ඕනෑම දරුවෙකුගේ කායික නිරෝගී බවට සමානව මානසික නිරෝගී බව ද එක සේ වැදගත් වේ. නමුත් බොහෝ දෙමවුපියන්ට මේ පිලිබදව අවබෝධයක් නැත. ඔවුන් නිතරම සිතන්නේ තමන්ගේ දරුවාගේ කායික නිරෝගී බව බව පමණයි. ලෝක සෞඛ්‍ය සංවිධානයට අනුව කායික. මානසික,සමාජයීය සහ අධ්‍යාත්මික වශයෙන් යහ පැවැත්ම සෞඛ්‍ය සම්පන්න ලෙස අර්ථ දක්වා තිබෙනවා. එහෙත් සාමාන්‍යයෙන් නිරෝගී භාවය යනුවෙන් හදුනා ගෙන සිටින්නේ කායික නිරෝගී බව පමණි. මානසික වශයෙන් නිරෝගී වූ පුද්ගලයා තුල ප්‍රබෝධමත් බව,සතුට ප්‍රශ්න වලට මුහුණ දීමේ හැකියාව,විවිධ පුද්ගලයන් ඇසුරු කිරීමේ හැකියාව,තීරණ ගැනීමේ හැකියාව,කාලාත්මක හා නිර්මාණාත්මක හැකියාව ආදී දේ පවතිනවා. එහෙත් යම් පුද්ගලයෙක් දුකින් අසතුටින් කලකිරීමෙන් ප්‍රශ්න වලට මුහුණ දීමේ නොහැකියාවෙන් පසුවෙන්නේ නම් එයට ප්‍රධාන වශයෙන් බලපා ඇත්තේ පුද්ගලයාගේ මනස නිරෝගී නොවීමයි. යම් පුද්ගලයකු තුළ සමාජයීය සහ අධ්‍යාත්මික යහ පැවැත්ම පවතී නම් එම පුද්ගලයාට අන් අය සමග පහසුවෙන් සුහද ලෙස ජිවත් විය හැකිය.
සියලු දෙනාටම ආදරය කල හැකි අතරම සියලු දෙනාගේම ආදරය හිමි වේ. සියලු දෙන සමග සමගියෙන් සහ සාමයෙන් කටයුතු කල හැකිය. අන්‍යයන් පහත් නොකොට ඔවුන් අගය කිරීමේ හැකියාව ඇත. මේ නිසා පුද්ගල මනස නිරෝගී වේ. මේ අනුව යහපත් සෞඛ්‍යයක් පවත්වා ගැනීමට නම් කායික,මානසික සහ සාමාජියිය අධ්‍යාත්මික යන අංශ 04ම එක සමාන ලෙස නිරෝගී විය යුතුය.
ළමයින් ප්‍රීතිමත් සහ ප්‍රයෝජනවත් වැඩිහිටියන් බවට පත් කිරීමට නම් ඔවුන් සෞඛ්‍ය සම්පන්න සහ සතුටින් පසු වන අය විය යුතුය. ඒ නිසා ළමා වියේ සතුට සැනසුම හා ප්‍රීතිය දරුවෙකුගේ වර්ධනයට අත්‍යවශ්‍ය අංග වේ. ළමුන්ට වැළදෙන ඇතැම් රෝග පිටු පස බොහෝ විට මානසික ගැටළු පවතින බව බොහෝ විද්‍යාග්‍යයන් ගේ මතයයි.
නොදැනුවත්කම නිසා හෝ නොසලකා හැරිම තුලින් ද දෙමාපිය වැඩිහිටියන්ගේ ඇතැම් ක්‍රියාකලාපයන් නිසා ද දරුවන් තුළ මානසික ගැටළු හට ගන්න අවස්ථා පවතී. දරුවා ජිවත් වන පරිසරයේ පවතින විවිධ විෂමතාවන් හෝ වේදනාකාරී සිදුවීම් හෝ ඔහුගේ මානසික ගැටළු වලට හේතු විය හැකිය.
දරුවාගේ මානසික සමාජයිය වර්ධනයට උපකාරී වන අවස්තා 04ක් ළමා මනෝ විද්‍යාග්‍යයන් විසින් පෙන්වා දේ.
01 ආදරය,සැලකිල්ල,උනන්දුව
දෙමාපිය වැඩිහිටියන්ගේ ආදරය සැලකිල්ල ලැබීම මෙන්ම ඔවුන් තමන් පිලිබදව උනන්දු වන බව දැනීම දරුවාගේ යහපත් මානසික වර්ධනය සදහා බෙහෙවින් ඉවහල් වන්නකි. එහෙත් දරුවා කෙරෙහි වැඩිහිටියන් දක්වන ආදරය දරුවාට දැනෙන ආදරයක් විය යුතුය. මේ සදහා දරුවා සමග එකතුව සෙල්ලම් කිරීම,කතාන්දර කීම,දරුවා සමග විවිධ දේ පිලිබදව සාකාච්චා කිරීම ආදිය කල හැකිය.
02 යහපත් සෞඛ්‍ය
දරුවෙකුගේ සෞඛ්‍ය ඔහුගේ සිතුම් පැතුම් ආදියට බලපානු ලැබේ. දරුවා වර්ධනය වන්නේ ඔහුගේ අදහස් සිතුම් පැතුම් ආදියත් සමගින් වන නිසා දරුවාගේ අදහස් සිතුම් පැතුම් ආදිය නිසි ලෙස සකස් විය යුතුය. පිරිසිදුව ජිවත් වීම,පෝෂ්‍ය ආහාර සහ ජලය ලබා දීම,ප්‍රතිශක්තිකරණය කිරීම අනතුරු වලින් අරාක්ෂා කර ගැනීම ආදිය මගින් දරුවෙකුට යහපත් සෞඛ්‍ය සම්පන්න ජිවිතයක් උදා කර දිය හැකිය.
03 අත්දැකීම් වලින් ඉගෙන ගැනීමට සැලැස්සිම
දරුවා ටිකෙන් ටික වැඩෙන විට තමන් අවට ලෝකය අවබෝධ කර ගැනීමටත් දැනුම ලබා ගැනීමටත් උත්සහා ගනී. මෙහිදී දෙමාපියන්ගෙන් ලැබෙන රුකුල ඉතා වැදගත් වේ. තනිවම කර ගත හැකි වැඩ ඔහුට තනිවම කර ගැනීමට ඉඩ හැරිම සමබර දරුවෙකු ගොඩ නගා ගැනීමේදී අත්‍යවශ්‍ය අංගයකි.
04 දරුවාට ආත්ම ශක්තිය සහ ආත්ම විශ්වාශයන් ගොඩ නගා ගැනීමට අවස්ථාව ලබා දීම
දරුවාගේ යහපත් සහ සාර්ථක අවස්තාවන්හි ඔහුට ප්‍රශංසා කිරීමත් හැකියාවන් අගය කිරීමත් මගින් දරුවා තුල ආත්ම ශක්තිය ගොඩ නැංවිය හැකිය.
මෙකි ක්‍රම උපයුක්ත කර ගනිමින් ඔබේ දරුවාගේ මානසික සංවර්ධනය සිදු කිරීම දෙමාපිය ඔබ සතු වගකීමකි.
