දේ සොයා ගන්නට කැමතිය. ඔබේ දරුවා පාසැල් අවසන් වී නිවසට එන විට ගොඩක් දුරට දරුවාගේ සාක්කු වල විවිධ දේවල් වලින් පිරි පවතී. ඔබ දරුවා වත්තට යැවුවොත් මල්, පිහාටු, කුඩා ගල් කැට ආදී දේවල් ගෙන එනු ඇත. දරුවා ස්වභාවයෙන්ම විවිධ දේවල් අතගානු ඇත. දරුවාට අනතුරක් නොවන ආකාරයට ඒ දේවල් වලට උදව් වන්න. ළමයෙකු ගස් නගන විට, හැංගිමුත්තං සෙල්ලම් කරන විට, සත්තු දිහා බලන විට ඔවුන් සියුම් ලෙස පරිසරය අධ්‍යනය කරයි. ළමයින් තමන් අතට හසුවන හිස් පෙට්ටි, සෙල්ලම් බඩු ගෙන ඒවායේ ඇතුලත මොනවාදැයි තිබෙන්නේ ලෙස හොදින් පරික්ෂා කරයි. ඇතැම් විට කඩා බලයි. දරුවාගේ මෙවැනි ක්‍රියාදාමයන්ට සුදුසු පරිසරයක් සකසා දෙන්න.
කුඩා කාලයේදී මෙවැනි ගවේෂණ වලින් දරුවා ලබන අත්දැකිම් පසු කාලීන දරුවාගේ ඉගෙනීමට බලපානු ලැබේ. පරිසර ගවේෂණය, ක්‍රීඩා කිරීම, ගමන් බිමන් යෑම්, කතාන්දර කීම, ගී ගැයීම, පින්තුර පොත් සැකසීම ආදී දෑ සදහා දරුවාට සුදුසු පරිසරයක් සකස් කර දිය යුතුය.
මුදල් තිබු පමණින් දරුවෙකුගේ ඉගෙනීම වර්ධනය වන්නේ නැත. දරුවෙකුට සුදුසු අධ්‍යාපන වටපිටාවක් සකස් කර දිමාට දෙමාවුපියන්ට ඒ පිලිබදව අවබෝධයක් තිබිය යුතුය. ක්‍රමයෙන් වර්ධනය වන දරුවාට තනියම වැසිකිලියට යෑමට, කණ්ඩායම් සමග ආහාර ගැනීමට, කෑම මේසය පිරිසිදු කිරීමට, පොතපත පිළිවෙලට තැබීමට වැනි කටයුතු වලට සහභාගී කර ගත යුතුය.
පින්තුර ඇදීමට, පින්තුර ඇලවීමට අවස්තාව ලබා දිය යුතුය. මෙමගින් දරුවා තම අදහස ඉදිරිපත් කරයි. දරුවාට පරිසරයේ තිබෙන ගස් වර්ග, සතුන් වර්ග හදුනා ගන්න අවස්තාව ලබා දෙන්න. සත්තු නගන හඩ, සතුන්ගේ හැසිරීම් රටා, ගස් වල මල් පිපි තිබෙන ආකාරය ආදී දෑ දරුවා පරිසරය සමග ගනුදෙනු කිරිමෙන් හදුනා ගනී.
බෝල විසි කිරීමට, සරුංගල් යැවීමට, මැටි ඇනීමට, කතුරෙන් කැපීමට, කඩදාසි ගුලි කිරීමට හුරු කරන්න. අත් දෙකම භාවිතා කරමින් චිත්‍ර ඇදීමට පාට කිරීමට උනන්දු කරවන්න. පාට කිරීමේදී පින්සලක් නොව අතේ ඇගිලි භාවිතා කරමින් චිත්‍ර පාට කරවන්නට සලස්වන්න. ජලය සමග ක්‍රීඩා කිරීමට අවස්තාව ලබා දෙන්න. ඇදුම් නැවීම, දුවිලි පිස දැමීම, පොල් මිරිකීම වැනි ක්‍රියාකාරකම් වලට යොමු කරන්න. ගෙදර මිදුල අතු ගෑමට කුඩා ඉදලක් මෙන්ම, කොස්සක් සපයන්න. මෙවැනි දෙය කිරීමෙන් ළමයි සතුටක් ලබයි. වැඩය නිමා වූ පසු ළමයා අගයන්න. නිතරම දරුවා පරිසර ක්‍රියාකාරකම් වලට යොමු කරන්න. දරුවා මෙවැනි දෑ සිදු කරන විට ඔබ දරුවා පිළබදව අධීක්ෂණයෙන් සිටින්න.
