දරුවෙක් පුංචි කාලයේදී දෙමව්පියන් සමග හැසිරෙන ආකාරයට වඩා ඔවුන් හැදුන වැඩුන පසුව බොහොමත්ම වෙනස්. සමහර විට මගේ කුසින් බිහි කර ගෙන හදා වඩා ගත්තු දරුවාද කියන තරමටම දරුවාගේ ගති පැවැතුම් වෙනස් වෙන්න පුලුවනි.විශේෂයෙන්ම නව යොවුන් හෙවත් කුනාටු සමය ලෙසින් හැදින්වෙන මේ කාලයේදී දරුවන් සමග බොහොම පරිස්සමින් ගනුදෙනු කිරීමට සිදු වෙනවා.ඉතින් ඔබේ දරුවා ගේ මේ ගති පැවැතුම් ගැනත් ඔබ උනන්දුවක් දැක්වීම ඉතාම වැදගත්…
සාපරාධී හැසිරීම…
ඉතින් සාපරාධී කි සැනින් ඔබ බියක් ඇති කර ගන්න එපා. ඔවුන් මිනිමරුවන් එහෙම නොවෙයි. ඒ වුනත් ඔවුන්ගේ මානසිකත්වය බොහොම වෙනස්. කොටින්ම ඔවුන්ගේ හිත් සාමකාමී නැහැ. කවුරුන් හෝ සමග හෝ අරගලයක පැටලීමට වැඩි නැඹුරුතාවයක් ඇති මේ දරුවන් නොමගට ඇදීමේ වැඩි ප්‍රවනතාවයක් තිබෙනවා.
උපන්නාට මේ ලොව වැනෙනවා විනා…
මෙවැනි නව යොවුන් කණ්ඩායම් අතර කිසිම අරමුණක් නැහැ.කොටින්ම තමාගේ අනාගතය මුල් කර ගෙන ගොඩ නගා ගත් ඉලක්කයක් නැති නිසා නිතරම දෙමව්පියන් සමග අරගල ඇති කර ගැනීමට යොමු වෙනවා මිසක තමා මුල් කර ගෙන ස්වයං වටිනාකමක් හෝ ඔවුන් තුළ ගොඩ නැගී නැහැ.දෙමව්පියන් විසින් දරුවාගේ අනාගතය ගොඩ නගා ගැනීම වෙනුවෙන් කොතරම් උත්සාහයක් ගත්තත් දරුවා වෙතින් ඒ සදහා කිසිදු අභිප්‍රේරණයක් ඇති වෙන්නේ නැහැ.මෙවැනි ගති පැවැතුම් ඇති දරුවෙකු සිටිනවා නම් එවැනි දෙමව්පියන් දැඩි ලෙසින් පිඩනයකට පත් වෙන්න පුලුවනි. ඊට හේතුව දරුවා තුලින් ඔවුන්ගේ අනාගතය ගොඩ නගා ගැනීමට කිසිදු සූදානමක් නොමැති විටෙකදී දෙමව්පියන්ද සැබැවින්ම අසරණ වෙනවා.
දෙමව්පියන්ගේ ඉලක්කයට යා ගත නොහැකි දරුවන්..
දරුවෙකු වෙනුවෙන් දෙමව්පියන්ගේ හිතේ ලොකු වටිනාකමක් ගොඩ නැගෙනවා.එය සාධාරණ සිතුවිල්ලක්.කවදා හෝ මගේ දරුවා විශිෂ්ටයෙක් බවට පත් කරනවාය යන සිතුවිල්ල මත රැඳී දෙමව්පියන් කටයුතු කළත්, දරුවා විසින් දෙමව්පියන්ගේ ඉලක්කයට කිසිසේත්ම සමීප නොවන අවස්ථාවන් තිබෙන්න පුලුවනි.
- නමුත් ඒ ගැන කලකිරෙන්න එපා
ඔබේ ඉලක්කගත අරමුණට දරුවා සමීප නොවනවා නම් ඒ ගැන කලකිරෙන්න එපා. දරුවාට හැකි දුරක් පියඹන්න දෙන්න. ඔබට තිබෙන්නේ ඒ හැකි දුර පියඹා යෑමට අත්තටු සවිමත් කිරීම පමණයි.දරුවා ඔහුට හැකි දුර නිදහසේ පියඹා යාවි එය දෙමව්පියන් විසින් ගොඩ නගා ගත් ඉලක්කය නොවුනත් දරුවෙකු විසින් ස්වාධීනව ගමන්කරන සාර්ථක මාවතක් බවට පත් වෙනු ඇති.
බලාපොරොත්තු මටට්මට පැමිණෙන දරුවන්..
මුලින් සදහන් කළ විදිහට දෙමව්පියන්ගේ අපේක්ෂිත අරමුණට පත් නොවන දරුවන් වගේම දෙමව්පියන් විසින් බාල කාලයේදී අරමුනු කළ ඉලක්කයට පත් වෙන දරුවන්ද අප අතර සිටිනවා. මේ තත්වය නම් දෙමව්පියන්ගේ සෑහීමට හේතුවක් බව රහසක් නොවේ.
- දෙමව්පියන් අපේක්ෂා කළ මට්ටමටත් වඩා වැඩි තැනකට පත් වෙන දරුවන්..
සමහර දරුවන් බාල කාලයේදී එතරම් ප්‍රභාවක් පෙන්නුම් නොකලත් ඔවුන් තුළ හදිසියේම වාගේ විශිෂ්ට හැකියාවන් ප්‍රදර්ශනය වීමට පටන් ගැනේ. කොටින්ම ඔවුන්ගේ නිදිගත යෝධයන්ගේ පිබිදීම සමග ජීවිතයේ එවැනි හැරවුම් ලක්ෂයන් බිහි වීමට පටන් ගැනේ.අද දවසේ ශ්‍රි ලංකාවේ ඉතා වැදගත් තනතුරක් දරණ සහ පෞරෂයකින් යුක්ත ඔහු බාලකාලයේදී ඉතා පසුගාමී චරිතයකි. ඉගෙනුම් කටයුතු වෙනුවෙනුත් දුර්වලය. ඒ නිසා ඔහුගේ දෙමව්පියන් මේ දරුවා උසස් අධ්‍යාපනයක් ලබනු ඇතැයි හෝ බලාපොරොත්තු වූයේ නැත. ඒත් මේ දරුවාගේ නිදිගත යෝධයා අවදි විය. සාමාන්‍ය පෙළ විභාගය එතරම් ඉහළ අන්දමින් සමත් නොවුනත් ගණිත අංශයෙන් උසස් පෙළ හදාරා මුල් වතාවෙන්ම අදාල ඉසෙඩ් අගය ලබා විශ්ව විද්‍යාලයට ඇතුලත් විය. එතැනින්ද නොනැවතී පශ්චාත් උපාධි පවා ලබා ගෙන අද ඉහළ පෙළ කළමනාකරුවෙකු ලෙසින් සිය ජීවිතය ගොඩ නගා ගෙන ඇත.
විශ්වීය දරුවන්..
අද ලෝකයේ දරුවන් අතරින් 10% ක් පමණ දෙනා විශ්වීය දරුවන් බවට පත්ව සිටිති. ඔවුන් සැබැවින්ම අසිරිමත්ය.අදහා ගත නොහැකි හැකියාවන්ගෙන් සමන්විතය. මේ ගැන ඔබටත් යම් ඇසු පිරූ තැන් තිබිය හැක.වයස අවුරුදු 9 දී මහාචාර්යවරයෙකු බවට පත් දරුවෙකු ගැන තොරතුරු මේ දිනවල සමාජ මාධ්‍යජාලාවන්හි හුවමාරු වේ. ඒ වගේම මේඝ විජේවර්ධන නැමැති ශ්‍රි ලාංකික පුතනුවන් නාසා ආයතනයේ NASA Space App Challenge ව්‍යාපෘතියට සම්බන්ධ වී භෞතික විද්‍යාව පිලිබඳ මහාචාර්යවරුන් සමග රාත්‍රි දේශන වලට පවා සම්බන්ධ වුන මේඝට අවශ්‍ය වී තිබෙන්නේ වයස අවුරුදු 15 වන විට රොකට් විද්‍යාඥයෙකු වීමයි.මේ වෙන විට පුංචි මේඝ ”නාසා ආයතනයේ NASA Space App Challenge ව්‍යාපෘතියේ මෙහෙයුම් තානාපති තනතුර වෙනුවෙන් සුදුසුකම් සපුරා තිබේ.
- ඔබේ දරුවා කොතැන වුනත් බිය වෙන්න එපා…
ඉහතින් සදහන් කරන ලද කරුනු අනුව ඔබේ නව යොවුන් දරුවා මේ කුමන හෝ කාණ්ඩයකට ඇතුලත් විය හැකියි. ඔහු විශ්වීය දරුවෙකු නොවනු ඇත. ඒ ගැන කම්පා නොවන්න. විශ්වීය දරුවෙකු යනු ආශ්චර්යමත් සංසිද්ධියක් නිසා නොලද දෙයට කම්පා නොවන්න.
නමුත් ඔබේ නව යොවුන් දරුවා සාපරාධී ගති පැවැතුම්වලින් යුක්ත නම් ඒ ගැනත් බිය නොවන්න. මේ දරුවා ඉතාම පහසුවෙන්ඔහුට යා හැකි ඉලක්කයක් වෙත යොමු කිරීමට හැකියාවක් තිබේ. නමුත් ඒ ඉලක්කය කිසිදු දිනක ඔබේ ඉලක්කය නොවිය යුතුයි.
ඔබේ දරුවා උපන්නාට මේ ලෝකයේ ජීවත්වෙන දරුවෙකු නම් ඔහුගේ මනස උත්තේජනය කරන්න.සතුට විනෝදය දරුවාගේ මනසට සමීප කරන්න. ජීවිතය ගැන බලාපොරොත්තු ගොඩ නගන්න.ඔහුට ජීවිතය ප්‍රබෝධයක් වේවි.
එහෙමනම්…නව යොවුන් දරුවන් සමග ගණුදෙනු කරන දෙමව්පියන් කොටින්ම දරුවාගේ හිත විමසන රහස් පරීක්ෂයෙක් බවට පත් වීම ඉතා වැදගත්.මේ කුනාටු සමයේදී දරුවාගේ පිබිදීම සහ බිඳවැටීම යන අවස්ථාවන් අතර පවතින දෝලනය මැනවින් පවත්වා ගන්න. එවිට දරුවාත්…ඔබත් …දිනුම්.
