පොඩි එවුන්ට මොන විනෝදංශද….? විටෙක ඔබ මෙහෙම හිතනවා ඇති. පුංචි කාලයේ හොඳට ඉගෙන ගන්නවා මිසක, විනෝදයට හිත යොදවන්න ඕන නැහැ. අම්මා තාත්තා මේ විදිහට හිතනවා නම් ඇත්තටම ඔබ වැරැදියි. අතීතයේදී නම් දරුවන්ට අමුතුවෙන් විනෝදාංශ අවශ්‍ය වුනේ නැහැ. ඇලේ දොලේ දුව පැන නටමින්, පොල්පිති ගොනුන්, කරත්ත දක්කමින් දවස පුරා කෙළි දෙලෙන් ගෙවපු දරුවන්ට තිබුන මානසික සැහැල්ලුව අද දරුවන්ට ඇත්තේම නැහැ. මේ නිසා මනසට කුමන අන්දමකින් හෝ සතුටක් ලබා ගැනීමට නම් විනෝදාංශයක් අවශ්‍යම බව අවධාරනයෙන්ම කියන්න වෙනවා.
විනෝදාංශයකින් දරුවන්ගේ මනසට ලැබෙන සතුට නිසා නිතරම ජීවිතය දෙස ධනාත්මකව බැලීමට දරුවා හුරු පුරුදු වෙනවා. ඉගෙනුමෙන්ම සියල්ල සපුරා ගන්න බැහැ. දිනපතා පාසල් අධ්‍යාපනය වගේම අතිරේක සහ උපකාරක පංති නිසා ඇති වෙන වෙහෙසකර බවට හොඳම පිළියමක් ලැබෙන්නේ විනෝදංශයකින් නිසා දරුවා වෙනුවෙන් විනෝදාංශ කටයුතු අකැප යැයි මව්පියන් විදිහට ඔබ නොසිතිය යුතුයි.
විනෝදාංශ කටයුතු නිසා දරුවා තුළ නිර්මානශීලිත්වය වර්ධනය වෙන්නේ ඔබත් නොදැනමයි. සමහර දරුවන් අත්වැඩ වෙනුවෙන් කාලය යොදනවා. තවත් දරුවන් විනෝදාංශ විදිහට ඉවුම් පිහුම් එහෙම නැත්නම් මැහුම් ගෙතුම්වල යෙදෙනවා. ඒ වෙලාවට දැන් ඕවා කරල හරියන්නේ නැහැ. විභාග වෙනුවෙන් කටයුතු කරන්න තිබෙන වෙලාව නාස්ති කරනවා යැයි ඔබ උදහස් වුනත් , විනෝදයට කරන මෙම කටයුතු නිසා දරුවාගේ නිර්මානශීලිත්වය නොදැනම දියුණුවට පත්වෙනවා.
විනෝදාංශයක් නිසා ආත්ම විශ්වාසය ගොඩ නැගෙනවා. මට මේ දෙය කරන්න පුළුවන්…යන අදහසින් දරුවා පන්නරය ලබනවා. සරුංගලයක පට්ටමක් හදා ගත් දරුවා එය කොළ අලවා සරසා ගන්නවා. මෙම අවසාන නිර්මානය දකින විට තමාට යමක් කළ හැකිය යන විශ්වාසය නොදැනම ගොඩ නැගෙනවා. ප්‍රායෝගිකව ලබන මෙම දැනුම ජීවිතයටත් ආලෝකයක් ,ලබා දෙනවා.
දරුවාගේ විනෝදාංශ තීරනය කළ යුත්තේ ඔබ නොව දරුවාමයි. මේ වෙනුවෙන් ඔබට යම් දායකත්වයක් ලබා දීමට පුලුවන්. ඒ අතරම දරුවාගේ විනෝදාංශ වෙනුවෙන් සහයෝගය ලබා දෙන්න. මුද්දර එකතු කරන දරුවාට ඔබට හැකි ලෙසින් ඔහුගේ මුද්දර සංඛ්‍යාව පමණක් නොව එහි විවිධත්වය ඇති වෙන අන්දමට මුද්දර සොයා ගැනීමට උදව් වෙන්න.
ඇතැම් මව්පියන් දරුවාගේ විනෝදාංශ වෙනුවෙන් දැඩි සීමා බන්ධන පනවා ඇත. මේ සියල්ල කරන්නේ විනෝදාංශවලට යොමු වෙන දරුවා තමන්ගේ අධ්‍යාපනයෙන් දුරස් වෙනු ඇතැයි වූ මිථ්‍යාව නිසාය. මේ තත්වය නිසා දරුවාට තම විනෝදාංශය සිදු කළ යුත්තේ හොර රහසේය.
බනින්නෙපා පොඩි දෝණිට…ගහන්නෙපා….
හාල් මිටක් දුව අරගෙන ඇත්තේ…සෙල්ලම් බත් උයන්නයි.
හාල් මිටක් නාස්ති කළා යැයි විනෝදාංශයක නිරත දරුවාට ඒ වෙනුවෙන් චෝදනා කළ යුතු නැත මේ කටයුත්තේන් පුංචි මනසට ලැබෙන වින්දනය ආර්ථික කෝදුවෙන් තක්සේරු කළ නොහැකියි.. ගැහැණු දරුවන් බෝනික්කන්ට ඇඳුම් මසන විට නොදැනුවත්කමට වටිනා රෙදි කපා නාස්ති කිරීම වැනි කටයුතු සිද්ධ වෙනවා. මේ ගැන විවෘතව කතා බහ වෙනවා නම් දරුවාට නොබියව ඔබගෙන් අදහස් විමසා සිටින්නට පුලුවන්.ඒත් මෙ බෝනික්කන් සමග ලබන විනෝදය නිසා ගැහැණු දරුවන් අනාගතයේදී ගෘහ පාලනය, දරුවන් නඩත්තුව ගැන බොහෝ දේ ඉගෙන ගන්නවා. ඉස්සර කාලයේ කඩදාසි බෝනික්කන් මුල් කර ගෙන (පේපර් ඩෝල්) ඔවුන්ට ඇදුම් නිර්මානය කළ දැරියන් කාලයත් සමග ඉතා දක්ෂ ඇඳුම් මෝස්තර නිර්මානය කිරීමට හැකියාව ලබා ගත්තා.
මව්පියන් හා දරුවන්ගේ විනෝදාංශ මුල් කර ගෙන ඔවුන් දෙපාර්ශවය අතර සන්නිවේදනය අවශ්‍යයෙන්ම තිබෙන්න ඕන. එසේ නොමැති විට දරුවාගේ ආත්මානුකම්පාවත් ඔවුන්ගේ මානසිකත්වයට බලපානවා. විසිතුරු මල් සහ පත්‍ර වගාවට කැමැත්තක් දක්වන දරුවෙකුට ඒ වෙනුවෙන් අවශ්‍ය පැල පොහොර සහ වෙනත් පහසුකම් නොලැබෙන්නේ නම් දරුවා මහත් අසරණතාවයට පත් වෙනවා. ” මට කවුරුත් උදව්වට නැහැ …” යන පසුගාමීබවෙන් තදින්ම පීඩාවට පත් වෙනවා.
ඒ වගේම විනෝදාංශ ගැන අවතක්සේරුවෙන් කතා නොකරන්න. මෙය ඔබට නොවටිනා වුනත් දරුවාට බොහෝ වටිනා දෙයකි.
හොඳට ඉගෙන ගන්න දක්ෂතාවය තිබෙන දරුවන් එකපාරටම බොහොම පසුගාමීත්වය විතරක් නොවෙයි මානසිකවත් යම් යම් ගැටළුවලට පත් වෙනවා. මේ වෙහෙසකර හෝර්මෝන හෙවත් මානසික වෙහෙසකර තත්වයට දරුවන් පත් වීම එතරම් සුබ තත්වයක් නොවෙයි. පමණට වඩා කාර්යබහුලත්වය සහ මනසට විවේකයක් නොමැතිවීම නිසා ඇති වෙන වෙහෙස කල්යන විට දරුවා මානසික රෝගීයෙක් බවට පත් කරනවා. මේ නිසා දරුවන්ට විනෝදාංශයක නිරත වෙන්න අවස්ථාව සලසා දෙන්න. ඒ වගේම ඔහු නිරත විනෝදාංශයක් වේ නම් එය ඉදිරියට ගෙන යෑමට අවශ්‍ය සහයෝගයත් මව්පියන් විදිහට ඔබගෙන් ලැබීම දරුවාට විශාල ශක්තියක් වෙනවා.
විනෝදංශය නිසා දරුවන්ගේ ජීවිතයේ පසුගාමීත්වයක් ඇති වෙතැයි සිතන වැරැදි ආකල්පයෙන් මව්පියන් ඉවත් වීමට දැන් කාලය එළැඹ ඇත. ලෝකය දිනා ගත් චරිත දෙස ඔබ බලන්න. ඔවුන් හැම දෙනෙක් වෙනුවෙන්ම කුමන හෝ විනෝදංශයක් තිබී ඇත. 2016 වසරේ ලෝකයේ ප්‍රබලයා වූයේ රුසියානු ජනාධිපති ව්ලැද්මියර් පූටින්ය. ඔහුගේ විනෝදාංශය ජූඩෝ ක්‍රිඩාවයි. ඇමරිකාවේ හිටපු ජනාධිපති බැරැක් ඔබාමා ස්පයිඩර් මෑන් සහ හාස්‍යමය කථාන්දර කියවීමට බෙහෙවින් ප්‍රිය කළේය. ඉන්දීය ව්‍යවසායකත්වයේ ඉහළ පෙලම සිටින විධායක නිළධාරී අනිල් අම්බානීගේ විනෝදාංශය දිවීමයි. ප්‍රංශයේ හිටපු ජනාධිපති නිකලොස් සර්කෝසිගේ විනෝදාංශය මුද්දර එකතු කිරීම වූ අතර අදටත් ඔහු එම විනෝදාංශයෙන් ඉවත්ව නැත. රිචඩ් බ්‍රැන්ඩ්සන් යනුවෙන් හැඳින්වෙන ලෝක ප්‍රකට ව්‍යාපාරිකයා සරුංගල් ඇරීම විනෝදාංශයක් ලෙසින් සිදු කරන ලද්දෙකි. විනෝදාංශය නිසා මේ කිසිම කෙනෙකුගේ ජීවිත ආපස්සට ගියේ නැත ඔවුන් තම ජීවිතය ජයගත්තා පමණක් නොව ලෝකයටම ආදර්ශ සපයා දුන් උදවියයි.
