ජීවිතය අතීතය වර්තමානය හා අනාගතය නම් කාල පරාසයන් පසු කරමින් ,මුහුණ දෙමින් ,මුහුණ දෙන්නට සූදානමින් රිද්මයානූකූලව ගලා යයි. වර්තමානය ගෙවී යමින් අතීතයට එක්කාසු වන විට එයින් ලද අත්දැකීම් අනාගතයට බෙහෙවින්ම වැදගත්ය. ඒ ජිවිතය පෝෂණය වන්නේ අත්දැකීම් තුලින් නිසාවෙන්මය. කාලය යනු ආශ්චර්යකි.අතීතයේ දිනකදී මා අම්මාගේ අකැයෙහි උණුහුම විඳිමින් නැළවුන අම්මාගේ සුරතල් දඟකාර දෝණියයි. අද මා අකැයෙහි උණුහුම විඳිමින් සුරතල් වන පුතු පැටවුන්ගේ අම්මා මමය. එළඹෙන අනාගතයේදී මා ආදරණිය මිත්තණියක් වනු ඇත. ඉදින් මේ කාලය මවන වෙනසෙහි අරුමයය. දරුවන් නමින් සෙනෙහස දෝර ගලා යන සෑම මව් හදවතකම නැගෙන සිතුවිලි වල සමානාත්මකතාවයක් මා දකිමි.

විටෙක මා වික්ෂිප්ත වෙමි. මේ මමමද… ඔව් මේ මමමය. කාලය ගෙවී ගොස් අප වයසින් මුහුකුරා ගොස්ය.ළදැරිය, යුවතිය ,පතිනිය, මව ,මිත්තණිය ලෙස කාන්තාවක් ජිවිතයේ විවිධ අදියරයන් පසු කරන විට එහි සුවිශේෂීම සංධිස්ථානය මවක් වීම යැයි මට සිතේ. අම්මා මිහිපිට ඇති ජීවයේ මැවුම්කාරිය ඇයයි. අම්මා අහසක් සේය. අම්මා පොළවක් සේය.අම්මා මෙන් අහස සේ දරා ගන්නා පොළව සේ උසුලා සිටින්නියක් මට කෙදිනකවත් හමුවී නැත. නව ජීවයකට උපත සදන සොඳුරු නවා තැන අම්මාගේ කුසය. කුළුඳුලේම මවක් වීම ඉමහත් බැරෑරුම් කාරියකි. මා කුස තුල නව ජීවයක් නවාතැන් ගත් බව දැනගත් නිමේෂය අදද මට සිහිනයක සේයාවක් මෙන් හදවතේ ඇඳී යයි. අම්මාගේ විසේකාර දඟකාරිය, බඩ පිස්සී “අම්මා” යන සොඳුරු ආමන්ත්‍රණයට හිමිකාරියක් විය.ඉතින් එයින් මා කෙතරම් වික්ශිප්ත වූවාද? හිස් මුදුනෙන් ඇරඹුන විදුලි සැරයක් පාදාන්තය දක්වාම විහිද ගියා සේ දැනුනි. සතුට ,බිය මුසුව හදවත ස්පන්ධනය වන වේගය පවා වේගවත් විය. කෙසේ මම මේ අවස්ථාවට මුහුණ දෙන්නද උ? මම මගෙන් ඇසූවෙමි.

ගැබිණියක් වන විට තම සිතුම් පැතුම්, ඇවතුම් පැවතුම් ,ඇඳුම් පැළඳුම්, ගමන බිමන ආදී දෛනික ජීවිතයම වෙනසකට ලක් වන්නේ නිරායාසයෙන්මය. දසමසක්ම මේ නුදුටු අමුත්තා වෙනුවෙන් පේවෙන්නීය. අඩුම වශයෙන් උණක් හෙම්බිරිස්සාවක්වත් නොසෑදී ඉන්නට මාද වගබලා ගත්තා මට මතකය. ඒතරමටම මා මගේ සෞඛ්‍යය පිළිබඳ මා සැලකිලිමත් වූයේ මගේ අසනීප තත්ත්වයන් මගේ නූපන් දරු පැටියාට ගැටලුවක් වේ යැයි සිතූ නිසාවෙන්මය.

අබ ඇටයක් තරමින් ඇරඹි ජීවය මොහොතින් මොහොත කුස තුල වර්ධනය වන විට දැනෙන ශාරිරික වෙනස්කම් අසීමිතය. හෝමෝන වෙනස්වීම නිසා වමනය, හිසරදය, කරකැවිල්ල, ආහාර අරුචිය වැනි අපහසුතා ඇති වන්නාසේම නොයෙකු සුවඳ පවා ගන්ධයන් සේ දැනෙන්නට විය. ගර්භණීත්වය හා බැඳුනු බොහෝ ගැටළු මටද පොදු විය. සෑම මසකට වරක්ම සායන වලට මා නොවරදවාම ගියෙමි. දරුවා නීරෝගීව වර්ධනය බව වෛද්‍යතුමා පවසන විට මා අපරිමිත සතුටකින් දැඩි ස්නේහයෙන් මගේ කුස පිරිමැද්දෙමි. මා මවක් වූ බව දැන ගත් දිනයට පසු දිනයේම මගේ සැමියා මට “ඔබත් දැනුවත් මවක් වන්න” යන පොත තිළිණ කළේය. සත්තකින්ම එය මට මහා පිටුවහලක් විය. කළලය වර්ධනය වන විට ටිකෙන් ටික කුසද මෝරා වැඩෙන්නට විය. සති 18ක් 19 පමණ වන විට ප්‍රථම වරට මගේ පුංචි දඟයාගේ දැඟලීම මා අත්වින්ඳෙමි. කුස පිරිමදිමින් කවි ,ගී ගැයුවෙමි. පුංචි කතන්දර කියා දුන්නෙමි. කුස තුල සිටින්නේ දුවක්ද පුතෙක්ද යන්න ස්කෑන් පරික්ෂණයකින් දැන ගත හැකි වුවත් එය කලින්ම දැන ගන්නට මට ඇවසි වූයේ නැත. මා පැතුවේ ස්වභාවික දරු උපතක්මය. එහිදී දැනෙන හැඟුමන් සජීවීවම අත්විඳින්නට මා ආශා කළෙමි.

සති 34 ක් පමණ වන විට හිටි හැටියේ මගේ දඟයා රාත්‍රිය පුරාවටම දඟ නොකළාය. අම්මා කෙනෙකුගේ හදවතෙහි දරුවන් වෙනුවෙන් උපදින කප්පරක් සෙනෙහස නිසාවෙන් දරුවන්ට කරදරයක් වු විට දැනෙන හැඟුමන් මා ප්‍රථම වරට අත්වින්දෙමි.නොනවත්වාම දෙනෙතින් කඳුළු ගලා හැලෙන්නට විය. මුව ගොළු වී ඇත. සිත ගිණියම් වී ඇත. ඉතින් මා වෛද්‍යවරයාට කෙසේ පහදන්නද?

“මගේ බබා ඊයේ රෑ ඉඳලා දඟලන්නෙ නැහැ” සිතට වාරු ගත් මා අවසානයේ වදන් එකතු කොට පැවසුවෙමි. මා පරික්ෂා කර බලා අහවර කළ වෛද්‍යවරයි මගේ දෙනෙත් දෙස එක එල්ලේ බලා උන්නාය. මා තවත්  බියට පත් වුණෙමි.

“අම්මලා ඔහොමම තමයිනේ… ප්‍රශ්නයක් නැහැ දරුවෝ ඔයාගේ පැටියට දැන් ටිකක් ඉඩ මදි දඟලන්න. එයා හොඳට නිදාගෙන ඊයේ රෑම”

හිස මත තිබූ මහා බරක් නිදහස් විය.

“අනේ මගේ පැටියෝ ඔයා මාව කොච්චර බය කළාද? ” කුස පිරිමදිමින් මා මිමිණීය.

සති 38 වන විට මගේ පැටියා මේ ලෝකයට වඩින්නට සූදානම් විය. ලොව ඇති උපරිම වේදනාව අත්විඳින්නට මා සුදානම් විය. දෑස් තරයේ වසාගත් මගේ සිත අභියසට ආවේ මගේ ආදරණීය අම්මාය. අම්මා අප පස්දෙනෙකු මෙළොවට ජනිත කරන්නට මේ තරමටම වේදනාවක් උහුලන්නට ඇත. අම්මා නමින් මගේ සිත ආදරයෙන් හා භක්තියෙන් පිරීගියේය. අම්මා… මගේ  වේදනාව අතරින් මිමිනූ එකම වදන විය. උං ඈ උං ඈ… ඒ මගේ පැටියාගේ ප්‍රථම හැඬුමය. මෙතෙක් මා ලද වේදනාව අතුරුදන් විය. මා හිස ඔසවන්නට තැත් දැරූවෙමි.

“ඔන්න ඔයාට පුතෙක් මෙන්න බලන්න, හරි ඉක්මණට එක්කරන් එන්නම් ” හෙදිය පවසද්දි මා සිනාසුනෙමි

ඔය රෝස කම්මුල් වල

හාදු හුඟක් තවරද්දි

නුඹ උන්නා සුව පහසුව ඔහේ…

සිහිනයෙන් නුඹ හිනැහෙද්දි

සිහිනයෙන් නුඹ හඬද්දි

මං උන්නා නුඹ දිහා බලා ස්නේහයෙන්…

දසමසක් පෙරුමන් පුරා

දෝතට වැඩිය වස්තුවේ

ආදරෙයි  නුඹට මං මහා හුඟක්…

මගේ මුල් ලිපිය එනම් “මව්වරුනි…ඔබ, ඔබේ රැකියාව අත් හැරියත්, ඔබ තුල ඇති ශක්තිය අත් නොහරින්න” ලිපිය කියවා, ඒ සදහා ප්‍රතිචාර ලබා දුන් මව්වරුන් එහි දෙවෙනි ලිපියක් ලෙස මෙය ලිවීමට මා පෙලබවීය. රැකියාව අතහැර නිවසේ නැවතුන මවකට නිවසේදීම කල හැකි දේ බොහෝය. දරුවන් ගේ, සැමියාගේ සහ නිවසේ වැඩ කටයුතු වලට පමණක් තම හැකියාව හා දැනුම සීමා නොකොට ඉන් තමන්ට මෙන්ම අනුන්ටද වැඩදායි කටයුත්තක නියැලෙන්නේ නම් ඉතා අගනේය. නිකම්ම නිකම් ගෘහනියක් පමණ්ක් නොවී ඉන් ඔබ්බට සිතා බැලීමට ඔබට දැන් කාලය එළබ ඇත.

පූර්ණ කාලීන මවක් හා ගෘහණියක් වූ ඔබ, නිවසේ සියලු වැඩ කටයුතු වලට සමගාමීව කිරීමට යන මෙම අමතර කටයුත්ත ඔබට ගතට මෙන්ම සිතටද සැනසීමක් සතුටක් ලබා දීමට සමත් විය යුතුය. එනිසා මේ සදහා ඔබ තෝරාගත යුත්තේ තමන් තෘප්තිමත් වන අයුරින් කළ හැකි දෙයක් වන බව මාගේ අදහසයි.

ඔබ සැමගේ අධ්‍යාපන මට්ටම සාමාන්‍ය පෙළ සිට විශ්ව විද්‍යාල අධ්‍යාපනය දක්වා එකිනෙකාට වෙනස් වේ. පෙරදී ඔබ කල රැකියාව ඒ සුදුසුකම් මත ලබා ගත් ඒකකි. එවන් වටිනා රැකියාව ඔබ මේ වන විට අත්හැර අවසන් ය. එනිසා පළමුව ඔබ විසින් කළ යුත්තේ ඔබ කළ රැකියාව සහ ඔබගේ ඉහත කී සුදුසුකම් මුලු හිතින්ම අමතක කර දැමීමයි. මක් නිසාද යත්,ඉහත කී කාරණා ඔබ නොදැනුවත්වම ඔබ තුල පුහු මානයක් ඇතිකරලන බැවිනි. ලජ්ජාවක් ඇතිකරලන බැවිනි. එම මානය, ලජ්ජාව නිසා ඔබට ඔබේ ඉදිරිය නිසියාකාරව නොපෙනේ. එය ඔබට ඔබෙ ඉදිරිය පිළිබද පැහැදිලි තීරණයක් ගැනීමට ඉඩ නොදෙයි. ඔබට, ඔබේ සිතට නිදහස්ව සවන් දීමට ඉඩ නොදෙයි. (මතක තබා ගන්න. මෙය තාවකාලික අමතක කිරීමක් බව. ඔබ උගත් දෑ, ඔබ ගන්නා කවර හෝ තීරනයක් ඉදිරියට ගෙන යාමට සහ එය අන් අයට රැකියාවන් ජනනය කරවීම දක්වා දියුනු වූ කර්මාන්තයක් බවට පත් කර ගැනීමට ඔබට අනිවාර්යයෙන් අනාගතයේදී උපකාරී වේවි.)

මේ වෙබ් අඩවියට සමගාමීව දිවෙන www.womanly.lk වෙබ් අඩවියේ පළවී තිබෙන එක ළිපියක් මට අහම්බෙන් මෙන් මුණගැසුනි. එය කියවීමෙන් ඔබට නිවසේදී කල හැකි, අමතර ආදායමක් ද ලබා ගත් හැකි විනෝදාංශ කීපයක් සදහන් කර තිබේ. එනම් සුබ පැතුම් පත් නිර්මාණය, ආභරණ නිර්මණය, ඇදුම් මැසීම, ඡායාරූපකරණය, කේක් සහ ආහාර වර්ග සැකසීම. මීට අමතරව තවත් බොහෝ විනෝදාංශ ද සහජ හැකියාවන්ද ඔබට තිබේ. රූපලාවන්ය, ලිවීමේ හැකියාව, භාණ්ඩ ගැනුම් සහ විකිණිම්, ස්ව නිර්මාණ(DIY Crafts), සේවා සැපයීම යනාදිය ඉන් කිහිපයක් වේ. එමෙන්ම ඔබගේ අධ්‍යාපන මට්ටම පසුබිම් කරගනිමින් නිවසේදී කල හැකි යමක් ඔබට ආරම්භ ක්ල හැකියි. උදා:- වෛද්‍ය සේවාවන්, උපදේශන සේවාවන්, ගිනුම් කටයුතු, ජනමාධ්ය ලිපිලේඛන, උපකාරක පන්ති මින් සමහරක් ය.

රැකියාව කරන සහ නොකරන සියලුම මව්වරුනි! අප, පුහුදුන් මනසකින් යුතුව ” අපව අගය කල යුතුයි, අපි තමා වඩාත් කැපකිරීම් කල  උදවිය, අපි තමයි කාල කලමනාකාරීත්වයෙන්  උසස්ම” යැයි එකිනෙකාට කියා නොගෙන ඉන් ඔබ්බට  පියවර කීපයක් ඉදිරියට තබමින් ඒකිනෙකාට උදව් දී ඔවුනොවුන් ගේ තත්වය ඉහලට දැමීම වඩා කාලෝචිතයැයි මම පිලිගනිමි. මේ පුංචි පනිවිඩය, දැනට රැකියාවේ නියලෙන දක්‍ෂ මව්වරුන්ටයි. නිවසේ වසන මව්වරුන් රැකියාව කරන මව්වරුන් මෙන් ආර්ථිකය අතින් ශක්තිමත් කරගැනීමට ඔවුන්ව දිරිමත් කරමු. ඔවුන්ද අන් අයට රැකියා මවන්නියන් බවට පත්කරමු. මේ සමාජයේ සියලුම කාන්තාවන් කෙසේ වෙතත්, බහුතරයක්වත්  තවෙකෙකුගෙන් පූර්ණකාලීනව යැපෙන්නේ නැති තත්වයට පත් කරමු.

අපේ කාන්තාවන් හරිම දක්‍ෂයි; හරිම නිර්මාණශිලීයි. නිදහසේ ඔවුන්ට සිතීමට ඉඩකඩක් ලැබුනොත් ඔවුන්ට ඉතා අලංකාර අදහස් පහල වේ. මම ද පූර්ණකාලීණ මවක් ව හිඳිමින් ඉතා සාර්ථකව Facebook හරහා මගේම ව්‍යාපාරයක් පවත්වාගෙන යමි. මේ කටයුත්ත කරගෙන යාම සඳහා මම දවසේ වැඩි ප්‍රමාණයක් අන්තර්ජාලය හා සම්බන්ධව සිටිමි. එවිට Facebok පසුබිම් කරගනිමින් දිවෙන ඉතා රසවත් පිටු මට මුනගැසෙයි. ඉන් කිහිපයක් මම මෙසේ සඳහන් කරමි. එක් මවක්, අද කාලයේ දෙමාපියන් ගේ කාර්‍ය බහුලත්වය හේතුවෙන් කර ගැනීමට ඉඩ නොලැබෙන  දරුවන් ගේ පාසල් පොත් වලට පිටකවර දැමීම සුලු කටයුත්තක් ලෙස කරගෙන යනු ලබයි; ඉන් ආදායමක් ද අැය උපයා ගනී . තවත් මවක් , අද පෙර පාසල් වලට සහ කුඩා ලමුන් ගේ ප්‍රීති උත්සව වලදී නිතරම භාවිතා කරගන්නා Play dough (පිටි වලින් සාදා ගන්න , දරුවන් ට සෙල්ලම් කිරීමට උපකාරී වන ගුලියක්) සෑදීම තමාගේ සුලු ව්‍යාපාරයක් ලෙස කරගෙන යයි. තවත් මවක් ඉතා අලංකාර සුභ පැතුම් පත් නිර්මාණයෙන් අරඹා දැන් සාර්ථක ලෙස අලංකාර උත්සව සැරසිලි නිර්මාණය දක්වා තම ව්‍යාපාරයක් දියුනු කරගෙන සිටී.

මෙවන් වූ උදාහරණ මා ඔබට ගෙන හැර දැක්වූවේ, මේ කියවන ගෙදර ඉන්න අම්මලාව දිරිමත් කිරීමටයි. නිකමට හිතන්න, ඔබත් කෙසේ හෝ කීයක් හරි උපයා ගන්නේ නම්, ඔබේ එදිනෙදා මෙන්ම අනෙකුත් විශේෂ අවශ්‍යතා සපුරා ගැනීම ඔබටම කරගත හැකිනේද? ඒ වගේම ඔබේ ස්වාමි පුරුශයාට ආර්ථිකමය වශයෙන් සුලු හෝ සහයෝගයක් ලබාදෙන වටිනා,ආදර්ශමත් බිරිඳක් විය හැකි නේද? මා හැම විටම පවසන පරිදි ඔබ, ඔබ තුල අැති ශක්තිය හඳුනා ගෙන එය ඉහලට ගෙන එන්න. ඔබ, ඔබේ හා දරුවන් ගේ, සිය පවුලේ අනාගතය හා අභිවෘද්ධිය වෙනුවෙන් ගන්නා කිසිඳු තීරණයක් පිළිඹඳව පසු නොතැවෙන්න. ඉදිරියටම යන්න.

තවත් මෙවන් වූ ලිපියකින් නැවත ඔබ හා ඉක්මනින්ම සමීප වෙමි! ආයුබෝවන්!

 කතුවරිය ගැන

උමන්දා මුතුකුඩආරච්චි මොරටු විශ්ව විද්‍යාලයේ ඉංජිනේරු උපාධිධාරිනියක්. බහුජාතික සමාගම් දෙකකම ඉහල රැකියාවන් වල නිරතව අත්දැකීම් පරිපූර්ණව සිටි ඈ, ඊටත් වඩා උතුම් වූ රාජකාරියක් සඳහා ඇගේ වෘතියෙන් සමුගත්තා. ඒ නම්, පූර්ණකාලීන මවක් වීමේ අරමුණෙන්. දැන් ඇය පුතුන් දෙදෙනෙකුගේ මවක්. ඊට අමතරව ඇය නිවසේ සිට පවත්වාගෙන යන ඇගේම ව්‍යාපාරයක හිමිකාරිනියක්. ඇගේ ව්‍යාපාරයේ Facebook පිටුවට මෙතනින් පිවිසෙන්න www.facebook.com/aumjewellery .