හාහාපුරා දරුවෙකු බිහි වීම ඕනෑම කාන්තාවකට නවමු අත්දැකීමක් බව නොරහසකි. අත්දැකීම් නොමැතිකම මත හෝ නොදැනුවත්කම මත ඕනෑම කාන්තාවකට මව්කිරි දීම සම්බන්ධයෙන් ගැටලු ඇති විය හැකිය. අලුත උපන් දරු පැටියාට නිවැරදිව කිරි ලබා දීම සම්බන්ධව ඇති දැනුම අල්ප වීම නිසා මවකට මුහුණ දීමට සිදුවිය හැකි අපහසුතා, වේදනාකාරී අත්දැකීම් කිහිපයක් පිළිබඳවත් ඒ වෙනුවෙන් ගත යුතු ක්‍රියාමාර්ග පිළිබඳවත් මේ ලිපිය හරහා සාකච්ජා කෙරෙනු ඇති.

තන පුඩුව කෙළවර තුවාල වීම

වැරදි ආකාරයට දරුවා අල්වා ගැනීම හා තන පුඩුව නිසි ආකාරයට දරුවාගේ මුඛයට ඇතුළු නොකිරීම නිසා මේ තත්ත්වය ඇති වේ. මේ සඳහා නිවැරදි ප‍්‍රතිකාරය වන්නේ දරුවා අල්ලා ගන්නා ක‍්‍රමය හා කිරි පොවන ක‍්‍රමය සකසා ගැනීමයි.

• තුවාල වී ඇති ස්ථානය විවෘත කර සුළඟ මගින් වියළීමට ඉඩ හරින්න. නැතිනම් සූර්යා ලෝකයට විවෘත කර වියළීමට ඉඩ දෙන්න.
• කිරි ටිකක් දොවා තන පුඩුව හා තුවාලය මත අතුල්ලන්න. ඉන් පසු වියළීමට ඉඩ හරින්න.
• කිරි පෙවීමට පෙර අයිස් කැටයක් ඒ මත තබා වේදනාව අඩු කරගන්න.
• අදාල පියයුරට දිනක පමණ විවේකයක් ලබා දෙන්න. එම දින තුළ එහි ඇති කිරි දොවා ඉවත් කරන්න.
• තද ඇඳුම් හා තද බ්‍රෙසියර් ඇඳිමෙන් වළකින්න.
• අනෙක් පියයුරෙන් නියමිත ආකරයට කිරි ලබාදෙන්න.

කිරි නාල සිරවීම හා ගැටිති ඇති වීම

මෙහිදී පියයුර ස්පර්ශ කළ විට කුඩා ගැටිති ලෙස අතට දැනේ.

• උණුසුම් තෙත රෙදි කඩකින් විනාඩි 5 ක් පමණ සම්භාහනය කරන්න.
• ඉන්පසු සම්භාහනයකර කිරි ඉවතට ගන්න.
• ඉන්පසු එම පැත්තේ කිරි ගලාගෙන එන ලෙස දරුවාට කිරි පෙවීම කරන්න
• එක දිගට කිහිප වාරයක් එම පැත්තෙන් කිරි පොවන්න. ඉතිරි කිරි දොවා ඉවත් කරන්න.

පියයුර ඇතුළත සැරව සහිත වීම

මෙය අහිතකර තත්ත්වයකි. වහාම ප‍්‍රතිකාර ඇරඹිය යුතුය. මවට උණ ඇතිවන අතර පියයුර ඇතුළත තද ගෙඩියක් මෙන් අතට දැනේ. රතු පැහැවී ඉතා වේදනාකාරී විය හැක.

ප‍්‍රතිකාර :

• වැඩිපුර දියර වර්ග පානය කරන්න.
• උණුසුම් තෙත රෙදි කඩකින් තෙමන්න.
• වැඩිපුර කිරි දොවා ඉවත් කරන්න.
• දරුවාට කිරි පෙවීම.
• සුදුසුකම්ලත් වෛද්‍යවරයෙකු හමුවී වෛද්‍ය නිර්දේශයට අනුව ප‍්‍රතිජීවක ඖෂධ ගැනීම ආරම්භ කළ යුතුය.මෙම තත්ත්වය අසතුටුදායක වුවහොත් සැරව ගෙඩි නිසා සැත්කමකට පවා බඳුන් විය හැක.

එක් පියයුරකින් වැඩිපුර කිරි උරා බීම

සමහර විට දරුවන් එක් පියයුරකින් කිරි උරාබීමට වැඩි කැමැත්තක් දක්වයි. මෙය දරුවා අල්ලන ක‍්‍රමය, කිරි බොන ප‍්‍රමාණය සහ දරුවාට පහසුවීම වැනි හේතු නිසා සිදු වේ. මෙය නිවැරදි කිරීමට දරුවා අල්ලන ක‍්‍රමය වෙනස් කර බලන්න. සෑම විටම අඩු කැමැත්තක් ඇති පියයුරෙන් කිරි පෙවීම අරඹන්න

කිරි උරා බිම ප‍්‍රතික්ෂේප කිරීම

මාස 3 පසු වූ විට මවගේ අවශ්‍යතාවයට වඩා දරුවා තමන්ට අවශ්‍ය නම් හෝ බඩගිනි නම් පමණක් කිරි උරා බොයි. මව්වරු මෙය දකින්නේ කිරි උරා බීම ප‍්‍රතික්ෂේප කිරීමක් ලෙසය. අම්මා කන කෑම වල ඇති රසය කිරිවලින් දැනීම හා එම රසයට දරුවා අකමැති වීම නිසා ද මෙම තත්ත්වය ඇති විය හැක. සමහර දරුවන් පැය 4-5 ක් පමණ කිරි නොබී සෙල්ලම් කරමින් සිටී. මෙය ස්වභාවිකය. පියයුරුවලින් කිරි ගලා ඒම අධික වීම නිසා කිරි ගිලීමට අපහසු වීමද හේතුවක් විය හැක. එවිට වැඩිපුර කිරි දොවා ඉවත් කර නැවන පොවන්න. සෙම්ප‍්‍රතිශ්‍යාව, නාසය හිරවීම, කනේ කැක්කුම හෝ දත් ඒම වැනි කරුණු නිසාද මෙම තත්ත්වය ඇති වේ. අවට පරිසරය හා මවගේ ශරීරය ඉතා උණුසුම් වීම නිසා දරුවාට අපහසු තත්ත්වයක් ඇති වීමද දරුවාගේ වර්ධනය නිසා අවට පරිසරයේ සිදුවන සිදුවීම්වලට වැඩිපුර අවධානය යොමු කිරීම නිසා ද ඇතැම් විට මේ තත්ත්වය ඇති වීමට ඉඩ ඇත.

තන පුඩුව සැපීම

දත් එන කාල වලදී මෙය සිදු විය හැක. එවිට එපා කියා පැහැදිලිව හා සංසුන්ව කියන්න. තන පුඩුව මුඛයෙන් ඉවත් කරන්න. සුළු වේලාවක් කිරි නොදී සිටින්න. නැවත කිරි පෙවීම අරඹන්න. දින කිහිප දිනකින් මෙය නවතී.

කිරි මැලියම් ඇති වීම

දිව මත පමණක් ඇති වන කිරි මැලියම් ඉවත් කිරීම අවශ්‍ය නැත. තොල්, විදුරු මස් හා කම්මුල්වල ඇතුළු පැත්තේ කිරි මැලියම් ඇති වේ නම් ඒ සඳහා ප‍්‍රතිකාර ලබාදීමට අවශ්‍ය වේ. වෛද්‍යවරයෙකු හමු වී ප‍්‍රතිකාර ලබාගන්න.

පැතලි තන පුඩු පිහිටා තිබීම

මෙය දරුවා ඉපදීමට පෙර පරික්‍ෂා කර බලන්න. එම තත්ත්වය පවති නම් තන පුඩුව වටා ඇති කළු කොටස (ඇරියෝලාව) පපුව තුළට තද කරන්න. එවිට තන පුඩුව ඉදිරියට නෙරයි. එසේ නොවේ නම් ඒවා පැතලි හෝ ඇතුළට නෙරා ගිය තන පුඩු වේ. ඇඟිලි තුඩු මගින් තන පුඩුව දිනකට කිහිප වතාවක් රෝල් කිරීම කරන්න.

කරාපිටිය, ශික්‍ෂණ රෝහලේ වෛද්‍ය ආර්. එම්. එන්. කේ. රණතුංග මහතා සහ හෙද නිලධාරිනී ක්‍රිෂාන්ති ගංගා කුමාරිහාමි මහත්මිය සමග සකසන ලද ලිපියකි.

 

දස මසක් කුස හොවා මෙලොවට බිහිකරන කිරි කැටියාගේ පෝෂණය වෙනුවෙන් අම්මාගේ රුහිරු කිරට හැරෙන බව අපි ඕනේ තරම් අහලා තියෙනවා. සොබා දමේ විස්මය ජනක සිදුවීමක් ලෙස එය හැඳින්වීමේ වරදක් නැහැ. දසමසක් කුස හොවා සිටි කිරි කටියා මෙලොවට බිහිවීමත් සමගම දරුවා දැකීමෙන් දරුවාගේ හඬ ඇසීමෙන් දරුවා කෙරෙහි උපදින ආදරය නිසාවෙන් ඔක්සිටොසින් ප‍්‍රතීකය උත්තේජනය වී කිරි නිපදවීම ඇරඹෙනවා. රුධිරයේ ඇති ඔක්සිටොසින් නම් හෝමෝනය කිරි ධාරාව ඇති වීමට මුල පුරයි. කිරිදෙන අවස්ථාවේදී හෝ ඊට ප‍්‍රථම ක‍්‍රියාත්මක වේ.

කිරි උරාබීමේදී තන පුඩුව මගින් නිපදවෙන සංවේදී උත්තේජනය මගින් රුධිරයේ ප්‍රෝලැක්ටික් ශ‍්‍රාවය වේ. සෑම කිරි වේලකටම පසුව ප්‍රෝලැක්ටින් හෝමෝනය ශ‍්‍රාවය වී එමගින් ඊලඟ කිරි වේල නිපදවයි. ප්‍රෝලැක්ටින් ශ්‍රාවය වීම වැඩිපුර සිදුවන්නේ රාත‍්‍රියේදී ය. නමුත් මවක් අසහනය, කම්පනය, මානසික පීඩනය, වේදනාව, සැකය ආදි තත්ත්වයන් ඔක්සිටොසින් ශ‍්‍රාවයට බාධා ඇති කරවන අතරම ඒ හේතු මත කිරි නිපදවීම අඩුවීම හෝ නැතිවීම සිදු විය හැක.

ඔක්සිටොසින් ප‍්‍රතීකය ක‍්‍රියාත්මක වීමේදී,

බිළිඳාට කිරි දීමට පටන් ගැනීමට ඉතා ආසන්නව හෝ කිරි දෙන කාලය තුළ තම පියයුරු මිරිකෙන ස්වභාවයක් හෝ නලියන ස්වභාවයක් මවට දැනේ. බිළිඳා ගැන සිතන විට හෝ හැඬිම ඇසෙන විට පියයුරුවලින් කිරි ගලා ඒම සිදුවේ. දරුවා එක් පියයුරුකින් කිරි උරණ විට අනෙක් පියයුරෙන් කිරි ගලා ඒම, බිළිඳා කිරි බී අත්හල විට සිහින් ධාරාවක් ලෙස පියයුරුවලින් කිරි ගලා ඒම මෙහිදී දැකිය හැකියි. දරු උපතට පසු පළමු වන සතියේදී දරුවා කිරි බොන විට ගර්භාෂය සංකෝචනය වන නිසා මවට වේදනාවක් දැනීම හා සමහරවිට වේගවත් ලෙස යෝනි මාර්ගයෙන් ලේ ගැලීම සිදු විය හැකිය.

කිරි නිපදවීම උත්තේජනයට මෙන්ම අඩු කිරීමට එනම් නිශේධනයට (යටපත් කිරීම) සමත් ද්‍රව්‍යද මව්කිරිවල අඩංගු වේ. එනම් පියයුරක කිරි වැඩි ප‍්‍රමාණයක් ඉතිරිව තිබෙන විට, තවත් ශ‍්‍රාවය කිරීම මෙම නිශේධක මගින් වළක්වයි. පියයුරෙහි අනවශ්‍ය ලෙස කිරි එකතු වීම පියයුරට පීඩාවකි. එම පීඩනවලින් ආරක්‍ෂා වීම නිශේධක (යටපත් කර රසායනික ද්‍රව්‍ය) නිසා සිදු වේ. බිළිඳා මිය යාම හෝ වෙනත් හේතුවකට කිරි උරා බීම නැවැත්වුවහොත් ස්වභාවයෙන්ම මෙසේ සිදුවිය යුතුය. කිරි උරා බීම හෝ කිරි දොවා හැරීම මගින් පියයුරෙන් කිරි ඉවත් කළ හැකි නම් නිශේධකය ද ඉවත් වේ. එවිට කිරි නිෂ්පාදනය වැඩිපුර සිදුවේ. බිළිඳා එක් පියයුරකින් උරා නොබන විට එහි කිරි නොමැති විටත් එක් පියයුරකින් කිරි වැඩිපුර උරා බොන විට එහි වැඩි කිරි ප‍්‍රමාණයක් නිපදවා අනෙක් පියයුරට වඩා විශාල වීම නිශේධක ක‍්‍රියාත්මක වීමට කදිම නිදසුනකි. මේ නිසා නොකඩවා කිරි නිපදවේ නම් එම පියයුර හිස් කළ යුතුය. (කිරි ඉරීම හෝ දොවා ඉවත් කිරීම මගින්) තවද දරුවාට කිරි ලබා නොදෙන විට දෙතනෙන්ම කිරි දොවා ඉවත් කළ යුතු වේ.

ළදරුවෙක්,

• යමක් තොලේ ගෑවුණු විට මුඛය විවර කර දිව පහළට හා පෙරට දමයි. මෙය රූටීන් ප‍්‍රතීකය ලෙස හඳුන්වයි.
• යමක් තල්ලේ වැදුණු විට දරුවා උරයි. මෙය ඉරීමේ ප‍්‍රතීකයයි.
• මුඛය කිරිවලින් පිරුණු පසු ගිලීම, ගිලීමේ ප‍්‍රතීකය ලෙස හඳුන්වයි.

දරුවාට කිරි පෙවීමේදී,

• මව සුව පහසු අයුරින් පුටු ඇන්දට හේත්තු වී වාඩි වීම කළ යුතුය.
• දරුවා ඔතා ඇති අනවශ්‍ය ඇඳුම් ඉවත් කළ යුතුයි.
• දරුවාගේ හිස හා කඳ එකම තලයක තිබිය යුතුයි.
• දරුවා පියයුර දෙසට මුහුණලා ඔහුගේ නාසය මවගේ තන පුඩුව මට්ටමට සිටින සේ අල්ලා ගැනීම
• දරුවාගේ ශරීරය මවගේ ශරීරයට ඉතාම සමීප වන සේ (ලයට-ලය) දරුවා අල්ලාගෙන සිටීම.
• පියයුරේ මුලට ආධාරකයක් වශයෙන් පළමු ඇඟිල්ල සිටින සේ මවගේ අතෙහි ඇඟිලි පියයුරට යටින් පසු බිත්තිය මතින් තබාගැනීම.
• පියයුර මද වශයෙන් තෙරපෙන සේ තම මහපට ඟිල්ල පියයුර මත තබාගැනීම, ඉතිරි ඇඟිලි හතර පියයුර යටින් තබා ආධාර කිරීම, දරුවා පියයුරට පහසුවෙන් සම්බන්ධ කිරීමට උපකාර වන පරිදි පියයුරෙහි හැඩය C අකුරක් ලෙස ගෙන කිරි පෙවීම, තන පුඩුවට ඉතා ආසන්නව ඇල්ලීම නොකළ යුතුය.
• දරුවාගේ මුඛය ඇරෙන පරිදි තන පුඩුවෙන් තොල ස්පර්ශ කරන අයුරු තේරුම් කර දෙන්න. මෙහිදී දරුවා මුඛය හොඳින් අරින තෙක් තන පුඩුව තොලේ ස්පර්ශ කරන්න.
• මුඛය හොඳින් විවෘත කරන තෙක් බලා සිට දරුවා පියයුර වෙතට ආ යුතු බව පහදා ගන්න. මුඛය තුළට පියයුරෙන් සෑහෙන ප‍්‍රමාණයක් ඇතුළු කරගැනීමට දරුවාගේ මුඛය සම්පුර්ණයෙන් විවෘතව තිබීම අවශ්‍ය වේ. දරුවා පියයුර වෙත ගෙන එනවා මිස මව හෝ මවගේ පියයුර පමණක් දරුවාට ලං නොකළ යුතුය.
• දරුවාගේ නිකට තම පියයුරු සමග ස්පර්ශ කරවීමට මවගේ තන පුඩුවට පහළින් දරුවාගේ යටි තොල යොමු කළ යුතුය.
• මවගේ ප‍්‍රතිචාර නිරීක්‍ෂණය කරන්න. ඇය වේදනාකාරීද නැතිද යන්න විමසා ආධාර කරන්න.

මවට ප‍්‍රයෝජනවත් වෙන ඉරියව්…

අත යටින් දරුවා ස්ථාපිත කිරීම : මෙම ස්ථාපිතය පහත අවස්ථාවලදී ප‍්‍රයෝජනයට ගත හැක.

• නිවුන් දරුවන් දෙදෙනාට එකවර පියයුරු දෙකෙන් ලබා දීමේදී
• සිසේරියන් සැත්කමින් පසු
• විශාල පියයුරු ඇති විට
• මව හා දරුවා අතර නිසි සම්බන්ධය අසීරු විට

පියයුරට විරුද්ධ පැත්තෙහි ඇති බාහුවේ ආධාරකය දරුවා ස්ථාපිත කිරීම :  

• ඉතා කුඩා බිළිදුන්
• අසනීප වූ දරුවන් සඳහා ප‍්‍රයෝජනවත් වේ

දරුවාට ලැබෙන මව්කිරි ප‍්‍රමාණවත් නොවන විට,

• දරුවාගේ වර්ධනය දුර්වල වේ (මසකට 500g ට වඩා අඩුවෙන් බර වැඩි වීම)
• ස්වල්ප වශයෙන් සාන්‍ද්‍ර වූ මුත‍්‍රා (තද පාට) පහවීම. කහ පැහැති තද ගඳකින් යුතු මුත‍්‍රා දිනකට වාර 6 කට වඩා අඩු වේ
• දරුවා මව්කිරි බීමෙන් පසු සෑහීමකට පත් නොවේ
• දරුවා නිතර හඬයි
• නිතර නිතර මව්කිරි උරා බීමට අවශ්‍ය වේ
• කිරි වේලක් උරා බීමට දිගු කාලයක් ගත වේ
• දරුවා මවගෙන් කිරි බීම ප‍්‍රතික්‍ෂෙප කරයි
• දරුවා වියළි කොළ පැහැති තද මල පිට කරයි
• මව්කිරි දෙවීමට තැත් කළ ද කිරි ගලා නොයේම

කරාපිටිය, ශික්‍ෂණ රෝහලේ වෛද්‍ය ආර්. එම්. එන්. කේ. රණතුංග මහතා සහ හෙද නිලධාරිනී ක්‍රිෂාන්ති ගංගා කුමාරිහාමි මහත්මිය සමග සකසන ලද ලිපියකි.

 

මම බබාට වට්ටක්කා දුන්නේ මෙහෙමයි…

ඔව්, මේ ලිපියෙන් මම වට්ටක්කා ගැන ලියන්න හිතුවා. ඔයාලා දන්නවනේ වට්ටක්කා කියන්නේ මාස 6 න් ඉහළ ඕනෑම බබෙක්ට දෙන්න පුලුවන් එළවලුවක් කියලා. එහෙමත් නැත්නම් මාස 6 පහුවෙලා මූලික ඝණ ආහාර හඳුන්වා දෙන බබාලට මුලින්ම දෙන්න කියන දෙයක් තමයි වට්ටක්කා. සමහර රටවලනම් මේවා පළතුරක් විදියට සලකනවා. අපේ රටේ නම් මේක හොඳ එළවලුවක්. ඇටයේ ඉඳලා පොත්ත වෙනකම් ම ගුණ සපිරි දෙයක්.

වට්ටක්කා වල විටමින් A සහ බීටා කැරොටීන් වැඩි වශයෙන් අඩංගු වෙනවා. ඒ වගේම යකඩ​, පොටෑසියම් සහ ප්‍රෝටීන් අන්තර්ගතයි. තන්තුමය ගතිය වැඩි එළවලුවක් වන වට්ටක්කා වල කැලරි සහ මේදය අඩුයි. ඔබේ දරුවාට ශක්තිමත් ප්‍රතිශක්තිකරණ පද්ධතියක් ගොඩනඟා ගැනීමට අවශ්‍ය කරන පෝෂ්‍ය පදාර්ථ කිහිපයක් වට්ටක්කාවල අඩංගු වෙනවා. මෙය බබාගේ ශරීරය සෞඛ්‍ය සම්පන්නව පවත්වා ගැනීමට එයාගේ ආහාර වේලෙහි අත්‍යවශ්‍යයෙන්ම තිබිය යුතුයැයි මම හිතනවා.

වට්ටක්කා වර්ග කීපයක් අපේ වෙළඳ පොලේ තියෙනවා. ඒ ඕනෑම වර්ගයක් බබාලට සුදුසුයි. ලංකාවේ වැවෙන කාබනික වට්ටක්කා හොයා ගන්න පුලුවන් නම් තවත් හොඳයි. වට්ටක්කා ඇට වලත් යකඩ සහ ප්‍රෝටීන් ගොඩක් අන්තර්ගත නිසා ඉතා ගුණදායකයි. විශේෂයෙන් බබාලා ලැබෙන්න ඉන්න අම්මලට වට්ටක්කා ඇට ආහාරයට ගැනීම ගුණ දායකයි කියා කියනවා. මම සොයා බැලූ තොරතුරු අනුව වට්ටක්කා ඇට පුංචිම බබාලට ඒ කියන්නේ ආහාර මුලින් හඳුනා ගමින් ඉන්නා බබාලට එතරම් සුදුසු නැති බව කියනවා. ඒත් එහි වැඩි යකඩ ප්‍රමණය නිසා ටිකක් ලොකු බබාලට නම් සුදුසු බව කියනවා. කොහොම වුනත් පුංචි බබාලට ඒ වගේ අලුත්, මතභේදාත්මක දෙයක් කවන්න කලින් වෛද්‍ය උපදෙස් ලබා ගන්නා ලෙස මම අම්මලා තාත්තලා හැමෝගෙන්ම ඉල්ලා සිටිනවා.

දැන් මම කියන්නම් වට්ටක්කා බබාට හදල දෙන්න පුලුවන් ක්‍රම සහ විධි කීපයක්:-

වට්ටක්කා තලපය – වට්ටක්කා හොඳින් සෝදා පුංචියට කෑලි කපල වාශ්පයෙන් තම්බා , පොඩි කරගෙන බබාට කවන්න​. මෙම තලපයේ ඝනකම වෙනස් කිරීමට ඔබට වතුර හෝ කිරි භාවිතා කරන්න පුලුවන්. මෙය හොඳ උදාසන ආහාරයක් ලෙසද නැතිනම් අමතර ආහාරයක් ලෙසද දෙන්න පුලුවන්. කිරි භාවිතා කරන්නේ නම් බබාගේ වයස අනුව මව් කිරි, ළදරු පිටි කිරි හෝ නැවුම් එළකිරි භාවිතා කරන්න​.

වට්ටක්කා බත් සමග එකට උයා ගන්න​.

වට්ටක්කා බේක් කරලා – මේ ක්‍රමය මාස 9 න් වගේ බබාලට අතින් අල්ලන් කන්න පුරුදු කරන්න සුදුසුයි. වට්ටක්කා හොඳින් සෝදලා කෑලි කපලා අවන් එකේ බේක් කරගන්න විතරයි තියෙන්නේ. එතකොට සාමාන්‍ය රසයට වඩා වැඩි රසයක් වට්ටක්කා වලට ලැබෙනවා. මේවා හොඳින් නිවලා, බබාට අතින් අල්ලා කන්න දෙන්න​. හැබැයි බබාගේ ළඟින්ම ඉන්න ඕන.

වට්ටක්කා සුප් – මේක වට්ටක්කා තම්බලා හදන්නත් පුලුවන්. නමුත් හුඟක් රස වෙන්නේ වට්ටක්කා බේක් කරලා ගත්තොත්. මේ ඕන ක්‍රමයකට මෙලෙක් කර ගත්ත වට්ටක්කා බ්ලෙන්ඩ් කරලා, මස්/මාලු/එළවලු තම්බපු වතුර එක්ක මිශ්‍ර කරලා (පොඩි තෙම්පරාදුවක් දා ගන්නවනම් තවත් රසයි) වට්ටක්කා සුප් හදන්න පුලුවන්. අම්මා කෙනෙක් එයා සුප් හදා ගත්ත විදිය කියලා එවපු රෙසිපියක් ඇති..ඒකත් ඔයාලා මේ සටහනෙන් පස්සේ දීලා ඇති ලින්ක්ස් ක්ලික් කරලා බලන්න.

වට්ටක්කා , තවත් එළවලුවක් හෝ කීපයක් සමග – වෙනත් එළවලු සමඟ වට්ටක්කා තම්බලා පොඩි කරලා බබාට කවන්න පුලුවන්.. කැරට්, කෝලිෆ්ලවර්, අල​, බීට් රූට්, බතල මේ වගේ ඕනැම එළවලුවක් සුදුසුයි.

වට්ටක්කා , තවත් පළතුරක් සමඟ – ඇපල්, පෙයාස් වගේ පළතුරු සමඟ වට්ටක්කා දෙන්න පුලුවන්. උදාහරණයක් කිව්වොත් ඇපල් සහ වට්ටක්කා එකට තම්බාගෙන , පොඩි කරල සාදික්කා/කුරුඳු කුඩු ටිකකුත් දාලා රසවත් කෑමක් හදලා බබාට දෙන්න පුලුවන්.

වට්ටක්කා සම්ඟ බිත්තර , මස්, මාලු වැනි දෙයක් එකතු කරලා බබාට කවන්න​.

වට්ටක්කා වලින් පෑන් කේක් හදලා දෙන්න පුලුවන්

වට්ටක්කා රොටි – පූර්ණ තිරිඟු පිටි වලට​, පොඩියට ලියා ගත් ඉදුනු වට්ටක්කා එකතු කරලා රොටී සාදා ගන්න පුලුවන්. මේවා ලොකු බබාල ආසාවෙන් කාවි.

මේ වගේ, වෙනස් වෙනස් විදියට හිතලා අපිට එක එක විදියට බබාලට මේ ගුණදායක එළවලුව ලබා දෙන්න පුලුවන්. අනේ අපේ බබා වට්ටක්කා කන්නේ නැහැනේ කිය කිය ඉන්න එපා අම්මලා..ඔන්න මම අදහස් ගොඩක් ඔයාලට කියලයි තියෙන්නේ.

මේ ලිපිය සම්භන්ධයෙන් ඔයාලට නැගෙන ප්‍රශ්ණ අපිට දන්වන්න​. අපි හැකි පමණින් ඔබට නිවැරදි තොරතුරු සපයා දෙන්න උත්සහ කරන්නම්. නැවත ඔබ සැම ඉක්මනින්ම මුණ ගැසීමට බලාපොරොත්තුවෙන් මේ ලිපිය අවසන් කරන්නම්.

 කතුවරිය ගැන

උමන්දා මුතුකුඩආරච්චි මොරටු විශ්ව විද්‍යාලයේ ඉංජිනේරු උපාධිධාරිනියක්. බහුජාතික සමාගම් දෙකකම ඉහල රැකියාවන් වල නිරතව අත්දැකීම් පරිපූර්ණව සිටි ඈ, ඊටත් වඩා උතුම් වූ රාජකාරියක් සඳහා ඇගේ වෘතියෙන් සමුගත්තා. ඒ නම්, පූර්ණකාලීන මවක් වීමේ අරමුණෙන්. දැන් ඇය පුතුන් දෙදෙනෙකුගේ මවක්. ඊට අමතරව ඇය නිවසේ සිට පවත්වාගෙන යන ඇගේම ව්‍යාපාරයක හිමිකාරිනියක්. ඇගේ ව්‍යාපාරයේ Facebook පිටුවට මෙතනින් පිවිසෙන්න www.facebook.com/aumjewellery .