ගෑස් පිලිබඳව මෑතකදී ඇති වුන අවදානම් සහිත තත්වය නිසා බොහෝ දෛනක් නැවතත් දර ලිප් වෙත යොමු වුනා.ඈත අතීතයේ පටන් අපේ ඉවුම් පිහුම් කටයුතු වෙනුවෙන් භාවිතා කළ දර ලිප ගැන චෝදනා කරන්න බැරි වුනත් අද කාලයේ අපේ මුලුතැන් ගෙදර ඉඩ පරිසරය අනුව දර ලිපත් අවදානම් සහිත බවට මහනුවර මහ රෝහලේ ශ්වසන රෝග පිලිබඳ විශේෂඳ වෛද්‍ය දුශාන්ත මැදගෙදර මහතා බිබිසි පුවත් සේවය සමග පවත්වන ලද පුවත් සාකච්ඡාවකදී සඳහන් කර තිබෙනවා.
ශ්‍රි ලංකාවේ පවතින ගෘහස්ථ වායු දූෂණය හේතුවෙන් , දුම්වැටි පානය හා සමාන අවදානම් රෝග තත්වයන් සහ පෙනහළු පිළිකා ඇති වීමේ අවදානම ඉහළ ගොස් තිබෙනවා. මේ තත්වයට වැඩියෙන් මුහුණ දෙන්නේ මව්වරුන් හා ගෘහණියන් බැව් සඳහන් කරන්න පුලුවනි. දර ලිප පත්තු කරන විට යොදන ප්ලාස්ටික්, පොළිතින්, භුමිතල්වලින් නිකුත් වෙන දුමෙන් අපේ සිරුරට ඉතා අහිතකර කාබන් මොනොක්සයිඩ්,නයිට්‍රජන් ඔක්සයිඩ්,සල්ෆර් ඩයොක්සයිඩ් වැනි අංශු පිටවෙනවා.එක දර ලිපක් දැල්වීමෙන් ඇති වෙන දුම දුම්වැටි 75 ක් 100 ක් අතර ප්‍රමාණයකින් නිකුත් වෙන දුමට සමානයි.කොටින්ම එය දිනකට සිගරට් පැකට් දෙකක් බිව්වාට වඩා වැඩියි. ඒ නිසාම කාන්තාවන් මෙම ගැටළුවට වැඩි වශයෙන් මුහුණ දෙන අතර ඔවුන්ට දුම්වැටි පානයෙන් ඇති වෙන COPD (Chronic obstructive pulmonary disease, ) වාතය ගලායාම අවහිර වීම සහ හුස්ම ගැනීම සම්බන්ධ ගැටළු ඇති කරන ඇදුම, පෙනහළු පිළිකා ඇති වීම , සහ පටක හානියට පත් වීමේ වැඩි අවදානමක් ඇති බවත් විශේෂඳ වෛද්‍යවරයා විසින් පෙන්වා දී තිබෙනවා.
ඒ නිසා දර ලිපක් භාවිතා කරනවා නම් එය නිවසෙන් පිටත ස්ථානයක තබා ගන්නා ලෙසත් , නිවස තුළ තිබෙනවා නම් වාතාශ්‍රය හොඳින් පිටවෙන සේ මුළුතැන්ගෙය ජනේල යොදා ගැනීමෙන් මේ තත්වය තරමක් දුරට පාලනය කර ගත හැකි බවත් වෛද්‍යවරයා සඳහන් කරනවා.
සාම්බ්‍රානි සහ හඳුන්කුරු
ආගමික වතාවත් සිදු කිරීම වෙනුවෙන් යොදා ගන්නා සාම්බ්‍රානි සහ හඳාුන්කුරු වගේම මදුරු දඟර දැල්වීමත් ගෘහස්ථ වායු දූෂණයට බලපාන බැව් සඳහන් කරන වෛද්‍යවරයා මදුරු දඟර දල්වන විට ජනේල විවෘතව තැබීම නිර්දේශ කරනවා.
සුරතල් සතුන්…
නිවසේ ඇති කරන සුරතල් සතුන්ගේ ලොම් වගේම ඔවුන්ගේ සිරුරේ සිටින පරපෝෂිතයන්ද සෞඛ්‍යට හානිකර බැව් අමතක නොකළ යුතුයි.
ඒ වගේම නිවසේ කාමරයටම අලලා ඉදි කර තිබෙන නාන කාමර : (Attached Bathroom) නිතර වසා තැබීමෙන් ඒවායේ බිත්ති වාෂ්ප ලෙස නිකුත්වෙන රසායනික අංශු දීර්ඝ කාලයක් ආඝ්‍රානය කිරීමෙන්ද සෞඛ්‍ය ගැටලු ඇති වෙන නිසා මේවායේ දොර ජනේල විවෘත කර තැබීම ඉතා වැදගත් බැව් වෛද්‍යවරයා සඳහන් කරනවා.බාගෙට ඉදි කරන ලද නිවාස වල ඇති අධික දූවිලි තත්වයන්ද පෙනහළු ආශ්‍රිත රෝග තත්වයන්ට බලපානවා.
නිවස තුළ ව්‍යාපාරිකව රෙදි මැසීමක් සිදු වෙනවා නම් රෙදිවල තිබෙන දූවිලි අංශු පෙනහළුවලට ඇතුලු වීමත් පසුකාලීන රෝග තත්වයන්ට හේතු වෙනවා. මේවා මුල් අවස්ථාවේදී හඳුනාගෙන ප්‍රතිකාර නොකිරිම නිසා පසුකාලීනව මාරාන්තික තත්වයන්ට පවා ගොදුරු වීමට ඉඩ තිබෙනවා.වී වැනි ධාන්‍ය වර්ගවල ඇති “කාටුව ” ගෘහස්ථ වායු දූෂණයේ තවත් චුදිතයෙක් ලෙස පෙන්වා දෙන්න පුලුවනි.
මහනුවර මහ රෝහලේ රෝග පිලිබඳ විශේෂඳ වෛද්‍ය දුශාන්ත මැදගෙදර මහතා බිබිසි පුවත් සේවය සමග පවත්වන ලද පුවත් සාකච්ඡාවකදී සඳහන් කරන ලද තොරතුරු ඇසුරිනි.
