රෝග පිලිබඳ ජාත්‍යන්තර වර්ගීකරණයේ (International Classification of Diseases) දී වීඩියෝ ක්‍රිඩා මගින් සිදු වෙන කැළඹිලි සහගත තත්වයත් මානසික රෝග ලැයිස්තුවට 2022 වසරේදී එක් කිරීමට ලෝක සෞඛ්‍ය සංවිධානය විසින් තීරණය කර තිබෙනවා. ඊටත් වඩා මෙහි තිබෙන ඉරපතල තත්වය වන්නේ අද දරුවන් අතර විඩියෝ ක්‍රිඩාවන්ට අවස්ථාවක් නොලද විට ඇති වෙන සහ ඔවුන්ටවත් පාලනය කර ගත නොහැකි මානසික ආවේගයයි.පසුගිය දිනකදී තමාගේ මව විසින් ජ’ගම දුරකථනය නුදුන් නිසා සිය දිවි හානි කර ගත් දරුවෙකු පිලිබදව පුවත ඔබත් සමාජ මාධ්‍ය ජාලා ඔස්සේ දකින්න ඇති.සැබැවින්ම දරුවෙක් මෙවැනි අවාසනාවන්ත ඉරණමකට පත් වුනේ ඇයි…? එයට වග කිව යුත්තේ වීඩියෝ ක්‍රිඩාවද..? එසේත් නැත්නම් දෙමව්පියන්ද..?
ඇබ්බැහි විමක් වුනොත්…?
අපි ඇබ්බැහි විම ගැන කතා කළත් සැබැවින්ම ඇබ්බැහි වීම කියන්නේ කුමක්ද..? මතට, දුමට ඇබ්බැහි වීම ගැන අපි දැන සිටියත් සැබැවින්ම වීඩියෝ ක්‍රිඩාවන් වෙනුවෙන් දරුවන් ඇබ්බැහි වෙනවාද..? එහෙමනම් දරුවන් මේ ඇබ්බැහි වීමෙන් මුදවා ගැනීමට වැඩිහිටි සමාජයට නොහැකිද..?
අපි කරන යම් කාර්යක් නිසා හිතේ සතුට ඇති වෙනවා නම් ඒ කාර්යයයේ නිරත වීමට අපි වැඩි කැමැත්තක් දක්වනවා. මේ අවස්ථාවේදී සතුට ලබා දෙන ”ඩොෆමින් ” රසායනය මොළයෙන් නිදහස් කරන නිසාම අපි ඒ වෙනුවෙන් දිගින් දිගටම යොමු වෙන තත්වයක් ඇති වෙනවා.පරිගණක ක්‍රිඩාවත් එහමයි.දරුවෙක් තමාගේ දෛනික ජීවිතයේ කටයුතුවලින් බැහැරව පරිගණක ක්‍රිඩා වෙනුවෙන්ම යොමු වෙන ප්‍රවනතාවයක් ඇත් නම් එය ඇබ්බැහි විමක් ලෙසින් හදුන්වන්න පුලුවනි.
ඉන්දියාවේ ගුජරාට් ප්‍රාන්තයේ PUBG ක්‍රීඩාවට දරුවන් ඇබ්බැහි වීම නිසාම එරට රජය විසින් මෙම පරිගණක ක්‍රිඩාව තහනම් කළත් ඇතැම් දරුවන් තහනම නොතකා මෙම ක්‍රිඩාවේ යෙදුන නිසා ඉන්දියාවේ පොලිසිය විසින් ඔවුන් අත්අඩංගුවට පවා ගෙන තිබුණා. පසුව ඇප මත මේ දරුවන් නිදහස් කළත් ඔවුන්ගේ ඇබ්බැහි වීම ඒ තරමටම දරුණු ලෙසින් සිදු වුණා.
සමහර පරිගණක ක්‍රිඩා ප්‍රචණ්ඩකාරියි…
මෙම පරිගණක ක්‍රිඩාවන්හි යෙදිමේදී දෙමව්පියන්ගේ ඒ වෙනුවෙන් මැදිහත් විමක් නැහැ. අතීතයේදි නම් සිනමා පටයක්…ටෙලි නාට්‍යක් වුනත් දෙමව්පියන්ගේ අනුමැතිය යටතේ වැඩිහිටියන්ට සුදුසු නම් එය දරුවන්ට නුසුදුසු ලෙසින් පිළිගැනීමක් තිබුණා. ඒ නිසාම ප්‍රබන්ධ සාහිත්‍ය කතාවක් වුනත් දරුවාට ලැබුනේ දෙමව්පියන් විසින් එය දරුවන්ට වඩාත් සුදුසුයි කියන පිලිගැනීම යටතේ පමණයි.
නමුත් අද පරිගණක ක්‍රිඩාවන් සම්බන්ධයෙන් දෙමව්පියන්ට මේ හැකියාව නැහැ. සමහර විට දරුවා මෙම ක්‍රිඩාවන් මිළට ගන්නවා. එහෙම නැත්නම් මිතුරන් සමග හුවමාර කර ගන්නවා. ඒ වගේම අන්තර්ජාලයෙන් හෝ සන්නිවේදන මධ්‍යස්ථානයකින් බාගත කර ගන්නවා. ඒ නිසා පරිගණක ක්‍රිඩාවේ ඇතුලාන්තය ගැන වැඩිහිටින්ට දැණුමක් ඇත්තේම නැහැ.
දරුවා විසින්ම තෝරා ගන්නා මෙම පරිගණක ක්‍රිඩාවන් සමහර විට බොහෝ සෙයින් ප්‍රචන්ඩකාරී විය හැකියි.දරුවාගේ මනස විකෘති කරන සහ ඉක්මනින් තරහ යෑමේ හැකියාව ඇති කරනවා.2018 වසරේදී Call of Duty ක්‍රීඩාවෙන් පරාජයට පත් තරුණයෙකු, තමන්ගේ මිතුරාට උල් ආයුධයකින් ඇන තුවාල කිරීමට තරම් පරිගණක ක්‍රිඩා නිසා දරුවන්ගේ මනස වෙනස් වී තිබෙනවා.
පරිගණක ක්‍රිඩාවේ වීරයෙක් වීම…
දරුවන් මෙවැනි පරිගණක ක්‍රිඩාවන්හි යෙදෙන විට දරුවාද එම ක්‍රිඩාවේ සිටින වීරවරයන්ගේ චරිත බවට පත් වීමට උත්සාහ ගන්නවා. මේ නිසා දරුවා එවැනි වීරත්වයකට, දුෂ්ට චරිතයක් හෝ දාමරිකයෙක් ලෙසින් සිය චරිත ලක්ෂන ගොඩ නගා ගන්නවා. ඔවුන්ගේ ජීවිතයේ සැබෑ විරයා වන්නේ පරිගණක ක්‍රිඩාවේ සිටින ආදර්ශමත් නොවන චරිතයක් විය හැක.
සූදුව සඳහා ඇබ්බැහිවීම
ඇතැම් පරිගණක ක්‍රිඩාවන් මගින් මුදල් ඉපැයීමේ රටාවක්ද දැන් පවතිනවා. තරුණ පරම්පරාව දැන් ලෝකයට විවෘතයි. ඔවු්නගේ ජීවිතයේ භෞතික සම්පත් වෙනුවෙන් ඇගි ඇල්ම ඉතාම අධිකයි. ඒ වගේම තරුණ පරම්පරාවට මුදල් උපයා ගැනීමට සහ රැකියා වෙනුවෙන් ඇති අවස්ථාවන් ඉතාම සිමිත නිසා ඔවුන් තුළ පරිගණක ක්‍රිඩාවන් මගින් මුදල් උපයා ගැනීමේ මාර්ග සොයා යෑමත් අද අපි නොදකින විදිහට සමාජ ප්‍රශ්නයක් බවට පත් වී තිබෙනවා.
දරුවන් හුදෙකලා වීම..
පරිගණකය සමග හුදෙකලා වීම නිසා දරුවා සමාජයෙන් දුරස් වෙනවා. ඔවුන්ට සැබෑ ලෝකයේ හොද මිතුරෙක්, හිතවතෙක් නැහැ.ඒ නිසා තමාගේ හිතේ යම් ගැටලුවක් ඇති වුන විට එය බෙදා හදා ගැනීමට හෝ උපදෙස් ගැනීමට කිසිවෙකුත් නැහැ.මේ හුදෙකලා තත්වය නිසාම දරුවාට ගැටලු විසදා ගැනීමේදී බරපතල මානසික ගැටුමක් ඇති වෙනවා. මෙවැනි හුදෙකලා විමක් නොවුන අතිත සමාජයේදී කතා කළ කළ්‍යාණ මිතුරා අද දරුවාගේ ලෝකයේ නැහැ. ඒ වෙනුවට ඔවුන්ට ඇත්තේ බෞතික ලෙසින් වූ ජංගම දුරකථනය හෝ වෙනත් උපාංගයක් පමණයි.
පරිගණකයේත් යක්ෂයෙක් වගේම හොඳත් තිබෙනවා..
පරිගණකය සමග සම්බන්ධතාවයන් දැක්වීම ගැන අපි චෝදනා කළත් එයින් යහපත් ප්‍රතිඵල ලබා ගැනීමටත් දරුවාට හොදින්ම අවස්ථා තිබෙනවා.ඒ නිසා අපි යක්ෂයා ගැනම කියනවාට වඩා ජංගම දුරකථනය යහපත් ලෙසින් හසුරුවන ආකාරය කියා දෙන්න.කොටින්ම කොවිඩ් වසංගත කාලයේදී අධ්‍යාපන කටයුතු සම්පුර්නයෙන්ම මග හැර යා නොදී පවත්වා ගත හැකි වූයේ මෙම තාක්ෂනයේ සම්බන්ධතාවය නිසාවෙන බවත් සදහන් කළ යුතුයි.
ඒ වගේම යම් කිසි ආකාරයකින් මානසික ව්‍යයාමයක් ලබා ගත හැකි ආකාරයේ පරිගණක ක්‍රිඩාවන් මෙන්ම , දැණුම ලබා ගැනීම, විවේකය ගත කිරීමේ දී සහ විනෝදාංහයක් ලෙසින්ද ජීවිතයට සම්බන්ධ කර ගත හැකි ආකාරයේ වීඩියෝ වැඩ සටහන් තිබෙන බැව් අමතක නොකළ යුතුයි.
ඒ වගේම දරුවන්ගේ වීඩියෝ ක්‍රිඩා පමණක් නොව ජංගම දුරකථනය පවා පාවිච්චි කරන ආකාරය පිලිබදව දෙමව්පියන්ගේ නියාමනය අවශ්‍ය වෙනවා. දරුවා ඇබ්බැහි වූ පසුව ඒ වෙනුවෙන් කටයුතු කිරීම පහසු නැත. එවිට වෙන්නේ මව්පියන් සහ දරුවන් අතර ඇති වෙන අරගලය සමහර විට දරුවාගේ සිය දිවි හානියෙන් කෙළවර වෙන්නත් පුලුවන්. ඒ නිසා නියපොත්තෙන් කැඩිය හැකි දෙය පොරවෙන්වත් කපා ගත නොහැකි සේ ඔඩු දුවන තෙක් නොසිට දරුවා සහ ඔබ අතර සම්බන්ධතාවයත් යහපත් පරිද්දෙන් පවත්වා ගැනීමට කටයුතු කරන්න.
