පවුලක් වුනාම දරුවෝ දෙතුන් දෙනෙක් වුනොත් බොහොම ආලෝකයක් ලැබෙනවා. ඒ නිසාම දෙමව්පියන් තම කැදැල්ලට තවත් අමුත්තෙක් බලාපොරොත්තු වෙනවා. කාලයත් සමග ඒ සුබ ආරංචිය ලැබෙනවා. ඉතින්..තවත් ගැටලුවක් ඇති වෙනවා..

අම්මාට දැන් ටිකක් අපහසුයි…

කුළුදුලේ දරුවා ලැබෙද්දී නම් අම්මාට එතරම් ගැටලුවක් වුනේ නැහැ. දැන් පුංචි පුතෙක් හෝ දුවෙක් ඉන්න නිසා එයාගේ වැඩ කටයුතුත් සමග කාලය ගෙවන්නත් ඕන. මුල් කාලයේදී ඇති වෙන ශාරිරික අපහසුතාවයන් නිසා තමන් මෙච්චර කාලයක්ම දැඩි ආදරයෙන් සහ අවධානයෙන් සිටි දරුවා ගැන පුංචි හෝ අතපසුවීම් ඇති වෙනවා. මේ තත්වය දැන් පැටියාට ගැටලුවක්.දරුවාත් ඒ වෙනුවෙන් ප්‍රතිචාර දක්වන්න පටන් ගන්නවා. අම්මාටත් ඒ තත්වය ටිකක් අපහසුයි. 

අම්මාට කරදර කරන්න එපා…

ඔන්න දැන් හැම තැනින්ම පැටියාට ලැබෙන පණිවිඩය ඒකයි.මම නිවස තුළම ප්‍රතික්ෂෙප වෙලා කියන සිතුවිල්ල දරුවාට ලැබෙනවා. ඒ නිසා දෙවැනි දරුවා ලැබෙන පණිවිඩය ලැබුනාම පුංචි අමුත්තෙක් නිවසට එන බව වැඩිමහල් දරුවාට බොහොම ආදරයෙන් සහ ප්‍රවේසමෙන් කියා දෙන්න.ඔබ දරුවාට ලබා දෙන පණිවිඩය අනුව තමන්ගේ ප්‍රතිචාර දරුවා ගොඩ නගා ගන්නවා.

දරුවාගේ හිතේ ඊර්ශ්‍යාව ඇති වෙන්නේ ඇයි..?

දරුවන්ගේ හිත් බොහොම සංවේදියි. ඔවුන්ට හැම දෙයක් දෙසම සාධාරණ ඇසකින් බලන්න බැහැ. ඒ නිසා පවුල තුළ අලුත් අමුත්තෙකුගේ ආගමනය ඉතා දැඩි විදිහට බලපාන මානසික තත්වයක් වෙන්න ඉඩ තිබෙනවා.

• මෙතෙක් දෙමව්පියන්ගේ පැවැති ආදරය සහ අවධානය අඩු වීම.
• සෙල්ලම් බඩු බෙදා ගැනීමේදී තමන්ට අසාධාරණයක් වෙතැයි වූ සිතුවිල්ල
• ”ඔයා දැන් ලොකුයි..” කියමින් බාල දරුවාට වැඩි අවධානයක් දැක්වීම

නිවස තුළ ඇති වෙන මේ පරිසරය නිසා වැඩිමහල් දරුවා බෙහෙවින් මානසික පසුබැසීමකට පත් වෙනවා. එය දරුවෙකු සම්බන්ධයෙන් එතරම් ගැලපෙන තත්වයක් නොවෙයි.

දරුවාගේ මානසික තත්වය ගැන දැන ගන්නේ කොහොමද..?

• ඉස්සර වගේ නොවෙයි, දැන් අපේ ලොකු පුතාට හරියට කේන්ති යනවා..
• ගිහින් සෙල්ලම් කරන්න…ඇයි මේ පැත්තකට වෙලා.
• දැන් කී සැරයක් කිව්වද..? ඇවිත් බත් කන්න.
• ඔලුව රිදෙනවා…බඩ රිදෙනවා…හැමදාම ‍එක එක ලෙඩ..

ඔන්න ඔය විදිහට වැඩිමහල් දරුවා විවිධ හැසිරීම් රටාවන් ප්‍රදර්ශනය කරන්න පුලුවනි. ඒ සේරමටත් වඩා දැඩි ගැටුමක් ඇති වෙන්නත් ඉඩ තිබෙනවා. බාල දරුවාට රහසේම හිරිහැර කරන්න ඉඩ තිබෙනවා. ඒ නිසා මේ මානසික තත්වය සමග දෙමව්පියන් බොහොම ප්‍රවේසමෙන් කටයුතු කරන්න අවශ්‍යයි.

ඉතින්..වැඩිමිහල් දරුවාටගේ හිත නොරිදෙන විදිහට අලුත් අමුත්තා පිලිගන්නේ කොහොමද..?

පුතාට නංගියෙක් ගේන්නයි යන්නේ…

ඔන්න අම්මා පුතාට නංගියෙක් ගේන්නයි යන්නේ..අම්මාගේ බන්ඩියේ දැන් නංගියෙක් ඉන්නවා. පුතා කැමැතියි නේද..? එතකොට පුතාට සෙල්ලම් කරන්න පුලුවනි..පුතා අයියා කෙනෙක් වුනාම නංඟියාව හොදට බලාගන්න ඕන.. නංඟිත් ඔයාට ආදරෙයි නේ..

මේ අන්දමින් දරුවාගේ මානසිකත්වය අලුත් අමුත්තා පිලිගන්නා ලෙසින් සූදානම් කිරීම ඉතාම වැදගත්.

එසේ නොමැතිව නිතරම දරුවා ප්‍රතික්ෂෙප වන අන්දමින් කටයුතු කරත්ම ඔහු අම්මා විසින් අනාගතයේදී කැදවා ගෙන එන අලුත් නංඟියා හෝ මල්ලියා ගැන සිතේ අමනාපයක් අද දවසේ පටන්ම ගොඩ නගා ගන්නවා.

වැඩිමහල් දරුවාටත් අවධානය දෙන්න..

දෙවැනි දරුවාගේ ප්‍රසුතිය වෙනුවෙන් සූදානමින් සිටින දෙමව්පියන් වැඩිමහල් දරුවාටත් හැකි අන්දමින් අවදානය ලබා දෙන්න.මෙතෙක් පවුලේ රජා ලෙසින් සිටි ඔහු දැන් නොදැනීම අවතැන් වුනොත් එය දරුවාට දැඩි මානසික ප්‍රශ්නයක් විය හැකියි.ඒ නිසා වෙනදා මෙන් නොහැකි වුනත් ඉඩ ලද සෑම විටම අවදානය, ආදරය දක්වමින් ඔහු පවුලේ වැදගත් චරිතයක්ය යන ශක්තිය ගොඩ නගා ගැනීමට හැකි ලෙසින් පවුලේ වටපිටාව සූදානම් කරන්න.

අළුත් අමුත්තා පැමිණි විට..

අලුත් අමුත්තාගේ පැමිනීමත් සමග නිවසේ පරිසරය සම්පූර්ණයෙන්ම වෙනස් වීමට පටන් ගන්නවා. වෙනදා නොමැති කලබලයක් වගේම අලුත් පැටියා බලන්න එන නැදෑ හිත මිතුරන් සමග නිවසේ පැවැති පරිසරය සම්පූර්නයෙන්ම වෙනස් වෙනවා. මේ වෙනස තුළ වැඩිමහල් දරුවා අවතැන් නොවන සේ කටයුතු කිරීම ඉතාම වැදගත්.අළුත් දරුවාට තෑගි බෝග ලැබෙන විට එය යම් අන්දමකින් වඩිමහල් දරුවාගේ හිතට දැනෙන්න පුලුවනි.ඒ නිසා දෙමව්පියන් ලෙස ඔබ වැඩිමහල් දරුවාගේ හිතේ ඊර්ශ්‍යාවක් ගොඩ නැගෙන්නට ඉඩ නොමැති ලෙසින් නිවස සූදානම් කරන්න.ඒ නිසා බාල දරුවාට තෑග්ගක් දෙන විට ඒ නිවසේ වැඩිමහල් දරුවෙකු සිටිනවා නම් පුංචි හෝ යමක් ඔහුටත් ලබා දීම වඩාත් සුදුසුයි.

වෙනදා තාත්තා එන තෙක් මග බලා සිටි වැඩිමහල් දරුවා ගෙන තවමත් ඔබේ අවධානය ලබා දෙන්න.මුලින්ම ඔහු සිප සනසන්න. නංගි හෝ මල්ලි ගන තොරතුරු ඔහුගෙන් විමසන්න.

මල්ලි කිරි බිව්වද..? මල්ලි අද ඇඬුවද..? ඔයා මල්ලි බලා ගත්තද..? මේ විදිහට යම් වගකීමක් ලබා දුන් විට තමාත් මේ පවුලේ වැදගත් චරිතයක් බැව් වැඩිමහල් දරුවා විසින් තේරුම් ගනු ඇත.

බාල දරුවාගේ වැඩ කටයුතුවලට සහය කර ගන්න

බොහෝ දෙමව්පියන් බාල දරුවාගේ වැඩ කටයුතුවලදී වැඩිමහල් දරුවාගේ සහයෝගය ලබා ගන්නේ නැහැ. සමහර විට එයින් එක වැඩය දෙගුණයක් බවට පත් වෙන්නත් පුලුවනි. නමුත් නිතරම එපා..එපා…කියනවාට වඩා පුතා නංගිගේ රෙදි ටික ගෙට ගේන්න… නංගාට අන්දවන්න ලස්සන ගවුමක් පුතු තෝරලා දෙන්න..

මෙවැනි පුංචි පුංචි කටයුතු පැවරීම සමග අලුත් අමුත්තා සමග තමාද ගනුදෙණු කරන බැව් ඒත්තු ගැනුනොත් පුංචි වුනත් මටත් නිවසේ යම් වගකිමක් තිබෙන වැදගත් චරිතයක් බැව් වැඩිමහල් දරුවා විසින් තේරුම් ගනු ඇති.

ඒ නිසා අලුත් අමුත්තෙකුගේ පැමිනීමත් සමග තිබෙන මාස ගණනාව පුරා ඔබට වැඩිමහල් දරුවාගේ මානසිකත්වය ඉතාම යහපත් අන්දමින් ගොඩ නගන්න පුලුවනි.කිසිම දිනක ”ඔයා දැන් ලොකුයි..දැන් අපට නංගියෙක් ඉන්නවා..ඔයා දගයි..ඔයා අපට දැන් වැඩැක් නැහැ…නංගා හොදයි..යනුවෙන් විවිධ අන්දමින් ඔබේ වැඩිමහල් දරු පැටියා අවතැන් කරන්න එපා. ඔබ නොදැන සිදු කරන මේ තත්වය නිසා වැඩිමහල් දරුවා නොදැනීම තමාගේ සහෝදරයා සමග විරසකබවක් හිතෙන් ගොඩ නගා ගැනීම අනාගතයේදී සහෝදරත්වයට පවා බලපාන තත්වයක්..ඒ නිසා අලුත් අමුත්තා පිලිගන්නා මානසිකත්වය දරු පැටියාගේ මානසිකත්වයේ ගොඩ නගන්න.

දරුවන් අතර ගැවසෙන විට අපිට ඒ අයගේ විවිධ ගති පැවැතුම් ගැන හොඳ වැටහීමක් ලැබෙනවා.සාමාන්‍යයෙන් දරුවන් තුළ ආත්මාර්ථකාමී ගති පැවැතුම් දක්නට ලැබෙනවා. ඒ වගේම ටිකක් ආවේගශීලි වෙන අවස්ථාවනුත් නැතුවාම නොවෙයි. ඒත්..දරුවාගේ ආත්මාර්ථකාමීබව, ආවේගශීලිත්වය තවත් අයටහිරිහැරයක් හෝ පීඩාවක් වෙන අන්දමින් හැඩ ගැසී තිබෙනවා නම් එතැනදී දෙමව්පියන් සැලකිලිමත් වීම වැදගත්. දරුවා වෙතින් ගොඩ නැගෙන මේ පෞරෂ ඌනතාවය ”ආත්ම මානය ” හෙවත් narcissistic personality disorder ලෙසින් නම් කර තිබෙනවා.

• ඉතින් මෙවැනි දරුවන්ගේ ගති පැවැතුම් ගැන ඔබ දැණුවත්ව සිටියොත් හොදයි නේද…?

අනුන් පීඩාවට පත් කිරීම

මෙම පෞරෂ ඌනතාවයට පත් දරුවන් අනුන් පීඩාවට පත් කිරීමට වැඩි කැමැත්තක් දක්වනවා. එයින් ඔවුන් තෘප්තියක් ලබන්න සූදානම්. සතුන්ට පවා හිංසා කිරීමේ මානසිකත්වයකින් මේ දරුවන් පසුවෙනවා. ඇතැම් නරුම පාලකයන් ලෙසින් ප්‍රසිද්ධියට පත්ව සිටි පුද්ගලයන්ගේ බාල කාලයේදී මේ අන්දමින් අනුන් පීඩාවට පත් කරන ගති පැවැතුම් තිබෙන බැව් ඔවුන්ගේ චරිතාපදානයන්හි පවා සඳහන්ව තිබේ.

කෙසේ හෝ තමන්ගේ අරමුණ ඉටු කර ගැනීම

ආත්ම මානය ලෙසින් හැදින්වෙන මෙම දුර්වල පෞරෂ තත්වයට පත්ව සිටින දරුවන් කෙසේ හෝ තමාගේ අරමුණ ඉටු කර ගැනීමට වෙහෙස දරති.ඔවුන්ට දෙමව්පියන්ගේ අපහසුතාවයන් ගැන තැකීමක් නොමැත. තමාගේ අවශ්‍යතාවය ඉෂ්ට වුනොත් එය ප්‍රමාණවත්ය.ඒ නිසාම පවුලේ දෙමව්පියන්.සහෝදරයන් පීඩාවට පත් කරමින් හෝ තමාගේ අරමුණ ඉටු කර ගැනීමට මේ දරුවන් නිරන්තරව උත්සාහ දරති.

බොරු කීමට මැලි නැහැ

මේ පෞරෂ ඌනතාවයට පත් දරුවන් අනවශ්‍ය අන්දමින් පවා බොරු කීමට වැඩි නැඹුරුතාවයක් දක්වති.ඔවුන්ගේ අරමුණ ඉටු කර ගනු වස් බොරුවෙන් හෝ මව්පියන් මුලාවට පත් කිරීමට පසුබට නොවෙති.

විවේචනයේදී දරුණුයි

ආත්ම මානය පෞරෂ දුර්වලතාවයට පත්ව ඇති දරුවන්ට හොඳක් නරකක් පැහැදිලි කිරීම ඉතාම අපහසුයි.ඔවුන් එවැනි අවස්ථාවන්හිදී දැඩි විදිහට කිපෙනවා.ආවේගශීලිත්වයට පත් වෙනවා. වචන පවා ඉතාම දරුණු විදිහට හසුරුවනවා. 

අනුන් මත වැරදි පැවරීම

පුංචි පැටව් බොහොම සුන්දර වුනත් මේ අන්දමේ ආත්ම මානය නැමැති පෞරෂ දුර්වලතාවයට පත් දරුවන් කිසිම දිනක තමන්ගේ වරද පිලිගන්නේ නැහැ. කිතුල් ගහට ගිය මිනිසාටත් කියන්න කරුණු තිබුනා වගේ මේ දරුවන් නිතරම වරද අනුන් මත පටවන්න හරිම දක්ෂයි. අම්මා නිසා තමයි වුනේ…එහෙම නැත්නම් තාත්තා නිසා තමයි…යනුවෙන් අනුන් මත වරද පටවා තමා නිදොස් වීමේ ගති පැවැතුම් බාල කාලයේ පටන්ම මේ දරුවන් වෙතින් ප්‍රදර්ශනය වෙනවා.

සහයෝගයක් නැහැ…

මේ දුර්වල ගති පැවැතුම් ඇති දරුවන් කිසිම දෙයකදී සහයෝගයක් දක්වන්නේ නැහැ.ඒ වෙනුවට කඩාකප්පල් කිරීමට වැඩි නැඹුරුතාවයක් දැක්වීම මෙවැනි දරුවන්ගේ සිරිතයි.

ඉතින්…මේ ගති පැවැතුම් සමග දරුවාට වැඩෙන්න ඉඩ දිය යුතු නැහැ..

දරුවෙකුගේ මොළයේ සැලකිය යුතු වර්ධනයක් මුල් පස් වසර තුළ සිදු වේ.දරුවාගේ නළල ඉදිරිපස හෙවත් කොටසේ වර්ධනය සිදු වන්නේ වයස අවුරුදු විස්සක් වැනි අවධියකදීය. ගැටවර අවධියේදී දරුවාගේ අනිසි හැසිරීම් වෙනුවෙන් බාල කාලයේදී ලබන අත්දැකීම් වඩාත් සමීප බලපෑමක් ලබා දෙන නිසා ඔබ දරුවා හැඩගැස්වීමේදී මේ ගැනත් සලකා බැලීම ඉතා වැදගත්.

අනාගතයේදී ඔබේ දරුවා ”ආත්ම මානය ” නැමැති දුර්වල පෞරෂ තත්වයෙන් ආරක්ෂා කර ගැනීම ඔබ වැඩි අවදානයක් දැක්වීම ඉතාම වැදගත්. එසේනම් 

• දරුවාගේ ගති පැවැතුම් සමග ඔබ කටයුතු කරන්නේ කෙසේද…?

නිතරම දරුවාගේ ආත්මාභිමානය ගොඩ නගන්න…

දරුවන් කුඩා වුනත් ඔවුන්ටත් ආත්මාභිමානයක් තිබෙන බව අමතක නොකරන්න. ඒ නිසා කිසිම දිනකදී ඔබ විසින් දරුවාට ප්‍රසිද්ධියේ අපහාස කිරීමෙන් වලකින්න.

ඒ වගේම සෑම දෙනා අතින් යම් යම් වැරදි සිදු වෙන බැව් පහදා දෙන්න.වැරැද්දක් සිදු වූ විට එය පිලිගැනීමට සහ යලිත් එම වරද නොකර සිටීම වඩාත් සුදුසු බැව් පහදා දෙන්න.

කිසිම දිනක දරුවා තවත් අයෙකු සමග සංසන්දනය කිරීම නම් නොකලම යුතුය.එයින් දරුවා ගොඩ නගා ගත හැකියැයි ඔබ සිතුවත් එයින් සිදු වෙන්නේ දරුවාගේ පෞරෂය දුර්වල වීම පමණි.

දරුවාගේ සහයෝගය ලබා ගන්න. 

නිවසේ මෙන්ම අසල්වැසියන් සමග කටයුතු කරන විට දරුවාගේ සහයෝගය ලබා ගැනීමත් ඉතා වැදගත්. සහයෝගයේ පාඩම දරුවා එතැනින් උගනිනු ඇත.සමාජයේ ජීවත් වෙන විට සහයෝගය අවශය පැව් දරුවා එහිදී තේරුම් ගනු ඇත.

තීන්දු තීරණ ගැනිමේදී දරුවාගේ අදහස් යෝජනා භාරගන්න.

නිවසේ යම් කටයුත්තක් සිදු කරන විට දරුවාගේ අදහස් විමසන්න.ඇදුම් අඳින විටත් පුතා කැමැති ඇඳුමක් තෝරා ගැනීමට අවසරය දෙන්න.බාල කාලයේ පටන්ම පාවහන් දමා ගැනීම, කමිසය තනියම ඇඳ ගන්න අවස්ථාව ලබා දෙන්න.මෙය ළදරු පාසල් අවස්ථාවේ පටන් අනුගමනය කරන්න පුලුවනි. එවිට අනාගතයේදී දරුවා තවත් අයෙකු මත යැපෙන මානසිකත්වයෙන් නිදහස් වෙනු ඇත.

අනවශ්‍ය ඇගයීමත් සුදුසු නැහැ.

දරුවාට යම් ඇගයුමක් ලබා දිය යුතු බැව් ඇත්ත. ඒත් අනවශ්‍ය අන්දමින් ඔවුන් අගයන්න එපා. එවිට දරුවා අනාගතයේදීත් සමාජයෙන් බලාපොරොත්තු වන්නේද ඇගයීම පමණි. විවේචනය ඉදිරියේදී ඔහු දණ්ඩෙන් පහර කෑ සර්පයෙකු ලෙසින් ආවේශ විය හැක.

දරුවාගේ ආත්ම පාලනය ගොඩ නගන්න..

දරුවන් එකිනෙකාට වෙනස් බැව් ඇත්ත. ඇතැම් දරුවන් දැඩි ලෙසින් ආවේගශීලි වේ. එවැනි දරුවන් තුළ බාල කාලයේදී පටන්ම ආත්ම සංයමය ගොඩ නැගීමට කටයුතු කරන්න.

දරුවන් ඉදිරියේ මව්පියන්ගේ පාලනය අවශ්‍යයි.

දරුවන් ඉදිරියේ මව්පියන්ගේ ආවේගශීලි හැසිරීම් රටාවන් ප්‍රදර්ශනය වුනොත් දරුවන්ද ඒවා අනුකරණය කිරීමට පුරුදු වීමට පටන් ගනී. ඒ නිසා ඔවුන් ආවේගශීලී රටාවක් සමග වැඩෙනු මිස ආත්ම සංයමයකින් කටයුතු කිරීමට කිසිම දිනක යොමු නොවනු ඇත.

පවුල තුළ සහජිවනය

දරුවෙකු මව්කුස සිටින කාලයේදී පටන් මව සහ පියා ගැන අවබෝදයක් ලබන බැව් පර්යේෂකයන් පෙන්වා දී තිබේ. මාස දෙකක් පමණ වෙත්ම දරුවා මව්පිය, සහෝදර සහ නිවසේ එකට ජීවත්වෙන පුද්ගලයන්ගේ මුහුනු හදුනා ගනී.ළදරු පාසල් අවධිය වෙන විට දරුවා තවත් පුංචි සමාජයකට සම්බන්ධ වෙන අතර මේ සෑම දෙනා සමග එකට එක්ව ජීවත්වීමේ පාඩම දරුවාට කියා දීම ඉතාම වැදගත්.

සහකම්පනය උගන්වන්න

දරුවෙකුට ඔබ ලබා දිය යුත්තේ පොත පත පාඩම් පමණක් නොවේ.ඔවුන් තුළ සංවේදී සිතුවිලි ගොඩ නගන්න. කුරා කුහුඹුවාගේ පන් පාරේ යන එන අසරන, රෝගි පුද්ගලයන් වෙත පිහිට වීමේ අවස්ථාවන්හිදි උදව් වීමට හුරු කරන්න.සහකම්පනය නොමැති දරුවා අසම්පූර්ණ චරිතයකි.

එසේනම් මතු අනාගතයේදී ඔබේ දරුවා වෙතින් ”ආත්ම මානය ” නැමැති දුර්වල පෞරෂ ගති පැවැතුම් දුරස් කිරීමට නම් අද සුදානම් වෙන්න.