වැස්සෙන් පස්සේ මොකද කරන්නේ…

යාන්තම් වැස්ස ඉවරයි. ඒත් දෙමව්පියන්ට නම් සැනසුම් සුසුමක් හෙලනන් බැහැ. දැන් මේ අයට වැඩ පටන් ගන්න වෙනවා…

වැස්සෙන් පසුව අපි කාගේත් අවධානය යොමු වෙන්නේ ඩෙංගු අවදානමට වුනත් ඒ හා සමානව අපේ පරෙස්සම ගැන සැලකිය යුතු තවත් විවිධ පැති තිබෙනවා. මීඋණ, අතීසාරය, පාචනය වැනි රෝග වගේම විවිධ  අන්දමේ උදරාබාධයන් සමේ ආසාදනයන්ටත් ගොදුරු වීමේ අවදානම ඉතාම ඉහලින් මේ කාලයේදී ඇති වෙන්න පුලුවනි.ඒ ගැන බොහෝ විට අප නොතකා සිටින නිසා නොදැනීම යම් යම් අපහසුතාවයන්ට මුහුණ දීමට සිදු වෙනවා එහෙමනම් දෙමව්පියන් විදිහට ඔබ පවුලේ සෞඛ්‍යාරක්ෂිත බව  ගැන සැලකිලිමත් වෙනවා නම් මේ ගැනත් හිතන්න.

• වැස්සෙන් පසුව ජල මූලාශ්‍ර බොහොම අපවිත්‍රයි. ඒ විතරක් නොවෙයි. විවිධ රෝගකාරකයන් ජලය සමග මිශ්‍ර වෙලා තිබෙන්න පුලුවනි. ඒ නිසා මතක ඇතුවම උනුකළ නිවා ගත් ජලය පානය කිරීමට මතක තබා ගන්න.
• සමහර විට ඔබ පානීය ජලය ගැන වැඩි උනන්දුවක් දැක්වුවත් බීම වර්ග සෑදීමේදී සහ ගෙදරදොර ඉවුම් පිහුම් කටයුතුවලදී නම් උනු කළ ජලය ගැ එතරම් තැකීමක් නොකරනන් පුලුවනි. සමහර විට ඔබට මෙහෙම හිතෙන්න පුලුවනි. අපි උයන විට උණුසුම් වෙන නිසා විෂබීජ මැරෙන්න පුලුවනිනේ…ඒත් නටන ජලයේ උණුකර ගත් ජලය යොදා ගැනීම වඩාත් ආරක්ෂිතයි.
• මේ දවස්වල එළවලු ,පලා වර්ග පිසිනවා නම් හොදින් සෝදා ගන්න. ඒවා ගලන ජලයෙන් සෝදන්න. විශේෂයෙන් ගොටුකොළ, මුකුනුවැන්න වැනි බිම දිගේ යාන් වෙන පලා වර්ග වැසි ජලයේ යටවී තිබීම නිසා අපවිත්‍ර වී තිබෙන්න පුලුවනි. නමුත් මේ කාලයේදී කතුරුමුරංගා වගේ පලා වර්ග ගැන නම් එතරම් චෝදනා ගොණු වී නැහැ.එකම වතුරෙන් සෝදන්නඑපා. ඒ වගේම අමුවෙන් එළවලු ආහාරයට ගැනීම එතරම් සුදුසු නැහැ.පළතුරු වුනත් දරුවන්ට දැක්ක ගමන් කටේ දාගන්න අවසර දෙන්න එපා. ඒවා සෝදා ආහාරයට ගත යුතු බවට දරුවන් දැණුවත් කරන්න.
• ආහාර පිසින විටත් හොදින් පිසින්න. බාගෙට තම්බා ගැනීම ටික දිනකට සීමා කරන්න. පිටස්තර තැන් වලිනුත් ආහාර ගැනීම මේ කාලයේදී නම් නොකරන තරමටම ගුණයි.
• ආහාර වලට මැස්සන් වැසීමටත් ඉඩ තියන්න එපා. මේ දිනවල මැස්සන් වැඩියෙන් සැරිසරනවා. ඒ අය එන්නේ නිකම්ම නොවෙයි, රෝගකාරකත් අරගෙන නිසා ටිකක් පරිස්සම් වෙන්න.
• වත්තේ පිටියේ ළං තිබෙනවා නම් පිටාර ගලා ගෙන ආ ජලයෙන් ළිඳ අපිරිසිදු වී තිබෙන්න පුලුවනි. ඒ නිසා ළිඳ ඉසීම හෝ ක්ලෝරින් යොදා ගෙන පිරිසිදු කිරීම ඉතාම වැදගත්. එහෙම නැතුව වතුර බැස ගියාට පසුව ළිං ජලය පානය කිරීම ලෙඩ රෝග වෙනුවෙන් වූ අහිතකර බලපෑමකට ඔබ නොදැනීම හේතු වෙන්න පුලුවනි.පොළවේ වතුර බැස ගියාම තැන තැන වතුර රැදී තිබෙන්න පුලුවන්. ඒවා ඩෙංගු මදුරුවාට තිඹිරි ගෙය සදන නිසා වහාම මේ වතුර රැදුන තැන්වලින් වතුර ඉවත් කරන්න.
• වැස්සට ගසා ගෙන විත් රැදුන ප්ලාස්ටික්, පොලිතින් නිසා අපිරිසිදුව තිබෙන පරිසරයෙන් ඒවා නිසි පරිදි බැහැර කරන්න. මේවා රැදී තිබීම නිසා ඔබේ වටපිටාව අවලස්සන වෙනවා විතරක් නොවෙයි, ඒවායේ රැඳෙන වතුරේ ඩෙංගු මදුරුවා බිත්තර දාන්නත් ඉඩ තිබෙනවා.මේ විදිහට බැලුවාම පවුලේ ආරක්ෂාව වෙනුවෙන් ලොකු වගකීමක් තිබෙනවා…