සැප්තැම්බර් කියන්නේ සාහිත්‍ය මාසය. දැන් ඉතින් අම්මලා තාත්ලාට දරුවන්ට කියවන්න පොත් ටිකක් අරගෙන දෙන්න පුලුවන්. මේ කාලය අතිරේක පොත් පත් මිළට ගන්න හොඳටම ගැලපෙන කාලයක්. අපි දරුවන්ට ලබා දිය යුත්තේ හොඳ දේවල්. ඉතින් පොත් කොහොමද දරුවන්ට හොඳ වෙන්නේ කියල ඔබ ඇහුවොත් මෙන්න උත්තර වැලක් තිබෙනවා.
මතකය වර්ධනය වෙනවා
දරුවන්ගේ මතකය ඉතාම තිරිහන්. මේ කාලයේ ඔවුන්ට බොහෝ දේ අවශෝෂනය කරගන්න පුලුවන්. ඒ නිසා පොත් පත් කියවීම මගින් දරුවාගේ මතක ශක්තිය වර්ධනය කිරීමට පුලුවන් බව හස්කින්ස් විද්‍යගාරයේ පර්යේෂක නිළධාරියෙක් වෙන “කෙන් පුෂ්කින්” සඳහන් කරනවා. ඒත් අද දරුවන් වැඩි අවධානයක් දෙන්නේ පොත් පත් කියවීමට වඩා රූපවාහිනිය සහ පරිගණකයට බව අම්මලා තාත්තලා දන්නවා. හැබැයි සාහිත්‍ය මාසයේදී දරුවන්ට කියවන යමක් මිළට ගැනීමට උනන්දු වුනොත් කියවන දරුවන් පිරිසක් බිහි කර ගැනීමට පුලුවන් වේවි.
තමන්ගේ ආත්මාභිමානය ගොඩ නැගෙනවා
කියවීම මිනිසා සම්පූර්ණ කරනවා කියන්නේ ඇත්තටම නිකමට නොවේ. අර්ථවත් යමක් දරුවන්ට කියවීමට ලබා දීමෙන් ඔවුන්ගේ ආත්මාභිමානය ගොඩ නගා ගැනීමට පුලුවන්.විහේසයෙන් ලෝකයේ පුර්වාදර්ශ චරිත තිබෙනවා. අපේ දරුවන්ගේ ලෝකයේ ජීවත් වෙන්නේ නයිට් රයිඩර්, ස්පයිඩර් මෑන් වුනත් දරුවාගේ මානසිකත්වය මේ විදිහටම ගොඩ නගා ගැනීමට ඔවුන්ට ගැලපෙන යමක් තෝරා දීමෙන් පුලුවන්.
මානසික ආතිතයට හොඳයි
අද හැම කෙනෙක්ම කියන්නේ කතා කරන්නේ මානසික ආතතිය ගැනයි. තමන්ට මානසික ආතිතය තිබෙනවා නම් එයින් මිදෙන්නත් මග හොයා ගැනීම අවශ්‍යයි. ඉතින් මේ වෙනුවෙන් ඖෂධීය ප්‍රතිකාරයන්ට වඩා සරල පිලිවෙත් අනුගමනය කිරීමට පුලුවන්. පොත් පත් කියවීම ඒ අතරින් ඉතාම ගැලපෙන බව දැන් මනෝ වෛද්‍යවරුන් පවා පිලිගෙන තිබෙනවා. ඉතින් එළැඹෙන සාහිත්‍ය මාසයේදී දරුවන් වෙනුවෙන් ඔබේ මුදල් පසුම්බියට ගැලපෙන විදිහට අතිරේක කියවන දේ ලබා දීමට උත්සාහ කරන්න.
භාෂා ඥානය වැඩිවෙනවා
අද පරම්පරාවේ අය මුල් කර ගෙන නැගෙන ප්‍රදාන චෝදනාවක් තිබෙනවා. අක්ෂර වින්‍යාසයක් දන්නේ නැහැ…භාෂාව ගැන දැණුමක් ඇත්තේම නැහැ. කිසිම නිර්මානශීලීත්වයක් නැහැ. හරියට පුරන් වුන කුඹුරක් වගෙයි..ඉතින් අපිට මේ පුරන් කුඹුර අස්වද්දන්න බැරිද…එක රැයකින් බැරි වුනත් දරුවන් වෙනුවෙන් කියවන දේ ලබා දීමට පුලුවන්. එවිට නිතරම නෙත ගැටෙන අක්ෂර නිසා නිවරැදිව ලිවීම පුරුදු වෙනවා. ව්‍යාකරණ ගැන වුනත් දැනුමක් ලැබෙනවා. බස හසුරුවන්නේ කොහොමද යන්න ගැන අමුතුවෙන් ඉගැන්වීමක් අවශ්ය නැහැ.
මනස හා හදවත අතර සම්බන්ධතාවයක් ඇති වෙනවා
අපි පොත් පත් කියවන විට ඇත්තටම අපි ඒ චරිත සමග ජීවත් වෙනවා. ගැමුණු කුමාරයා ගැන අහන විට ඇති වෙන්නේ වීරත්වයක්. මද්දුම බණ්ඩාර ගැන ඇති වෙන්නේ එඩිතර බවක්. මේ විදිහට චරිත පමණක් නොව විවිධ ස්ථාන ගැන මනස්කාන්ත දර්ශන අපේ හිතේ මැවෙනවා. ඒ නිසා දරුවන්ගේ චරිත සංවර්ධනයටත් පොත් පත් කියවීමෙන් විශාල දායකත්වයක් ලැබෙනවා.
ආදර්ශ ලබා ගත හැකියි
පොත් පත් කියවීමෙන් ලැබෙන දැනුම මගින් දරුවන්ට ආදර්ශ ලබා ගත හැකියි. අපි හැසිරෙන්නේ කොහොමද යන්න ඔවුන්ටම වැටහේවි. වචන දහස් ගණනක් අවවාදවලට වෙන් කරනවාට වඩා එක් කතාවක ආදර්ශයකින් ඒ ගැන දරුවාම තේරුම් ගනු ඇති.
නිර්මානශීලී වීම
පොත් පත් කියවන දරුවන්ට එයින් ලැබෙන ආශ්වාදය පමණක් නොව තමාගේ චින්තනයද ඉතාම නිර්මානශීලී ලෙසින් අවදි වේ. දරුවෙකුගේ නිර්මාශීලී චින්තනය ඔවුන්ගේ අධ්‍යාපනයට පමණක් නොව එදිනෙදා ජීවිතයට පවා ඉතා වැදගත් වේ. කියවීමෙන් ලැබෙන තොරතුරු ඔහු නොදැනම ගබඩා වෙන අතර අවශ්ය අවශ්ය තැන්හිදී ඒවා ආදේශ කිරීමෙන් නිර්මානශීලී දරුවෙක් බිහි වෙනු ඇත.
මානසික විවේකයට ගුණයි
අපි කායිකව වෙහෙසීම නිසා ඇති වෙන විඩාව වගේම මානසිකවත් අපට දැනෙන වෙහෙසකර බව ඇත්තටම දුරු කර ගැනීම අවශ්‍යයි. ඒ වෙනුවෙන් බොහෝ දෙනෙක් විනෝදාංශ වෙත යොමු වෙනවා. හැම කෙනෙකුටම කුමක් හෝ විනෝදංශයක් තිබීම වැදගත්. එය මේ විනෝදාංශය විය යුතු බව අපිට තීරණය කරන්න බැහැ. ඒත් බාල කාලයේ පටන්ම දරුවාට කියවන සමාජයක් නිර්මානය කලොත් ඔහු තුළ පොත් පත් කියවීම වෙනුවෙන් ඇල්මක් ඇති වෙනවා. ඒ නිසා වෙහෙසකර මානසිකත්වයට හොඳ පුටුවහලක් නොදැනීම ලැබේවි.
කොච්චර ගුණ තිබුනත් කියවන්නේ නැත්නම්…
- දරුවන්ට නිතරම කියවන පරිසරයක් ගොඩ නගන්න. බාල කාලයේ පටන්ම දරුවා වෙනුවෙන් කුඩා පුස්තකාලයක් ඇත්නම් ඔවුන් පොත් සමග ගණුදෙණුව එතැනින් ආරම්භ කරනු ඇත.
- පළාත් පාලන ආයතන පුස්තකාලයේ හෝ වෙනත් පුස්තකාලයක සාමාජිකත්වය ලබා දෙන්න. එසේ නැත්නම් ඔබ දරුවා කැටුව අවස්ථාව ලැබූ විට පුස්තකාලයට යන්න. දෙමව්පියන් විදිහට ඔබ පුස්තකාලයේ සීමාවට වත් නොයා දරුවන් පමණක් පුස්තකාල පරිශීලනය වෙනුවෙන් යොමු කිරීම තරම් පහසු නැත.
- උපන්දිනයට දරුවාට ලබා දෙන තෑගි අතරට පොතක්ද එක් කරන්න. ඉදහිට හෝ පොත් වලින් ප්‍රශ්න ලබා දී ඒ වෙනුවෙන් ත්‍යාග ලෙසින් ඔවුන් සතුටු යමක් දෙන්න.
- පොත් ප්‍රදර්ශනයට අනිවාර්යෙන්ම දරුවා කැටුව යන්න. රසවත් ආහාරයක් පිසින විට විහිදෙන සුවඳට අපේ ඇති වෙන උත්තේජනය ඔබ අත්දැකීමෙන් දන්නවා ඇති. පොත් ප්‍රදර්ශනයේදී පොත් වෙතින් වහනය වෙන නැවුම් සුවඳ නිසා ඔබේ දරුවාටත් පොත් සමග ජීවත් වෙන රුචිකත්වය නොදැනීම වගා වෙනු ඇත.
