දුව එන්න එන්නම මහත් වෙනවා වගේ .. කෑම ටිකක් අඩු කරන්න ඕනේ
ඔය හැදෙන වයසට ඔහොම තමයි .. තාම අවුරුදු 13යි. කෑම පාලනය කරන්න පුළුවන්ද? දරුවට ආස කෑමක් බීමක් කන්න බොන්න දෙන්න
දියණියගේ මහත වැඩිවීම ගැන අම්මා කලබල වුවත් තාත්තා දැරුවේ එවැනි අදහසක්. ආච්චි අම්මා පැවසුවේ ගෑනු දරුවෙක් පිරිලා ඉද්දි හරි හැඩයි කියාය.
ඒ අදහස් කෙසේ වෙතත් නව යොවුන් වියේ මුල් අවධියේ සිටි මේ දියණිය ඇයගේ ගෙල, අත් යට, දෙපා අතර සම කලු වීම සහ ඝනකම් වීම ගැන සිටියේ කණස්සල්ලයකිනි. අම්මාගේ ඇයට ලැබුණු උපදෙස වූයේ හොඳින් කුණු අතුල්ලා පිරිසිදු කළ යුතු බවයි. දිනෙන් දින ගත වෙද්දී මුහුණේ කුරුලෑ ඇතිවීම, නිකට ප්‍රදේශයේ රෝම වැඩීම නිසා ඇය මානසිකව ඉතා අසරණ තත්ත්වයකට පත් වූයේ පාසැලේ මිතුරියන්ගේ උසුළු විසුළුවලට ලක් වීමට සිදු වූ නිසාමය. අවසානයේ ඇය තමාට චර්ම රෝග පිළිබඳ වෛද්‍යවරයෙක් හමු විය යුතු බව මවට පැවසීය.
වෛද්‍යවරිය ඇයගේ උස සහ බර මැන බලා ශරීර ස්කන්ධ දර්ශකය ගණනය කර ඇය අධි බර තත්ත්වයේ සිටින බවත් ඇගේ ඔසප් චක්‍රයේ අක්‍රමවත් බව, කුරුලෑ, ගෙල කළු වීම සහ උඩු තොලේ රෝම යන සියල්ලම බර මට්ටම සමග බැඳී ඇති වව පැවසුවා. පියා දියවැඩියා රෝගය සහිත අයෙක් නිසා ඇයගේද රුධිර පරීක්ෂණ කිපයක් සිදු කළා. ඒවායින් තහවුරු වූයේ ඇ පූර්ව දියවැඩියා තත්ත්වයේ සිටින බවයි. ඊට අමතරව අක්මාවේ තෙල් තැන්පත් වීමක් ඇති බවට ද සැකයක් වෛද්‍යවරයාට පැණ නැගුණ නිසා ඒ සඳහා ඇයට ස්කෑන් පරීක්ෂණයකට යොමු කෙරුණා. ඇය පෝෂණවේදියෙකු වෙත යොමු කෙරුණේ දැනට ලබාදුන් ප්‍රතිකාර වලට අමතරව බර පාලනය කරගැනීමටත්, වඩා ක්‍රියාශීලී ජීවන රටාවකට යොමු වීමට අවශ්‍ය උපදෙස් ලබාගැනීම සඳහායි.
අධි බරට එකම හේතුව ආරය හෝ වැඩියෙන් කෑම නොවන අතර සමහරවිට හෝමෝන ක්‍රියාකාරිත්වයේ ගැටළුවක් එයට හේතුවිය හැකියි.
අධි බර සමගින් ඔබ පසුපස එන කරදර
අද වන විට ආහාර පුරුදු වල වෙනස්කම්, ආර්ථික තත්ත්වය සහ ක්‍රියාශීලී බවින් අඩු ජීවන රටාව යන හේතු මත අධි බර හෙවත් ස්ථුල භාවය වැඩිහිටියන් මෙන්ම දරුවන් අතරත් එකසේ දැකිය හැකියි. ස්ථුල බවත් සමග දියවැඩියාව, අධි රුධිර පීඩනය, කොලෙස්ටරෝල් මට්ටම ඉහළ යාම, හෘද රෝග, ආඝාතය වැනි තත්ත්වයන් අත්වැල් බැඳගෙන අප වෙත එයි.
- අධි බර සහිත කාන්තාවන් සහ තරුණියන් අතර මාසික ඔසප් වීම අක්‍රමවත් වීම හා මදසරුබව ඇතිකරන පොලිසිස්ටික් ඕවරි සින්ඩ්‍රෝම් නම් තත්ත්වය සුලබව දක්නට ලැබෙනවා.
- අක්මාවේ තෙල් තැන්පත් වීම හෙවත් ෆැටි ලිවර් රෝගයද අධිබර සමග ඇති විය හැකියි
- ස්ථුල අයකුගේ සමට යටින් සාමාන්‍ය ප්‍රමාණයට වඩා ඝන තෙල් තට්ටුවක් පවතින අතර මෙය නිසාම සම වඩාත් ඝන වීම සහ අවපැහැවීම දැකිය හැකියි. මෙය වඩාත් පැහැදිලිව දැකිය හැක්කේ ගෙල සහ කිහිලි ඉකිලි වැනි සිරුරේ නැමෙන ස්ථාන වලයි. සමහරවිට ඇඟිලිවල පිටුපස තද කළු පැහැති ඝනවීම්ද මෙම තත්ත්වයේදී දැකිය හැකියි.
- වැඩිහිටි අයගේ නම් මුහුණේ නළල සහ කම්මුල් පෙදෙසේ තද කළු පැහැයක් ඇතිවීම දැකිය හැකියි. එවැනි විටක සිරුරේ පැහැයට වඩා මුහුණ අවපැහැ ගැන්වී තිබීම මානසික ආතතියට පවා හේතුවක් විය හැකියි.
- අධික ලෙස කුරුලෑ ඇතිවීම සහ උඩුතොල සහ නිකට ප්‍රදේශයේ ඝන රෝම ඇතිවීම මෙම තත්ත්වයේදී සුලබයි.
- සිරුර මහත් වීමත් සමග සම ඇදීම සිදුවන නිසා සමෙහි ඇදීම් ලකුණු (තරුණ දරුවන් ඉක්මණින් උසින් වැඩිවීම නිසාද මෙවැනි ඇදීම් ලකුණු ඇතිවිය හැකියි) ඇතිවිය හැකියි.
ඔබේ දරුවාට හෝ ඔබට මෙවැනි ගැටලු ඇත්නම් කළ යුත්තේ මොනවාද?
- වෛද්‍යවරයෙකු හමුවන්න
- අධි බර පාලනය කර ගන්න (වෛද්‍ය උපදෙස් මත තමා මසක් තුළ අඩු කරගත යුතු බර ප්‍රමාණය අඩු කරන වැඩපිළිවෙලක් අනුව බර පාලනයකට යොමුවිය යුතුයි)
- යම් හෝමෝන ගැටළුවක් හඳුනා ගතහොත් එයට වෛද්‍ය උපදෙස් අනුව ප්‍රතිකාර ලබාගන්න.
- හෝමෝන ගැටළුවක් නොමැති අයකුට වුවත් රුධිර සීනි මට්ටම, ලිපිඩ මට්ටම සහ අක්මාවේ ක්‍රියාකාරිත්වය පරීක්ෂා කර ගැනීම වැදගත්. මෙම පරීක්ෂාවන් දරුවන් සඳහාත් සිදු කළ යුතු වනවා.
- මෙම තත්ත්වයේදී බෝ නොවන රෝග සඳහා අවදානමක් ඇති නිසාත් බර පාලනය කරගත යුතු නිසාත් සමබල ආහාරයක් ගැනීම ඉතා වැදගත්. ආහාරයේ අඩංගු කාබොහයිඩ්‍රේට ප්‍රමාණය අඩු කිරීම සහ එළවළු පලතුරු සහ පලා වර්ග වැඩියෙන් ආහාරයට එක් කර ගන්න
- සීනි, ලුණු සහ තෙල් භාවිතය හැකිතාක් සීමා කරන්න.
- ක්‍රියාශීලී දිවි පෙවෙතකට හුරු වෙන්න
- අධිබර අයගේ සම අවපැහැ ගැනීමක් හෝ ඝනවීමක් සිදුව ඇත්නම් සම ඇතිල්ලීම කිසිසේත් නොකළ යුත්තේ එයින් සම තවත් ඝන විය හැකි නිසයි. ඒ සදහා අවශ්‍ය ආලේපන වෛද්‍ය උපදෙස් මත ලබාගන්න
- සුදු වීමට භාවිත කරන “නයිට් ක්‍රීම්” වැනි ආලේපන භාවිතයෙන් වළකින්න
- අධි බර ඇති තරුණ තරුණියන්ට කුරුලෑ ඇතිවීම සුලබ වන අතර එම කුරුලෑ ප්‍රතිකාර මගින් සුව වීමද තරමක් ප්‍රමාද විය හැකියි. මෙවැනි අයට බර පාලනය සහ හෝමෝන ගැටළුව පාලනය කිරීමට අවශ්‍ය ඖෂධ නොමැතිව කුරුලෑ සුව කිරීම අපහසු විය හැකියි. මෙහිදී සමහරවිට හෝමෝන සමතුලිත කිරීම සඳහා ප්‍රොජෙස්ටරෝන් සහිත උපත් පාලන පෙති ලබාදීමට සිදුවිය හැකි අතර තරුණ දියණියන්ට වෛද්‍ය උපදෙස් මත මෙම ඖෂධ ලබා දීමට බිය විය යුතු නැහැ.
- උඩු තොලේ සහ නිකටේ ඝන රෝම ඇති වීම මෙවැනි තත්ත්වයකදී ඇතිවිය හැකි තවත් ගැටළුවක් වන අතරම එම රෝම තාවකාලිකව ඉවත් කිරීමට වඩාත් සුදුසු ක්‍රමය වන්නේ ත්‍රෙඩින් ක්‍රමයයි. රෝම ඉවත් කිරීමට භාවිත කරන ක්‍රීම් වර්ග මුහුණේ ආලේප කිරීම නුසුදුසුය. බොහෝ දෙනා විශ්වාස කරන පරිදි රේසරයක් භාවිතයෙන් රෝම ඉවත් කිරීම ඒවා වඩාත් ඝනව වැඩීමට හේතු නොවන අතර සෞඛ්‍යාරක්ෂිත ලෙස එසේ කිරීමට වගබලා ගත යුතුයි. මේ සියලුම ක්‍රම තාවකාලික වන අතර ස්ථිරව රෝම ඉවත් කිරීමට නම් ලේසර් වැනි ප්‍රතිකාර ක්‍රමයක් අවශ්‍ය වනවා. නමුත් බර පාලනය සහ හෝමෝන සමතුලිතතාව නොමැතිව ලේසර් ප්‍රතිකාර වලට යොමුවුවහොත් නැවත රෝම වැඩීම සිදුවිය හැකියි. අභ්‍යන්තර රෝග තත්ත්ව පාලනය නො වීම නිසා රෝම නැවත ඇතිවීම මෙයට හේතුවයි.
විශේෂඥ මතය, අදහස සහ මූලික සටහන:
චර්ම රෝග විශේෂඥ වෛද්‍ය ඉන්දිරා කහවිට
