කිසිම දවසක අපේ ජීවිතය අපට අවශ්‍ය අන්දමින් ගලා ගෙන යන්නේ නැහැ. කාල විපත්ති වගේම අපට ගලපා ගන්න බැරි විදිහට විවිධ ගැටලු සහ ගැටුම්වලට අපට මුහුණ දෙන්නට සිදු වෙනවා. ඒ වගේ අවස්ථාවකදී අපි වෙනස කළමනාකරණය කර ගෙන ජීවත් වීම ඉතාම වැදගත්. අඳුරට දොස් නගනවාට වඩා පහනක් දල්වා ගැනීමට අපි පුරුදු වීම ඉතාම වැදගත්.

නව මානසික ආකෘතියක් ගොඩ නගා ගනිමු.

අතීතය අපි ඉතාම සැපවත්ව ජීවත් වුන බව ඇත්ත. දරුවන්ට වුනත් අද දෙමව්පියන් මුහුණ දී සිටින තත්වය නිසා වෙනදා තිබුන සුඛෝපබෝගී ජීවිතය වෙනස් වෙලා ඇති.ඒ තත්වය සාධාරණ කර ගෙන ජීවත් වීමට අපි පුරුදු වීම ඉතාම වැදගත්. කොටින්ම රෝමයට ගිය විට රෝම වැසියෙක් විදිහට ජීවත් වෙනවා වගේ දැන් අපි මුහුණ දී තිබෙන තත්වයට අනුව අපේ ජීවිතය හැඩ ගසා ගැනීම යුගයේ අවශ්‍යතාවයක් බව සිතනන්.

අපේ බොහෝ ප්‍රශ්න සහ ගැටළු හැසිරෙන්නේ අපේ මනස අනුවයි. ‘‘පැමිණි දුක් පැණිරසයි ‘‘කියමින් ජීවත් වීමට හැකි පිරිසකුත් සිටිනවා.ඒ වගේම පවතින තත්වයට නිතරම දෙස් දෙවෙල් තබන කොටසකුත් සිටිනවා. මේ දෙපාර්ශවය විසින් වෙනස ගැන සිතන පතන ආකල්ප අපට වෙනස් කිරීමට බැහැ. මොනවා වුනත් අපට ජීවිතයෙන් පලා යන්න බැහැ. පවතින තත්වයේ අපට ජීවත් වීමට අනිවාර්යෙන්ම සිදු වෙනවා. ඒ නිසා ඔබ මානසික ආකෘතිය වෙනස් කරන්න.

වෙනස තේරුම් ගන්න…

සාමාන්‍ය ජීවන රටාවක් තුළ සිටි අපට වෙනසක් වෙනුවෙන් අනුවර්තනය වීම එතරම් පහසු නැහැ. නමුත් ඔබ මේ ගැනත් අමතක කරන්න එපා. ඕනෑම ජීවියෙක් පරිසරයට අනුවර්තනය වීම අවශ්‍ය බැව් චාල්ස් ඩාවින් පරිණාමවාදයේදී පවා පෙන්වා දී තිබෙන කරුණක්. එසේ අනුවර්තනය නොවුනොත් ඒ ජීවියාට නොනැසී පැවතීමට අපහසුයි. මේ න්‍යාය අද අපටත් ආදේශ කර ගැනීමට සිදු වෙනවා. වෙනස අපි තේරුම් ගෙන ඒ අනුව අනුවර්තනය වීම හැර කළ යුතු දෙයක් අපට නැහැ.

දරුවන්ට වුනත් පවතින වෙනස තේරුම් කර දීම ඉතා වැදගත්. අනුරුද්ධ කුමාරයාට නැති බැරි කම් නොසගවා සිටි නිසා ඔහු කැවුම් නැති බව කී විට ‘‘නැති කැවුම් “ ඉල්ලා සිටි කථාවත් ඔබ දන්නවා ඇති. ඉතින් අද අපි මුහුණ පා සිටින ආර්ථික අසීරුතාවය තුළ දරුවන්ගේ ජීවිතයේ බොහෝ දේ වෙනස් විය හැකි බැව් ඔවුන්ට කරුණු කාරනා ඇතුව පැහැදිලි කර දෙන්න.

වෙනදා තිබුන සැප අද නැති වීම.

මීට පෙරාතුව කෙටි දුරක් හෝ පයින් නොගිය ඔබේ පවුල අද ඉන්ධන හිගය නිසා යම් පිරිමැස්මකින් කටයුතු කිරීමට සිදු වේවි. ඒ ගැන කම්පා වීමට වඩා පෙරලුන පැත්ත හොඳ නැති වුනත් එයින් සිත කළකිරවා ගන්න එපා. ප්‍රශ්න ගැන පමණට වඩා සිතීමත් ප්‍රශ්නයක්. ඒ නිසා අසීරුවෙන් ලබා ගන්නා ඉන්ධන කළමනාකරණයකින් පාලනය කළ යුතු බැව් දරුවන්ටත් තේරුම් කර දෙන්න. ඒ නිසා වෙනදා මෙන් නොව දැන් හැකි දුර පයින් යෑමටත්, හැකි සෑම අවස්ථාවකදීම පොදු ප්‍රවාහනය තෝරා ගැනීමටත් දරුවන්ට තේරුම් ඇතුව කියා දෙන්න.

විකල්ප සොයන්න…

අපේ ජීවන රටාව දැන් අලුත් වෙනසක් අනුව ගලපා ගැනීම අත්‍යවශ්‍ය වෙනවා. ඒ නිසාම විකල්ප වෙනුවෙන් වෙනදා නොමැති අවධානයක් දැක්වීම අවශ්‍යයි.ගෑස් නැති නිසා දර, හෝ වෙනත් විකල්ප ඉන්ධන වෙනුවෙන් යොමු විය යුතු බැව් ඔබ පමණක් නොව දරුවන්ටත් තේරුම් කර දෙන්න.

නිර්මානශීලී අදහස් ඇති වෙන්නත් පුළුවනි..

සමාජයේ ඇති වෙන පීඩනය බොහෝ විට නිර්මානශීලී අදහස් පමණක් නොව නිර්මාණ බිහිවීමටත් ඇවැසි පරිසරයක් නිර්මානය වෙනවා. මැක්සිම් ගෝර්කිගේ අම්මා, ලියෝ ටෝල්ස්ටෝයිගේ ‘‘යුද්ධය හා සාමය “ වැනි වටිනා නිර්මාන බිහි වූයේ යුධ මානසිකත්වයක ජීවත් වුන ලේඛකයන්ගෙන් බැව් අමතක නොකළ යුතුයි. කාර්මික විප්ලවය සමග සමාජයේ වැඩ පහසු කරන මෙවලම් ඇති වූ පරිදි අද පවතින ආර්තික අර්බුද හමුවේ අලුත් නිර්මාණ නිෂ්පාදනය තරුණ දරුවන් උනන්දු කිරීම වැදගත්.මේ පසුබිම තුළින් අලුත් නිර්මාණ හදුනා ගත් තරුණ දරුවන් අප අතර බොහෝ සිටිති.උදාහරණ ලෙස කිවහොත් විදුලිය නොමැති අවස්ථාවන්හි ප්‍රෙයා්ජනයට ගත හැකි පරිදි පරිගණක උපාංගයන්ගෙන් විදුලි ආලෝකය ලබා ගැනීමේ නිෂ්පාදන මේ වෙන විටත් නිර්මානය වී තිබේ.එවැනි නිර්මාන අප සැබැවින්ම අගය කළ යුතුය. ඒ වෙනස තුළුන් නව පරම්පරාව ලබා ගත් විශිෂ්ට ජයග්‍රහණයන් බවත් අමතක නොකරන්න.

මානසික අභිප්‍රේරණ

වෙනස ඉදිරියේ අපේ මනසට අභිප්‍රේරණයන් ලබා දෙන්න. අතීතය පාදක කර ගෙන සුසුම් හෙලීමට වඩා වර්තමාන ගැටලු සහ අභියෝග ජය ගත  යුතු බැව් තේරුම් ගන්න.අභිප්‍රේරණයකින් අදහස් වන්නේ යම් අභියෝගයක් තුළ විසඳුම් සොයමින් ඒ විසඳුම් වෙත සමීප විය යුතුය යන මානසික ජවයයි. බොහෝ උදවිය බොහෝ දේ ගත් තැනම ලොප් හෙවත් එය අසාර්ථක වේවි..එහෙම නැත්නම් අපට ඕක කරන්න බැරි වෙයි..කරලා වැඩක් වෙයිද…? වැනි පසුගාමී මානසිකත්ව ගොඩ නගා ගැනීමට පුරුදු වී සිටිති.

ඒ වුනත් පවතින වෙනස කළමනාකරණය කර ගැනීමට නම් මානසික ලෙසින් ලැබෙන අභිප්‍රේරණයන් ඉතා වැදගත්. එය ජීවිතය ජය ගන්නා වූ ජවයයි.

එසේ නම් අපි මෙතෙක් අතීත උරුමයන් ගැන පාරම් බෑවා මිසක ස්වඋත්සාහයෙන් නැගිටින්නට උනන්දු වූයේ නැත. තවමත් අපි අතීතකාමයේ පිහිටා වර්තමාන තත්වයට දොස් නගනු විනා පැමිණ ඇති බාධක බිදගෙන ඉදිරියට යෑමේ මානසික ජවය ගොඩ නගා ගෙන නැත.එහෙත්…වෙනස කළමනාකරණය කර ගනිමින් ජීවිතය ජය ගැනීමට නම් වෙනස වෙනුවෙන්  විකල්ප හදුනා ගැනීමත්, එම විකල්ප ජය ගැනීමෙහි ලා මානසික අභිප්‍රේරණ ගොඩ නගා ගැනීමත් ඉතාම වැදගත් වේ. එවිට අනාගතයේදී අපි වෙනස කළමනාකරණය කිරීමෙන් දැයක් ජයගත් ජාතියක් වනු ඇත.

ධනාත්මක  චින්තනය එහෙම නැත්නම්  positive thinking ගැන අපි කතා කළත් අපේ ජීවිතයට මේ සංකල්ප ප්‍රයෝගික විදිහට සම්බන්ධ කර ගන්නේ කොහොමද…? සමහර විට ඔබ දැනටමත් ඔබේ ජීවිතය ධනාත්මක ලෙසින් ගොඩ නගා ගත් දෙමව්පියෙක්  විය හැකියි. අපේ අතීත පරම්පරාවන් ධනාත්මක චින්තනය යන වචනය  ගැන නොදැණුවත් වුනත් සැබැවින්ම ඔවුන්ගේ ජීවිතයේ ප්‍රායෝගික පැත්ත බැලූ විට අනේ ඇත්ත නේන්නම් යැයි සිතෙනු ඇති.

ජයග්‍රහනයෙන් වගේම පරාජයෙනුත් ඉගෙන ගන්න

අපේ ජීවිතය සැමදාම ජයග්‍රහණයන්ගෙන්ම පිරී පවතින්නේ නැහැ. අපට පරාජයන් වගේම අහිමිවීම්වලටත් මුහුණ දීමට සිදු වෙනවා. ඒ නිසා ධනාත්මක ලෙසින් ජීවිතයට මුහුණ දීමට නම් ජයග්‍රහණයන් ඉදිරියේදී ලබන ශක්තිය පරාජය තුලිනුත් ලබා ගැනීමට උනන්දු වෙන්න.

සාර්ථක පුද්ගලයන් අසාර්ථක වුනේ ඇයි..?

පවුලේ අම්මා , තාත්තා ලෙසින් කටයුතු කරන  ඔබට සමාජයේ ආර්ථික හෝ සමාජ ස්ථාවරයක සිටි පුද්ගලයන් හිටි අඩියේම අසාර්ථක චරිත බවට පත් වුන අන්දම ගැනත් අත්දැකීම් ඇති  එවැනි චරිත බිඳවැටෙන්නට ඔවුන් පිටුපසින් දිවෙන යම් හේතුවක් තිබෙන්න පුළුවනි. ඔබ අන්න ඒ හේතුව හඳුනා ගන්න. මේ පුද්ගලයාගේ පරාජයට හේතු වුනේ ඔහුගේ මෙවන් හැසිරීම් රටාවක් නිසා බැව් අවබෝධ වූ විට එය ඔබේ ජීවිතයේ සාර්ථකත්වයට මනා පාඩමක් වනු ඇති.

ස්වයං කථනයක යෙදෙන්න

ඔබ විවේකව සිටින විට ඔබ ගැන ඔබම හිතන්න. ඔබට වඩා ඔබ ගැන දන්නා පුද්ගලයෙක් තවත් නැහැ. කොටින්ම ඔබේ මව , පියාටවත් ඔබ නිවරැදිව තේරුම් ගැනීමට නොහැකි අවස්ථා ඇති. ඒ තරමටම මිනිස් සිත ගුප්තයි. නමුත් ඔබ ගැන ඔබෙන් විමසන විට ඔබ තුළ පවතින ශක්තීන් වගේම දුර්වලතාවයන් ගැනත් ඔබටම වැටහෙනු ඇති.ඒ නිසා ඔබේ වැරැදි නිවරැදි කර ගැනීමට මේ අන්දමින් සිදු වෙන ස්වයං කථනය ඉතාම වැදගත් වෙනවා.

මනස පිරිසිදු කර ගන්න.

මවක්, පියෙක් වුනත් ඔබ සාමාන්‍ය මිනිසෙක්. ඒ නිසා ඔබේ සිතේ ඊර්ශ්‍යාව, ක්‍රෝධය වැනි දුර්ගුණ පවතින්න පුලුවනි. ඒවා ආරම්භයේදීම උදුරා ඉවත් කරන්න. මෙවැනි දුර්ගුණ වැඩෙන්නට ඉඩ දුනහොත් එයින් ඔබේ ජීවිතයට දැඩි බලපෑමක් එල්ල වීමට ඉඩ ඇති. ඊර්ශ්‍යවන්තයා නිතරම දුකින් පෙලේ… මේ කියමන ඔබටත් හොඳින් අසා පුරුදු ඇති. ඒ නිසා ඔබ සමාජයේ කුහක චරිතයක් ලෙසින් ලේබල් වනවාටත් වඩා ඔබේ අයහපත් සිතුවිලි ඔබේ ජීවිතයට යම් බලපැමක් ඇති වෙන තත්වයක් දක්වා වගා වීමට ඉඩ නොදීම ඔබේ වගකීමක්.

ආත්ම විශ්වාසය වැදගත්..

ව්‍යවසායකයෙකු ලෙසින් ඔබ සතුව පවත්නා ආත්ම විශ්වාසය ඉතා වැදගත්. අතීත පුද්ගලයන්ගේ ආප්තෝපදේශයකට අනුව ප්‍රශ්නයකට අපි මැදිහත් විය යුතුයි. පනින්න පෙර සිතා බැලිය යුතු ඇත්ත වුනත් ඒ ගැන සිතමින් පමණක් සිටියොත් ඔබට කිසිම දිනක ජයග්‍රහණයක් අත් නොවනු ඇති. ගොඩබිම සිට පීනන්න නොහැකි බැව් ඔබ දන්නවා ඇති. දියේ ගැඹුර දැන ආත්මාරක්ෂාවෙන් කටයුතු කිරීමට වුනත් පිහිනීමේ හැකියාවක් ඔබ සතුව තිබිම වැදගත්. ඒ නිසා නිතරම ‘‘ ඔව්..මට එය කළ හැකියි යන ආත්ම විශ්වාසය ගොඩ නගා ගන්න. හැම දෙයම කළ නොහැකි බැව් ඇත්ත. නමුත් කළ හැකි දෙය ගැන විශ්වාසයෙන් කටයුතු කළහොත් ඔබ සැබැවින්ම ධනාත්මක ව්‍යවසායකයෙකු වෙනු ඇති.

බාහිර පෙනුමත් වැදගත්.

බොහෝ දෙනාගේ අදහස වී තිබෙන්නේ මම කවුද කියන්න හැම දෙනාම දන්නවා…  එය ඇත්ත. බොහෝ අඹු සැමියන් විවාහයට පෙරාතුව ඔවුන් බාහිර පෙනුම ගැන දැක්වූ උනන්දුව කාලයත් සමග අතපසු කරනු ඇති. දැන් ඉතින් කාට පෙනෙන්නද…? ඔවුන් ඒ අන්දමින් සාධාරණ කළත් හැම දෙනෙක්ම යටි සිතින් ප්‍රසන්න දෙයට කැමැතියි. කන්නාඩියක් ඉදිරියට ගොස් බලන විට ඔබේ ප්‍රසන්න පෙනුම ඔබටම ආත්මාභිමානයක් ඇති කරන්නට තරම් හේතු වෙනවා. ඒ නිසා නිතරම ප්‍රසන්නව, පිළිවෙලට සිටින්න. එය නොදැනීම පවුල තුළ ආකර්ශනයට හේතු වෙනු ඇති.

කායික නිරෝගිතාවය වැදගත්..

ආරෝග්‍යා පරමා ලාභා සැබැවින්ම නිරෝගිකම පරම ධනයයි. පවුලක මව හෝ පියා නිරන්තරව රෝගි තත්වයට පත් වුනොත් ඒ පවුල බිඳ වැටෙනවා ‘ Tn  නිරන්තරව රෝගි තත්වයට පත් වුනොත් mjqf,a පැවැත්මට එය දැඩි බාධාවක් වීම අරුමයක් නොවේ. ඒ නිසා නිරන්තරව ඔබේ සෞඛ්‍යය ගැන ප්‍රමුඛතාවය ලබා දෙන්න. හදවත් රෝග ” වකුගඩු රෝග සඳහා පාර කියන රුධිරගත කොලස්ටරෝල් මටට්ම, රුධිරගත සීනි මට්ටම හිතකර අන්දමින් පවත්වා ගත හැකි සේ Tබේ ජීවන රටාව සකස් කර ගන්න. සිනි, තෙල් , ආහාර අඩුවෙන් ගැනීම මෙන්ම ව්‍යායාම ගැනත් කාලය යොමු කරන්න. ඔබේ කායික නිරෝගිතාවය ඔබටත් නොදැනීම මානසික සුවතාවයට මග කියනු ඇත.

අතීතය ගැන මධ්‍යස්ථ වෙන්න

ඔබ අතීතයේදී ඉතා සැප පහසු ජීවිතයක් ගත කළ අයෙකු විය හැක. නමුත් අද ඔබට ඒ සියලු සැප සම්පත් අහිමි වී ඇතැත් ඔබ අනිවාර්යෙන්ම වර්තමානයේ ජීවත් විය යුතුය. අතීතය ගැන ලතැවෙන්න අවශ්‍ය නැහැ. අතීතය දැන් ගෙවී ගොස් අවසානය. සමහර විට අතීතයේ අත්දැකීම් මත ඔබට වර්තමානය සැලසුම් කිරීමේ හැකියාව ඇති. ඒ නිසා ගෙවුන අතීතය දෙස මධ්‍යස්ථව බලන්න. නමුත් අතීත අත්දැකීම් වර්තමානය සැලසුම් කිරීමේ මාර්ගෝපදේශ ලෙසින් ජීවිතයට සම්බන්ධ කර ගන්න.

ධනාත්මක පොත පත කියවන්න

කියවීම මිනිසා සම්පූර්ණ කරන බව ඇත්ත. කියවීමෙන් ජීවිතය පෝෂණය කර ගැනීමට අවශ්‍ය ශක්තිය ලැබෙනවා. ඒ අතරත් ඔබට ධනාත්මක ලෙසින් කටයුතු කරමින් ජීවිතය ජයගත් පුද්ගල චරිතාපදාන කියවන්න. ඒවා පවුලේ අයට සහ හිත මිතුරන් අතරත් බෙදා හදා ගන්න. ඔබේ දරුවන්ටත් බාල කාලයේ පටන් ධනාත්මක ලෙසින් ජීවිතය ජයගත් පුද්ගලයින් ගැන කියා දෙන්න. ඔවුන් අගය කරන්න.

ජීවන කුසලතාවයන් දියුණු කරන්න.

සමාජයේ වෙනස් වීමට සමගාමීව අපිත් වෙනස් විය යුතුයි. එය අපේ නොනැසී පැවැත්මයි. ඒ නිසා අපේ ජීවන කුසලතාවයන් සංවර්ධනය කර ගැනීම වැදගත්.  ව්‍යවසායකයෙකු ලෙසින් ඔබ බොහෝ දේ උගත යුතුය. අද වෙන විට තොරතුරු සන්නිවේදන තාක්ෂනය ගැන සන්නද්ධ වීම ඉතා වැදගත්. දරුවන් පවා නොමග යෑමට බොහෝ විට හේතු වන්නේ දෙමව්පියන් ලෙසින් ඔබට ඒ පිලිබඳව ඇති නොදැනුවත්කමයි. ඒ නිසා නිතරම ජීවන කුසලතාවයන් සංවර්ධනය කර ගැනීමට උනන්දු වෙන්න.උගත මනා ශිල්පයමයි මතු රැකෙනා…යන උදාන වාක්‍ය ඔබේ ජීවිතයට සම්බන්ධ කර ගන්න.

ඇසුරු කරන අයත් වැදගත්.

අපට සමාජයේ තනියෙන් ජීවත් විය නොහැකි බැව් ඇත්ත. නමුත් බොහෝ විට ආශ්‍රයෙන් අපේ ගති පැවැතුම් වෙනස් වීමට ඉඩ තිබෙනවා. ඒ නිසා නිතරම ඇසුරු කරන පුද්ගලයන්ගේ ගති පැවැතුම් මත ඔබේ ගති පැවැතුම් වෙනස් විය හැකි නිසා යහපත් චරිත ඇසුරට යොමු වීමත් වැදගත්.

ආගමක් අනුව හැසිරෙන්න

ආගමකින් ඔබේ මනසට ලබා දෙන පනිවිඩය නිසාම ඔබේ ජීවිතය ශක්තිමත් වනු ඇත. සෑම ආගමකින්ම අපට ලබා දෙන්නේ මානව දයාව, සහජීවනය වැනි ගුණාංඟයන්ය. එම ඉගැන්වීම් වෙතින් අපේ ජීවිතයම පෝෂණය කරනු ඇත.

දවස ආගමික වතාවත්වලින් ආරම්භ කරන්න.

ඔබ කුමන ආගමිකයෙකු වේවා දවස ආගමික වත් පිළිවෙත්වලින් ආරම්භ කරන්න. ඔබේ දරුවන්ටත් ඒ අනුව හැසිරෙන්නට හුරු කරන්න. එවිට ඔවුන්ද අනාගතයේ යහපත් චරිත ලෙසින් ගොඩ නැගෙනු ඇත. එහෙමනම් බර වචනයෙන් කියන මේ ධනාත්මක චින්තනය මොන තරම් සරලදැයි ඔබටත් සිතෙනු ඇති.