“පුතා හැම නිතරම වගේ මොනවා හරි අපහසුතාවයකින් ඉන්නවාද කියලා මට නිතරම හිතුණා. ඒ අතරේ තමයි මට මේ දරුවා නිතර නිතර ඉකිලි හරිය කසනවා නේද කියලා හිතුණේ. දැන් තරුණ දරුවෝ නිසා දෙයක් එකපාර අහන්නත් බෑ වගේ. ඒත් දරු‍වන්ගේ අපහසුතා ගැන අම්මලා තාත්තලා විදියට අපිට එයාලගෙන් අහන්නත් දරුවෝ විදියට දෙමාපියන්ට තමන්ගේ ඕනෙම දෙයක් කියන්නත් බැරි කමක් නැති නිසා මම පුතාගෙන් ඒ ගැන අහන්න හිතුවා.
පුතා මම දැක්කා ඔයා නිතරම වගේ ඉකිලි හරිය කසනවා. ඇයි ඒ? ඔයා හොඳට පිරිසිදුවට ඉන්න දරුවෙක්නේ
ඔව් අම්මා.. දැන් ටික කාලයක් තිස්සේ මේක මට තියෙනවා. අපේ ටීම් එකේ කීපදෙනෙක්ටත් තියෙනවා. එයාලා ක්‍රීම් එකක් අරන් ඇවිත් තිබුණා. මමත් ඒක ගෑවා. ගෑවම අඩු වුණාට ආයේ එනවා.
අනේ අනේ පුතා.. අම්මට තාත්තට නොකිය එක එක්කෙනා දෙන බෙහෙත් ජාති පාවිච්චි කරන්නේ ඇයි ඔයා. අසනීපයක් තියෙනවා නම් ඩොක්ටර් කෙනෙක් හමුවෙලා බෙහෙත් ගන්න ඕනේ..
මේවා කියන්න පුළුවන්ද අම්මා ඩොක්ටර්ස්ලට..
ඒ මොකද බැරි.. හැම ලෙඩකටම ඩොක්ටර්ස්ලා ඉන්නවා. ලෙඩ හැදෙන්නේ මිනිස්සුන්ට තමයි. ඉතිං ඒවාට බෙහෙත් ගන්න අපි ලැජ්ජ වෙන්න හොඳ නැහැ පුතා
අර අපේ ටීම් එකේ කසුන්ගේ ගෙදර අයටත් මේක හැදිලා. එයාලගේ මල්ලිගේ අගේ තැන් තැන් වල රතු පාට රෑෂ් එකක් වගේ ඇවිත්. ඒකේ හම ගැලවිලා යනවලු. හරියට කසන්නත් අරගෙන. එයාටත් මේ ක්‍රීම් එකම තමයි ගාලා තියෙන්නේ. ඒකට අඩු වෙලා ගිහින්. ඒ වුණාට නංගිගේ මූණේ ලප ආපු නිසා ඩොක්ටර් කෙනෙක් ලගට එක්ක යන්න ඕනේ කියලා කසුන්ගේ අම්මා කියලා තිබුණා.
බලන්න ඉතිං… වැඩිහිටියොත් ඔහොම නම් දේවල් කරන්නේ ඔයාලා ගැන පුදුම වෙන්න දෙයක් නැහැ.
එයාලගේ තාත්තට දියවැඩියාවත් තියෙනවා. තාත්තගෙත් මුළු ඇඟ පුරාම ලප හැදිලලු අම්මා.”
මෙවැනි අවස්ථාවකදී අපි ක්‍රියාත්මක වෙන්න ඕනේ කොහොමද කියලා බොහෝ දෙනෙක්ට අවබෝධයක් නැහැ. ලැජ්ජාව නිසා හෝ වෙලාවක් නැති නිසා හෝ ආර්ථික ප්‍රශ්න නිසා හෝ මෙවැනි තත්ත්ව වලට වෛද්‍ය උපදෙස් ලබා ගැනීම බොහෝ දෙනක් කල්දානවා. නමුත් ආසන්නම රජයේ රෝහලේ චර්ම රෝග සායනයට යොමු වුණොත් මේ තත්ත්වය මොකද්ද ඒ සඳහා අවශ්‍ය ප්‍රතිකාර මොනවද කියලා වෛද්‍ය උපදෙස් ලබාගත හැකියි.
කසුන්ගේ නිව‍සේ අයට වැලදී තිබුණේ දිලීර රෝගයක් බව චර්ම රෝග සායනයේ වෛද්‍යවරු තීරණය කර තිබුණා. එයට ප්‍රතිකාර ලෙස ආලේපන වර්ගවලට අමතරව කරල් වර්ගයක් ලබා දී තිබූ අතරම ඒ සියලු දේ නොමිලේ රෝහල වෙතින් ලබා දී තිබීම අද පවතින ආර්ථික ගැටලු හමුවේ කසුන්ගේ මව්පියන්ට විශාල සහනයක් වී තිබුණා.
දිලීර හේතුවෙන් ඇති වුණු මේ රෝග තත්ත්ව මොනවාද?
සමෙහි ඇතිවන දිලීර රෝග අතරින් රිංවර්ම් හෙවත් ටීනියා (ring worm/ Tinea) ලෙස සාමාන්‍ය ව්‍යවහාරයේ හැඳින්වෙන රෝගය මේ දිනවල ඉතා සුලබව දක්නට ලැබෙනවා.
එයට අමතරව ඉතා සුලබ තත්ත්වයක් වන අලුහම් ඇතිවන්නේත් දිලීරයක් නිසායි. අලුහම් ඇතිකරන දිලීරය අපගේ සමෙහි ආරක්ෂාව සඳහා සාමාන්‍යයෙන් පවතින ක්ෂුද්‍ර ජීවීන්ගෙන්ම එකක් නිසා සමහර අයට නිතර නිතරම අලුහම් ඇතිවීමේ අවදානමක් පවතිනවා. මෙනිසාමදෝ අලුහම් අතීතයේ සිටම රූප ශෝභාවේ අංගයක් ලෙස ගෝමර නමින් හැඳින්වුන අතර එයට ප්‍රතිකාර කළ යුතු යැයි බොහෝ ශ්‍රී ලාංකිකයන් සිතන්නේ නැහැ.
ශ්ලේෂ්මල පටලවල (මුඛය සහ ලිංගාශ්‍රිත ප්‍රදේශවල) ඇතිවන දිලීර ආසාදන සාමාන්‍යයෙන් හටගන්නේ කැන්ඩිඩා නම් දිලීරය නිසා වන අතර මෙය ටීනියා ආසාදනයට වඩා තරමක් වෙනස් විය හැකියි. මෙහිදී මුඛය සහ දිවෙහි සුදු පැහැති පටලයක් ඇතිවීම, යෝනි මාර්ගයෙන් සුදු පැහැති ස්‍රාවයක් පිටවීම සමග කැසීම ඇතිවීම, පුරුෂ ලිංගය කෙළවර කැසීමක් සමග සම ගැලවී යාම වැනි රෝග ලක්ෂණ ඇතිවිය හැකියි. මෙවැනි ලක්ෂණ බොහෝ දුරට ඇතිවන්නේ දියවැඩියාව, ප්‍රතිශක්තියට බලපෑම් ඇතිකළ හැකි රෝග වැනි රෝගවලින් පෙළෙන අයටයි.
ටීනියා ආසාදන යනු මොනවාද?
ටීනියා ආසාදන ඇති වන්නේ සමෙහි මතුපිට ස්ථරය තුළ වර්ධනය වන දිලීර විශේෂයන් නිසායි. මෙම දිලීර වලට සම, හිසකෙස් සහ නිය යන සමෙහි අංග සියල්ලෙහිම ආසාදන ඇති කළ හැකි නමුත් වඩාම කරදරකාරී වන්නේ සමෙහි දිලීර ආසාදනයි. සාමාන්‍යයෙන් ශ්ලේෂ්මල පටලවල මෙම ආසාදනය ඇතිවන්නේ නැහැ. මෙම ආසාදන ස්පර්ශය මගින් අයකුගෙන් තව අයකුට බෝවීම සිදුවන අතර, ඇඳුම් සහ සමෙහි ස්පර්ශ වන වෙනත් ද්‍රව්‍ය මගින්ද බෝවීම සිදු විය හැකියි.
රෝග ලක්ෂණ
සම මතුපිට රතු පැහැති කසන ලප ලෙස හටගන්නා මෙම ආසාදනය බොහෝ විට ඉකිලි, කිහිලි වැනි දහදිය දැමීම වැඩිපුර සිදුවන ස්ථාන වල පළමුව හටගත හැකියි. පසුව ශරීරයේ ඕනෑම ස්ථානයකට පැතිරිය හැකි වන අතරම මුහුණ, කන් වැනි ස්ථාන වල ඇති වූ විට හඳුනා ගැනීම තරමක් අපහසුයි.
ශ්‍රී ලංකාවේ චර්ම රෝග සායනවල ප්‍රතිකාර කරන රෝග තත්ත්ව අතුරින් දෙවැනියට සුලබම රෝග තත්ත්වය වන්නේ දිලීර ආසාදනයි. වර්තමානයේදී ශ්‍රී ලංකාවේ ටීනියා ආසාදන ඇතිකරනු ලබන දිලීර ප්‍රභේදයේ වෙනසක් සිදුව ඇති බව පරීක්ෂණ වලින් අනාවරණය වී තිබෙනවා. එයට අමතරව මෙම දිලීර සුලබව භාවිත වන දිලීර නාශක ඖෂධ වලට ප්‍රතිරෝධී වීමක් සිදුවී තිබේද යන්න පිලිබඳව පර්යේෂණ මේ වනවිට සිදුවෙමින් පවතිනවා. මෙම රෝගය ඉතා දීර්ඝ කාලයක සිට පවතින රෝගයක් වුවද කරදරකාරී වසංගතයක් ලෙස පැතිරී යන බවක් මෑතකදී දැකගන්නට ලැබුණා.
ටීනියා ආසාදනය වසංගතයක් ලෙස පැතිරී යාමට හේතු
- නිවැරදි ප්‍රතිකාරයකට යොමු නොවී නොයෙකුත් ආලේපන වර්ග භාවිතා කිරීම
- යන්තම් සුවයක් දැණුනු වහාම ප්‍රතිකාර නවත්වා දැමීම
- කෘත්‍රිම රෙදිවලින් නිම කළ තද ඇඳුම් භාවිතය
- පෞද්ගලික ස්වස්ථතාව පිළිබඳව සැලකිලිමත් නොවීම
- ඇඳුම් හවුලේ භාවිතය
ඔබටත් ඉහත දැක් වූ රෝග ලක්ෂණ ඇත්නම්,
- චර්ම රෝග සායනයකින් හෝ චර්ම රෝග වෛද්‍යවරයකුගෙන් ප්‍රතිකාර ලබාගන්න.
- හිතුමතේ “කසනවාට බෙහෙතක්” ලෙස ෆාමසිවලින් ආලේපන වර්ග ලබා පාවිච්චි නොකරන්න (බොහෝ විට එවැනි ආලේපනවල ස්ටෙරොයිඩ වර්ග අඩංගු වන අතර ඒවා භාවිත කිරීමෙන් රෝග ව්‍යාප්තිය වේගවත් වීමත් රෝගය හරිහැටි හඳුනා ගැනීමට අපහසු වීමත් විය හැකියි)
- වෛද්‍යවරයා ලබා දෙන ආලේපන ලපය මතුපිට පමණක් නොව එය අවට අඟලක් පමණ ප්‍රදේශයකත් ආලේප කරන්න
- වෛද්‍ය උපදෙස් අනුව අදාල වාර ගණන ආලේපන පාවිච්චි කරන්න
- වෛද්‍යවරයා ලබා දෙන පෙති හෝ කරල් නියමිත කාලය තුළ භාවිත කරන්න. (සුවයක් දැනුනද සමෙන් රෝග කාරක දිලීර ඉවත් වීමට යම් කාලයක් ගත වන නිසා බොහෝවිට ප්‍රතිකාර ලබා ගත යුතු මුළු කාලය සති හයක් පමණ විය හැක)
- ඇඳුම් අන්‍යයන් සමග මාරු කරමින් ඇඳීමෙන් වළකින්න
- ඔබගේ ඇඳුම් වෙනම සෝදන්න. අන් අයගේ ඇඳුම් සමග එකට දමා සේදීමෙන් වළකින්න (ඇඳුම් සහ තුවාය නටන ජලයේ තම්බා/ තද අව්වේ වියලා/ තද රස්නයෙන් මැදීම වැනි ක්‍රියා මගින් ඇඳුම්වල තැවරී ඇති දිලීර ඉවත් කරගත හැක)
- එක් අයෙකුට ලබා දුන් ඖෂධ හවුලේ පාවිච්චි කිරීමෙන් වලකින්න (පවුලේ කිහිප දෙනෙක්ම රෝගී වී ඇත්නම් සියලු දෙනාටම ප්‍රතිකාර ලබාගන්න. ගර්භණී/කිරිදෙන මවක් නම් වෛද්‍යවරයා දැනුවත් කරන්න)
- දියවැඩියාව, ප්‍රතිශක්තියට බලපෑම් කරන රෝග ඇත් නම් ඒවා නිසිලෙස පාලනය කරගන්න.
දිලීර හේතුවෙන් ඇති වන ආසාදන බිය විය යුතු රෝග තත්ත්වයන් නොවේ. හිතුමතේ ආලේපන වර්ග භාවිත නොකොට නිසි වෛද්‍ය උපදෙස් හමුවේ ප්‍රතිකාර ලබා ගැනීමෙන් පූර්ණ සුවය ලබා ගත හැකිය. එසේම ඔබ, ඔබේ පෞද්ගලික පිරිසිදුකම ගැන සැලකිලිමත් වෙන්න.
විශේෂඥ මතය, අදහස සහ මූලික සටහන:
චර්ම රෝග විශේෂඥ වෛද්‍ය ඉන්දිරා කහවිට
