Mongolian blue spots (මොන්ගෝලියන් බ්ලු ස්පෝට්ස්) ලෙස සාමාන්‍යයෙන් හඳු න්වන බිලිදුන්ගේ සම ආශ්‍රිතව ඇති වන ලප විශේෂය වෛද්‍ය විද්‍යාත්මකව congenital dermal melanocytosis ලෙස හඳුන්වයි. ආයුර්වේද වෛද්‍ය විද්‍යාවේදි මෙවැනි තත්ත්වයන් කුඩා දරුවන්ගේ සම ආශ්‍රිතව ඇතිවන සෞඛ්‍යමය වශයෙන් දරුවාට හානිදායක නොවන ලප වර්ග ලෙස හඳුන්වා ඇත. මේවා අයත් වන්නේද උපන් ලප වර්ගයටමය.

සාමාන්‍යයෙන් උපතේදීම මෙම ලප දක්නට ලැඛෙන අතර තට්ටම් ප්‍රදේශයේ හා පහළ පිටකොන්ද ප්‍රදේශයේ බහුලව දක්නට ලැබේ. සමහර විටෙක බාහුවල ද දක්නට ලැබේ. නිල්-අළු පැහැයකට හුරු මෙම ලප රතු පැහැයෙන් ඇතිවන අවස්ථා ද ඇත. කෙසේ වෙතත් දරුවා පරීක‍ෂා කරන පළමු අවස්ථාවේම වෛද්‍යවරයා විසින් එය නිශ්චය කරගනු ලබයි.

මේ සඳහා හේතු තවම සොයාගෙන නොමැති අතර ප්‍රධාන ලක‍ෂණ වන්නේ,

• සමෙහි ස්වභාවයෙන්ම පැතලිව නිල්-අළු පැහැයෙන් පැවතීම
• 2-8 cm පමණ ප්‍රමාණයේ ලප
• අක්‍රමවත් හැඩැති ලප

කිසිසේත් මෙම ලප පිළිකා කාරක ෙසෙල නොවන අතර දරුවාගේ හමේ අවපැහැ වීම හැර කිසිදු සෞඛ්‍ය ගැටලූවක් ඇති නොවේ. දරුවන් වැඩිවියට පත්වන විට බොහෝ විට මෙම ලප ස්වභාවිකවම ඉවත් වී යයි.

යක්කල, ගම්පහ ආයුර්වේද විද්‍යායතනයේ ආයුර්වේද වෛද්‍ය නිලීකා සමන්වීර මහත්මිය සමග සකසන ලද ලිපියකි.

 

මව්පියන් සිය ජීවිතය කැප කරන්නේ තම ආදරණීය දරු පැටියන් වෙනුවෙනි. ඔවුන්ගේ අනාගතය, නිරෝගීකම, පෝෂණය මෙන්ම අවශ්‍යතා සම්පූර්ණ කිරීමට ඔවුන් දිවා රෑ නොතකා වෙහෙසෙයි. මේ තත්ත්වය යටතේ සෑම මවක්ම පියෙක්ම නිරන්තරයෙන් ඔවුන්ගේ සෑම කටයුත්තක් පිළිබඳවම දැනුවත් වීම අනිවාර්ය වනවා සේම බුද්ධිමත්ව ක්‍රියා කළ යුතුය. දරුවාගේ කෑම පෙට්ටිය එතරම් දෙයැක්දැයි සිතා ඔබ කටයුතු කළද පෙර පාසැල් ගොස් නිවසට එන සිඟිත්තාගේ කෑම පෙට්ටිය දකින ඔබට සිතෙන්නේ ”දරුවා අදත් කාලා නෑනේ” යන්නයි. ඒ සිතිවිල්ලෙන් මිදෙන්නට මේ ලිපිය ඔබට උදව් වනු ඇත.

අද වන විට දරුවෙකු තම පෙර පාසැල් ජීවිතය අරඹන්නේ බෝහෝ විට අවුරුදු දෙකහමාර වයස් සීමාවේදීය. නිවසේ සුපුරුදු වටපිටාවෙන් මිදෙන දරුවා පය තබන්නේ ඔහුට නුහුරු නුපුරුදු අලූත් පරිසරයකටයි. මේ වයස් සීමාවන්වල පසුවන ඇතම් දරුවන් ඉතා ඉක්මණින් අලූත් වටපිටාවට හුරු වන අතරම ඇතැම් දරුවන් ඒ සඳහා හුරු විමට යම් කාලයක් ගනී. මේ අවධියේදී මවකට පැවරෙන වගකීම අකුරටම ඉටුකළ යුත්තේ අලූත් වටපිටාව තුළ දරුවා අත්දකින සියලූ දේ පිළිබඳව ඔහුට/ඇයට ධනාත්මක හැඟීම් සමුදායක් ඇති විය යුතු බැවිනි. එසේම පෙර පාසැලේ නවක පුංචි සාමාජිකයන්ට එම ස්ථානය සුන්දර කිරීමේ වගකීම පෙර පාසැල් ගුරුවරියන්ට පැවරෙන බව පැවසීමේ වරදක් නොමැත. නමුත් ඒ සඳහා මව්පියන්ගේ පූර්ණ සහයෝගය අවශ්‍ය බව සිහිතබගන්න.

පෙර පාසැලට යන ඔබේ සිඟිත්තාගේ බෑගය තුළ,

• කෑම පෙට්ටිය
• වතුර බෝතලය
• අමතර ඇඳුමක්
• තොප්පිය/වැහි කබාය ඇතුළු අවශ්‍ය සියලූ දේ පිළිවෙළකට ඇසිරීම මවගේ කාර්යය භාරයේ කොටසකි

මෙසේ අත්‍යවශ්‍ය දේ අතරින් සිඟිත්තාගේ කෑම පෙට්ටිය පිළිබඳව ඔබේ අවධානය යොමු විය යුතු සුවිශේෂී කරුණු කිහිපයක් පිළිබඳව මේ ලිපිය හරහා මව්වරුන් දැනුවත් කිරීමටයි මේ සූදානම.

පෙර පාසැල් සිඟිත්තාගේ කෑම පෙට්ටිය

• උසස් තත්ත්වයේ ප්ලාස්ටික් නිෂ්පාදනයක් තෝරාගන්න
• ප්‍රමාණයෙන් විශාල නොවිය යුතුය
• හැකි නම් කෑම පෙට්ටි දෙකක් තබා ගන්න
• කෑම පෙට්ටිය සිඟිත්තාට තනිව හෝ විවෘත කරගැනීමට පහසු එකක් වීමට වග බලාගන්න
• කෑම පෙට්ටිය ඔතන සර්වියට් එක දරුවාට පාලනය කරගැනීමට හැකි ප්‍රමාණයක් විය යුතුය

සිඟිත්තාගේ කෑම පෙට්ටියට පෝෂණයෙන් සපිරි විවිධ කෑම වර්ග විවිධත්වයකින් යුතුව එක් කිරීමට මෙන්ම ආහාරයේ රසය, වර්ණය පිළිබඳව ද ඔබේ අවධානය යොමු විය යුතුයි. ඇතැම් මව්වරුන් සිතා සිටින්නේ දරුවන් කුඩා නිසා ආහාරයේ පෙනුම පිළිබඳව ඔවුන් අවධානයක් යොමු නොකරනු ඇතැයි කියාය. නමුත් වැඩිහිටි අපට මෙන්ම දරුවන්ට ද ආහාර දුටු විගස රුචිකත්වයක් ඇති වන්නේ ආහාරයේ පෙනුම නිසාය. එසේම පෙර පාසැල් වයසේ දරුවෙකු ආහාරයට ගන්නේ ඉතා කුඩා ප්‍රමාණයක් නිසාම කෑම පෙට්ටිය පිරී ඉතිරෙන ලෙස ආහාර දැමීමෙන් වැළකිය යුතුය. එන්ද එය දරුවාට අප්‍රියජනක දසුනක් වනු නොඅනුමානය. එසේම එය දරුවාව විශාල අභියෝගයකට ලක්කිරීමකි.

එසේ රුචිකත්වයක් ඇති නොවන විට ආහාර ලබා ගන්නා වේලාව ළංවත්ම උදරයේ වේදනාවක් හෝ වෙනත් රෝගී තත්ත්වයක් පවසමින් කෑම වේල මග හරින්නට උත්සාහ ගන්නා සිඟිත්තන් මෙන්ම අනෙක් දරුවන්ගේ කෑම පෙට්ටිය දෙස දෙනෙත් යොමා සිටින සිඟිත්තන් ද අපට හමුවේ.

මේ කරුණු මත සිඟිත්තාගේ ආහාර වේලට විවිධත්වයක් එක් කරන්නත් එය රසයෙන් හා පෙනුමෙන් උසස් ලෙස සකසන්නටත් නිසි සැලසුමක් තබාගැනීම මවකට පැවරෙන වගකීමකි.

ඔබේ සිඟිත්තාට විවේක කාලයෙදී ලබාදෙන්නේ බත් නම්,

• එය මිශ්‍ර කර ගැනීමට පහසු ලෙස ලබාදෙන්න
• කටු ඉවත් කරන ලද මස්/මාළු කුඩා කැබලි ලෙස ලබාදෙන්න
• සම්පූර්ණ බිත්තරය පිටින්ම යොදා හතරට හෝ කපා දමන්න
• කරපිංචා නටු/කොළ ඉවත් කරන්න

ඔබ ලබාදෙන්නේ පාන් නම්,

• සැන්විච් ලෙස සැකසුව ද බටර්/ජෑම් හෝ බටර්/මාමයිට් තැවරුවද පාන් පෙත්තේ වැටි කපා කුඩා කැබලිවලට කැපීමෙන් දරුවාට තනිව එය ආහාරයට ගැනීම පහසු කරවයි. එවිට දරුවාට තම ආහාරය ඉතා පිළිිවෙළට හා පිරිසිදුවට ලබාගැනීමට ද හැකියාව ඇත.

ධාන්‍ය වර්ග ලබාදෙන්නේ නම්,

• බටර්/තෙල් යොදා තෙම්පරාදු කරන්න
• දරුවා කැමති නම් සිහින්ව ගාගත් පොල් සමග ලබාදෙන්න

නුඩ්ල්ස්/පැස්ටා ලබාදෙන්නේ නම්,

• එළවළු/බිත්තර/මස් හෝ මාළු එක්කර තෙම්පරාදු කර ලබාදීමෙන් පෝෂණ ගුණය සුරැකෙනවා සේම සුවඳ සහ පෙනුම නිසා දරුවා ආහාරයට රුචියක් දක්වයි.

සමපෝෂ/අග්ගලා වැනි දෙයක් ලබාදෙන්නේ නම්,

• දරුවාගේ විවේක කාලය වන විට වියළි තත්ත්වයට පත්නොවී තිඛෙන අයුරින් සකසාගන්න
• දරුවාට අල්ලාගෙන කෑමට පහසු ප්‍රමාණයේ කුඩා බෝල සකසන්න

පළතුරු/එළවළු ලබාදෙන්නේ නම්,

• හොඳින් තම්බා කුඩා කැබලිවලට කපා අසුරා දෙන්න.
• එය ආහාරයට ගැනීම සඳ හා ආරාක‍ෂාකාරී ගෑරුප්පුවක් ලබාදෙන්න
• සුපිරි වෙළඳසැල්වල පලතුරු කපා අසුරා ඇති රිජිෆෝම් පලතුරු අසුරුම් විවේක කාලය සඳහා එවීමෙන් වළකින්න

පාන වර්ග

• සැමවිටම හොඳින් උතුරවා නිවාගත් පිරිසිදු ජලය පමණක් පානය සඳහා ලබාදෙන්න. එක් එක් වර්ණයන්ගේ රසයන්ගේ බීම වර්ග ලබාදීමෙන් වළකින්න. වතුර බෝතලය සැමවිටම දරුවාට තනිව විවෘත කරගැනීමටත් වැසීමටත් හැකි ආකාරයේ එකක් වීම වඩාත් පහසුවක් වනු ඇත.

– සැලිකිය යුතුයි –

• දරුවා පෙර පාසැලට යැවීමට පෙර උදෑසන ආහාර වේල ලබාදීමට සැලකිලිමත්වන්න එවිට පෙර පාසැලේදී ආහාරයට ගැනීම සඳහා කෙටි ආහාරයක් ලබාදීමේ වරදක් නොමැත.
• බත්/නූඩ්ල්ස්/පැස්ටා/පළතුරු/එළවළු/ධාන්‍ය වර්ග ලබාදීමේදී හැන්දක් හෝ ගෑරුප්පුවක් දරුවාට ලබාදීමෙන් ආහාර ගැනීමේදී එය විශාල පහසුවක් වනු ඇත. නමුත් මෙහිදී සැලකිලිමත් විය යුතු වැදගත් කරුණක් වන්නේ පුංචි දඟකාරයන් වන පෙර පාසැල් වයසේ සිඟිත්තන්ට ස්ටේන්ලස් ස්ටීස් ගෑරුප්පු දීමෙන් දරුවාගේ හෝ අනෙක් දරුවෙකුගේ හෝ ඇණනහොත් තුවාල සිදුවිය හැකි බැවිනි. මේ සඳහා උසස් තත්ත්වයේ ප්ලාස්ටික් ගෑරුප්පුවක් යොදාගත හැකි නම් එය වඩාත් යෝග්‍ය වේ.

වළකින්න

• සීරියල්/කෝනෆ්ලෙක්ස් කිරි සමග මිශ්‍ර කොට එවීමෙන් වළකින්න
• දරුවාට පාලනය කරගත නොහැකි ප්‍රමාණයේ අත්පිස්නා එවීමෙන් වලකින්න (එය දිනපතා පිරිසිදු කිරීමටත් කල්පනාකාරී වෙන්න)
• දිනපාතා කෙටි කෑමහල් වෙතින් ලබාගන්නා කෙටි ආහාර වර්ග දිනපතා එවීමෙන් වළකින්න

පෙර පාසැල් ආචාරිනී ක්‍රිස්ටීන් ෆ්‍රැන්සිස්කා ද සිල්වා මහත්මිය සමග සකසන ලද ලිපියකි 

 

මෑතක සිට අප භෞතචිකිත්සක අංශ වෙත පැමිණෙන පාසැල් දරුවන් සංඛ්යාව ඉහළ ගොස් ඇති බව පෙනී යයි. ඒ කොඳු ඇට පෙළ එක් පැත්තකට වක්ර වී තිබීම (ස්කෝලියොසිස් තත්ත්වය) හේතුවෙනි. මෙයට මූලිකම හේතුවක් ලෙස අප දකින්නේ අධික බරින් යුත් පාසැල් බෑගය එක් උරහිසකට පමණක් දමාගෙන දිනපතා පාසල් යාමට පුරුදු වූ දරුවන් දිගු කාලයක් මෙලෙස බෑගය රැගෙන යාමෙන් කොඳු ඇට පෙළ එක් පැත්තකට වක් වී ඇති බවයි. එබැවින් අප නිර්දේශ කරන්නේ පිටේ එල්ලාගෙන යන බෑගය සුදුසු බවයි. එය වුවත් දරුවාට ඔසවාගෙන යාමට සුදුසු බරකින් එය යුක්ත විය යුතුය.

මේ ආකාරයෙන් වැරදි ඉරියව් හේතුවෙන් ඇති විය හැකි මෙවැනි තත්ත්වයන් පිළිබඳව සැවොම දැනුවත් වීම ඉතාම වැදගත් වන අතරම ලොකු කුඩා කාටත් මෙවැනි අවස්ථාවන්ට මුහුණ දීමට සිදුවිය හැකිය.  මේ ලිපිය හරහා සාකච්ඡා කිරීමට බලාපොරොත්තු වන්නේ වැරදි ඉරියව් හේතුවෙන් කොදු ඇට පෙළ ආශ්රිතව ඇති විය හැකි අසාමාන්යතා පිළිබඳව දැනුවත් කිරීමටයි.

දිගු කාලයක් මුළුල්ලේ වැරදි ඉරියව්වල සිට කාර්යයන්වල නිරත වූවන්ට කොඳු ඇට පෙළ ආශ්රිතව ඇති විය හැකි ආබාධ පහත පරිදි වේ.

• කොඳු ඇට පෙළ කුදු වීම හෙවත් කයිපොසිස් (Kyphosis)
• කොඳු ඇට පෙළ පැත්තකට නෙරා යෑම හෙවත් ස්කෝලියෝසිස් (Scholiosis)
• කොඳු ඇට පෙළ ඉදිරියට නෙරා ඒම හෙවත් ලෝඩෝසිස් (Lodosis)

කයිපොසිස් සහ ස්කෝලියොසිස් යන වක්ර වැඩි වශයෙන් දක්නට ලැඛෙන්නේ උරස් කශේරුකා ආශ්රිතවය. ලෝඩෝසිස් වක්රය කටී කශේරුකා පද්ධතිය තුළත් බහුලව දක්නට ලැබේ. මෙම අසාමාන්ය වක්ර ශරීරයේ අලංකාරය නැති කරනවා පමණක් නොව පෙණහලූ රෝග සහ ස්නායු රෝග ද ඇති කරයි.

මේ තත්ත්වයන් ඇති වීමට බලපෑ හැකි වෙනත් හේතු

• මාංශ පේශීන් දුර්වල වී සමතුලිතාව බිඳවැටීම
• ස්නායු ආඝාතයට ලක්වීම
• සුෂුම්නාව හෝ කශේරුකාවට ඇති වන ආසාදන
• උත්පත්තියෙන්ම ඇතිවන අසාමාන්යතා
• සුෂුම්නාවේ හටගන්නා අර්බුද (Tumour)
• දෙපාවල දිගෙහි වෙනසක් තිබීම

කුඩා වියේ සිටම දරුවන්ගේ ඉරියව් පිළිබඳව නිරීකෂණය කරමින් ඔවුන්ව නිවැරදි ඉිරියව්වලට පුරුදු කිරීම ඉතා වැදගත් බව ඔබට වැටහෙනවා ඇති. විශේෂයෙන් ඔවුන් පාඩම් කරන ඉරියව් නිවැරදි විය යුතුය. බොහෝ දරුවන් කොන්ද කුදු කරගෙන පාඩම් කරන අතරම එවිට කොඳු ඇට පෙළේ කයිපොසිස් නම් තත්ත්වය ඇති වේ. දරුවා පාඩම් කරන විට කොන්ද ඍජුව තබාගෙන, හිස හැකි පමණ කෙළින් තබාගෙන පොත මේසයට ආනතව සිටුවාගෙන එය කරන්නේ නම් වඩාත් නිවැරදිය.

ස්කොලියෝසිස් තත්ත්වයට තවත් හේතුවක් නම් පාද දෙකෙහි දිග අසමාන වීමයි. එවිට එම වෙනසට ගැළපෙන ලෙස කොඳු ඇට පෙළ ඇද වී යයි.

උදරය ඉදිරියට නෙරා එන ලෙස කොඳු ඇට පෙළ පිහිටීම zලෝඩෝසිස්Z නම් තත්ත්වයට  පේශිවල දුර්වලතාවය ප්රධාන වශයෙන් බලපායි. උදර පේශි ශක්තිමත් කරන ව්යායාම කිරීමෙන් ලෝඩෝසිස් තත්ත්වය අවම කර ගත හැක.

ස්කෝලියෝසිස්, කයිපොසිස්, ලෝඩෝසිස් තත්ත්ව නිවැරදි කිරීමට

• ඛෙල්ට්/කෝසෙට් වර්ග පැලඳ සිටීම සුදුසුය.
• ස්කෝලියෝසිස් සඳහා දෙඅත් ඔසවා ආධාරකයක එල්ලී සිටීම සුදුසුය
• කයිපෝසිස් සඳහා මුනින් අතට දිගා වී දෙඅත් පිටුපසට බැඳ හිස හා කඳ කොටස ඉහළට ඔසවාගෙන සිටීම
• ලෝඩෝසිස් සඳහා උඩුබැලි අතට හාන්සි වී උදරය මත උඩින් අත් දෙක බැඳගෙන හිස හා කඳ අංශක 45ක් ඔසවාගෙන මිනිත්තුවක් පමණ සිටීම.

කොළඹ, රිජ්වේ ආර්යා ළමා රෝහලේ ප්‍රධාන භෞතචිකිත්සක, වරලත් භෞතචිකිත්සක සංගමයේ සභාපති ආචාර්ය ජාලිය උඩුවැල්ල මහතා සමග සකස්කරන ලද ලිපියකි. 

 

අලුත උපන් ළදරුවාට ඉතාම සුදුසු ආරක්ෂිත ආහාරය මව්කිරි වන අතර දරුවාට අවශ්‍ය සියලූ පෝෂණ කොටස් එහි අන්තර්ගත වේ. දරු ප්‍රසූතියෙන් පසු මුල් දින කිහිපය තුළදී මව විසින් නිපදවන ලා කහ පැහැති කිරි කොලෙස්ට්‍රම් ලෙස හඳුන්වයි. මෙය ඉතා ස්වල්ප වශයෙන් නිපදවූවත් අලූත උපන් දරුවාට ප්‍රමාණවත් වේ. සියලූ පෝෂකවලින් අනූන මෙම මුල් කිරි මගින් දරුවා ආසාදන රෝගවලට ගොදුරු වීම වළකයි. එමෙන්ම මෙම කාලයේදී නිපදවන මුල් කිරි සියල්ලම දරුවාට ලබාදිය යුතුයි. දරුවාට මාස 06 සම්පූර්ණ වන තෙක් මව්කිරි පමණක් දීම අනිවාර්ය වේ. මාස 06 න් පසු අමතර ආහාර හඳුන්වා දිය යුතු අතර මව්කිරි දීම අවුරුදු 2 දක්වා හෝ ඊට වැඩි කාලයක් ක්‍රියාත්මක කළ හැකිය.

මව්කිරි මගින් දරුවාට ලැඛෙන වාසි

• දරුවාගේ වර්ධනයට සහ විකසනයට අවශ්‍ය සියලූ පෝෂක ප්‍රශස්ථ මට්ටමින් දරුවාට ලැබේ.
• මව්කිරි පහසුවෙන් දිරවයි. දරුවාට හොඳින් අවශෝෂණය වෙයි.
• දරුවා ආසාදන රෝගවලින් ආරක‍ෂා කරයි.(උදා- පාචනය, ස්වසන මාර්ග ආශ්‍රිත ආසාදන හා කනේ ඇති වන ආසාදන)
• මල බද්ධය වළකයි.
• එය පිරිසිදුයි. ඕනෑම අවස්ථාවක දරුවාට ලබාදිය හැකිය.
• මව හා දරුවා අතර සම්බන්ධතාවය වැඩිදියුණු කරයි.
• ජීවිතයේ පසු අවස්ථාවල ඇතිවිය හැකි ආසාත්මිකතාවයන් වන ඇදුම, සමේ රෝග ආදිය වළකයි.
• ජීවිතයේ පසු අවදියේ ඇතිවිය හැකි බෝ නොවන රෝග වන තරබාරුව, දියවැඩියාව, හෘද රෝග වැනි රෝග ඇතිවීම වළකයි.

මව් කිරි දීම නිසා මවට සහ පවුලට ලැඛෙන වාසි

• මවට පියයුරු පිළිකා ඇතිවීමේ අවදානම අඩු වේ.
• මවගේ බර අඩු වීමට උදව් වේ.
• ආර්ථීක වාසි ලබා දෙයි.

දරුවාට මාස 06 ක් යන තෙක් මව්කිරි පමණක් දිය යුත්තේ ඇයි ?

අලූත උපන් දරුවා මාස 06 සම්පූර්ණ වන තෙක් ප්‍රශස්ථ මට්ටමෙන් වර්ධනය සිදුවීම සඳහා ප්‍රමාණවත් පෝෂක මව් කිරිවල අඩංගු වේ. එමෙන්ම මව විසින් නිපදවනු ලබන මව්කිරි ප්‍රමාණයද දරුවාගේ වර්ධනය සඳහා ප්‍රමාණවත්ය. මව්කිරි මගින් දරුවාට අවශ්‍ය ජලයද ප්‍රමාණවත් ලෙස ලැඛෙන නිසා මෙම කාලයේදී අමතර දියර වර්ග දීම අවශ්‍ය නොවේ. මාස 06 ක් යන තෙක් මව් කිරි පමණක් ලබා දීම නිසා දරුවා ලෙඩ රෝග වලින් ආරක්ෂා වන අතර ආසාත්මික රෝග වලට ගොදුරු වීමේ අවදානම අඩු කරයි.

මව කොපමණ කලක් මව් කිරි දිය යුතුද ?

දරුවා ඉපදී පැයක් ඇතුළත මව්කිරි දීම ආරම්භ කළ යුතුය. දරුවාට අවශ්‍ය සෑම විටම මව්කිරි දිය යුතුය. දරුවාගේ බර මැනීම මාස් පතා සිදු කළ යුතු අතර මෙයින් දරුවාගේ වර්ධනය මැන ගැනීමට පුළුවන. බර වැඩිවීම ප්‍රශස්ථ අයුරින් සිදු නොවේ නම් වෛද්‍ය උපදෙස් ගැනීම සුදුසුය. අමතර ආහාර මාස හයක් වන විට ආරම්භ කල යුතු අතර මව්කිරිදීම අවුරුදු දෙකක් හෝ ඊට වැඩිකාලයක් දක්වා ක්‍රියාත්මක කළ හැක.

මව්කිරිදෙන ළදරුවන්ට විටමින් පරිපූරක අවශ්‍යද ? 

මව්කිරි පමණක් දෙන ළදරුවනට අමතර විටමින් හා ඛනිජ ලවණ අවශ්‍ය නොවේ. නොමේරූ හා අඩු බර සහිත දරුවන්හට වෛද්‍ය උපදෙස් මත පමණක් මෙම පරිපූරක විටමින් හා ඛනිජ ලවණ භාවිතා කළ හැක.

අසනීප වූ දරුවාට මව්කිරි දිගටම ලබා දිය යුතුය. දරුවා අසනීප වූ විටදී ප්‍රමාණවත් ලෙස පෝෂණය පවත්වාගෙන යාම ඉතා වැදගත් අතර එමගින් දරුවාගේ සුව වීම ඉක්මන් වේ. තවද මෙම කාලය තුළදී දරුවාගේ වර්ධනය අඩාල වීමද වළකී. එමනිසා දිගටම මව්කිරි දීම කළ යුතු අතර කිරි දෙන වාර ගණන වැඩි කිරීම මගින් දරුවාට නිසි පෝෂණය හා ඉක්මණින් සුවවීම යන ප්‍රතිලාභ අත් වේ.

වැඩකරන මව්වරුන්

මව දරුවා සමඟ නොමැති අවස්ථාවල තම මවගෙන් දොවාගත් කිරි දරුවා පෝෂණය කිරීමට භාවිතා කළ හැකිය. දොවාගත් කිරි පැය 06 ක් කාමර උෂ්ණත්වයේද පැය 24 ශීතකරණයක් තුළද (අධිශීතකරණ නොවන කොටස) සුරක‍ෂිතව ගබඩා කිරීමට හැකිය. මෙම දොවාගත් කිරි නැවත දරුවාට ලබා දීමේදී රත් කිරීම සුදුසු නැත. කිරි පෙවීම සඳහා කෝප්පයක් සමඟ හැන්දක් භාවිත කිරීම වඩා යෝග්‍ය අතර සූප්පු සහිත කිරි බෝතල් භාවිතය සම්පූර්ණයෙන් බැහැර කළ යුතුය. මාස හය සම්පූර්ණ වන තෙක් දිගටම මව් කිරි දීම කළ නොහැකි අවස්ථාවක හෝ කිරි දොවා ගැනීමේ හා ගබඩා කිරීමේ අපහසුතා ඇති අවස්ථාවක දරුවා පෝෂණය කිරීම සඳහා අමතර ආහාර මාස හතරෙන් වෛද්‍ය උපදෙස් මත ආරම්භ කළ හැකි අතර පිටිකිරි ලබා දීම සිදු නොකළ යුතුය.

සෞඛ්‍ය අමාත්‍යාංශයේ පෝෂණ අංශයේ ප්‍රකාශනයක් ඇසුරෙනි