කාන්තාවක් විසින් තමා ගැබ්ගත් පුවත දැනගැනීමත් සමග ඇගේ කුස පිලිසිඳගත් දරුවාගේ මෙන්ම තමාගේ නීරෝගිබව ගැන සැලකිලිමත් වීම ඉතාම වැදගත්. කාන්තාවක් ගැබ් ගැනීමෙන් පසුව ප්‍රසව හා නාරි විශේෂඥ වෛද්‍යවරයෙකුගේ සේවය ලබා ගැනීම සිදු වෙනවා. ඊටත් අමතරව ඇය තමා ජීවත්වෙන ප්‍රදේශයේ පවුල් සෞඛ්‍ය සායනයේ  ලියාපදිංචිය  ලබා ගැනීමත් ඉතා වැදගත්. පවුල් සෞඛ්‍ය සායනය වෙතින් ගර්භණී කාන්තාවකට ලබා ගත හැකි සේවාවන් රාශියක් තිබෙනවා. පවුල් සෞඛ්‍ය සායනයේදී ගර්භණී මවගේ පුර්ව ප්‍රසව සෞඛ්‍ය තත්වය, පසු ප්‍රසව සෞඛ්‍ය තත්වය වගේම දරුවා හදා වඩා ගැනීමට අවශ්‍ය උපදස් ලබා දෙනවා. 

පූර්ව ප්‍රසව සේවාවන්…

ගර්භණී මවක් වෙනුවෙන් පවුල් සෞඛ්‍ය සායනය වෙතින් උපදෙස් වගේම ප්‍රතිකාර ලබා දීම සිදු වෙනවා. ඒ අතර ගර්භණීත්වයේ යම් අවදානම් තත්වයක් හදුනා ගැනීමෙන් පසු එම අවදානම් තත්වය සඳහා වැඩිදුර ප්‍රතිකාර ලබා දෙමින් නිරෝගී දරුවෙකු බිහි කිරීම සදහා මවගේ සෞඛ්‍ය තත්වය ආරක්ෂා කරනවා.

ඒ වගේම ගර්භණී මවක් ලෙසින් ඇගේ සහ දරුවාගේ සෞඛ්‍ය තත්වය පවත්වා ගැනීම වෙනුවෙන් අවශ්‍ය පෝෂණය වෙනුවෙන් උපදෙස් ලබා දිම සහ ගර්භණී කාලයේදී කළ යුතු ව්‍යායාම වෙනුවෙන් දැණුවත් කිරීමත් පවුල් සෞඛ්‍ය සායනයකදී මවකට ලැබෙන සුවිශේෂී අවස්ථාවක්. 

පසු ප්‍රසව අවස්ථාව වෙනුවෙන් ලබා දෙන උපදෙස්…

ගර්භණී කාන්තාවක් මව් පදවිය ලැබීමෙන් පසුවත් ඇය ගේ වගේම උපත ලද දරුවාගේ සෞඛ්‍ය තත්වය පවත්වා ගැනීමත් ඉතාම වැදගත්. දරුවෙක් හදා වඩා ගැනීම ගැන හෙවත් ”දෙමව්පියකරණය ” ගැන දැණුවත් කිරීම,  දරු ප්‍රසුතිය සමග ඇති වෙන ආසාදන, මව්කිරි දීමේ ගැටළු සහ පසු  ප්‍රසව මානසික ගැටළු හෙවත් විශාදය තත්වයට නිසා  නව ජන්ම දරුවා මෙන්ම මව ගැනත් වැඩි සැලකිල්ලක් දැක්වීමත් වැදගත්.පසු ප්‍රසවයෙන් පසුව පවුල් සැලසුම් ක්‍රම අනුගමනය කිරීම ගැනත් දැනුවත් වීමක් ලබා දෙනවා.

පරීක්ෂණ සිදු කිරීම

මෙම මධ්‍යස්ථානය මගින් මවගේ උස, බර පිළිබඳව සටහන් කිරීම මගින් නිරෝගි බර මටට්ම පවත්වා ගැනීමට ඇයට උපදෙස් ලැබෙනවා

• මුලික රුධිර පරීක්ෂණ,  (රුධිර ඝනය පරික්ෂා කිරීම, රුධිරගත සීනි ,රක්තහීනතාවය හඳුනා ගැනිම, කළලය සඳහා බලපානු ලබන ලිංගාශ්‍රිත රෝග හඳුනා ගැනීම) 
•  මුත්‍රා පරීක්ෂණ සිදු කිරීම
• පෝෂණ සම්බන්ධ ගැටළු හඳුනා ගැනීම, දත් සහ මුඛ පරික්ෂා සිදු කිරීම
• හෘද ඇතුළු වෙනත්  කායික,  මානසික සහ සමාජීය ගැටළු හඳුනා ගැනීම මෙම සායන වලදී සිදු කරනු ලබයි. එහිදී ගැටළු හඳුනා ගෙන ඉක්මනින්  ඒවාට පිළියම් යෙදීම සිදු කරනු ලබන අතර වැඩි දුර පරීක්ෂණ කිරීමට හෝ ප්‍රතිකාර අවශ්‍ය වුවහොත්, ඒ සඳහා වෙනත් සායන හෝ රෝහල් වෙත යොමු කරනු ඇත.
• අවශ්‍ය එන්නත් ලබා දීම ( පිටගැස්ම, කොවිඩ් )
• ත්‍රිපෝෂ ලබා දීම.

ඖෂධ ලබා දීම

ගර්භණී මවගේ සහ දරුවාගේ සෞඛ්‍ය තත්වය වෙනුවෙන් අවශ්‍ය විටමින්, කැල්සියම්, යකඩ වැනි ඖෂධ සායනය මගින් ලබා දීම.

ගර්භණී මවක් විවිධ අවස්ථාවන්හිදි අවදානම් විය හැකියි.

ගැබ්ගත් කාන්තාවක් එම අවස්ථාවේ පටන් දරුවා බිහි කිරීම සහ පසු ප්‍රසව අවධිය දක්වාම විවිධ අන්දමින් අවදානමට පත් විය හැකියි. එවැනි අවදානම් සාධක හදුනා ගෙන ඒ වෙනුවෙන් පුර්ව ආරක්ෂාව සලසා දීම පවුල් සෞඛ්‍ය සායනකයක් වෙතින් ලැබෙන විශේෂ වාසියක්.

ගර්භණීත්වයට පෙර පටන් පවතින අවදානම

• මවගේ වයස අවුරුදු 19 ට අඩු වීම හෝ 35 ට වැඩි වීම.
• ගර්භණී මව බෝනොවන රෝග හෙවත් දියවැඩියාව, අධිරුධිර පීඩනය, අපස්මාරය,
•  රුධිරයේ රිසස් සාධක වැනි අවදානම් කාණ්ඩයකට අයත් වීම
• මවගේ බර අඩුවීම වැඩිවීම, , උස අඩු වීම , රක්තහීනතාවය, වැනි තත්වයන්

පෙර ගර්භණීත්වය සමග ඇති අවදානම් සාධක

ගර්භණී මවක් මීට පෙරාතුව දරු ප්‍රසුතියක් සිදු කර ඇත්නම් ඒ අවස්ථාවේදී ඇගේ දරු ප්‍රසුතිය සමග ඇති වුන පෙර ප්‍රසව තත්වයන් ගැනත් සලකා බැලීම සිදු වෙනවා.

• මීට පෙරාතුව ගැබ් ගත් අවස්ථාවන්හිදි සිදු වුන ගබ්සා වීම.
• පෙර දරු ප්‍රසුතිය සිසේරියන් සැත්කමකින් සිදු වීම.
• නොමේරූ දරු උපත්
• මළ දරු උපත්.

වර්තමාන ගර්භණීත්වය සමග ඇති අවදානම් සාධක

ගර්භණී මවක් මීට පෙරාතුව අවදානම් කාණ්ඩයකට අයත් නොවී දරු ප්‍රසුතියක් සිදු කළත් මේ අවස්ථාවේදී ඇය යම් සංකුලතාවයකට පත්ව සිටින්නට හැකියි.

• දරුවා පමණට වඩා විශාල වීම.
• දරුවා පමණට වඩා කුඩා වීම
• තට්ටමෙන් පිහිටිම.
• අධි රුධිර පීඩනය, දියවැඩියාව, වැනි බෝ නොවන රෝගයකට ගොදුරු වීම
• නිවුන් දරුවන් පිහිටීම.
• ගර්භණි සමයේ ඇති වෙන රුධිර වහනය

පවුල් සෞඛ්‍ය සායනය වෙතින් ලැබෙන ගර්භණී කාඩ්පත 

ගර්භණී කාන්තාවක් අදාල පවුල් සෞඛ්‍ය සායනයේ ලියාපදිංචිය ලැබීමෙන් පසුව ඇයට කාඩ්පතක් ලබා දෙනවා. මේ කාඩ්පතේ අදාල කාන්තාවගේ සියලු විස්තර ඇතුලත් කරනු ලබනවා.

. මෙම ගර්භණී කාඩ්පතේ කුළුදුල් දරු ප්‍රසුතිය ලබන මවක් නම් නිල් ලේබලයක් අලවනවා. ප්‍රථම දරු ප්‍රසුතියේ වුනත් අවදානමක් ඇත්නම් නිල් ලේබලයට අමතරව එහි රතු ලේබලයක්ද අලවනවා.

රතු කියන්නේ අනතුරක් නොවේ…

මෙම රතු ලේබලයෙන් හැඟෙන්නේ ඔබේ දරු ප්‍රසුතිය අවදානම් බවක් නොවේ. නමුත් ඔබේ ඉතිහාසයේ ඇති යම් යම් රෝග තත්වයන් සහ ගර්භණිත්වය සමග ඇති යම් ගැටලු සහගත බවක් එයින් දන්වා තිබෙනවා. මේ නිසා ගර්භණී කාන්තාව පරීක්ෂා කරන තවත් වෛද්‍යවරයෙකුට හෝ දරු ප්‍රසුතියේදී රෝහල්ගත වීමෙන් පසුව ඇය පරීක්ෂා කරන වෛද්‍යවරුන්ට එය පහසුවක් වෙනවා. ඒ වගේම ඇගේ තත්වය ගැන වැඩි අවදානයක් යොමු කිරීම නිසා දරුවා ප්‍රසුත කිරීමේදී මවගේ සහ දරුවාගේ ආරක්ෂාව ගැන වැඩි සැලකිල්ලක් දැක්වීමත් සිදු වෙනවා.

ගර්භණී කාඩ්පත ළඟ තබා ගන්න…

ගර්භණී මවක් විසින් මෙම ගර්භණී කාඩ්පත නිතරම තමා  සමීපයේ තබා ගැනීම වැදගත්.දරු ප්‍රසුතිය ආසන්න නොවුනත් යම් යම් ගැටළු ඇති වූ විට ඇගේ රෝග ඉතිහාසය මේ කාඩ්පතේ දක්වා තිබෙන නිසා වෛද්‍ය ප්‍රතිකාර ගැනීමේදී කාඩ්පත රැගෙන යෑම ඉතාම වැදගත්. ඒ වගේම දරු ප්‍රසුතියට ආසන්න නොවුනත් ඔබ දුර ගමනක් හෝ  යන විටත් මේ කාඩ්පත රැගෙන යෑමට අමතක කරන්න එපා. හදිසියේ හෝ ඔබට පදිංචි ප්‍රදේශයෙන් බැහැර රෝහලක රෝහල්ගත වීමට සිදු වුනොත් ඔබේ වෛද්‍ය ඉතිහාසය මෙහි සටහන් වී තිබීම වඩාත් පහසුවක් වෙනු ඇති. 

විශේෂඥ මතය, අදහස සහ මූලික සටහන:

ප්‍රසව සහ නාරි  රෝග පිළිබඳ විශේෂඥ ගාමිනී පෙරේරා මහතා

ප්‍රසව සහ නාරි  රෝග පිළිබඳ විශේෂඥ වෛද්‍ය සංගමයේ සභාපති ( 2016 )

ගැබිනි සමයේදී රසයානික ද්‍රව්‍යවලට නිරාවරණය වීමෙන් වැඩෙන කලලයට හානි දායකද යන්න පිළිබඳව සාකච්ඡා කිරීම අප අදහස් කළේ ඒ පිළිබඳව ඇති දැනුම අවම යැයි සිතුණු නිසාමය. අපරික්ෂාකාරී හැසිරීම් තුළින් කුස තුළ වැඩෙන කලලයට මෙන්ම කිරි බොන වියේ සිටින ඔබේ ළදරුවාට හානි දායක විය හැකි අවස්ථා ගැන මව්වරුන් වශයෙන් අප දැනුවත්ව සිටීම ඉතාම වැදගත් වේ. 

ගැබිනි සමයේ පළමු ත්‍රෛමාසිකය තුළ යම් රසායනික ද්‍රව්‍ය වෙත වැඩි කාලයක් නිරාවරණය වීමෙන් උපත් ආබාධ ඇතිවිමේ ප්‍රවණතාවය වැඩි බව මෙන්ම යම් රසායනිකයක් ගිලීමෙන් හෝ ආශ්වාස වීමෙන් ඒවා රුධිරයට එකතු වී පෙකණිවැල හරහා දරුවාට ඇතුළු වීමේ අවදානම ඇති බව ඔබ අසා තිබෙනවාද? 

අහිතකර රසයානික ද්‍රව්‍ය 

කෘමිනාශක හා වල් නාශක/නිවෙස්වලට භාවිත කරන පිරිසිදු කිරීම් කාරක/ඊයම් සහිත තීන්ත වර්ග/ප්ලාස්ටික්/මඳුරු දඟර/රසදිය/ආසනික්/දැව ආරක්‍ෂක/නියපොතු පොලිෂ් කාරක/ඇස්බැස්ටෝස්/ කපුරු බෝල/ඇතැම් හිස‍කේ වර්ණක/BPA

කෘමිනාශක හා වල් නාශක – සමහර කෘමි නාශක විශේෂයෙන් මකුණන් විනාශ කරන ඒවා සහ වල් නාශක මගින් වැඩෙන කලලයට හා මවට බලපෑම් ඇති කරයි. 

පිරිසිදුකාරක – බොහෝ පිරිසිදුකාරක ආරක්‍ෂිත ලෙස සලකනු ලැබූවද නිවෙස්වල සමහර පිරිසිදුකාරක මගින් කුඩා දරුවන්ට ස්වසන අපහසුතා ඇදුම වැනි දේ ඇති වූ බවට වාර්තා වේ. මේ නිසා උඳුන් හා ටයිල් පිරිසිදුකාරක භාවිතයේදී අත්වැසුම් පැලදීම, ආශ්වාස වීමෙන් වළකන්න ගැනීම (මුව වැසුම් භාවිතය) කිරීම වඩාත් ආරක්‍ෂාකාරී වේ. 

තීන්ත වර්ග – බොහෝ තීන්ත වර්ග ආරක්‍ෂාකාරී වුවද, ඊයම් අඩංගු ඒවා මගින් මවට හා දරුවාට (කළලයට) අවදානම වැඩි කරයි. water base ඒවා අහිතකර නොවේ. 

මදුරු දඟර – මඳුරු දඟරවල පවතින DEET/ Picaridin වැනි රසායනික සම තුලට ඇතුළු විය හැක. මේ නිසා මුල් මාස 3 තුලදී ප‍්‍රවේශම් වීම වඩා යෝග්‍ය වේ. මදුරුවන්ගෙන් ආරක්‍ෂා වීමට මදුරු දැල් භාවිතය, අත් වැසෙන සේ දිගට ඇඳුම් ඇඳීම වඩා යෝග්‍ය වේ. 

රසදිය – අධික සාන්‍ද්‍රනයන් සහිත රසදියවලට නිරාවරණය වීමෙන් සෞඛ්‍යයට තර්ජනයක් ඇති විය හැක. විශේෂයෙන් මෙහිදී මොළයට හානි වීම, ඇසීමේ හා පෙනීමේ ගැටලු වැඩෙන දරුවාට ඇති කරයි. සමහර මාළු වර්ග (මෝරා, තලපත් ආදි මාළුන්ගේ) රසදිය පවතින බැවින් ගර්භනී කාලයේදී ආහාරයට ගැනීමෙන් වැළකී සිටීම වඩා වැදගත් වේ. 

ආසනික් අඩංගු දැව ආරක්‍ෂක – දැව, දීලිර වර්ග, දැව දිරීමෙන් කුඩු ඇති වීම, පුස්, වේයන්ගෙන් ආරක්‍ෂා කරගැනීම සඳහා තඹ, ක්‍රෝමියම් හෝ ආසනික් ආලේප කරයි. මේවා මගින් සමහර පිලිකා, දියවැඩියාව, ගබ්සා වීම, මළ දරු උපත් ඇති විය හැක.

නිය ආලේපන – නිය ආලේපන, සමහර රූපලාවන්‍ය කටයුතු හා හිසකෙස් සෘජු කිරීම (straightening) සඳහා ෆෝමැල්ඩිහයිඞ් මිශ‍්‍ර නිෂ්පාදන භාවිත කරයි. නිය ආලේපනවල කුඩා ප‍්‍රමාණයකින් ෆෝමැල්ඩිහයිඞ් අඩංගු වන අතර ශරීරය මගින් ඉතා ඉක්මණින් බිඳ හෙලයි. එයින් දරුවාට වන අහිතකර ප‍්‍රතිඵල නිශ්චිත ලෙස දක්වා නොමැති නිසා ෆෝමැල්ඩිහයඞ් අඩංගු නොවන ආලේපන භාවිත කිරීම සුදුසු වේ. 

ඊයම් සහිත තීන්ත නිෂ්පාදන – අධික සාන්‍ද්‍රනයකින් යුතු ඊයම් මගින් නූපන් ළදරුවන්ගේ හා දරුවන්ගේ සෞඛ්‍යයට අහිතකර ලෙස බලපායි. අධික සාන්‍ද්‍ර ඊයම් සහිත තීන්ත වර්ග හා නිෂ්පාදන මගින් ගර්භනී මව්වරුන්ට නොමේරූ දරු උපත්, අඩු බර දරු උපත්, මළ දරු උපත් හෝ ගබ්සා වීම් ඇති කරවයි. මේ නිසා වඩා වැදගත් වන්නේ ඊයම් නිෂ්පාදන වලට නිරාවරණය නොවීම හෝ හැකිතාක් අවම කරගැනීමයි. 

Flame retardant – ගෘහ උපකරණවල දීප්තිය ඇති කිරීම සඳහා යොදා ගන්නා රසයානික ද්‍රව්‍ය මගින් දරුවන්ගේ ඉගෙන ගැනීමේ ආබාධයන් ඇති වීම හා සම්බන්ධයක් පවතී. 

වියලි පිරිසිදු කිරීමේ රසයානික ද්‍රව්‍ය (Dry cleaning chemicals) – මෙම ක‍්‍රමය ඇඳුම් වියලි ලෙස පිරිසිදු කිරීම් සිදු කරන ස්ථානවල භාවිත කරන රසයානික ද්‍රව්‍ය වල බොහෝ සේ නිරාවරණය වීමෙන් ගබ්සා ඇති වීමේ තර්ජනයක් පවතී. 

ඇස්බැස්ටෝස් – ගොඩනැගිලි කර්මාන්තයේදී භාවිත කරන Asbestos මගින් දරුණු පෙනහලු රෝග ඇති කරවයි. උදා: පෙනහළු පිළිකා, mesothelioma

ඇස්බැස්ටෝස් මගින් ගර්භනී මව්වරුන්ට සෘජු බලපෑමක් ඇති වන බවට සාක්‍ෂි නොමැති වුවද ඉන් ඈත්වී සිටීම වඩා හිතකර වේ. 

BPA – Bisphenola A  – බොහෝ ප්ලාස්ටික්වල මෙම සංයෝගය දැකිය හැක. මෙම රසායනිකය මවගේ පෙකණිවැල හරහා ගර්භාෂයේ සිටින දරුවාට ගමන් කළ හැක. මෙමගින් දරුවා තුළ මොළයේ ගැටළු, හැසිරීමේ වෙනස්කම් සමහර දරුවන්ට ඇති විය හැක. 

කපුරු බෝල – කපුරු බෝල වල naphthalene නම් රසයානිකය අඩංගු වන අතර එමගින් පුද්ගලයන්ට හිසරදය, ඔක්කාරය, හිසේ කරකැවිල්ල, වමනය ඇති කරවයි. කුඩා දරුවන් මේවා මුඛය තුලට දමා ගැනීමෙන් ඔවුන්ට ඉතා දරුණු සෞඛ්‍ය ගැටළු ඇති කරවයි. අවුරුදු තුනට අඩු දරුවන්ට කපුරු බෝල ඇස නොගැටෙන ලෙස ආරක්‍ෂාකාරීව ගබඩා කළ යුතුය. 

රසයානික ද්‍රාවණවල බලපෑම – මේවා ආශ්වාස වීමෙන් මවගේ අක්මාව, වකුගඩු, මොලය ආදී ඉන්‍ද්‍රියන්ට හානි වී මරණය පවා සිදුවිය හැක. ගර්භනී කාලයේදී මව මෙම ද්‍රාවක වලට නිරාවරණය වීමෙන්,

• ගබ්සා වීම් – සති 20 පෙර කළලයක් ඉවත්වීම
• දරුවාගේ වර්ධනය සෙමින් සිදුවීම
• නොමේරු දරු උපත් සිදුවීම (සති 37ට පෙර දරුවා ඉපදීම)
• උපත් ආබාධ – මෙහිදී ශරීරයේ හැඩය හා ක‍්‍රියාකාරීත්වය වෙනස් කරයි. 

සමේ සාත්තුවේදී ගනු ලබන රසයානික ද්‍රව්‍ය – සමට කරන සාත්තුවලදී භාවිත කරන Benzoyl/ peroxide සහ salicylic acid සහිත සමේ ගල්වන ආලේපන ගැබිනි සමයේදී භාවිත නොකළ යුතුය. විශේෂයෙන් කුරුලෑ සඳහා භාවිත කරන බොහෝ ආලේපනවල මෙම රසයානික අඩංගු වේ. 

රූපලාවන්‍ය කටයුතුවලදී භාවිත කරන ගැබිනි මව නිරාවරණය නොවිය යුතු රසයානික ද්‍රව්‍ය

1. Retin A, Retinol iy Retinyl palmitate – විටමින් A අඩංගු මෙම නිෂ්පාදන මගින් උපදින දරුවාට උපත් ආබාධ ඇති කරයි. එනම් විටමින් A ව්‍යුත්පන්න මගින් එනම් tazorac සහ accutane මේවා නියම කරන්නේ ඖෂධ ලෙස පමණි. වෛද්‍ය උපදෙස් නොමැතිව භාවිත නොකළ යුතුය.

2.Essential oil – රූපලාවන්‍ය කටයුතු වලදී භාවිත වේ. 

3.Hydroquinone – සමේ ඇති වන අවර්ණ වීම් (ලප, pigmentation/ melasma) සඳහා ප‍්‍රතිකාර ලෙස භාවිත වේ. 

4.Aluminum chloride – දහදිය දුර්ගන්ධය වළක්වන ද්‍රාවණවලදී මෙම ද්‍රව්‍ය භාවිත කරයි. මේවා Aluminum chloride සාන්‍ද්‍රණය ඉතා අඩුව පවතින නිසා භාවිත කළ හැකි වුවද අධික සාන්‍ද්‍රණ සහිත නිෂ්පාදනයන්ට නිරාවරණය නොවීම වැදගත් වේ. 

5.Formaldehyde – නිය ආලේපන, සමහර හිසකෙස් සඳහා ලබාදෙන සාත්තුවලට භාවිත කරන නිෂ්පාදනවල අඩංගු වේ. මෙමගින් ගබ්සා වීම්, සරු භාවයේ ගැටළු ඇති විය හැක. 

6.Chemical sunscreen – හිරු එළියෙන් ආරක්‍ෂා වීමට ගල්වන ආලේපන (oxybenzone/ arobenzone වැනි රසයානික ද්‍රව්‍ය) මගින් හෝමෝන වලට බාධා ඇති කරයි. මෙමගින් දරුවාගේ ස්නායු පද්ධතියට හානි සිදු විය හැක. 

7.Tetracycline – සමේ විවිධ රෝග තත්ත්වවලදී භාවිතා කරන සුලභ ප‍්‍රතිජෛවකයකි. Tetracycline හා එහි ව්‍යුත්පන්න (doxycycline/ minocyclene) වලින් මවට හා දරුවාට හානි ඇති විය හැකි බැවින් භාවිතයෙන් වැළකිය යුතුයි. 

8.Dihydroxy acetone – මේවා සුවඳ විලවුන් වල (ස්ප්‍රේ ආකාරයෙන් යොදා ගැනෙන ඒවායේ) භාවිත වේ. ශරීරයට අවශෝෂණය වීමක් සිදු නොවුනද ආශ්වාස වීම තුල ගැටළු ඇති වේ. 

ගබ්සා වීම් ඇති කරවන රසයානික ද්‍රව්‍ය

• බැර ලෝහ (heavy metals) – කර්මාන්ත වල වැඩ කරන්නන්, දත් බැඳීම් වල
• කාබනික ද්‍රාවක – රසයනාගාර වල, කර්මාන්ත හා වියලි පිරිසිදු කිරීම් කාරක සමග කටයුතු කරන්නන් හට
• වියළි පිරිසිදු කිරීම් වල කටයුතු කරන්නන් (dry cleaning workers) – Tetrachloroethylene භාවිතයෙන්.
• Glycol ethers
• ඉලෙක්ට්‍රොනික් කර්මාන්තයේ 2 – Bromopropane
• Petrochemicals
• Ethylene oxide (දන්ත සහායක)
• නිර්වින්දක වායු – ශල්‍ය කටයුතු සඳහා සහාය වන කාර්ය මණ්ඩලය
• පිළිකා සඳහා ලබාදෙන ඖෂධ (එම ඖෂධ හා සම්බන්ධව කටයුතු කරන කාර්ය මණ්ඩලය)

රසයානික ද්‍රව්‍ය වලට නිරාවරණය වීම වළක්වා ගැනීමට

• දරුවන්ට ළඟා විය නොහැකි ලෙස කරකවා වැසිය හැකි පියන් සහිත බදුන් වල ආරක්‍ෂාකාරීව ගබඩා කළ යුතුය. 
• ගබඩා කිරීමේදී ලබාදී ඇති උපදෙස් පිළිලැදිය යුතුය
• පිරිසිදු කිරීම් (උදුන් හා ටයිල්) සඳහා විකල්ප රසායනික භාවිත කරන්න. උදා: ආප්ප සෝඩා, විනාකිරි
• භාවිතයෙන් පසු හොඳින් අත් සේදීම හා අත් වැසුම් භාවිතය
• නිවෙස් හොඳින් වාතාශ‍්‍රය ලැබෙන ලෙස නිරාවරණය කර තැබීම. 

විශේෂඥ මතය, අදහස සහ මූලික සටහන:

ක්‍රිෂාන්ති ගංගා කුමාරිහාමි මහත්මිය

සූතිකා පුහුණු හෙද නිළධාරිනි (I ශ්‍රේණිය)

නවජ සූති දැඩි සත්කාර ඒකකය

පළාත් මහ රෝහල, කුරුණෑගල

මානව වර්ගයාගේ පැවැත්ම වෙනුවෙන්ම ස්භාවධර්මයා විසින් දායාද කරන ලද ස්වභාවිකවම වූ සංසිද්ධියකි ගර්භනීභාවය. එහෙත් මිනිසාගේ පරිණාමය සමගම සිදුවූ තාක්‍ෂණික දියුණුවත් සමගම විද්‍යාත්මක, සංස්කෘතික ලෙස හා සාමාජීය වශයෙන් විපර්යාසයනයට ලක්වීම හේතු කොටගෙන වර්තමානයේදී සංකීර්ණමය තත්ත්වයකට ගර්භනීභාවය පත්ව ඇත. මේ නිසා ගර්භනී කාලය තුල කාන්තාවක විසින් මුහුණදෙන සංකීර්ණ ගැටළු ඇය අවදානමකට ලක් කරයි. මේ නිසා කායික, මානසික හා සාමාජීය වශයෙන් ඇතිවන ගැටළු සඳහා මුහුණදීමට නම් ඒ සඳහා ඇයට ශක්තිය හිමිවිය යුතුයි. මේ ශක්තීන් මොනවාද ඒ ශක්තීන් ලාබදිය යුත්තේ කා විසින් කෙලෙසද කොයි කාලයේද යන්න පිළිබඳව අපි විමසා බලමු. 

විස්කෘත පවුල් සංස්කෘතියක උරුමකම් කියූ අපේ පැරණි ජන සමාජය තුල නිවසේ සිටි සාමාජීක සංඛ්‍යාව වැඩි වු අතර එනම් අම්මා, තාත්තා, ආච්චි, සීයා ආදී ලෙසින් පරම්පරා 2 කට අධික ප‍්‍රමාණයක් සිටීම මත සාමාජීය වශයෙන් පවුල් අතර බෙදී ගිය කාර්යභාරයන් සමගම හිමි වූ පිළිගැනීම හා ගෞරවය තුල ගර්භනී මවක කෙරෙහි විශේෂ සැලකිලි දැක්වීම නිතැතින්ම සිදුවුනි. නිවසට සෞභාග්‍යයක් ලෙසින් සැලකූ ගර්භනී මවකට සලකන්නන් ඇය සහා සුවිශේෂී වූ රැකවරණයක් ලබාදීමත් වැඩිහිටියන් මෙන්ම අසල්වැසියන් ගෙනුත් නොඅඩුවම සිදුවූවවක්. 

ගර්භනී වූ කාන්තාවක් තුල ඇති වන හෝමෝනමය වෙනස්කම් හේතුවෙන් ඇගේ ශරීරය තුල ඇතිවන වෙනස්කම් නිසා ඇගේ ශරීරය තුල ඇතිවන වෙනස් වීම් සමහර අවස්ථාවලදී දරාගැනීමට අපහසු වන අතරම රෝහල් ගත කර ප‍්‍රතිකාර ලබාදීමට සිදුවන අවස්ථාද ඇත. ගර්භනී වූ වහාම මේ වෙනස්කම් නිසා නිතර කටට කෙල ඉනීම, ඔක්කාරය, වමනය, ක්ලාන්තය, කරකැවිල්ල මෙන්ම කෑම අරුචිය වැනි තත්ත්ව මෙන්ම ඇගට දැනෙන වෙහෙස, විඩාව, කම්මැලිකම මෙන්ම සිතට දැනෙන බර ගතිය ආදිය මව නොසන්සුන් බවට පත් කරයි. එසේම ලබාගන්නා ආහාර අඩුවීම හා ජල පානය අඩුවීම නිසා මව විජලනයට පත්වීමත් සිදු වේ. 

එසේම සංසේචිත කලලය ගර්භාෂ බිත්තියේ තැන්පත් වීම සමග ගර්භාෂ පේශී ක‍්‍රියාකාරීත්වය නිසා යටිබඩ ප‍්‍රදේශයේ ඇතිවන වේදනාව, දියර පානය අඩුවීම නිසා ඇති වන මුත‍්‍රා දැවිල්ල ආදියද මව තවත් අසහනයට පත් කරයි. මේ ආදී වූ සුවිශේෂී අපහසුතාවයන් ඇය කායිකව මෙන්ම මානසිකවද දුර්වලතාවට පත් කරයි. 

මෙවන් අවස්ථාවකදී මේ මවගේ අපහසුතා පිළිබඳ සොයා බලා ඇය පිළිබද අවධානය යොමු කිරීම මෙන්ම ඇගේ රුචිකත්වය අනුව ආහාර පාන සපයා දීම හා ඇය හා එක්ව කටයුතු කිරීම වැදගත් වේ. ඒ අනුව ඇයට හැකි උපරිම අයුරින් පහසුකම් සලසා දීමත් ඇයගේ මනස සැහැල්ලූ වනසේ පාරිසරික සාධක ළඟා කරදීමත් හැකි සෑම වීටම සිදු කල යුතුයි. මේ ශාරීරික මානසික වෙනස්කම් නිසා ඇයට මානසික සහනය, ඇය පිළිබදවද දක්වන ඇල්ම, ආදරය හිතෛෂී බව මෙන්ම ඇයගේ වැඩ කටයුතු සඳහා දක්වන සහායද වැදගත් වේ. 

කාන්තාවක ගර්භනී වුවද ඇය නිවස තුල ගෘහණියක් ලෙස කටයුතු කරන හෙයින් ඇයට ගර්භනීභාවය සමග මේ ගෘහණියගේ කාර්යභාරයද කිරීමට සිදු වේ. මේ නිසා ඇයට දිරි ගැන්වීමක් ලෙස නිවසේ වැඩකටයුතු බෙදා හදා ගැනීම තුලින් ඇයට විවේකයක් ලබාදීමට අවශ්‍ය කටයුතු කළ හැකියි. 

ඇයගේ රුචිකත්වය අනුව සුදුසු කෑමක් බීමක් සකස් කරදීමට/ ගෙන දීම ඇයගේත් ඇය කුස තුල දරුවාගේත් සෞඛ්‍යයට බෙහෙවින් බලපායි. අඩුවන හෝ ඌනතා ඇති විය හැකි පෝෂණ සංඝටක සම්බන්ධ විටමින් වර්ග ලබාගැනීම සඳහාද ඇයට උනන්දු කිරීම නිවැරදිව ලබාගන්නේදැයි සොයා බැලීම මෙන්ම අවශ්‍ය වේලාවන් වලට අත්‍යාවශ්‍ය වෛද්‍ය රසායනික පරීක්‍ෂණ සඳහා යොමු කිරීම මෙන්ම සායන සංරක්‍ෂණ කටයුතු සඳහා යොමු කිරීමත් ඒවා සඳහා ඇය සමගම සහභාගී වීමත් ඇයගේ හා දරුවාගේ සෞඛ්‍ය තත්ත්වය පිළිබඳ සෞඛ්‍ය නිළධාරීන් සමග මෙන්ම ඇය සමගත් සාකච්ජා කිරීම ඇය වෙනුවෙන් ස්වාමිපුරුෂයාට හෝ නිවැසියන්ට සිදු කළ හැකිම කරුණකි. 

අවදානම් තත්ත්වයන් මව තුල වේ නම් ඒවා පිළිබඳ නිරන්තර සොයා බලමින් සෞඛ්‍ය උපදෙස් අනුව ඇය රැකබලා ගනිමින් මානසික සෞඛ්‍ය වෙනුවෙන් ආගමික හා සංස්කෘතික කටයුතු සමග සම්බන්ධ වීමත් වැදගත් වේ. මෙවැනි සංස්කෘතික, ආගමික, සහජීවනය ඇගේ මනස සැහැල්ලූ වීම තුලින් කායික නිරෝගීභාවයටද යහපත් වූ බලපෑමක් ඇති කරයි. 

දරුවා වැඩෙත්ම උදරය විශාල වීමත් සමග බර වැඩි වීම නිසා මවට උසුලාගෙන සිටීමට ඇති බර නිසා කොන්දේ වේදනාවත්, පාදවල වේදනාවත් සමහර විට නහර ගැට ගැසීම නිසා සිදුවන අපහසුතාවන් නිසා ඇයට විවේකය අවශ්‍ය වෙයි. නිවසේ කටයුතු වලදී ඇයට සහයෝගය ලබාදීම තුලින් යම් අස්වැසිල්ලක් ඇයට ලැබේ. මවට දරුවාට ඇඳුම් පැලඳුම් සැලසුම් කිරීම මෙන්ම රෝහල් ගත වන විට අවශ්‍ය ද්‍රව්‍ය සපයා ගැනීම සඳහා උදව් කිරීමත් ඒවා පිරිසිදු කර සකසා ගැනීම සඳහා උනන්දු කර සහය දීමත් ඇය සලසාලන මහඟු වූ සහනයකි. 

දරුවා ලැබුණු පසු නිවසේ දරුවා සඳහා සුදුසු ස්ථානයක් පිළියෙල කිරීමත් එය මුල් ළමා විය සත්කාරයට ඉඩ ලැබෙන පරිදි සැලසුම් කිරීමටත් ඇය හා අත්වැල් බැඳ ගැනීම පියෙකු ලෙස කළ හැකි තවත් මහඟුම වූ යුතුකමකි. දින ආසන්න වන විට රෝහල් ගත වීම සඳහා අවශ්‍ය ප‍්‍රවාහන පහසුකම් පිළිබඳව කතිකා කර තැබීමත් ඒ සඳහා අවශ්‍ය මුදල් ඉතිරි කර තබාගැනීමත් ඒ පිළිබඳව මව දැනුවත් කිරීමත් ඇයගේ හිතට ලැබෙන සහනයක් මහත් වේ. 

මෙසේ නිවැසියන්ගේ සහය මවට ලැබෙන විට සමාජයටද මේ මව රැකබලා ගැනීමේ වගකීම නිතැතින්ම හිමි වේ. රැකියාවක් කරන මවක් නම් රැකියා ස්ථානයේදී ඇයගේ රාජකාරී කටයුතු වලදී සහනයක් පහසුවක් සලසා දීමත්, රාජකාරියට පැමිණෙන හා පිටව යන විට ඒ සඳහා භාවිත කරන ක‍්‍රමවේද පිළිබඳව ඇයට සහනයක් සැලසෙන සේ කටයුතු කිරීම ඉතාමත් වටිනා වූ යුතුකමකි. මේ සඳහා රජයේ මැදිහත් වීමෙන් සකසා ඇති චක‍්‍රලේඛ අනුව හෝ ඇයට සහනයක් උදා කරදීමත්, අධික බර/ වෙහෙසකර රාජකාරී වලින් ඇය මුදවා සැහැල්ලූ රාජකාරියකට  ඇය යොමු කිරීමත් වටිනාකමක් ඇති කරයි. ආයතනය කෙරේ ඇයගේ ඇතිවන පැහැදීමත් ඇයගේ මානසික සෞඛ්‍යයට වැදගත් වේ. සමහර පුද්ගලික ආයතන වල ගර්භනී මව්වරු සඳහා අමතර ආහාර වේලක් පවා ලබාදීමට සැලසුම් කර ඇත්තේ මවට සලකන සුවිශේෂී වූ රැකවරණයක් පරිද්දෙනි. 

එසේම පොදු ප‍්‍රවාහන සේවය භාවිතයේදී ඇයට වාහනයට නැගීමට හා බැසීමට උදව් කළ යුතුවා මෙන්ම ආසනයක් ලබාදීමට කාරුණික වීමද මාතෘත්වයට සිදු කරන සමාජීය වගකීමකි. 

ගැබිනි මවට නිවසේද සමාජයේද පිළිගැනීමක් ඇති කිරීම ගෞරව කිරීම ඇයට අවශ්‍ය අවස්ථාවන්හිදී අවශ්‍ය පරිදි උදව් ලබාදීම තුලින් ඇයට ඇතිවන පිබිදීම ඇයගේ දරුවාටද නිරෝගී ශක්තිමත් නිර්මාණශීලී නිදහස් සිතුවිලි සහිත දරුවකු වීමට මගපාදයි. 

සමාජයට යහපත් දරුවකු තනනා මවට සියලු තන්හිදී එක්ව සහයෝගය දැක්වීම තුලින් ඇයට දක්වන කරුණාබරිත බදන් සැලකීම් තුලින් සමාජය කෙරේ ඇයට ඇතිවන ප‍්‍රශංසනීය හැඟීම ඇගේ දරුවාද නිවුනු දරුවකු වීමේ අඩිතාලම ඇති කරයි. පොදු ස්ථාන වලදී පෝලිම් වලින් තොරව ඇයට සේවය සලසා දීමත් සාමාජීය වගකීමක් වේ. 

ගැබිනි මව වෙත නගනා සෙනෙහස මුදු මොලොක් හැඟීම් දැනීම් මවක් කායික, මානසික, සාමාජීය හා අධ්‍යාත්මික ලෙසින් ප‍්‍රබෝධයට පත් කරයි. මෙම ප‍්‍රබෝධය කුස තුල සිටිනා දරුවාද අත්විඳින හෙයින් ඔහු හෝ ඇයද එළිය දකින මෙලොව පිළිබඳව ප‍්‍රසන්න හැඟීම් ඇති කරනවා සේම වෛර ක්‍රෝධ සිතුවිලි වලින් තොරවූ ප‍්‍රසන්න සිතුවිලි ඇති ලොවට වැඩදායී පුද්ගලයෙකු වනු නොඅනුමානයි. එය මා පිය පදවිය දරන සියළුම දෙමාපියන්ට යහපත් වූ ආරංචියක් වනවා සේම ලොවෙහි පැවැත්මටද සමබර වූ ශක්තියක් එක් වේ. 

එසේ හෙයින් ලද සෑම අවස්ථාවකම උත්තරීතර මාතෘත්වයට නිවසින් සාමාජයෙන් කළ හැකි වූ යුතුකම් නොපිරි හෙලා ඉටු කිරීම තම රට ජාතිය වෙනුවෙන් කළ හැකි වූ උදාරතම වූ යුතුකම හා වගකීම වන්නේය. 

විශේෂඥ මතය, අදහස සහ මූලික සටහන:

අයිරාංගනී ගගලගමුව

පවුල් සෞඛ්‍ය සේවා නිළධාරීනි

සෞඛ්‍ය වෛද්‍ය නිලධාරී කාර්යාලය

බුලත්සිංහල

දරු උපතක් තරම් ප‍්‍රීතිමත් හැඟීමක් යුවලකට තවත් නොමැති තරම්. විවාහ ජීවිතයත් සමගින් සැමගේම ඊලඟ අපේක්‍ෂාව දරුවකු තම ජීවන ගමනට එක් කර ගැනීමයි. මෙම බලාපොරොත්තුව සඵල කරගන්නට ඇඟිලි ගනිනවා සේම එම ප‍්‍රීතිමත් ආරංචිය දැනගත් මොහොතේම ඊලඟ අපේක්‍ෂාව එම දරුවා මෙලොව එළිය දකින දිනය දැනගැනීමයි. මෙම දිනය සකස් කරගන්නට අපේ මව්වරු දැන සිටීම ඉතා වැදගත්. ඒ නිසාම මේ උත්සාහය ඔබට ඒ පිළිබඳව දැනුවත් කිරීමයි. 

සාමාන්‍ය ව්‍යවහාරයේ පරිදි මිනිසාගේ ගැබ් කාලය සති 40 ක් එහෙමත් නැතිනම් දින 280 ක් ලෙස ගණන් ගැනෙනවා. මාස 9 ක් කුස තුළ දරා සිටිනවා ලෙසත් මෙය හඳුන්වනවා. මේ කාලය ගැබ් කාලය නම් අපි මේ දිනය හදාගන්නේ කෙසේද? එහෙමත් නැත්නම් ප‍්‍රසූතිය සිදුවන දිනයට දින සකසා ගන්නේ කෙසේද? 

මේ සඳහා අපිට වැදගත් වන්නේ කාන්තාවගේ මාසික ඔසප් චක‍්‍රයයි. ඒ අනුව අවසාන ශුද්ධ වීම ආරම්භ වූ දිනයේ සිට තමයි මේ ගණන් සැකසීම ආරම්භ වෙන්නේ. ඒ අනුව අවසාන ශුද්ධ වීම ආරම්භ වූ දිනයට මාස 9 යි දින 7 ක් එකතු කිරීම අප කළ යුතුයි. එනම් අවසාන ශුද්ධ වීම ආරම්භ වූ දිනය ජනවාරි 01 වෙනිදා නම් ඊට මාස 9 ක් එකතු කළ විට ඔක්තෝබර් මාසය ලැබෙනවා. ඊට දින 7 ක් එකතු කළ විට ඔක්තෝබර් 08 දිනය ලැබෙනවා. එය.

වර්ෂය මාසය දින

අවසන් ඔසප් ආරම්භ වූ දිනය 2021 01 01

මාස 9 දින 7 ක් එකතු කිරීම – 09 07

බලාපොරොත්තු ප‍්‍රසව දිනය 2021 10 08

මෙසේ නැතහොත් අවසන් ශුද්ධ වීම ආරම්භ වූ දිනයේ සිට සතියෙන් සතිය දින දර්ශනයකින් බලා සති ගණන් කිරීමෙන් එය ලබාගත හැකියි. 

එය මෙලෙස සටහන් කර ලබාගන්න. 

සාමාන්‍යයෙන් කලලයේ වර්ධනය පිළිබඳව කතා කරන්නේ සති ගණන්වලින් නිසා මවකට තම කුසයේ සිටින දරුවාගේ වයස බලාගැනීමට මේ ක‍්‍රමය යොදා ගත හැකියි. පෙර සේම අවසන් ශුද්ධ වීම සෑදුනු දින සිට සතියෙන් සතිය ගණන් කර හෝ දින ගණන් කර එය 7 න් බෙදීමෙන් සති ගණන් සදාගත හැකියි. මෙසේ මවක විසින් දරුවා කුස තුළ තබාගෙන කරන කටයුතු දරුවාගේ බුද්ධි වර්ධනයට බලපාන නිසා මෙසේ කටයුතු කර මව්වරුන්ගේ දරුවන් ගණිත හැකියාව හා නර්තන ශක්තිය අතින් ඉහළ අගයක් ගන්නවා. මෙයත් දරුවන්ට කුස තුල සිට ඉගෙනීමට ලැබෙන මහඟු අවස්ථාවක්. 

අප විසින් සාදන දින ගණන්වල සුළු වෙනස් වීමක් ස්කෑන් පරීක්‍ෂණයේදී පෙන්විය හැකියි. එසේ වන්නේ දරුවාගේ වර්ධනය තාක්‍ෂණික වශයෙන් මැනීමෙන් ලබාගන්නා දත්ත මෙන්ම එය පෙන්නුම් කරන්නේ සංසේචනය වූ දිනයේ සිටම පෙන්වන වර්ධනය අනුව නිසයි. එය ඔබට සායන පරීක්‍ෂාවේදී දැනගත හැකි වනවා. 

සෑම කාන්තාවක්ම තමන්ගේ ඔසප් චක‍්‍රයේ දින සටහන් කරගැනීමට ඉතා වැදගත්. ඔසප් චක‍්‍රය ක‍්‍රියාත්මකව පවතින සෑම කාන්තාවක්ම දින සටහන් කරතබා ගන්නේ නම් මෙසේ දරුවා ලැබෙන දිනය සකස් කරගැනීමට කලලයේ වර්ධන සති ගණන් සාදා ගැනීමට එය පිටුවහලක් වනවා. 

දරුවකු බලාපොරොත්තු නොවන කාන්තාවක් වුවද, දරු උපත් සීමා කිරීමට හෝ උපත් අතර පරතරය සඳහා යම් හෝ ක‍්‍රමයක් පාවිච්චි කළද තමන්ගේ ඔසප් චක‍්‍රය සටහන් තබාගැනීම වැදගත්. මෙලෙස පවත්වා ගන්නා සටහන් තුලින් අනවශ්‍ය ගැබ් ගැනීම් වේලාසන හඳුනා ගැනීමටත් ඔසප් චක‍්‍රයේ ක‍්‍රමවත් හෝ අක‍්‍රමවත් භාවය හඳුනා ගැනීමටත්, භාවිත කරන පවුල් සංවිධාන ක‍්‍රමයේ සාර්ථක අසාර්ථකභාවය මෙන්ම එහි අතුරු ආබාධ හඳුනාගැනීමටත් අවස්ථාව උදා වෙනවා. මේ තුලින් ඇති වන සෞඛ්‍ය තර්ජන වළක්වා ගැනීමටත් ඒ සඳහා අවශ්‍ය ප‍්‍රතිකාර වෙත කල් තියා යොමු වීමටත් අවස්ථාව ලැබෙනවා. 

මෙසේ නිශ්චිත ලෙස ප‍්‍රසූත දිනය දැන ගැනීම තුලින් ඔබට පූර්ව සූදානම සඳහා අවස්ථාව ලැබෙනවා. එනම් රෝහල් ගත වීමේදී මවට හා දරුවාට අවශ්‍ය දෑ සකස් කරගැනීමට, ප‍්‍රවාහන පහසුකම් සලසා ගැනීමට, හදිසි අවස්ථාවකදී අවශ්‍ය මුදලක් ඉතිරි කර තබාගැනීමට, ඥාති මිත‍්‍රයින් දැනුවත් කර තැබීමෙන් හදිසි අවස්ථා සඳහා උපකාර ලබාගැනීමට, ඔබේ තව දරුවන් සිටී නම් ඔබේ රෝහල් ගත වීම පිළිබඳව ඔවුන් දැනුවත් කර තැබීමට ඔවුන්ගේ ආහාර, රැකවරණය ආදිය පිළිබඳව සැලසුම් කිරීමට මෙන්ම අධ්‍යාපන කටයුතු/රැකියාවේ කටයුතු පිළිවෙළකට සකස් කරගැනීමට ඔබට මේ තුලින් හැකියාව ලැබේ.

සැහැල්ලූවෙන් රෝහල් ගත වීමටත් ප‍්‍රසූතිය සඳහා හොඳින් මුහුණදීමටත් ඔබට හැකි වනවා සේම ඔබේ ස්වාමි පුරුෂයාට, නිවැසියන්ට හා දරුවන්ටත් සහනදායී වටපිටාවක් නිර්මාණය වීම තුලින්, ඔබේත් ඔබ පවුලේත්, ඔබගේ ප‍්‍රසූතිය සිදු කරන රෝහල් කාර්ය මණ්ඩලයටත් ලැබෙන සැහැල්ලූව සැමගේම ජීවිතයනට ආලෝකයක් වනවා නොඅනුමානයි.

විශේෂඥ මතය, අදහස සහ මූලික සටහන:

අයිරාංගනී ගගලගමුව

පවුල් සෞඛ්‍ය සේවා නිළධාරීනි

සෞඛ්‍ය වෛද්‍ය නිලධාරී කාර්යාලය

බුලත්සිංහල