පුංචි පැටියෙක් කුසට ආ බව දැනගත් මොහොතේ සිටම කියා ගන්න බැරි සතුටකින් හිටියත් මුල වරට අම්මා කෙනෙක් වෙන්න යන කාන්තාවකට දරුවාගේ වැඩ කටයුතු නිවැරදිව පරිස්සමෙන් කරගන්න පුළුවන්ද කියන බය හිත පුරාම තියෙනවා. මොකද අද වෙද්දී අපි ජීවත් වෙන්නේ අම්මා, තාත්තා, නැන්ද, මාමා , පුංචි බාප්පා එකට ජීවත් වෙන ලොකු පවුලක නෙවෙයි. එහෙම වුනානම් අම්මට තියෙන්නේ දරුවට කිරි ටික දීලා ආදරයෙන් තුරුළු කරන් ඉන්න විතරයි. අනිත් හැමදේම වැඩිහිටියන්ගේ අනුදැනුම ඇතිව කරන්න අවස්ථාව ලැබෙනවා. මොන දේ කරගත්තත් දරුවා නාවන්න නම් අලුත් අම්මා කෙනෙක් හරිම බයයි. සබන් නිසා දරුවා ලිස්සලා යාවිද? කන්වලට වතුර යයිද? වගේ ගොඩක් දේ වල් ගැන අලුතින් අම්මා කෙනෙක් වෙන්න යන කාන්තාවක් කල්පනා කරනවා. ඒත් ඇත්තටම පුංචි පැටියෙක් නාවන එක හිතෙන තරම් භාරදුර කාර්යයක් නෙවෙයි. අපි හරිම ක්‍රමය ඉගෙන ගත්තොත් පැටියා නාවන්න හැම අම්මා කෙනෙක්ටම පුළුවන්. බබා ලැබිලා රෝහලෙන් පිටවෙන්න කලින් බබාව නාවන හැටි අම්මාට බලන් ඉන්න පුළුවන්. ඒ වගේම අවශ්‍ය දේ හෙදියන්ගෙන් අසා දැනගන්නත් පුළුවන්. මුළු ගැබිනි සමය තුළම තමාගේ වෙනැල්ල වගේම ළගින්ම හිටිය සැමියාත් ඉද්දි අම්මා කෙනෙක් මේ දේවල්වලට බය වෙන්න නම් ඕනේ නැහැ. මොකද දෙන්නත් එක්කම එකතු වෙලා පුංචි පැටියා නාවන්න පුළුවන්.
පුංචි පැටියා නාවන්නේ කොයි වෙලාවටද?
අලුත උපන් බිළිදෙක් නාවන්න සුදුසුම වෙලාව උදේ වරුව. හොඳින් එළිය වැටෙන ස්ථානයක් මේ සඳහා තෝරාගත යුතුයි. මොකද ඉපදුණු ගමන් පුංචි පැටව් කහ පැහැ වෙන අවස්ථා ගැන අපි අහලා තියෙනවා. ඒ නිසා අපිට පැටියව නාවන මේ වෙලාව එයාව හොඳින් පරීක්ෂා කරන්නත් අවස්ථාවක් කර ගත හැකියි. ඒහෙම වෙනස් පැහැයක් නිරීක්ෂණය වුණොත් අපිට වෛද්‍යවරයාගේ උපදෙස් කරා යොමු විය හැකියි. ඒ වගේම නාවන්න පැය භාගයකට කලින් වගේ පුංචි බණ්ඩිය පිරෙව්වා නම් නාන අතරේ කුක්කු ඉල්ලලා එයා අඬන එකක් නැහැ.
පුංචි පැටියා නාවන්න අවශ්‍ය වෙන්නේ මොනවද?
- ලොකු සහ කුඩා ප්‍රමාණයේ බේසම් දෙකක්
- දරුවාගේ හිසට වතුර දාන්න කුඩා භාජනයක් (වැඩිහිටියන් නම් මේ සඳහා හිල් පොල්කට්ටක් යොදා ගන්නවා)
- ළදරු සමට උචිත Ph අගයකින් යුතු සබන් කැටයක් (මෙය වෛද්‍ය නිර්දේශය මත ලබා ගන්නේ නම් වඩාත් සුදුසුයි)
- පුළුන් බෝල
- ළදරු තුවායක් (මල්පීස්/බැන්ඩේජ් රෙද්දෙන් නිමවා ඇති නම් වඩාත් හොඳින් ජලය උරාගනී.)
- නෑවීමෙන් පසු දරුවා උණුසුම් කිරීමට අවශ්‍ය ඇඳුම් (නැප්කින්, ළදරු ගවුමක් සහ ප්ලැනල් රෙද්දක්, අත් සහ පා ආවරණ, තොප්පයික්)
පුංචි පැටියට නාවන්න වතුර ?
ඉන්න ඉන්න … අම්මා පොඩ්ඩක්වත් බය වෙන්න එපා. පැටියා නාවන්න වතුර සූදානම් කරගන්න හැටි තමයි මේ කියන්න යන්නේ. වැඩි උණුසුම වගේම වැඩි සීතලත් පැටියට දරාගන්න අමාරුයි. ඒ නිසා මද රස්නේ වතුර තමයි පැටියට සුදුසුම. අපි අපේ වැලමිට වතුරට දාලා තමයි වතුරේ උණුසුම පරීක්ෂා කරන්නේ.
අපි දැන් බබාව නාවන්න පටන් ගනිමු නේද?
පුංචි පැටියෙක් නාවද්දි වැඩිහිටි අපි නානවා වගේ මුළු ඇඟටම වතුර වැටෙන්න සලස්වන්නේ නැහැ. අපි මුලින්ම සෝදන්නේ දරුවාගේ හිස. හිස සෝදලා පිහදලා අවසන් වෙනතුරු පැටියාගේ ඇඟ හොඳින් උණුසුම්ව තබා ගැනිමට ඔතා ගන්න ඕනේ. මොකද බබාගේ මුළු ඇඟම නිරාවරණය වුණොත් අම්මාගේ කුස ඇතුළේ උණුසුමු පරිසරයක වැඩුණු මේ පුංචි පැටියට සීතල දරා ගන්න බැරි වෙනවා.
ඒ වගේම තමයි අපි පුංචි පැටියවි අල්ලගන්න විදිය. අලුත උපන් පැටියෙකුගේ කොඳු ඇට පෙළ, බෙල්ල ශක්තිමත් නැහැ කියලා අපි කවුරුත් දන්නවා. ඉතිං එයාව නාවද්දි ඒ බෙල්ලට වගේම කොන්දට හොඳ ශක්තියක් ලබා දිය යුතුයි. ඒ නිසා අපි පැටියගේ කොන්ද අපේ අතේ වැලමිටේ සිට අලුල දක්වා එන පරිදි රඳවා ගැනිම කළ යුතුයි. එවිට දරුවාගේ කොන්දට වගේම අපේ අත්ලෙන් හිසට ලැබෙන සහය නිසා දරුවා පරිස්සම්.
මුලින්ම පැටියාගේ ඇස්දෙක
පුංචි වුණත් බබාගේ ඇස්වලත් කබ එනවා. ඉතිං අපි ඒවා පිරිසිදු කරන්නම ඕනේ. ඉතිං ඒ සදහා පිරිසිදු කපු පුලුං බෝල තමයි වඩාත්ම සුදුසු. මුලින්ම බබාගේ ඇහේ ඇතුළු පැත්ත පිරිසිදු කරගන්න ඕනේ. ඒ කියන්නේ ඇහේ ඇත්ළත කොනේ සිට පිටතට එන විදියට තමයි අපි ඇහැ පිරිසිදු කරගන්නේ. ඊට පස්සේ අත තෙමමින් පැටියගේ පුංචි මූණ තෙත මාත්තු කරලා වගේ පිරිසිදු කරගන්න අපිට පුළුවන්.
දැන් පැටියගෙ හිස
පුංචි මූණ පිරිසිදු කරගතතට පස්සේ පැටියාගේ කන් දෙකට වතුර යන්නේ නැති වෙන්න අපේ මාපට ඇඟින්ලෙන් සහ සුළැගිල්ලෙන් වසා ගෙන (සමහර අය පුංචි පුළුං බෝල දෙකකින් කනේ සිදුර වසනවා. ඒත් බොහෝ දෙනෙක් එහෙම කරන්න නම් බයයි) පුංචි කෝප්පයෙන් හිසේ ඉදිරි කොටසට වතුර බේරී පහතට යන ආකාරයට වතුර ටිකෙන් ටික වත්කරන්න. මෙසේ වතුර වතකරද්දී බබාගේ කන්වලට නහයට වතුර නොයන්නට වග බලාගත යුතුමයි.සමහර අත්තම්මලා කියනවා වතුර කෝප්ප ගාන ගණන් කරන්න ඕනේ කියලා. නමුත් වෛද්‍යවිද්‍යාත්මකව ගත්තම නම් කළ යුත්තේ දරුවාගේ හිස හොදින් පිරිසිදු වනතුරු ඔබ යොදන සබන් හෝ ෂැම්පූ වර්ගය හොඳින් ඉවත් වන තුරු ඉතා සෙමින් සුමුදුව (අලුත් පැටියෙක්ගේ හිසකබල ශක්තිමත් නැති නිසා) සේදීම පමණයි. ඉන් පසුව හොදින් තෙත මාත්තු කිරිමෙන් පසුව පුංචි පැටියාගේ සිරුර පිරිසිදු කර ගැනීමට හැකියි.
දැන් පුංචි පැටියාගේ ඇඟ
පැටියාගේ සිරුර පිරිසිදු කරද්දී අපි විශේෂයෙන්ම පෙකෙණිය ගැන සැලකිලිමත් විය යුතුමයි. සාමාන්‍යයෙන් පුංචි පැටියා ඉපදිලා සතියක් පමණ ගත වෙද්දී පෙකෙණිය හැලිලා යන බව ඔබ දන්නවා. එතෙක් වියළී යන තුරු අප එය ඉතා පරිස්සමෙන් බලා ගත යුතුයි. යම් විදියකින් පැසවීමක් හෝ ඒ හරහා විෂබීජයක් ඇතුළු වීම නිසා හෝ යම් යම් ගැටලු මතු විය හැකියි. ඒ නිසා පැටියාගේ පෙකෙණියේ පැහැය සාමාන්‍ය තත්ත්වයේ පවතිනවාද? දුර්ගන්දයක් තිබේද? සැරව ගතියක් තිබෙනවාද යන කරුණු ගැන සැලකිලිමත් වෙන්න.
දැන් පුංචි පැටියගේ ඇදුම් ඉවත් කරලා වතුරට බස්සලා ඇඟ හෝදන්න ඔබට පුළුවන්. මුල් දින ටිකේ බබා ඇඩුවත් ඒක ටික දවසකින් හරියනවා.
දැන් පුංචි පැටියාගේ ඇඟ හොදින් පිරිසිදු කරගන්න ඕනේ. බෙල්ල යට, අත් යට, කකුල් අතර, යෝනි පෙදෙස, පසු පෙදෙස ඉතා මෘදුව සෙමින් පිරිසිදු කරගත යුතුයි. වෛද්‍ය නිර්දේශය මත ඔබ පැටියා වෙනුවෙන් ලබා ගත් පිරිසිදු කාරක යොදනවා නම් ඒවා හොඳින් ඉවත් වන තුරු දරුවා පිරිසිදු කළ යුතුයි. කිසි විටෙක දරුවා තදින් ඇතිල්ලීම නම් කරන්න එපා.
දැන් ඔන්න පුංචි පැටියා නාවලා ඉවරයි
එහෙම නම් ඉක්මනින්ම පැටියා හොඳින් තෙතමාත්තු කරලා පෙකෙණිය හොඳින් වියළා ඇඳුම් අන්දවන්න. පෙකෙණිය වෙනම පිරිසිදු කිරීමක් හෝ කොලෝන් වර්ග/ස්ප්‍රීතු වර්ග යෙදීම හෝ කිසිසේත්ම නොකළ යුතුයි නැවීමෙන් පසු පෙකෙණිය හොඳින් තෙත මාත්තු කිරීම (ඒ සඳහා හොඳින් පිරිසුදු කර අයන් දරගත් මල්පීස් වැනි සිනිදු රෙදි කැබිල්ලක් යොදාගත හැකියි) පමණක් ප්‍රමාණවත් බව අම්මා මතක තබා ගන්න. මේ සියලුම කාර්යයන් විනාඩි 10 -15 අතර කාලය තුළ අවසන් කරගන්නත් අම්මා සැලකිලිමත් විය යුතුයි.
පුංචි පැටියට ඇඳුම් අන්දවද්දිත් අම්මා සැලකිලිමත් වෙන්න ඕනේ කරුණු කීපයක්ම තියෙනවා. එකක් තමයි නැපි කටුව. අපේ රටේ බොහොමයක් අම්මලා දරුවා ලැබුණු ගමන් ඩයපර් අන්දවන්නේ නැහැ. නැප්කින් එක තමයි පාවිච්චි කරන්නේ. අපි පැටියට නැප්කින් එක හෝ ඩයපර් එක හෝ කියන මේ දෙකන් කුමන එක පාවිච්චි කළත් ඒක අන්දවද්දී පෙකෙණිය නොවැසෙන ආකාරයට ඇන්ද වීමට වග බලාගන්න. එහෙම නැතිනම් මුත්‍රාවලින් නැපි එක තෙත් වෙද්දී පෙකෙණිය අසාදනවලට ලක්වීමට ඉඩ තියෙනවා.
ඒ වගේම පුංචි පැටියාට අනතුරු නොවන ආකාරයට (පැටියාගේ සම මත නැපි කටුව නොඇනෙන ලෙස නැපි එක ඔසවා ඔබේ අත යටින් තබාගන්න) නැපි කටුව රදවන්න. නැතිනම් නැපිය පැටියාගේ උදරයට තද නොවන සේ ගැට ගසන්න. දැන් ඔබට පුළුවන් පුංචි පැටියව හොඳින් උණුසුම් වන විදියට ඇඳුම් අන්දවලා අත් පා ආවරන පලදලා උණුසුම රැකෙන රෙද්දකින් ඔතන්න. ඔන්න දැං පැටියා පිරිසිදු කරලා ඉවරයි. දැන් පැටියව අම්මාගේ තුරුලට අරන් පුංචි බණ්ඩිය පිරෙන්න කුක්කු දුන්න නම් පැය කීපයක්ම පැටියා සුවසේ නිදියනවා.
විශේෂඥ මතය, අදහස සහ මූලික සටහන:
ක්‍රිෂාන්ති ගංගා කුමාරිහාමි මහත්මිය
සූතිකා පුහුණු හෙද නිළධාරිනි (I ශ්‍රේණිය)
නවජ සූති දැඩි සත්කාර ඒකකය
පළාත් මහ රෝහල, කුරුණෑගල
