පුංචි දරුවන් උණ සහ ප්‍රතිශ්‍යාව තත්වයට පත් වීම ඉතා සුලබයි. මේ අතර උණ , ප්‍රතිශයාව නෙසලකා සිටියොත් ඒ නිසාම පෙනහළු ආසාදනය වීම හෙවත් බ්‍රොන්කියෝලයිටිස් රෝග තත්වයට පත් වීමටත් යම් අවදානමක් තිබෙනවා. ඒ නිසා ඔබේ දරුවා ප්‍රතිශ්‍යාව සහ කැස්ස තත්වයෙන් පසු වෙනවා නම් ඒ ගැන නොසලකා ඉන්නත් එපා.වෛරසයක් හෝ බැක්ටීරියාවක් හේතුවෙන් ඇති වෙන බ්‍රොන්කියෝලයිටිස් රෝග තත්වයේදී අභ්‍යන්තර පටල ඉදිමෙන නිසා ශ්වාස නාල සිදුරු සිහින් වී හුස්ම ගැනීම අපහසු වෙනවා.
බ්‍රොන්කියෝලයිටිස් රෝග තත්වය සාමාන්‍ය සිදුවීමක්. නමුත් කැස්ස සමග මෙවැනි ලක්ෂණ ඇත්නම් ඒ ගැන සැලකිලිමත් වීම වැදගත්.රෝග තත්වය නොසලකා සිටියොත් පෙනහළු තුළ තිබෙන ශ්වාසනාල ඇතුළු පටල තුවාල වී ශ්වාසනාල ආසාදනය වෙනවා.
බ්‍රොන්කියෝලයිටිස් රෝග තත්වය ගැන යම් අනතුරු ලකුණු දැන ගැනීමට පුළුවනි. ඒවා දැන ගැනීම සමග දරුවා ප්‍රතිකාර වෙනුවෙන් යොමු කිරීම ඉතාම වැදගත්.
බ්‍රොන්කියෝලයිටිස් රෝග තත්වය ඇති වෙන්නේ…?
මේ රෝග තත්වය සමාන්‍ය ප්‍රතිශ්‍යාවකින් ආරම්භ වෙන්න පුළුවනි. වෛරස හෝ බැක්ටීරියා ආසාදනයක් නිසා ඇති වෙන රෝගයේ සාමාන්‍ය රෝග ලක්ෂණ මේ අන්දමින් සඳහන් කරන්න පුලුවනි.
- සාමාන්‍ය ප්‍රතිශ්‍යාව ( cold )
- කැස්ස
- කැස්ස සමග රුධිරය පිටවීම
- නාසය සිරවීම
- නාසයෙන් සොටු දියර ගැලීම
- සමහර අවස්ථාවලදී මද උණ
- සාමාන්‍යයෙන් මේ තත්වය දින කීපයක් තිබී සුවය ලැබීමට පුළුවනි.
බ්‍රොන්කියෝලයිටිස් රෝග තත්වයේ උග්‍ර අවස්ථාවන්
බ්‍රොන්කියෝලයිටිස් රෝග තත්වය උත්සන්න වීමත් සමග ඇති වෙන රෝග ලක්ෂණ ගැනත් දෙමව්පියන් දැනුවත්ව සිටීම ඉතාම වැදගත්.
- දරුවා හුස්ම ගන්නා විට ඇති වෙන ( wheezing ) ශබ්දය
- වේගයෙන් හුස්ම ගැනීම
- ශ්වසන මාර්ගයේ ඔක්සිජන් ධාරිතාවය අඩු වීම නිසා හුස්ම ගැනීමේ අපහසුතාවය apnea ලනිසා දරුවාට යන්ත්‍රානුසාරයෙන් ශ්වසනය ලබා දීමට පවා සිදු වේ.
- තොල් සහ නිය නිල් පැහැ ගැනීම cyanosis
- විජලන තත්වයට පත් වීම
- නිව්මෝනියා රෝග තත්වයට පත් වීමටත් ඉඩ තිබෙනවා.
අවදානමක් ඇති දරුවන්
බ්‍රොන්කියෝලයිටිස් හැදුන විට සෑම දරුවෙක්ම අවදානම් ඇති දරුවන් ලෙස සලකන්නේ නැහැ. බ්‍රොන්කියෝලයිටිස් නිසා ඇති වෙන අපහසුතාවයට හුමාලය ඇල්ලීම වැනි ප්‍රතිකාර ලබා දෙන්න පුළුවනි.
මාස තුනට අඩු දරුවන් සහ නොමේරූ ළදරුවන් බ්‍රොන්කියෝලයිටිස් රෝග තත්වයට පත් වීමේ වැඩි අවදානමක් තිබෙනවා. බ්‍රොන්කියෝලයිටිස් රෝග ලක්ෂණ උත්සන්න වී පෙනහළු ආසාදනය උග්‍ර වුන අතැම් දරුවන් දැඩි සත්කාර ඒකකයන්ට ඇතුලත් කර ප්‍රතිකාර කිරීමට සිදු වෙනවා. ඔවුන්ගේ පෙනහළු සහ ප්‍රතිශක්තිකරණ පද්ධතිය සම්පූර්ණයෙන්ම වර්ධනය වී නොමැති නිසා බ්‍රොන්කියෝලයිටිස් රෝග තත්වය යම් අන්දමකින් අවදානමක් ඇති කරන්න පුළුවනි. ඊට අමතරව
- නොමේරූ දරුවන්
- හෘදයවස්තුව සහ පෙනහලු ආශ්‍රිතව සංජානනීය රෝග තත්වයන් ඇති දරුවන්
- දුර්වල ප්‍රතිශක්තිකරණය සහිත දරුවන්
මව්කිරි පානයට අවස්ථාවක් නොලැබීම ( සමහර විට මවගේ රෝගී තත්වයන් සහ මව් මියයෑම වැනි හේතුන් නිසා ළදරුවාට අවශ්‍ය පෝෂණය මව්කිරි වෙතින් නොලැබීමට පුළුවනි. මව්කිරි නිසා දරුවාගේ ප්‍රතිශක්තිය වර්ධනය වීම සිදු වුනත් මෙවැනි දරුවන්ට එම වාසිය අහිමි වීම නිසා ඔවුන්ගේ ප්‍රතිශක්තිකරණය දුර්වල නිසා ඕනෑම බෝ වන රෝගයකට පහසුවෙන් ගොදුරු විය හැක. )
- ජනාකීර්ණ පරිසරයක ජීවත් වෙන දරුවන්
- අක්‍රිය දුම්පානය හෙවත් දුම්පානයට නිරාවරනය වන දරුවන්
කුඩා දරුවන් බ්‍රොන්කියෝලයිටිස් රෝග තත්වයෙන් ආරක්ෂා කර ගන්නේ කෙසේද..?
දරුවන්ගේ ආරක්ෂකයා මව්පියන් බැව් අපි දන්නවා. විශේෂයෙන් ශ්වසන රෝග තත්වයන් දරුවන්ට ඉතා පහසුවෙන් වැළඳීමට ඉඩ තිබෙනවා. ඒ නිසාම දෙමව්පියන් විසින් ළදරුවන්ගේ ආරක්ෂාව ගැන වැඩි අවධානයක් දැක්වීම ඉතාම වැදගත්.
- උණ ප්‍රතිශ්‍යාව ඇත්නම් දරුවා හැකි තාක් නීරෝගී දරුවන් හා ගැටීම වැලැක්විය යුතුයි. සමහර විට පාසල් යන දරුවන් උණ ප්‍රතිශ්‍යයා තත්වයෙන් පසු වෙන විට ළදරුවන් ඇත්නම් ආරක්ෂා කර ගැනීම වගේම වැඩිමහල් දරුවන්ටත් මෙවැනි රෝග තත්වයන්ගෙන් හැකිතාක් ආරක්ෂාව කරන්න.
- මුහුණු ආවරණ පළඳින්න
- දරුවා ස්පර්ශ කිරීමට පෙරාතුව සෑම අවස්ථාවකදීම සබන් යොදා හොඳින් අත් සෝදන්න.
- දරුවාට මව්කිරි ලබා දෙන්න
විශේෂඥ මතය, අදහස සහ මූලික සටහන:
ක්‍රිඩා සෞඛ්‍ය සහ නිර්වින්දන වෛද්‍ය නිළධාරී නාමල් චමින්ද විජේසිංහ
දිස්ත්‍රික් රෝහල, මීගමුව
