2020 වසරේ මාර්තු මාසයේ ශ්‍රි ලංකාවෙන් මුල්ම කොවිඩ් ආසාදිත රෝගියා වාර්තා වුන දිනයේ පටන් අපේ ජන ජීවිතය සම්පූර්නයෙන්ම වෙනස් වුණා. දෙමව්පියන්ගේ ආර්ථික හැකියාව, ආදායම් පහළ ගියා.දරුවන්ගේ සුන්දර ළමා ලෝකයේ මිතුරු ඇසුර දුරස් වුණා. කොටින්ම පන්සල, පල්ලිය , පාසල අතර සම්බන්ධතාවයන් පවා ලිහී ගිලිහී ගියා.
ඒත් අපි මානසිකව හෙම්බත් විය යුතු නැහැ…
කොවිඩ් කියන්නේ ගෝලීය වසංගතයක්. කොටින්ම කාලයත් සමග ඇති වුන විපතක්. විද්‍යාව කොතරම් දියුණු වෙලා ඉර, හඳ, තරු ඇල්ලුවත් තවමත් අපට කොවිඩ් වසංගතයෙන් බේරෙන්න අවස්ථාවක් නැහැ.ඒ වගේම මෙවැනි වසංගතයකට අපි මෑතකදී මුහුණ දුන් නිසාම මේ ගැන කම්පනයෙන් පසුවුනත් මීට පෙරාතුවත් මේ වගේම ගෝලීය වසංගත ඇති වුණා. මිනිසුන් මියගියා.1917/1918 වැනි අතීතයේදී ස්පාඤ්ඤ උණ, මහාමාරිය , මැලේරියාව වැනි ගෝලීය වසංගත ඇති වුණා. මිනිසුන් මේ වසංගත සමග ජීවත් වුණා මිසක පලා ගියේ නැහැ.කොවිඩ් ගැනත් අපට කියන්න වෙන්නේ මේ අනාවැකියයි. නමුත් කාලයත් සමග ඒ වෙනුවෙන් විසදුම් ලැබුණා.
2022 ටත් කොවිඩ් සමග ජීවත් වෙන්න වේවිද..?
අකමැත්තෙන් වුනත් සමහර විට ඔව් කියන්න සිද්ධ වෙනවා. ලෝක සෞඛ්‍ය සංවිධානය පවා සදහන් කරන්නේ කොවිඩ් 19 අවසන් වෙන දිනයක් ගැන අනාවැකි කීම අපහසු බවයි. ඒත් අපි මානසිකව පසුබසින්න හොඳ නැහැ.කාලාන්තරයක් පුරාම හුරු පුරුදු වුන ජීවන රටාවෙන් වෙනස් වීම ඇත්තටම පහසු නැහැ.අලුත් පරිසරයට එහෙම නැත්නම් නව සාමාන්‍යකරණයට දැන් අපි ටිකෙන් ටික අනුගත වෙමින් සිටිනවා.
වසරක් ගෙවී වසරක් ලැබුවාට කොවිඩ් අවසාන නැහැ.නමුත් අපි රැකියාව කරන්න, දරුවන් පාසල් යන්න අවශ්‍යයි.අනෙකුත් සමාජ සම්බන්ධතාවයන් පවත්වා ගැනීමත් අනිවාර්යෙන්ම සිදු වෙනවා.අපට හුරු පුරුදු ආර්ථික, සමාජයීය, සහ සංස්කෘතික වටපිටාවන් සමග සිදුකරන සෑම සිදුවීමක්ම කොවිඩ් වසංගතය ගැන සිහියේ තබා ගෙන සිදු කරන්න වෙනවා.එය 2022 ට පමණක් නොවෙයි, කොවිඩ් සමාජයෙන් අවසාන වෙන දිනයක් දක්වාම අපේ ජීවිතයේ රටාවක් බවට පත් වීමට අවශ්‍යයි.
ඒත් අපි කොවිඩ් සමග ජීවත් වෙන්නේ කොහොමද…?
විදුලිය අන්තරාදායක බව අපි දන්නවා. නමුත් අපි විදුලිය සමග ගනුදෙනු කරනවා.විදුළිය අන්තරාකාරියි කියල අපි විදුලිය පාවිච්චි නොකර ඉන්නේ නැහැ.අනතුර ගැන හදුනා ගෙන ඒ සීමාවන් තුළ අපේ ආත්මාරක්ෂාව සලසා ගෙන කටයුතු කරනවා. කොවිඩ් සමගත් අපට ගනුදෙනු කරන්න වෙන්නේ ඒ විදිහටයි.අපේ ඉතිහාසයේදී වුනත් විවිධ රෝග වෙනුවෙන් අපි ප්‍රතිචාර දැක්වූ නිසා අපට ආරක්ෂාව ලැබුණා. ඩෙංගු , බරවා, මැලේරියා වැනි රෝග ත්වයන්හිදී ඒ වෙුනවෙනු වූ චුදිතයා ලෙස සැලකෙන මදුරුවන්ගෙන් ආරක්ෂා වුණා. කක්කල්කැස්ස , ගලපටපය වැනි රෝග වෙනුවෙන් ප්‍රතිශක්ති එන්නත් ලබා ගත්තා.
කොවිඩ් වෙනුවෙනුත් ප්‍රතිශක්ති එන්නත් තිබෙනවා..
2022 වසර වෙන විට අපි බොහෝ දෙනක් කොවිඩ් වෙනුවෙන් වූ තුන්වෙනි එන්නත් මාත්‍රාව හෙවත් බුස්ටරය පවා ලබා ගෙන අවසාන විය හැකියි.නමුත් වෙනත් රෝගවලට එරෙහිව ලැබෙන ප්‍රතිශක්තිය වගේ කොවිඩ් ප්‍රතිහක්ති එන්නත ගැන තවමත් 100% ක තහවුරුවත් නැහැ.ඉතින් 2022 වසරේදීත් අපි දැනට අනුගමනය කරන සමාජ දුරස්ථබව,විෂබීජහරණය සහ මුව ආවරණ පැළදීමේ පුරුදු වලින් මිදෙන්න හොඳ නැහැ.ඊටත් මේ පුරුදු නිසා හැමදාම අනුගමනය කිරීම නිසා අපේ සෞඛ්‍ය තත්වය නොදැනීම ආරක්ෂා වෙනවා. ඒ නිසා කොවිඩ් වෙනුවෙන් අනුගමනය කරන පුරුදු අප සමග 2022 ටත් යා යුතුයි.
ස්වයංවිනයත් අවශ්‍ය වෙනවා
වෙනදාට අපට කැස්ස හෙම්බිරිස්සාවක් හැදුනොත් ඒ ගැන නොසලකා හිටියත් දැන් අපට ඒ ගැන නොසලකා සිටින්න බැහැ. එය ඔබේ පමණක් නොව නිවස, වටපිටාව යන හැම දෙනාගේම ආරක්ෂාවට වැදගත් වෙනවා.ඒ නිසා ස්වයංවිනයක් පනවා ගන්න. මෙවැනි තත්වයක් ඇති වුනොත් එය දින ගණනාවක් පවතිනවා නම් සහ කොවිඩ් රෝග ලක්ෂණ ගැන සැකයක් ඇත්නම් අදාල පරීක්ෂණ වාර්තාවක් ලබා ගන්න.
මිථ්‍යාවන් එපා..
අපේ රටේ සෞඛ්‍ය ජාලය ඉතාම විශිෂ්ටයි. ඒ නිසා කොවිඩ් වෙනුවෙන් අවශ්‍ය ප්‍රතිකාර සදහා සෞඛ්‍ය අංශය නිතරම සූදානම්. ඒ නිසා අනුමැතැතියක් නොමැති ඖෂධ මත යැපෙන්න එපා.අනුමැතිය ඇතැයි කිව්වත් ඊට වඩා රෝහල් පද්ධතිය මත විශ්වාසය තබන්න.ඒ වගේම නිවසේ සිටින වැඩිහිටියන් සමාජයේ ගැවසෙන්නේ නැතැත් ඔවුන් ගැන අවදානයෙන් සිටින්න.කොවිඩ් 19 වැඩිහිටියන් වැනි දුර්වල පුද්ගලයන් ආසාදනය කිරීමේ ප්‍රවනතාවය වැඩි නිසා ඔවුන්ගේ රැකවරණය සහ ආරක්ෂාව ගැන අවධානය ලබා දෙන්න. ඉතාලිය වැනි රටවල පවා වැඩිහිටි නිවාස මුල් කර ගෙන කොවිඩ් වයාප්ත වීමේ සීඝ්‍රතාවයක් ඇති වීම ගැන තිබෙන ඉතිහාසය නිසා ඔබේ නිවසේ සිටින අම්මා,තාත්තා, අත්තම්මා, සීයා වගේම සෙසු වැඩිහිටියන් ගැනත් අවදානයක් ලබා දෙන්න.
අධ්‍යාපනයේදී සමාජ දුරස්ථබව වැදගත්..
2020 වසරේ කොවිඩ් ආරම්භක අවධියේදී අපි තොරතුරු සන්නිවේදන සාක්ෂරතාවයෙන් දුර්වල වුනත් දැන් බොහෝ දෙනෙක් ඒ ගැන දැනුවත්. ඒ නිසා 2022 වසරේදිත් හැකි තරම් දුරට මාර්ගගත අන්දමින් අධයාපනය සහ සෙසු කාර්යාලයීය කටයුතු කර ගැනීමට උනන්දු වෙන්න. අනවශ්‍ය ලෙසින් පෝලිම්ගත නොවී මාර්ගගත අන්දමින් වැඩපහසු කර ගැනීමේ ඇප් ගැන යොමු වෙන්න.
උගත් දෙයක් අපතේ නොයයි..
අප විසින් උගත් දෙයක් කිසිදු දිනක අපතේ නොයන බව සැබෑය. ඒ නිසා ඔබ තුළ මෙතෙක් තොරතුරු සන්ිවේදන සාක්ෂරතාවය ගැන දැනුමක් නොමැති නම් ඒ ගැන ඉගෙනුමට උනන්දු වෙන්න. දැනට ඔබ තුළ තිබෙන හැකියාව තව දුරටත් සංවර්ධනය කර ගන්න. එය 2022 වසරේ ඔබ විසින් ගොඩ නගා ගන්නා එක් අරමුණක් කර ගන්න.
කොවිඩ් නිසා ඉගෙන ගත් දේ ඉදිරියට ගෙන යන්න..
කොවිඩ් නිසා අප බොහෝ දේ ඉගෙන ගත්තා.වෙනදා විතැන්ව තිබුන පවුල දැන් එකතු වුණා.දරුවන් සහ දෙමව්පියන්ට එකම වෙලාවක එකම මේසයේ ආහර ගැනීමට අවස්ථාව ලැබුණා.විවාහ, අවංගල්‍ය, දාන සහ වෙනත් උත්සව සීමිත පිරිසක් සමග අනවශ්‍ය වියදම් පිරිමසා ගෙන කර ගැනීමට පුරුදු වුණා. ඒ නිසාම අනවශ්‍ය අන්දමින් වියදම් කිරීම නිසා බිඳ වැටෙන ආර්ථිකයට යම් අන්දමකින් සහනයක් ලබා ගැනීමේ හැකියාව ලැබුණා. ඒ නිසා 2022 වසරේදීත් ඔබට හැකි අන්දමින් වැය කරන්න. අනවශ්‍ය වැය ශීර්ෂ නිසා ඇති වෙන ආර්ථික ගැටළුවලින් දුරස් වෙන්න.
අපි කොවිඩ් කාලයේදී ගෙවතු වගාව, මල් , එළවලු වගාවන්ට යොමු වුණා. ඒවා තව දුරටත් අනුගමනය කිරීමට කාගෙන්තවත් බාධාවක් නැහැ. ඔබේ ගෙවත්තේ එළවලු පාත්තියක් වගා කරන්න කොවිඩ් වසංගතයක්ම අවශ්‍ය නැහැ. වස විස නැති ආහාරයක් වෙනුවෙන් මේ ඵලදාව ඔබට ලබා ගත හැකියි. පොත් පත් කියවන්න..යම් ලේඛන කටයුතත්ක නිරත වෙන්න ලද අවසරය 2022 වසරේදී තව දුරටත් දියුණු කර ගැනීමට උනන්දු වෙන්න.
ධනාත්මකව හිතන්න..
නිතරම අපේ සිතුවිළි ධනාත්මක වීම වැදගත්.අතීතය ගැන හිතමින් ලතැවෙන්නත්, අනාගතය ගැන හිතමින් බියකරු හීන මවන්නත් එපා.2022 වසර දෙස අලුත් ඇසකින් බලන්න. ජීවිතයේ අභියෝග සියල්ල ජය ගැනීමට ඔබේ ධනාත්මක චින්තනය ඉතාම වැදගත්.
ඔබ සැම දෙනාටම සුබ නව වසරක් වේවා…
