දරුවන්ට ලිංගික අධ්‍යාපනය ලබා දීම ගැන මව්පියන් තුළ පවතින්නේ ඇතැම් විට ඍණාත්මක ආකල්පයක්. මේ පුංචි දරුවෝ දැන්ම ඕවා දැනගන්න ඕනේ නැහැ… ළමයින්ට මොකටද ඕවා වගේ අදහස් එක්ක සිටින මව්පියන් ඕනෑ තරම් අපේ සමා‍ජයේ සිටිනවා. ඇත්තටම එය එහෙමද? නැතිනම් දරුවන්ට ලිංගික අධ්‍යාපනය ලබා දීම වැදගත්ද කියන දේ ගැන අපි අද කතා කරමු.
නව යොවුන් වියේදී ඇතිවන හෝමෝන වෙනස්කම්වල ප්‍රතිඵලයක් ලෙස මේ වයසේ දරුවන් විරුද්ධ ලිංගිකයන් කෙරෙහි ආකර්ෂණයක් ඇති වීම, ලිංගිකත්වය පිළිබඳ කුතුහලයක් ඇතිවීම හා විවිධ ලිංගික ක්‍රියා අත්හදා බැලීම සඳහා වැඩි නැඹුරුවක් දක්වයි.
ඔබ දන්නවාද?
2017 වර්ෂයේදී කළ සමීක්ෂණයකින් ශ්‍රී ලංකාවේ පාසැල් යන නව යොවුන් වියේ පිරිමි ළමුන්ගෙන් 9% ක් පමණත්, ගැහැණු ළමුන්ගෙන් 1% ක් පමණත් ලිංගික සම්බන්ධතා පවත්වන බව සොයාගෙන ඇත. නමුත්, නව යොවුන් වියේ දරුවන් වැඩි දෙනෙක් උපත් පාලන ක්‍රම පිළිබඳ අවබෝධයක් නැති බවත් 25% ක් පමණ දෙනෙක් පළමු ලිංගික සංසර්ගයේදී වුවද ගැබ් ගත හැකි බව නොදන්නා බවත් තවත් සමීක්ෂණයකින් හෙළිවී ඇත.
උපත් පාලනය, ගැබ් ගැනීම හා ලිංගාශ්‍රිත රෝග පිළිබඳ දැනුමකින් තොරව ලිංගික ක්‍රියාවල නිරත වීම නිසා, නව යොවුන් වියේ දරුවන් අනවශ්‍ය ගැබ් ගැනීම් වලට ලක්වීම හා ලිංගාශ්‍රිත රෝග වලට ගොදුරු වීමට වැඩි අවදානමක් ඇත.
දරුවන්ට නිසි ලිංගික අධ්‍යාපනයක් ලබාදීම මගින් අනවශ්‍ය ගැබ් ගැනීම් හා ලිංගාශ්‍රිත රෝග වැලදීමේ අවදානම අඩු වෙනවා සේම, දරුවන්ට අනිසි ලිංගික බලපෑම් හා අපයෝජනවලට ලක්වීමද අවම කරගත හැකි බව දෙමාපියන් වශයෙන් ඔබ අවබෝධ කර ගත යුතු සත්‍ය කරුණකි.
ලිංගික අධ්‍යාපනයේ අරමුණු මොනවාද?
- තමාගේ ශරීරය අගය කිරීමට හා ආරක්ෂා කිරීමට ඉගෙනීම
- ලිංගිකත්වය පිළිබඳ නිවැරදි දැනුමක් ලබාගැනීම
- ලිංගික ක්‍රියාවලදී, නිවැරදි තොරතුරු මත පදනම් වූ තීරණ ගැනීම
- වගකීමක් සහිතව ලිංගික ක්‍රියාවල නිරත වීම
- තමාට හෝ අන් අයට හානියක් හෝ කරදරයක් නොවන ලෙස තමාගේ ලිංගික ආශාවන් ඉ‍ටුකරගැනීමට ඉගෙනීම
මෙහිදී දරුවාගේ වයසට, මානසික වර්ධනයට, සංස්කෘතියට ගැළපෙන පරිදි තොරතුරු ඉදිරිපත් කිරීම වැදගත් වේ.
ලිංගික අධ්‍යාපනයේදී ඇතුලත් කළයුතු කරුණු මොනවාද?
- ශරීරයේ උස, බර ආදිය එකිනෙකා අතර වෙනස් වන්නා සේම ලිංගික අවයවවල (පියයුරු, ශිෂ්ණය) ප්‍රමාණය හා හැඩය එකිනෙකාගෙන් එකිනෙකාට වෙනස් වන අතරම එම ලිංගික අවයවවල ප්‍රමාණය හෝ හැඩය ලිංගික ආස්වාදය කෙරෙහි බලපාන්නේ නැත.
- ආදරය හා ලිංගික ආශාව යනු එකම දෙය නොවේ. ඔබට ආදරය කරන හෝ ඔබ ආදරය නොකරන කෙනෙකුට වුවද ලිංගික ආකර්ශනයක් ඇතිවිය හැකිය. කෙනෙකු ඔබට ලිංගික අශාවක් දක්වන්නේ නම්, එයින් සැමවිටම අදහස් වන්නේ ඔහු/ඇය ඔබට ආදරය කරන බව නොවේ. එමෙන්ම ආදරය ප්‍රකාශ කිරීමට සෑම විටම ලිංගික කටයුතුවල නිරත විය යුතු නැත.
- ලිංගික අශාවන් ඇතිවීම සාමාන්‍යය දෙයකි. නමුත් ඔබට ඇතිවන සෑම ලිංගික ආශාවක්ම ඉටු කර ගත නොහැකි බව තේරුම් ගත යුතුය.
- රූපවාහිනිය හා විවිධ විද්‍යුත් මාධ්‍යවලින් ආදරයා හා ලිංගිකත්වය පිළිබඳව පෙන්නුම් කරන/විකාශනය කරන සියලුම දේ නිවැරදි නොවේ. එම නිසා විද්‍යුත් මාධ්‍ය, චිත්‍රපට ආදිය ලිංගික අධ්‍යාපනය ලබාගැනීමට සුදුසු මාධ්‍යනොවේ. මෙවැනි මාධ්‍ය මගින් තොරතුරු ලබාගැනීමේදී වැරදි තොරතුරු දැන ගැනීමටත්, මිථ්‍යා මත විශ්වාස කිරීමටත් ඉඩ ඇත. එමනිසා ලිංගිකත්වය පිළිබඳ තොරතුරු ලබාගැනීමට අවශ්‍ය නම්, තම දෙමාපියන් හෝ වෙනත් විශ්වසනීය වැඩිහිටියෙක් සමඟ කතා කරන්න.
- ස්වයං වින්දනය සාමාන්‍ය දෙයකි. බොහෝ දෙනෙක් ස්වයං වින්දනයේ යෙදෙති. ස්වයං වින්දනයේ යෙදෙන වාර ගණන පුද්ගලයාගෙන් පුද්ගලයාට වෙනස් වේ. ස්වයං වින්දනය නිසා ශරීරය කෙට්‍ටු වීම හෝ ශක්තිය අඩු වීමක් සිදු නොවේ.
- ලිංගික සංසර්ගයේ යෙදීමට පෙර ඔබ බොහෝ දේ පිළිබඳ සැලකිලිමත් විය යුතුය. ගැබ් ගැනීමට හෝ ලිංගාශ්‍රිත රෝගවලට ගොදුරු වීමේ අවදානම සැලකිල්ලට ගත යුතුය. ඔබගේ යහළුවන් හෝ පෙම්වතා/පෙම්වතිය ගේ පෙ‍රැත්ත කිරීම නිසා ඔබ ලිංගික කටයුතුවල නිරත වීම සුදුසු නැත. ඔබ අකමැති ඕනෑම ලිංගික කටයුත්තකට විරුද්ධ වීමට ඔබට අයිතිය ඇත. එමෙන්ම තව කෙනෙකුගේ කැමැත්ත නැතිව, බලහත්කාරයෙන් ලිංගික කටයුතු වල නිරත වීමට උත්සහ කිරීම වරදකි.
- ශ්‍රී ලංකාවේ නීතියට අනුව, වැඩිහිටියෙකු (වයස අවුරුදු 18 ට වැඩි අයෙකු) වයස අවුරුදු 16 ට අඩු දරුවෙකු සමඟ දරුවාගේ කැමැත්ත ඇතුව හෝ නැතුව ලිංගික කටයුත්තක නිරත වීම දඬුවම් ලැබිය හැකි වරදකි.
- වැඩිවියට පත් වූ ඇති ඕනෑම ගැහැනු දරුවෙකු ලිංගික සංසර්ගයකින් ගැබ් ගැනීමට ඉඩ ඇත. ගැබ් ගැනීම වලක්වා ගැනීමට නම්, උපත් පාලන ක්‍රමයක් භාවිත කිරීම අත්‍යාවශ්‍ය වේ. ඔසප් චක්‍රය නියමිත දිනයට වඩා ප්‍රමාද වීම ගැබ් ගැනීමක් සිදුවී ඇති බවට ඇති පළමු සාක්ෂිය වේ.
- විවිධ උපත් පාලන ක්‍රම ඇත. කොන්ඩම් හා උපත් පාලන පෙති මින් සමහරකි. කොන්ඩම් අනවශ්‍ය ගැබ් ගැනීම් හා ලිංගාශ්‍රිත රෝග යන දෙකෙන්ම ඔබව ආරක්ෂා කරයි. නමුත්, උපත් පාලන පෙති ඔබව ආරක්ෂා කරන්නේ අනවශ්‍ය ගැබ් ගැනීම්වලින් පමණකි. උපත් පාලන පෙති ලිංගාශ්‍රිත රෝග වලින් ඔබ ආරක්ෂා නොකරයි.
දරුවන් හා සම්බන්ධ සියලු වගකීම් නොපිරිහෙලා ඉටු කරන්නට දෙමාපියන් වශයෙන් අපි බැඳී සිටින අතරම ලිංගික අධ්‍යාපනය ද එම වගකීම් සමුදායේ කොටසක් බව අමතක නොකරන්න. නොදැනුවත්කම මගින් නව යොවුන් ජීවිත අකාලයේ අනතුරට පත්වීම විනාශ වී යාමට මූලික එක් හේතුවක් ලෙස ද නිවැරදි ලිංගික අධ්‍යාපනය නොමැතිකම හඳුන්වා දිය හැකියි. ඒ නිසාම දුවා දරුවන්ගේ හෙට දවස වෙනුවෙන් ලිංගිකත්වය පිළිබඳව අවශ්‍ය දැනුම දරුවාගේ වයසට සරිලන ආකාරයෙන් ලබා දීම දරුවන් හා සම්බන්ධව ඔබට පැවරුණු වගකීමේ තවත් එක් ප්‍රධාන කොටසක් බව අමතක නොකරන්න.
විශේෂඥ මතය, අදහස සහ මූලික සටහන:
ළමා හා නව යොවුන් 
මනෝවෛද්‍ය විශේෂඥ යසෝධා රෝහණචන්ද්‍ර මහත්මිය
විශ්වවිද්‍යාල මනෝවෛද්‍ය ඒකකය
දකුණු කොළඹ ශික්ෂණ රෝහල
