සෑම පුද්ගලයෙකුම ලබාගන්නා ආහාරයෙහි මේදය අන්තර්ගත විය යුතු අතර, එමගින් ශරීරයේ විවිධ ක්‍රියාකාරකම් රාශියක් ඉටු කෙරේ. එහෙත් මේද වර්ග වැඩිපුර භාවිතය නිසා රෝග සෑදීමේ අවදානම ඉහළ යයි. මේදය බහුලව ආහාරයට ගනු ලබන්නේ තෙල්, මේද තැවරුම්, තෙල් සහිත ඇට වර්ග හා පොල්කිරි වශයෙනි. ශ්‍රී ලංකාවේ ප්‍රධාන මේද ප්‍රභවය පොල්ය. එහෙත් නාගරික සමාජයේ කිරි, කිරි නිෂ්පාදන හා මස් වැනි සත්ත්ව ආහාර මගින ද ආහාරයට මේදය එකතු වේ.

ඔබේ ආහාර වේලේ මේද ප්‍රමාණය මධ්‍යස්ථ විය යුතුතේ ඇයි?

සෞඛ්‍යමත් දිවිපෙවෙතක් උදෙසා මේදය ප්‍රමාණවත් ලෙස ආහාරයෙහි අන්තර්ගත විය යුතුය. මේදය මගින් ශරීරයට ශක්තිය (මේද ග්‍රෑම් එකකින් කි.කැලරි 9 ක්) ලැබේ. ආහාරයෙහි අඩංගු සමහර මේද අම්ල ශරීරයේ පැවැත්මට අවශ්‍ය වන අතර, ඒවා ‘අත්‍යවශ්‍ය මේද අම්ල‘ නමින් හඳුන්වයි. විටමින් ඒ, ඩී, ඊ, කේ වැනි මේදයේ දියවන විටමින් වර්ග ශරීරයට උරා ගැනීමටද මේදය අඩංගු ආහාර අත්‍යවශ්‍ය වේ. සමහර මේද ප්‍රතිඔක්සිකාරක ලෙස ක්‍රියා කරන අතර, එමගින් පිලිකා වර්ග හා බොහොමයක් නිධන්ගත රෝග ඇති වීමේ අවදානම අඩුකරයි. මේදය මගින් ආහාරයට මෘදු ස්වභාවයත්, රසයත්, සුවඳත් එකතු කරන අතර, ආහාර රුචියද වැඩි කරයි. ගර්භණී සමයේදී හා කිරි දෙන අවදියේදී ප්‍රමාණවත් ලෙස ආහාරයේ මේදය අඩංගු වීම ඉතා වැදගත්ය. ආහාර පිළියෙල කිරීමේදී ස්වල්ප ප්‍රමාණයක් තෙල් එකතු කරගැනීම මගින් ආහාරයෙන් ලැඛෙන ශක්ති ප්‍රමාණය වැඩිකර ගැනීමට හැකිය. එමනිසා ප්‍රෝටීන් කැලරි මන්දපෝෂණයෙන් පෙලෙන අය සඳහා ආහාරයට තෙල් එකතු කර ගැනීම සුදුසුය. කෙසේ වෙතත් අධික මේද පරිභෝජනය නිසා අධිබර තත්ත්ව, රුධිරවාහිනි අවහිරතා රෝග, දියවැඩියාව සහ සමහර පිළිකා ඇති වීමේ ප්‍රවණතාව ඉහළ යයි. මේදය සෑදී ඇති ප්‍රධාන සංඝටකය වනුයේ මේද අම්ලයි. ආහාරවල විවිධාකාර මේද අම්ල විවිධ අයුරින් අන්තර්ගත වේ. එක් එක් කාණ්ඩයට අයත් මේද අම්ල මගින් ශරීරයට යහපත් මෙන්ම අයහපත් බලපෑම් ඇති කරයි.

සංතෘප්ත මේද

ශරීරයට අවශ්‍ය ශක්ති ප්‍රමාණයෙන් 10% කට වඩා අඩු ප්‍රමාණයක් මෙම කාණ්ඩයට අයත් මේද අම්ල මගින් ලබාගත යුතුය. මෙම මේද කාණ්ඩය මගින් රුධිරයේ ඇති හෘදයට අහිතකර කොලෙස්ටරෝල් (එල්.ඩී.එල්) ප්‍රමාණය ඉහළ නංවන අතර, එමගින් හෘද රෝග හා අංශභාග වැනි තත්ත්ව ඇති වීමේ අවදානම ඉහළ යයි.

සංතෘප්ත මේදය අඩංගු ආහාර ලෙස කිරි, කිරි නිෂ්පාදන, මස්, මස් ආශ්‍රිත නිෂ්පාදන, පොල්, පොල්කිරි, පොල්තෙල් ආදිය ගත හැක. හෘද රෝගවලින් පෙළෙන අය හා හෘදරෝග සෑදීමේ අවදානම ඇති අය සංතෘප්ත මේදය අඩංගු ආහාර භාවිතය සීමා කළ යුතුය.

ඒක අසංතෘප්ත මේදය

මෙම වර්ගයට අයත් මේදය මගින් රුධිරයේ ඇති අහිතකර කොලෙස්ටරෝල් ප්‍රමාණය (එච්.ඩී.එල්) ඉහළ දමන අතර, හෘදරෝග වැළඳීමේ ප්‍රවණතාව අඩු කරයි. ඒක අසංතෘප්ත මේදය අඩංගු ආහාර ලෙස කජු, රටකජු, කොට්ටං, තල, තෙල් සහිත ඇට වර්ග සහ එළවළු තෙල් (කැනෝලා, ඔලිව්, සූරියකාන්ත සහ තලතෙල්) හා අලිගැට පේර ගත හැකිය.

බහු අසංතෘප්ත මේද අම්ල

ඔමේගා 3 හා 6 ලෙස බහු අසංතෘප්ත මේද අම්ල වර්ග දෙකකි. මේවා ශරීරයට අත්‍යවශ්‍ය වන නමුදු ශරීරය තුළ නිපදවා ගැනීමට නොහැකිය. මෙමගින් රුධිරයේ කොලෙස්ටරෝල් ප්‍රමාණය අඩු කරන අතර, හෘදරෝග ඇති වීමේ ප්‍රවණතාවද අඩු කරයි. ළදරු කාලයේ විකසනයට මෙන්ම ස්නායු, හෘද, වකුගඩු, රුධිරවාහිණී හා ප්‍රතිශක්ති පද්ධතියේ ක්‍රියාකාරීත්වය සඳහා මෙම මේද අම්ල අත්‍යවශ්‍ය වේ. ඔමේගා 3 හා 6 මේද අම්ල නිවැරදි අනුපාතයකින් යුතුව ආහාරයට ගැනීම වැදගත්ය. ඔමේගා 3 මේදය අඩංගු ප්‍රභවයන් වන්නේ මේදය සහිත මාළුන් (උදා – බලයා, හුරුල්ලා, සාලයා, කුම්බලාවා, බෝල්ලා සහ සැමන්) සෝයා තෙල්, කැනෝලා තෙල් හා මද වශයෙන් තද කොළ පැහැ පලා වර්ග වලය. ඔමේගා 3 මේද අම්ලයේ ව්‍යුත්පන්නයක් වන ඩී.එච්.ඒ ළදරුවාගේ මොළය හා ස්නායූ පද්ධතිය වර්ධනයට වැදගත් වන අතර එය දරුවාට අවශ්‍ය ප්‍රමාණයට මව්කිරිවල අන්තර්ගත වේ. ඔමේගා 6 මේද අම්ලය අඩංගු ආහාර ලෙස බිත්තර, මස්, කුකුළු මස්, වට්ටක්කා ඇට, තල, බඩ ඉරිගු තෙල්, සෝයා තෙල් හා සූරියකාන්ත තෙල් ගත හැකිය. ඔමේගා 3 මේද අම්ලය විවිධ ආසාදිත රෝග වළක්වා ගැනීමට උපකාරී වන අතර ඇදුම, ආතරයිටිස්, දියවැඩියාව, චර්ම රෝග සහ ප්‍රතිශක්ති විකෘතිතා වැනි තත්ත්වද පාලනය කරයි.

ට්‍රාන්ස් මේදය

අසංතෘප්ත මේද අම්ල අධික උෂ්ණත්වයට රත් කිරීමේදී ට්‍රාන්ස් මේදය ඇතිවේ. ට්‍රාන්ස් මේදය අඩංගු ආහාර පරිභෝජනය නිසා හෘදරෝග සහ අංශභාග වැනි රෝග තත්ත්ව ඇතිවීමේ ප්‍රවණතාව ඉහළ යයි. පාම් (Palm) තෙල් ඇතුළු අනෙකුත් අසංතෘප්ත තෙල් වර්ග යොදා ගෙන ගැඹුරු තෙලේ ආහාර බැ`ද ගැනීම නිසා මෙම අහිතකර ට්‍රාන්ස් මේදය ඇතිවේ. එම නිසා එළවළු තෙල් වර්ග ආහාර ගැඹුරු තෙලේ බැද ගැනීම සඳහා සුදුසු නොවේ. එමෙන්ම අසංතෘප්ත තෙල් එක් වරක් භාවිත කළ පසු නැවත නැවත භාවිතයට ගැනීමෙන් ට්‍රාන්ස් තෙල් මට්ටමට ඉහළ යන නිසා නැවත භාවිතයට සුදුසු නොවේ. පොල්තෙල්වල ඇත්තේ සංතෘප්ත තෙල් වර්ගයක් වන බැවින්, එය ගැඹුරු තෙලේ බැදීමට මෙන්ම භාවිත කළ තෙල් නැවත පාවිච්චියට සුදුසුය. පොල්තෙල් භාවිතය මගින් ට්‍රාන්ස් තෙල් ඇතිවීමේ අවදානම අඩුවේ. පේස්ට්‍රි වැනි බේකිරි නිෂ්පාදනවලද, පැටිස්, කට්ලට්ස්, රෝල්ස් වැනි ගැඹුරු තෙලේ බදින ලද ආහාරවලද, මාජරින් වර්ගවලද, කේක් බිස්කට් සහ චොකලට්වලද සැඟවුණු ට්‍රාන්ස් මේදය අන්තර්ගත වේ. ට්‍රාන්ස් මේදය මගින් ශරීරයේ අහිතකර කොලෙස්ටරෝල් හා හෘද රෝග ඇති වීමේ අවදානම ඉහළ නංවන බැවින් මෙවැනි ආහාර භාවිතය සීමා කළ යුතුය.

කොලෙස්ටරෝල්

මෙය සත්ව ආහාරවල (මස්, සොසේජස්, බේකන්, බිත්තර, සම්පූර්ණ යොදය සහිත කිරි, බටර්, චීස් සහ සත්ව අක්මා) පමණක් දක්නට ලැඛෙන මේද සංඝටකයකි. කොලෙස්ටරෝල් සෛල පටලවල අත්‍යවශ්‍ය සංඝටකයක් වන අතර හෝමෝන හා පිත් අම්ලය නිපදවීමටද වැදගත් වේ. මිනිසා විසින් ශරීරීයේ ජීව විද්‍යාත්මක අවශ්‍යතාවයට ගැලපෙන පරිදි අවශ්‍ය ප්‍රමාණයට කොලෙස්ටරෝල් නිපදවයි. ආහාර මගින් ශරීරයට එකතු වන අමතර කොලෙස්ටරෝල් ප්‍රමාණය රුධිරවාහිණීවල තැන්පත් වීම නිසා රුධිරවාහිණී අවහිරතා රෝග ඇති විය හැක.

වයස අවුරුදු දෙකේ සිට සෞඛ්‍ය සම්පන්න ජීවිතයක් උදෙසා මේදය භාවිත කිරීම සඳහා නිර්දේශයන්

• දිනකට ශරීරයට අවශ්‍ය මුළු ශක්ති ප්‍රමාණයෙන් 15%-30% අතර ප්‍රමාණයක් ලබාගත යුත්තේ මේදයෙනි.
• සංතෘප්ත මේද ආහාර මගින් ලබාගන්නා ශක්තිය, දිනකට අවශ්‍ය ශක්තියෙන් 10% නොඉක්මවිය යුතුය.
• බහු අසංතෘප්ත මේදයද ශරීරයට අවශ්‍ය වේ. ඔමේගා 3 සහ 6 මේද අම්ල දෙවර්ගයම ශරීරීයට අත්‍යවශ්‍ය බහු අසංතෘප්ත මේද වර්ග දෙකකි. මෙම මේද අම්ල දෙවර්ගයම නිවැරදි අනුපාතයකින් යුතුව ආහාරයට ගැනීම ඉතා වැදගත් වේ. එමෙන්ම කළලයේ නිසි වර්ධනයට මෙන්ම මිනිස් සිරුරේ ස්නායු, රුධිර වාහිනී, බහිස්ශ්‍රාවීය සහ ප්‍රතිශක්ති පද්ධතිවල මනා වර්ධනය හා ක්‍රියාකාරීත්වය සඳහා මෙම මේද අම්ල අත්‍යවශ්‍ය වෙයි. බහු අසංතෘප්ත (ඔමේගා 3 සහ 6) මේදය මගින් ලබාගන්නා ශක්තිය, දිනකට අවශ්‍ය ශක්ති ප්‍රමාණයෙන් 6%-11% පමණ විය යුතුය.
• ට්‍රාන්ස් මේදය මගින් සපයන මේදය දෛනික ශක්ති අවශ්‍යතාවයෙන් 1% නොඉක්මවිය යුතුය.
• මේදයෙන් ලබාගන්නා ශක්තියෙන් ඉතිරි කොටස් ලබාගත යුත්තේ ඒක අසංතෘප්ත මේදය මගිනි.
• ආහාර මගින් දිනකට ලබාගන්නා කොලෙස්ටරෝල් ප්‍රමාණය මිලි ග්‍රෑම් 300 වඩා අඩු විය යුතුය.
• බහු අසංතෘප්ත හා සංතෘප්ත මේදය පරිභෝජනය දළ වශයෙන් සමාන විය යුතුය.
• ආහාරයේ අඩංගු බහු අසංතෘප්ත ඔමේගා 6 සහ බහු අසංතෘප්ත ඔමේගා 3 අතර අනුපාතය 4:1 විය යුතුය.

නිවැරදි ලෙස මේදය භාවිත කිරීම සඳහා ප්‍රායෝගික නිර්දේශයන්

• ඔබගේ ආහාරය සඳහා මේදය එකතු කරගැනීමේද පහත ආකාරයට හුරු පුරුදු වීම, නිරෝගී දිවිපෙවෙතකට උපකාරී වෙයි. ශ්‍රී ලාංකිකයන්ගේ ආහාර වේලෙහි ප්‍රධාන මේද ප්‍රභවය පොල්ය. මෙය පොල් කිරි හා පොල් තෙල් ලෙසද භාවිත කෙෙරේ. ළමයින්, යොවුන්වියේ පසුවන අය, ගර්භණී මාතාවන් හා කිරිදෙන මව්වරුන්ගේ ආහාරයට පොල් හා පොල් කිරි අඩංගු කිරීමෙන් ශක්තිජනකභාවය වැඩිවේ. පස් දෙනෙකුගෙන් යුත් පවුලකට දිනකට මධ්‍යම ප්‍රමාණයේ පොල් ගෙඩියක් භාවිත කිරීම ප්‍රමාණවත්ය.
• කජු, රටකජු, කොට්ටන්, වට්ටක්කා ඇට, තල හෝ අලි ගැට පේර භාවිතය මගින් දිනකට අවශ්‍ය අසංතෘප්ත මේද ප්‍රමාණය ලබාගත හැකිය.
• ඔබගේ ආහාර වේලෙහි විශේෂයෙන් තෙල් සහිත මාළු වන බලයා, සාඩින්, හුරුල්ලා සහ මැකරල් වැනි මාළු අඩංගු කර ගැනීම සුදුසුය.
• ඔලිව් තෙල්, කැනෝලා තෙල්, සූරියකාන්ත තෙල් හා බඩඉරිඟු තෙල් අසංතෘප්ත තෙල් බහුල තෙල් වර්ග වේ. මෙම අසංතෘප්ත තෙල් වර්ග යොදාගෙන නිපදවන මේද තැවරුම්වල ශරීරයට අත්‍යවශ්‍ය වන ඔමේගා 3 සහ 6 මේද අම්ල අඩංගු වේ. එබැවින් මෙම මේද තැවරුම් බටර්වලට වඩා ගුණදායකය.
• මේද තැවරුම් තෝරාගැනීමට පෙර හැම විටම එහි ඇති ට්‍රාන්ස් මේදයේ ප්‍රතිශතය, ලේබලය කියවා දැනගන්න. 1% වඩා අඩු ට්‍රාන්ස් මේදය අඩංගු නිෂ්පාදන පමණක් භාවිතයට සුදුසු වේ.
• කිරිවල සංතෘප්ත මේදය බහුලව ඇති බැවින්, වැඩිහිටි අයට, අවුරුදු 2 වැඩි අධි බරැති ළමුන්ට හා හෘද රෝග වැළඳීමේ අවදානමින් සිටින අයට මේදය අඩු හෝ මේදය රහිත කිරි හෝ කිරි ආහාර ( මේදය අඩු යෝගට්) යෝග්‍ය වේ.
• කේක්, ප්‍රේස්ට්‍රි, රෝල්ස්, බිස්කට් හා කට්ලට් වැනි කෙටි ආහාරවලද, ගැඹුරු තෙලෙහි බදින ලද ක‍ෂණික ආහාරවලද ට්‍රාන්ස් මේදය අඩංගු විය හැකි බැවින් එම ආහාර භාවිතයද සීමා කළ යුතුය.
• කුකුළු මස් පිස ගැනීමේදී මස්වල අඩංගු සම සහ අනෙකුත් මේද කොටස් ඉවත් කළ යුතුය.
• සෝසේජස්, මීට් බෝල්ස්, හැම්, බේකන් වැනි පිරිසැකසුම් කරන ලද මාංශමය ආහාර භාවිතය සීමා කළ යුතුය.
• ආහාර තෙම්පරාදු කර ගැනීම සඳහා තෙල් ස්වල්ප ප්‍රමාණයක් යොදා ගත යුතුය. (අසංතෘප්ත තෙල් වර්ගයක් නම් වඩාත් යෝග්‍ය වේ)
• ගැඹුරු තෙලේ බදින ලද ආහාර භාවිතය සීමා කළ යුතුය. පොල් තෙල් හැර අනෙකුත් තෙල් වර්ග භාවිත කර ගැඹුරු තෙලේ බැදගැනීම සිදුකරන්නේ නම් එම තෙල් නැවත නැවත භාවිතයට සුදුසු නොවේ.
• නොඇලෙන බඳුන්  (Nonstick) භාවිතය මගින් තෙල් භාවිතය සීමා කළ හැක.
• ඇසුරුම් කරන ලද ආහාර මිලදී ගැනීමේදී ලේබලයේ අන්තර්ගත පෝෂක පිළිබඳ තොරතුරු කියවන්න. සංතෘප්ත මේදය අධික හෝ ට්‍රාන්ස් මේදය අධික ආහාර මිලදී ගැනීමෙන් වළකින්න.
• තෙල් ශක්තිජනක ආහාර ළදරුවන් සහ ළමයින් සඳහා අතිරේක ආහාර ලෙස යොදා ගත හැකි අතර, දිනකට අවශ්‍ය මේද ප්‍රමාණය නොඉක්මවන ලෙස ලබා දිය යුතුය.

– සෞඛ්‍ය අමාත්‍යාංශයේ පෝෂණ අංශයේ ප්‍රකාශනයක් ඇසුරෙනි –

 

ප්ලාස්ටික් සහ පොලිතින් අපේ එදිනෙදා කටයුතු වෙනුවෙන් භාවිතාය බොහොම කැමැත්තෙන් වැළඳ ගත්තත් , කල් ගෙවෙන විට මේ පරිහරනය පහසු වුත්, සැහැල්ලු සහ වියහියදම පිරිමහින ඇසුරුම් සහ උයන පිහින භාජන ගැන චෝදනාවන් ගොඩ නැගෙන්නට වුණා.පොලිතින් ප්ලාස්ටික් පිලිකාකාරකයි යන බරපතල චෝදනාව සහ අපේ ඉවුම් , පිහුම් සහ ආහාර පිලිගැන්වීම වෙනුවෙන් භාවිතා කරන භාජන මොනතරම් ආරක්ෂිතද… ? මේ ගැන දැනුවත් කිරීමේ අදහස් ඉදිරිපත් කරනු ලැබුවේ පේරාදෙනිය විශ්ව විද්‍යාලයේ ආහාර විද්‍යා හා තාක්ෂණ අංශයේ මහාචාර්ය ටෙරන්ස් මදුජිත් මහතා විසින්…

ප්ලාස්ටික් භාජන රත්කිරීම සුදුසු නැහැ. ප්ලාස්ටික් භාජන නිපදවීමේදී කරනු ලබන fillers” stabilizers සහ plasticizers වැනි සංයෝග එකතු කරනවා. ප්ලාස්ටික් රත් කරන විට වගේම  හිරු එලියට නිරාවරණය වීම සහ උණුසුමට පත් වීම වැනි අවස්ථාවන්හිදී මෙම සංයෝග ආහාර සමග එකතු වෙනවා.

ජලය ගෙන යන බෝතල්වල  ජලය සමග ප්ලාස්ටික් මිශ්‍ර නොවන ස්ථරයක් තිබුනත් කාලයක් යන විට ස්ථරය ක්ෂය වී ප්ලාස්ටික් සහ ජලය එකට එකතු වීම සිද්ධ වෙනවා. මේ ගැන බොහෝ දෙනා හිතන්නේ නැහැ. අපි නිතරම දකිනවා පාර තොට සේවය කරන උදවිය ආපනශාලාවලින් තේ රැගෙන යන්නෙත් ප්ලාස්ටික් බෝතල්වලට. වේලාවේ හැටියට පහසුව තකා මේ විදිහට කටයුතු කළත් එය සෞඛ්‍යට ඉතාම අහිතකරයි.

උණුසුම් ජලය බෝතල්වලට දැමීම හෝ ජලය සහිත බෝතල් උණුසුම් කිරීමට භාජනයක තැබුවහොත් ඉතා පහසුවෙන් මෙම ස්ථරය පලුදු වී අහිතකර රසායනයන් ජලය සමග මිශ්‍ර වීම සිදු වෙනවා.

ඒ වගේම ප්ලාස්ටික් පැණි බීම බෝතල් දිවා කාලයේදී හිරු එළියට නිරාවරනය වෙලා උණුහුමට පත් වෙනවා. මේ රත්වීමෙන් ප්ලාස්ටික්වල අන්තර්ගත BPA හෙවත් Bisphenyl – A පිළිකා කාරක සංයෝගය සිරුරට ඇතුල් වෙන නිසා ලෙඩ රෝග වෙනුවෙන් නිරාවරනය වෙන අවදානම ඉතාම ඉහල මට්මකට පත් වෙනවා. Bisphenyl – A යනු ඉතා කුඩා ප්‍රමාණයෙන් පවා පිලිකා ඇති කරන පිලිකා කාරකයක්. දියුණු රටවල නැවත භාවිතා කරනු ලබන බෝතල්වල BPA රහිත (BPA –Free ) බවට සහතිකයක් තිබුනත් අපේ රටේ BPA –Free යනුවෙන් සහතික කළ ජලබෝතල් විරලය.

නිවසේ හෝ ආපනශාලාවල ආහාර පිලියෙල කිරීමට සුදුසුම වෙන්නේ මල නොබැඳෙන  වානේ  භාජනයි.

ඇලුමිනියම් ආහාර සකස් කිරීමේදී ඉතාම නුසුදුසුයි. අම්ලතාවය ඉහළ තක්කාලි, දෙහි, සියඹලා වැනි දේ කාලයක් මෙම ඇලුමිනියම් භාජන වල පිසින විට නොදැනම ඇලුමිනියම් ශරීරයට එකතු වෙනවා. අපේ සිරුරට ඇළුමිනියම් එතරම් අවශ්‍ය නැහැ. එය විෂ සහිතයි.

නොන්ස්ටික්  (non-stick ) හෙවත් නොඇලෙන සුළු වෙනුවෙන් තිබෙන ඇගයීම වුනත් අපේ පාවිච්චියේදී අහිතකර විදිහට බලපාන්න පුළුවන්. මෙම නොඇලෙන සුළු බව සකස් වෙන්නේ ඒ වෙනුවෙන් යොදා ගෙන තිබෙන ටෙෆ්ලොන් Teflon නිසයි. එහෙත් මේ ටෙෆ්ලොන් Teflon කොටස සීරී ගියාම සාමාන්‍ය ඇලුමිනියම් භාජනයක පිසිනවාට සමානයි. ප්‍රමිතියෙන් හොඳ නොඇලෙන භාජන මිළෙන් ඉහළ වුනත් ඒවායේ කල්පැවැත්ම නිසා අහිතකර බලපෑම් ඇති වෙන්නේ නැහැ. ඒ නිසා භාජන මිළට ගැනීමේදී කල් පවතින ප්‍රමිතියෙන් යුක්ත පිසින භාජන වෙනුවෙන් යොමු වුනොත් ආහාර පිසීමේ ආරක්ෂිත බව ගැන සහතිකයක් ගොඩ නගා ගන්න පුලුවන්.

මැටි භාජන වෙනුවෙනුත් චෝදනා තිබෙනවා.

ගෑස් උඳුන්වල රත් වෙන විට

• දහනය වෙන තාපය ඉහලයි.
• ප්‍රවාහනය අපහසුයි.
• කැඩෙන බිඳෙන බව ඉහලයි.
• හැසිරවීම අපහසුයි.
• පිරිසිදු කිරීමේ ගැටළු.

මේ සියල්ල අතරින් සෞඛ්‍යමය ලෙසින් ඇති වෙන ප්‍රධාන අවදානමක් තිබෙනවා. මෙම භාජන සකස් කිරීමට යොදා ගන්නා මැටිවල ඇති සියුම් සිදුරු අතරින් ක්ෂුද්‍ර ජීවින්ට ඇතුළු වෙන්න පුලුවන්. පිරිසිදු කිරීමේදී මේ ක්ෂුද්‍ර ජීවින් සියල්ලම ඉවත් වෙන්නේ නැහැ. ඒ නිසා හැටි භාජන  යොදා ගෙන වුනත් පිසින ආහාර නුසුදුසු තත්වයෙන් තිබෙන්න පුලුවන්.

අපි බුෆේ ආහාර වලදී මැටි භාජනවල අසුරා තිබෙන විට බොහොම කැමැත්තක් දක්වනවා. ඒත් මේ ආහාර වලින් ඇති විය හැකි අතුරු අන්තරාවන් ඉහලයි. මේ මැටි භාජන රත් කරන්නේ කුඩා තාපයකින්. ඒ නිසා ක්ෂුද්‍ර ජීවින් විනාශ වීම ගැන සහතික වෙන්න බැහැ. නිරන්තරව පාවිච්චිය නිසාත් පිරිසිදු කිරිමේදී ඇති වෙන අඩුපාඩු නිසාත් බුෆේ ක්‍රමයේදී මැටි භාජන වෙනුවෙනුත් සුබවාදීව හිතන්න බැහැ. සාමාන්‍ය නිවසක වගේම ව්‍යාපාරික කටයුතුවලදිත් මැටි භාජන හසුරුවන සහ ප්‍රවාහනයේ ඇති වෙන කැඩෙන බිඳෙන අවස්ථාවනුත් ඉහලයි. මේ සියල්ල ගැන හිතන විට  මළ නොබැදෙන හෙවත් Stainless භාජන බුෆේ ක්‍රමයට ඉතාම යෝග්‍ය වෙනවා.

අපි කවුරුත් අපේ පෞද්ගලික පිරිසිදුකම ගැන දක්වන්නේ ලොකු උනන්දුවක්. ආවාට ගියාට නිවසින් පිටතට නොබහින්න හැමකෙනෙක්ම වගේ වගබලාගන්නවා. ඇත්තටම දකින කෙනෙකුට ප්‍රියමනාප දසුනක් වීමත් අපි ලබපු භාග්‍යයක් විදියට සලකන්න පුළුවන්. අපිත් එක්ක අපි ගෙනියන කෑමක් බෙදා හදාගන්න වුණත් තවත් කෙනෙක් කැමැත්තක් දක්වන්නේ අපේ බාහිර පිරිසිදුකමත් එක්ක. ඒත් අපේ ඒ හිතවතෙක්/හිතවතියක් නිවසට ආවොත් අපේ පෙනුම තුළින් අපි පිළිබඳව ඔවුන්ගේ හිතේ ඇති වූ ආකල්පයට යම් වෙනසක් ඇති කරන්න අපේ නිවසේ නානා කාමරයට පුළුවන් වෙයි කියලා ඔබට හිතිලා නැතිද?

නිරාෂාත් අචලත් දුවලගේ පෙර පාසැල නිසා හිතවත් වුණු මව්වරුන් දෙදෙනෙක්. ඔවුන් හැමදාකම දරුවන් පෙර පාසැලට ඇරලවලා කොහෙට හරි වෙලා කතා කර කර ඉන්න පුරුදු වෙලා හිටියා. ඔය අතරෙදි තමයි දවසක් දුවලට කොන්සර්ට් ප්‍රැක්ටිසස් නිසා දවල් වෙනකන් ඉන්න වෙන බව දැනගන්න වුණේ. ඉතිං නිරාෂාගේ ගෙදරට වඩා ළඟින් අචලාගේ ගෙදර තිබුණු නිසා අවලා යෝජනා කළා එහේ ගිහින් එමු කියලා. නිරාෂාත් බොහොම කැමැත්තෙන් ඉදිරිපත් වුණා. වෙනදට එයාලා කන්න ගේන කෑම එකත් නොකාම ත්‍රී වීලර් එකක නැගලා අචලාගේ ගෙදරට ගියා.

අචලා පෙනුමෙන් බොහොම සුන්දරයි. ගෙට ගොඩවෙද්දිම නිරාෂාට පෙනුනේ අචලාගේ කෑම මේසය. කුණු ගොඩ වගේ. අද ගෙවල් අස්කරන්න බැරි වුණා. හැමදාම මම ඇවිත් තමයි අස්කරන්නේ. ගණන් ගන්න එපා හොඳේ. ඇයට සිනහවකින් පිළිතුරු දුන් නිරාෂා අසුන්ගත්තා. නිරාෂට ඒ ගෙදර ඉන්න ලොකු අපහසුවක් දැණුනා. ඒත් ඒක නොපෙන්වා ඇය සිටියා. දරුවන් ගන්න වෙලාව හරි ගිය නිසා නිරාශා තමාට මුහුණ ටිකක් සෝදාගැනීමට නානා කාමරයට යාමට අවශ්‍ය බව දැන්වූවා.

“අයියෝ එන්න එන්න…” කියලා අචලා නානකාමරයේ දොර විවෘත කළා.

ඇතුළට ගිහින් දොර වහගනිපු නිරාශට දැණුනේ හරිම පිළිකුළක්. අචලා ඉන්න විදියට මේ තරම් අපිරිසිදු ඇති කියලා හිතණේ නෑ. දැන්නම් මට එයා දෙන තේ එකක්වත් බොන්න පිළිකුළක් දැනෙනවා.

දන්නවද ඇයි නිරාෂට එහෙම හිතුණේ කියලා,

• ඒ නාන කාමරයේ බිම හැමතැනම වතුර
• බිත්තියට අල්ලපු සුදු පාට ටයිල් කහපාට වෙලා
• කොමඩ් එක පතුලෙ කහට බැඳිලා
• වොෂ් බේසින් එකේ පාට මොකද්ද කියලා හිතාගන්න බැරි තරමට කිලිටි වෙලා
• බිම අල්ලලා තියෙන ටයිල් අවර්ණ වෙලා, ටයිල් අතර දාර කලූ පාට වෙලා
• සබන් පෙටිටියේ සබන් කෑල්ල යට දිය වුණු සබන් නිසා සෙවල තට්ටුවක් හැදිලා
• සබන් කෑල්ලේ හිසකේ කොට ඇලවිලා
• දත් බුරුසු දාන බඳුනේ යට වතුර/කුණු පිරිලා
• ආවරණය ඉවත් කරලා වොෂ් බේසින් එක උඩ තියපු දත් බුරුසුවේ කෙඳි දෙපැත්තට වක් වෙලා
• ෂැම්පු බෝතලේ වටේ ෂැම්පු බේරිලා, ඒ විතරක් නෙවෙයි කොණ්ඩ ගසුත් ඒ වටේට ඇලවිලා
• ගලි එක උඩ මාස ගාණක් එකුතු වුණු කොණ්ඩ ගස් ඉවත් කරලා නෑ
• අත හෝදගන්නවත් වතුර කරාමයක් අල්ලන්න බෑ, ඒවා ලිස්සනාව විතරක් නෙවෙයි කිලිටියි
• කන්නාඩියෙන් මූණ බැලූවම දත් මදිද්දි විසි වූ දත් බෙහෙත් බිංදු බිංදු වේලිලා

තමන්ගේ අවශ්‍යතාවය අමතක කරලා නිරාෂා ඉක්මණින් පිටතට ආවා. ඒ එද්දි අචලා දොඩම් යුෂ වීදුරුවක් අරගෙන ආවා. නිරාෂාට ඒක බොන්න කොයි විදියටවත් හිත හදාගන්න අපහසු වුණා. ඇය එය අතට ගත්තත් එක උගුරක්වත් බිව්වේ නෑ. ඇයට එය ගැන දැණුනේ අපුලක් නිසා. නමුත් මේ පිළිබඳව අචලාට උපදෙසක් ලබාදිය යුතු බව නිරාශා තරයේම සිතා ගත්තා.

ඔබත් හිතන්න මෙවැනි නානා කාමරයක් තුළ තම අවශ්‍යතා ඉටුකරගත හැකි නම් ඔබේ පෞද්ගලික පිරිසිදු බවට ලකුණු දිය හැකිද යන්න. නාන කාමරය යනු විෂබීජ බොහොමයක් රැඳුණු ස්ථානයකි. ඉහත දැක්වූ ලක‍ෂණ සහිතව ඔබ ඔබේ නාන කාමරය භාවිත කරන්නේ නම් සැබවින්ම එය ඔබටද ඇති කරන්නේ අයහපත් සෞඛ්‍ය තත්ත්වයකි. මන්ද අද වන විට බොහොමයක් නිවෙස්වල නාන කාමරයේ වාතය පිටතට ගමන්කර පිරිසිදු වාතය ගෙන්වා ගැනීමට යොදන වාත කවුලූ නැති අවස්ථා බහුලය. කිසිසේත්ම හිරු එලිය හෝ පිරිසිදු වාතය ඇතුළු වීමක් දැකිය නොහැක. ඒ නිසා සියලූ දූෂිත වාතය ගමන්කරන්නේද නිවස තුළටමය. ඉතිං මෙවැනි අපිරිසිදු තත්ත්වයක් පවතින විට එය නිවසේ වෙසෙන පොඩි දරුවන්ටද අයහපත්ය. එසේම මෙවැනි අත්දැකීම් ලබන දරුවාට අපිරිසිදුකම පිළිබඳව ලොකු අත්දැකීමක් නොලැබේ. ඔහු/ඇය ඒ පිළිබඳව පිළිකුළක් නොදක්වයි.

නිරාෂගෙයි අචලාගෙයි කතාවට අනුව දැන් ඔබට දැනෙනවාද අපේ පෞද්ගලික පිරිසිදුකම මනින එක සාධකයක් ලෙස අපේ නිවසේ නාන කාමරය නම් කරන්න පුළුවන් බව. ඉතිං ඔබත් මේ හා සම්බන්ධව අත්දැකීම් තියෙනවා නම් ඔබේ අදහස්/අත්දැකීම් අපිත් එක්ක බොදාගන්න.