ධූලක ආතතිය වගේ බර වචනයකින් කිව්වාම ඔබට මේ තත්වය සමහර විට අපබංශ්රයක් වෙන්න පුලුවනි.නමුත් ඔබේම පුංචි පැටියා මේ මානසික ආතතිමය තත්වයට පත්ව සිටින්න පුලුවනි.හැබැයි මලක් වගේ සුන්දර ඔබේම වස්තුව මේ ධුලක ආතතියට පත් වෙන්නේ ඔබ විසින් දරුවා වෙනුවෙන් දක්වන ප්‍රතිචාර සහ ඔබේම නොමනා හැසිරීම නිසා වෙන්න පුලුවනිඒ නිසා ඔබ නිසා දරුවා ධූලක ආතතියට පත් වෙන හේතු හඳුනා ගන්න.
දරුවා නොසලකා හැරීම
ඔබ හැම විටම දරුවා ගැන දරුවාගේ මට්ටමින් සිතන්න.ඇත්තටම ඔබ කාර්ය බහුල පුද්ගලයෙකු විය හැකියි.ඒත් දරුවාට ඒවා ප්රශ්න නොවෙයි.ඔවුන් හැම විටම දෙමව්පියන් විදිහට ඔබගෙන් අපේක්ෂා කරන්නේ ආදරය,ආරක්ෂාව සහ රැකවරණයයි.මොනයම් හේතුවකින් හෝ ඔබේ අවධානයෙන් සහ ආදරයෙන් දරුවා දුරස් වුනොත් ඔවුන් හිතන්නේ අම්මා ,තාත්තා තමා නොසලකා සිටින බවයි. ඒ නිසාම දරුවා ආතතිමය තත්වයට පත් වෙනවා.
මේ ගැන වැඩියෙන් හිතන්න. පවුලේ වැඩිමහල් දරුවා විදිහට බොහොම හුරතලේට සිටිය දරුවාට බාල සහෝදරයෙකුගේ ආගමනය නිසා තමන් නොසලකා හරින්වාය යන සිතුවිල්ලක් ඇති වෙන්න පුලුවනි.එවන් අවස්ථාවකදී දරුවා තුළ ඇති වෙන වේදනාව තරහ නිසා ධූලක ආතතියට පත් වෙන්න පුලුවනි.
පවුලේ සමීප අයෙකුගේ මරණය
මරණය හෝ දුරස් වීම අප කාටත් දරන්න අපහසු තත්වයක්. දරුවන් මුල් කර ගෙන හිතුවොත් මේ තත්වය ඊටත් වෙනස්.ඔවුන් මානසිකව දැඩි විදිහට කඩා වැටෙන්න පුලුවනි. අම්මා හෝ තාත්තා මියගියොත් එසේ නැත්නම් වෙන්ව ගියොත් තමා අසරණය යන මානසිකත්වයෙන් පීඩා විඳින නිසා දරුවා ධූලක ආතතියට පත් වීම ඉතාම ඉක්මනින් සිදු වෙනවා.
මවට පහර දීම හෙවත් ගෘහස්ථ ප්‍රචණ්ඩත්වය
බොහෝ අවස්ථාවන්හි ගෘහස්ථ ප්රචන්ඩත්වය දරුවාට ඉතාම සමීපව බලපාන්න පුලුවනි.මව මුහුණ දෙන දුක්ඛදායක තත්වය ත-ළ දරුවා අසරණ වෙනවා.ඒ වගේම පියා ගැන ඇති වෙන්නේ බියක්.ඔවුන් පියා දකින්නේ දුර්දාන්ත චරිතයක් විදිහටයි.ඒ නිසා නිතරම බියෙන් හා තැතිගැන්මෙන් පසුවෙන දරුවාගේ මානසිකත්වය නොදැනීම විෂ සහිත හෙවත් ධූලක ආතතියට පත් වෙනවා.
මත්පැන් පානය කරන පරිසරයක ජීවත් වීම
පවුලක වැදගත්ම චරිතය පියා.නමුත් මේ පියාගේ චරිතය වචනයේ පරිසමාප්තාර්ථයෙන්ම පිය චරිතයක් විය යුතුයි.ඒත් හැන්දෑවට තැබෑරුම් අසල වැටෙන,හතර ගාතෙන් නිවසට පැමිනෙන,සහ මිතුරන් සමග මත්පැන් සාද දමන පියෙකු ඇසුරේ වැඩෙන දරුවන්ගේ පෞරෂයට දැඩි බලපෑම් ඇති වෙනවා.
පියා ගැන ගෞරවයක් දරුවාගේ හිතේ ගොඩ නැගෙන්නෙත් නැහැ.ඒ වගේම දරුවාතේ නොදැනීම මත්පැන් බොන පරිසරයට නිරාවරනය වෙනවා.තාත්තා ගමන් කරන පාරේ දරුවා ගමන් කරනවා විතරක් නොවෙයි,ඔවුන්ගේ මානසිකත්වයත් ධූලක ආතතිමය තත්වයට පත් වෙනවා.
මානසික රෝගින්ගේ ඇසුර
ඔබේ නිවසේ මානසික රෝගියෙකු සිටිනවා නම් අපට ඔවුන් ප්රතික්ෂෙප කරන්න බැහැ.නමුත් නිවසේ මානසික රෝගියෙකු විශේසයෙන්ම ප්රතිකාර නොගන්නා මානසික රෝගියෙකු සිටිනවා නම් ඒ තත්වය දරුවාගේ මානසික ධූලක තත්වයට හේතුවක්.ඒ නිසා ඔබේ නිවසේ සාමාජිකයෙකු මානසික රෝග තත්වයට පත්ව සිටින විට රෝගි පුද්ගලයා නොසලකා හරින්න එපා.ඔවුන් වෙනුවෙන් ප්රතිකාර ලබා දී සාමාන්ය ජීවිතයක් ගත කරන පරිසරයක් සකස් කර දීම ඉතාම වැදගත්.එසේ නොවුනොත් දරුවා ඉතාම පහසුවෙන් ධූලක ආතතියට පත් විය හැකියි.
කායික අපයෝජනය
දරුවන්ට දඬුවම් කරන්නේ ඔවුන් යහපත් පරිදි ගොඩ නගා ගැනීමට බව සැබෑවක්.ඒත් මේ ගොඩ නැගීමේදී අනවශ්ය විදිහට කායික වධ හිසාවන්ට නම් පත් කළ යුතු නැහැ. ඇතැම් දෙමව්පියන් තමන්ගේම දරුවාට වුනත් ලබා දෙන දඬුවම් ඔවුන්ට ඔරොත්තු දෙන්නේ නැහැ.ගහකට තබා බැඳ පහර දීම,අනවශ්ය විදිහට පන්න පන්නා පහර දීම වැනි අමානුෂික පහර දීම් නොකල යුතුමයි.දරුවා ඔබේ බව සැබෑය.ඒත් අමානුෂික විදිහට කායික අපයෝජනයන් වෙනුවෙන් දෙමව්පියන් වුනත් ඔබට අවසර නැහැ.අද ඔබේ දඬුවම මොනතරම් බරපතලද කිව්වොත් මේ නිසාම දරුවා ධූලක මානසික ආතතියට පත් වෙන්න පුලුවනි.
ලිංගික අපයෝජනය
අතීතයේදී දරුවාට සීයා,මාමා,බාප්පා ළග තිබුන ආරක්ෂාව අද නැහැ. වෙන දෙයක් තබා තමාගේ පියාගෙන්වත් අද ගැහැණු දරුවා ආරක්ෂිත නැහැ.දැනට සිදු කර තිබෙන සමීක්ෂණ මගින් පෙනී යන්නේ දරුවන් සැම විටම ලිංගික අපයෝජනයට පත් වෙන්නේ ඔවුන්ට ඉතාම සමීප අයගෙන් බවයි.මේ ලිංගික අපයෝජනය නිසා දරුවා ධූලක ආතතියට පත් වීමේ අවාසනාවන්ත තත්වය ඇති වෙනවා.
මානසික අපයෝජනය
අප බොහෝ විට ලිංගික සහ කායික අපයෝජනය ගැන කතා කළත් මානසික අපයෝජනය නිසාත් දරුවා තුළ ධූලක මානසික ආතතිය ගොඩ නැගෙන්න පුලුවනි.දරුවන්ට දොස් නැගීම,විවේචනය,ප්රසිද්ධියේ අපහාස කිරීම නිසා ඇති වෙන මානසික පීඩනය නිසා දරුවා ධූලක ආතතියට පත් වීමට පුලුවනි.
