ඔබේ පුංචි පැටියා නියපොතු හැපීම හෝ ඇඟිලි ඉරීම මග හැර ගැනීමත් ඔබට මානසිකව පීඩාකාරී ප්‍රශ්නයක් විය හැකියි.පුංචි කාලයේදී නියපොතු හපන දරුවන් වෙතින් ඒ පුරුද්ද වයසත් සමග ක්‍රමයෙන් මග හැරෙනවා. නමුත් සමහර පුද්ගලයන්ට වැඩිහිටි වයසට පැමිණි පසුවත් නියපොතු හපන පුරුද්දෙන් දුරස් වීමට අපහසු බැව් විවිධ අධ්‍යනයන් මගින් පවා පෙනී ගිය කරුණක්. පර්යේෂන සාහිත්‍යයන්හි සදහන් අන්දමට වැඩිහිටි පුද්ගලයන්ගෙනුත් 12 % ක් පමණ දෙනා නියපොතු විකන පුරුද්දට ඇබ්බැහි වී සිටිනවා.
පුංචි දරුවන් නියපොතු විකන්නේ ඇඟිලි උරන්නේ ඇයි…?
පුංචි දරුවන් අතර නියපොතු හපන සහ ඇඟිලි උරන පුරුදු ගොඩ නැගෙන්නේ ඇයි කියන ප්‍රශ්නයට ඇත්තටම පැහැදිලි උත්තරයක් නැහැ. ඒ වගේම හැම දරුවෙක් තුළත් මේ පුරුදු නැහැ. සමහර දරුවන් ඇඟිලි ඉරීමත් පුරුද්දක් විදිහට කරන අතර තවත් අය ඒ වෙනුවට නියපොතු හපන්න පුරුදු වෙනවා.
මානසික ප්‍රශ්නයන් ආවාමත්…
අපට වුනත් හිතේ යම් කිසි ගැටුමක් හෝ හිස් බවක් ඇති වුනාම අනුගමනය කරන විවිධ පුරුදු තිබෙනවා. ඒ වගේ චිත්තවේග වෙනස්වීමකදී සහ මානසිකව ඇති වෙන තනිකම මග හරවා ගැනීමට මේ වගේ පුරුදු අනුගමනය කරන්න පුළුවනි.මනෝවිද්‍යාඥයන්ගේ හඳුනා ගැනීමට අනුව දුර්වල පෞරෂ ගති ලක්ෂන නිසාත් නියපොතු විකන සහ ඇඟිලි උරන පුරුදු දරුවන් තුළ ගොඩ නැගෙන්න පුලුවනි.
නියපොතු විකන සහ ඇඟිලි උරන පුරුදු ගැන අවධානයක් දක්වන්නේ ඇයි…?
දරුවන්ගේ නියපොතු විකන සහ ඇගිලි උරන ඇබ්බැහි වීම් ගැන දෙමව්පියන් ලතැවෙන්නේ නිකරුනේ නොවෙයි. ඇඟිලි උරන පුරුදු නිසා දරුවාගේ ශාරිරික සෞඛ්‍යටත් බලපෑම් ඇති වෙනවා. ආගන්තුක විෂබීජ කෙළ මගින් උදරයට ඇතුලු වීම නිසා නිතරම උදරාබාධ ඇති වීමට ඉඩ තිබෙනවා. ඒ වගේම නියපොතු හපන විට ඇඟිලි අග තුවාල වී විෂබීජ ඇතුළු වීම වගේම විදුරුමස් තුවාල වීමේ අවදානමත් තිබෙනවා. ඒ නිසා දරුවන් වෙතින් මේ පුරුදු මග හැර ගත නොහැකි වූ තැන දෙමව්පියන් කනස්සල්ලට පත් වීමත් බොහොම සාධාරණයි.
පුංචි අයට ප්‍රශ්න කියන්න තේරෙන්නේ නැහැ..
පුංචි දරුවන්ටත් පුංචි වුනත් ඔවුන්ගේ තරමට ලොකු ප්‍රශ්න ඇති වෙනවා. ඒවා ඇත්තටම මානසික පීඩාවන් ගෙන දෙන ගැටුම් විය හැකියි.පංතියේ මිතුරන්ගේ වෙනස් විම්, අලුත් පාසලක පරිසරය නුපුරුදු වීම , මව්පියන්ගේ දික්කසාද සහ පවුල් ගැටුම්, පවුලේ සමීපතයන්ගේ වෙන් වීම් හෝ මරණය වගේ හේතු නිසා දරුවාගේ මනසේ ඇති වෙන සංකුලතාවයන්ට විකල්ප විදිහට ඇඟිලි ඉරීම හෝ නියපොතු විකන පුරුදුවලට ඇබ්බැහි වීමට ඉඩ තිබෙනවා.
දෙමව්පියන් එපා කියන නිසා…
බොහෝ දරුවන්ගේ ඉහත පුරුදු ඉතාම ඉක්මනින් මග හරවා ගත නොහැකි වුනොත් ඒවා ඇබ්බැහි විම් ලෙසින් වැඩි වෙන්න පුලුවන්. ඒ නිසා දෙමව්පියන්ගේ බලපෑම් ඇති වෙන විට දරුවන් ඔවුන්ට නොපෙනෙන ලෙසින් තමන්ගේ අවශ්‍යතාවයන් ඉටු කර ගන්නවා.
දරුවාගේ මෙවැනි පුරුදු දුරස් කිරීමට ප්‍රසිද්ධියේ අවමන් කරන්න එපා
දරුවාගේ මෙවැනි පුරුදු දුරස් කිරීමට උපායක් ලෙසින් ප්‍රසිද්ධියේ අවමන් කරන්න එපා. බොහෝ දෙමව්පියන් දරුවාගේ ඇඟිලි උරන සහ නියපොතු විකන පුරුදු ගැන ප්‍රසිද්ධියේ ලැජ්ජාවට පත් කිරීමට පුරුදුව සිටිනවා. ඔවුන් සිතන්නේ එය දරුවාට අපහාස කිරීම මගින් එම පුරුදු ඔවුන් මුදවා ගැනීමයි. එය උපායක් ලෙසින් සැලකුවත් අවමානය නිසා දරුවා පුරුදු වලින් මිදුනත් ඊට වඩා මානසිකව පසුගාමී බවකට පත් වෙන්න පුළුවනි.
එහෙමනම් කටයුතු කළ යුත්තේ කොහොමද..?
- දඬුවමක් ලබා දෙනවාට වඩා මේ පුරුදු නිසා සිදු වෙන හානිය කියා දෙන්න.
- දරුවා රෝගි වීම
- සමාජයේ අප්‍රසන්න චරිතයක් වීම
- ඇඟිලිවල ස්වභාවික ලස්සන නැති වීම
- අනාගතයේදී දත් නෙරා ඒමේ අවදානම දරුවාට මේ ගැන කරුණු කියා දෙන්න. ලස්සනට ඉන්න අවශ්‍ය නම් මේ අහිතකර සහ අනවශ්‍ය පුරුදු වලින් දුරස් වීමේ අවශ්‍යතාවය ඔවුන්ගේ දැනුම් තේරුම් තරමට කියා දෙන්න. අපහාසයට වඩා එයින් බොහෝ දේ දරුවා ඉගෙන ගනීවි.
ඇඟිලි උරන නියපොතු විකන සෑම අවස්ථාවකදීම අත් සේදීමට නියම කරන්න
දරුවා නියපොතු විකන සහ ඇඟිලි උරනවා දකින සෑම අවස්ථාවකදීම අත් සේදීමට නියම කරන්න. එය එක්තරා ආකාරයකින් දරුවාගේ ශාරිරික පවිත්‍රතාවයටත් ඉතා වැදගත් වෙනවා. අනිත් අතට අත් සේදීම හිරිහැරයක් ලෙසින් දැනෙන නිසා ඒ වෙනුවෙන් වූ නිමිත්ත හෙවත් ඇඟිලි උරන සහ නියපොතු විකන පුරුදුවලින් දුරස් වීමට දරුවා තුලින්ම උනන්දුවක් ඇති වෙනවා. එය දඬුවමට වඩා බලගතු විදිහට ක්‍රියාත්මක වේවි.
තෑග්ගක් දෙන්න…
දරුවාගේ මේ පුරුදුවලින් දුරස් කිරීමට මාර්ගයක් ලෙසින් මෙම පුරුදුවලින් දුරස් වී සිටින අවස්ථාවන් අගය කරන්න. ඒ වෙනුවෙන් රතු සහ කළු තරු ලබා දෙන සටහනක් භාවිතා කරන්න පුළුවනි. එම සටහන අනුව දරුවා ඇඟිලි ඉරීම හෝ නියපොතු හැපීම නොකරන දිනයන්හි රතු තරුවක්ද, එවැනි ක්‍රියාවන්හි නිරත වන දිනයට කළු තරුවක්ද ලබා දෙන්න. මේ තරුවකින් ඔබට කෝටුවකින් කළ නොහැකි බොහෝ දේ කිරීමට ඉඩ තිබෙනවා. කළු තරුවට නොරිසි දරුවා දවසේ රතු තරුව වෙනුවෙන් වෙහෙසෙනු ඇත. ඒ නිසා මුලින් ආයාසයෙන් හෝ මෙම පුරුදුවලින් මිදී සිටින්නට දරණ උත්සාහය කාලය සමග ඔහුට එය අපහසුවෙන් කිරීමට අවශ්‍ය නැති තරම් සාමාන්‍ය දෙයක් වීම නිසා ඇබ්බැහියෙන් මුදවා ගැනීම අපහසු කාර්යක් නොවනු ඇත.
දරුණු දඬුවම් එපා…
අද කාලයේ ‘‘දෙමව්පියකරණය ‘‘ගැන ඇති දැණුවත් වීම නිසා බොහෝ දෙමව්පියන් දරුවන් ගැන ආදරය, ආරක්ෂාව වගේම රැකවරණය ගැන වැඩි උනන්දුවක් දක්වනවා. නමුත් අතීතයේදී බොහෝ දෙම්විපයන් මෙවැනි පුරුදුවලින් දරුවන් ගලවා ගැනීමට ඇඟිලිවල කොච්චි මිරිස්, වෙනත් තිත්ත දෑ ආලේප කළ අවස්ථාවන් තිබුනත් අද එවැනි අකාරුණිකම් වලින් බොහෝ දෙමව්පියන් දුරස්ව සිටීම දරුවන්ගේ වාසනාවක් වී තිබේ. ඒ වෙනුවට අද භාවිතා කළ හැකි විවිධ ක්‍රමඋපායන්ද හඳුනා ගෙන තිබෙනවා. ඒ අතර
- අතට මේස් එකක් දැමීම
- ඇඟිලිවලට දිදාලයක් දැමීම
- තාවකාලික ලෙසින් ප්ලාස්ටරයක් දැමීම
මේ අන්දමින් ඇති අවහිරතාවයන් නිසා දරුවාගේ කටයුතු නිදහසේ කර ගෙන යෑමට ඇති අවස්ථාව ඇහිරී යෑම නිසා ක්‍රමයෙන් මෙම ඇබ්බැහි විම් වලින් මිදෙන්නට අවස්ථාව සැලසෙනු ඇත.
