දරුවෙක් ගැබ් ගත් තැන පටන් අම්මලා තාත්තලාගේ ඊළඟ අරමුණ මේ දරුවා වෙනුවෙන් නම ගිය පාසලක් ලබා ගන්නේ කෝහොමද කියන ගැටළුවයි. ඒ නිසා ඇති හැකි හැම දෙමව්පියෙක්ම අදාල චක්‍රලේඛන අනුව ලියකියවිලි සකස් කරනවා. පළමු වසරට දරුවන් ඇතුලත් කර ගැනීමේදී ඒ වෙනුවෙන් නිර්ණායක කීපයක් තිබෙනවා.
- පදිංචිය
- ආදි ශිෂ්‍ය
- රජයේ සේවක
- ස්ථානමාරු
මේ විදිහට අවස්ථා තිබුනත් පළමුවසරට පංති කීපයක් වෙනුවෙන් බඳවා ගන්නා දරුවන්ගේ යම් සීමාවක් තිබෙනවා. මේ හැම නිර්නායකයක් තුලින්ම දරුවා ප්‍රතික්ෂෙප වීමට තිබෙන අවස්ථාව ඉහලයි. එයිනුත් වැඩි ප්‍රතිශතයකින් දරුවන් බඳවා ගන්නේ පදිංචිය පදනම් කර ගෙනයි.
පදිංචියට අවශ්‍ය ලියකියවිලි
පදිංචියට අවශ්‍ය ලියකියවිලි නිසා අද සිද්ධ වෙන අසාධාරණය සුළුපටු නැහැ. දුර බැහැර හිටියත් කෙසේ හෝ පදිංචිය තහවුරු වෙන විදිහට ලියකියවිලි හදා ගත්තාම ඇත්තටම පදිංචි වෙලා ඉන්න අයගේ දරුවන් නොදැනීම ප්‍රතික්ෂෙප වෙනවා.
අම්මාගේ ගමේ දරුවා ලැබුණා..
මේ එක් උදාහරණයක්. අම්මාගේ ගම අම්පාරේ වුනත් ඇය විවාහ වුනේ මහනුවර ප්‍රදේශයටයි. හැබැයි සාමාන්‍ය පවුලකින්. ඒත් ලංකාවේම ජනප්‍රිය පාසලක වැට මායිමේ දරුවාගේ තාත්තා, සීයා විතරක් නොවෙයි, සීයාගේ තාත්තාත් පදිංචිව සිටියා. ඒත් ඔවුන්ට ඒ යුගයේ තිබුන පදනම අනුව මේ පාසලට යන්න ලැබුනේ නැහැ. දම්වැල් 22 ක් නොවෙයි, පාසලේ සීනුව නාදකරන හඩ පවා ඇසෙන මායිමේ හිටියට තාත්තා මේ පාසලේ ආදි ශිෂ්‍යයෙක් නොවෙයි. ඒත් දැන් කාලයේ මේ පාසලට සාමාන්‍ය පවුල්වලින් දරුවන් ඇතුලත් කර ගැනීමට බාධාවක් තිබුනේ නැහැ. ඒ නාමිකව පමණයි. කෙසේ හෝ පදිංචිය සනාථ කිරීමට සියලු ලිපි ලේඛන තිබුනත් දරුවාගේ උප්පැන්නයේ උපත ලද රෝහල විදිහට අම්පාර සඳහන් වීමත් අම්මාගේ ඡන්ද හිමි නාමලේඛන උපුටන නොමැති වීමත් නිසා දරුවා බාර ගැනීම ප්‍රතික්ෂෙප වුනා.
දුර සීමාවන් තිබුනත් පාසල් බස් නම් අල්ලපු දිස්ත්‍රික්ක වලිනුත් ඇවිත්…
දරුවන් බවා ගැනීමේ චක්‍රලේඛනයේ දුර සීමාවන් තිබුනත් පාසලක් ඇරෙන වේලාවට අහල පහල දිස්ත්‍රික්කත් ආවරණය වෙන විදිහට පාසල් බස් සේවාවන් තිබෙන බව ඔබ 11.30 ට ප්‍රාථමික පංති ඇරෙන වේලාව නිරීක්ෂනය කලොත් පෙනේවි. ඉහළ පංති ගැන නම් මේ චෝදනාව නගන්න බැහැ. ඊට හේතුව 6 වරෙන් ඉහළට ශිෂ්‍යත්ව විභාගය, ඇතුලත්වීමේ විභාගය, සාමාන්‍ය පෙළ වැනි විවිධ විභාග සමත් අයට ඇතුලත් වෙන්න පුලුවනි. ඒත් ප්‍රාථමික පංතිවලට දුර සීමාව අදාල නම් මේ පාසල් බස්වලින් යනෙන දරුවන් ඇතුලත් වුනේ හොර පාරෙන් බව විවෘත රහසක්. ඒත් විදුහල්පතිවරුන්ටත් අදාල ලියකියවිලි නිවරැදි නම් එයින් ඔබ්බට ආයේ කතා කරන්න දෙයක් ඉතුරු වෙන්නේ නැහැ.
ආදි ශිෂ්‍ය වෙද්දී තමන් ඉගෙන ගත්ත පාසල එතරම් සුදුසු නැති බව හිතෙනවාද…?
වර්තමාන අධ්‍යාපන රටාව තුළ අපි සීමිත පාසල් කීපයක් වෙනුවෙන් පොර බදිනවා මිස තමා උගත් පාසලට දරුවා ඇතුලත් කරන්න එතරම් මනාපයක් නැහැ. මම මේ පාසලේ ඉගෙනගෙන මේ තැනට ආවා නම් මගේ දරුවාට මේ පාසල වඩාත් සුදුසුයි කියල කාටවත් හිතෙන්නේ නැහැ.
ජනප්‍රිය පාසලේ ආදි ශිෂයන්ටත් තරගයක්…?
ඒ වගේම ජනප්‍රිය පාසලේ ආදි ශිෂ්‍යය බව තිබුනාටමත් දරුවා ඇතුලත් කරන්න එය සුදුසුකමක් වෙන්නේ නැහැ. ආදි ශිෂ්‍යයෙක් විදිහටත් ඔවුන් ලකුණු උපයා ගන්න ඕන. මේ නිසාම අද විවිධ විදිහට දරුවන් ඇතුලත් කිරීමේදී සාධාරණ පදනමක් ඇති වෙන්නේ නැහැ.
ළඟම පාසල හොඳම පාසල වුනත්….
අද “ළඟම පාසල හොඳම පාසල” ජනප්‍රිය කරන්න ගියත් එය ඉටු නොවන බව නම් කනගාටුවෙන් වුනත් කියන්න වෙනවා. අද ළඟම පාසලේ සමස්ත ශිෂ්‍ය සංඛ්‍යාව 33 ක් පමණ වෙන ඇතැම් පාසල් තිබෙන අමතක කරන්න එපා. ඒත් සුදුසුකම් ලත් ගුරුවරු මේ පාසල්වල පත්වීම් ලබා සිටින නිසා කිසිම විදිහකින් අධ්‍යාපනයේ ගුණාත්මක බව බාල වෙන්නේ නම් නැහැ. නමුත් අපේ මනස් සංකල්පය නගරයේ පාසල් මුල් කර ගෙන නිසා කරන්නන් වාලේ රැල්ලට යෑම නිසා දරුවන් හෙම්බත් වෙන බව දෙමව්පියන් කිසිම විටක හිතන්නේ නැහැ.
උපත ලබන විටම දරුවාගේ පාසලත් නම් කරන රටවල් තිබෙනවා. අපි උපත ලබන විට අපේ ආගම තීන්දු වෙනවා වගේ මේ රටවල් දරුවාගේ පාසල තීරණය කරනවා.එවිට පාසලේ අධ්‍යාපන බලධාරීන් එළැඹෙන වසරට මේ පාසලට ඇතුලත් විය යුතු ශිෂ්‍ය සංඛ්‍යාව මෙපමණක් බවට තීරණ ලබා ගන්නවා.
ජනප්‍රිය පාසලට ඇතුළු කල පමනින්ම සෑහෙන්න පුලුවන්ද…?
ජනප්‍රිය පාසලකට කෙසේ හෝ ඇතුලත් කළ පමණින් සියල්ල ඉෂ්ට වූවා යැයි ඔබට සෑහීමට පත් වෙන්න බැහැ. ජනප්‍රිය පාසල්වල පංති තදබදය නිසා ගුරුවරුන්ටත් එක් එක් දරුවාට අවධානය දක්වන්න අසීරුයි. ළඟම පාසලේදී නම් දරුවාට ඒ වාසිය හොදින්ම ලැබෙනවා. පංතියක සිසු පිරිස සීමිත නිසා අවදානය ඉතා හොදින් දක්වන්න පුලුවනි. ගුරුවරුන් ගැන අද කිසිම ගැටලුවක් නැහැ. හැම පාසලක් වෙනුවෙන්ම දක්ෂ සහ වෘත්තිය ප්‍රායෝගික සුදුසුකම් ලත් ගුරුවරු අමාත්‍යාංශයෙන්ම පත්වීම්, මාරුවීම් ලබන නිසා ඒ ගැන ගැටළුවක් නැහැ. නමුත් අපේ හිතේ මැවී තිබෙන සංකල්පය අනුව හොඳම ගුරුවරු ඉන්නේ ජනප්‍රිය පාසලේ පමණයි. ඒ වුනත් ඇතැම් අවස්ථාවලදී ප්‍රාථමික අධ්‍යාපනය ඉතාම හොඳින් ළඟම පාසලෙන් ලබා ගත් දරුවන් ඒ අත්තිවාරම ඔස්සේ පසුකාලීනව තමන්ගේ ද්විතියික අධ්‍යාපනය ඉතා සාර්ථකව සිදු කර ගැනීමට හැකියාව ලබනවා. මේ නිසා අම්මලා, තාත්තලා ඇත්තටම දිවිය යුතු වෙන්නේ ජනප්‍රිය පාසල වෙනුවෙන් නොව පොඩි දරුවාට ඉතාම හොදින් අධ්‍යාපනය ලබා ගත හැකි පරිසරය ඇති සහ ආරක්සාව වගේම පීඩනයක් නැති ළඟම පාසලට නොවේද…?
කූට ලේඛන හදාගෙන මලක් වගේ දරුවා දවස පුරාම පාසල් බස් රථවල තැලී පොඩි වෙනවාට වඩා ඔවුන්ගේ ළමා කාලය නිදහසේ ගෙවන්න අවසරයක් ලබා දිය හැකි පරිසරයක් නිර්මානය වෙනවා නම් මොන තරම් අගෙයිද ?
