වයසින් වැඩෙන්න වැඩෙන්න බබාලගෙ මොළයේ වර්ධනය වගේම කරන ක්‍රියාකාරකම් පවා වෙනස් වෙනව.ඉතිං අපි අපේ පැටවුන්ගේ වයසට අදාළව ක්‍රියාකාරකම් තෝරා බේරා ගන්න ඕන.ඉතිං අද කතාකරන්න යන්නෙ අවුරුදු 1ත් 2ත් අතර පොඩ්ඩො එක්ක ගෙදරදී කරන්න පුලුවන් සරල ක්‍රියාකාරකම් ටිකක්.
මේව සරලයි වගේ පෙනුනට බබාලට මේවගෙන් ලැබෙන පන්නරය නම් නිමක් නෑ. මම මේ කියන්නෙ අත්දැකීමෙන් සහ විශ්වාසයෙන්.
අපි දැන් එකින් එක කතාකරමු.
අරුම පුදුම “බිල්ඩින්ග් බ්ලොක්ස් ”
හැම ගෙදරකම බබාල ළඟ මේ බිල්ඩින්ග් බ්ලොක්ස් තියනව.එත් බලන්න ඔයාල කවදාවත් හිතල තිබුනද අපේ පැටවුන්ගේ මොළය වර්ධනයට මේව මේ තරම් වැදගත් කියල.
ගොඩක් අය බබාලාට මේව අරගෙන දීල බබාලට කැමති දෙයක් කරන්න දීල බලාගෙන ඉන්නව .ඒත් මම ඒක පොඩ්ඩක් වෙනස් කරල මෙන්න මේ වගේ දේවල් ටිකක් මගෙ දූත් එක්ක කලා.
වර්ණ හදුනාගැනීමේ ක්‍රියාකාරකම :
- පාට පාට බිල්ඩින්ග් බ්ලොක්ස් එක ගොඩකට දාල ඒ ඒ පාට වලට අදාළ වර්ණයෙන් යුතු කෝප්ප වලට ඒ ඒ වර්ණයෙන් යුතු බ්ලොක්ස් දැම්මා.
- ඒ වර්ණය දාන ගමන්ම මම ඒකට අදාළ වර්ණ උච්චාරණය කලා.
- දිගින් දිගටම මගෙ දුව හරි ආසාවෙන් මේ සෙල්ලම කලා.
ටික දවසක් යනකොට එයාම ඒ වර්ණය කිය කිය දාන්න ගත්තා.දැන් කියන්න සතුටුයි අවුරුදු 2ක් වෙන්නත් කලින් මගේ දුව වර්ණ 10කත් වඩා ප්‍රමාණයක් නම් වශයෙනුත් ,වර්ණ අනුවත් අදුනාගැනීමේ හැකියාවෙන් යුත් දරුවෙක්.
ලොකු පොඩි බේදය:
ගොඩාක් බබාලාට මොන්ට්සෝරි යන වයසෙදි පවා අදුනගන්න අසීරු දෙයක් තමයි ලොකු පොඩි බේදය වෙන්කරල අදුනගන්න එක.ඉතිං මේ සරල ක්‍රියාකාරකම බබාට සතුටක් වගේම ඉගැන්වීමේ සරල ක්‍රමයක්.
- එක එක ප්‍රමාණයන්ගෙන් ලොකු පොඩි ගොඩනැගිලි හදල බබාගෙන් අහන්න “බබා කැමති කොයි එකටද? ලොකු එකටද පොඩි එකටද ? ”කියල. කතාකරන්න පුලුවන් බබෙක්නම් අවශ්‍ය එක කියලා ඉල්ලයි.කතාකරන්න අසීරු බබෙක් නම් ඉරියව් වලින් පෙන්නයි.
- එතකොට ඔයාට පුලුවන් ඒක ලොකු එකද පොඩි එකද කියල කියල දීල බබාට ඒක දෙන්න.ටික දවසක් යනකොට ඉබේම ලොකු පොඩි අදුනගන්න බබාට පුලුවන් වෙනවා.
- ඊට පස්සෙ බලන්නකෝ බබාල ගෙදර තියන හැමදේම ඒ විදියට වෙන් කරනව.”ලොකු පුටුව , පොඩි පුටුව , ලොකු පිගාන ,පොඩි පිගාන” යනාදී වශයෙන්.
හසුරු කුසලතා වර්ධනය:
- බිල්ඩින්ග් බ්ලොක්ස් ඔක්කෝම ලොකු භාජනයකට දාල තවත් පොඩි භාජන කීපයක් ,හැන්දක් අරගෙන අර ලොකු භාජනයේ තියන බ්ලොක්ස් හැන්දෙන් පොඩි භාජන වලට දාන්න දෙන්න.
මේ ක්‍රියාකාරකම මගින් යම් දෙයකට අවධානය දීල ,ඉවසීමෙන් වැඩක් කරන්න සහ තනිවම තීරණ ගන්න ,ඒව ක්‍රියාත්මක කරන්න බබාලා පුරුදු වෙන්නෙ නිරායාසයෙන්මයි.
හැඩතල හදුන්වා දීම:
- බබාත් එක්ක එකතු වෙලා ත්‍රිකෝණ,සමචතුරස්‍ර,වෘත්ත,සෘජුකෝණාස්‍ර,වගේ හැඩතල මේ බ්ලොක්ස් වලින් හදන්න.
- ඒවට කියන නම් කියවන ගමන්ම හදන්න.
පොත් බලාගෙන උගන්නනවට වඩා අති සාර්ථක ක්‍රමයක් තමයි මේක.අම්මල මැසිවිලි නගන්නෙ බබාල ක්‍රියාකාරකම් කරන්න එන්නෙ නෑ කියලනෙ.ඉතිං මේ විදියට සෙල්ලමක් වගේ කරන්න.
කුස්සියෙ බඩු එක්කත් ඉගන ගන්න පුලුවන්
හැම අම්ම කෙනෙක්ම බබාලට කුස්සියෙ බඩු එක්ක සෙල්ලම් කරන්න දෙනවනෙ.ඒක මේ විදියට කරල බලන්නකෝ.
- වෙන් කරන්න බබාටම කියල හාල් ටිකක්,පරිප්පු ටිකක්,පිටි ටිකක්,තේ කුඩු ටිකක්.
- විවිධ ප්‍රමාණයන්ගේ විවරයන් සහිත බෝතල් ,කෝප්ප ,බාස්කට් වගේ දේවල් වලට හැන්දෙන් පුරවන්න දෙන්න මම මුලින් කියපු කුස්සියෙ තියන හාල් වගේ දේවල්.
- අපි නොදනුවත්වම මේකෙන් දියුණු වෙන්නෙ බබාගෙ හසුරු කුසලතාවයන් කියල ඔයාලටම අත්දකින්න පුලුවන් වෙයි.
විවිධ ප්‍රමාණයන්ගෙන් යුත් බෝල සෙල්ලම්
- එක එක ප්‍රමාණයන්ගෙන් බෝල ටිකක් එකතු කරගෙන දුර ප්‍රමාණය වෙනස් කර කර බබාට බෝලය විසිකරන්න.බලන්නකෝ එයාල ඒක අල්ලගන්න උත්සාහ කරන ලස්සන.
- මෙහෙම ටික කාලයක් කරනකොට ඒක බබාට ප්‍රියජනක දෙයක් වගේම ඕනම ප්‍රමාණයක දෙයක් දුරක ඉදල විසිකලාම අල්ලා ගැනීමේ හැකියාව ලැබෙනව.මගේ දුවගෙන් මම ඒක අත් දකිනවා.
පිටි බෝලෙයි ,ස්පැගටියි
රෑට කන්න ගෙනාපු ස්පැගටි වලින් පොඩ්ඩකුයි,පාන් පිටි ටිකකුයි අරගෙන ලෑස්ති වෙන්නකෝ.
- මුලින්ම බබා එක්කම එකතු වෙලා පිටි ටිකට වතුර ටිකක් දාල ගුලියක් හදාගන්න.ඊට පස්සෙ ස්පැගටි කූරු ටික බබාට දීලා අර පිටි ගුලිය වටේට ගහන්න දෙන්න.
- ඔන්න බලන්නකෝ පිටි ගුලියෙ හිස් තැන් හොය හොය ලස්සනට ස්පැගටි කූරු ටික ගහන හැටි.
මේකෙන් බබාගෙ මොළය වර්ධනය වෙන්නෙ මේ විදියට.
මුලින්ම එයා කුතුහලයෙන් පිටි ගුලිය හදන්න උදව් වෙනව.ඊටප්ස්සෙ ස්පැගටි වලින් මොකක්ද කරන්න යනව ඇත්තෙ කියල චූටි මොළෙන් අනුමාන කරන්න ගන්නව.ඒකෙන් කරන්න යන වැඩේ දැනගත්තම එයා ඒක හිත හිත ඉඩ හොය හොය කරන්න ගන්නව.බලන්න පුංචි ක්‍රියාකාරකමක් වුනාට බබා කොයිතරම් මොළය පාවිච්චි කරනවද කියල.
කොල බෝලයි ,බකට් එකයි
පොඩි බකට් එකකුයි පරණ පත්තර පිටු ටිකකුයි අරගෙන වැඩේට ලෑස්ති වෙමුකෝ.
- මුලින්ම පත්තර පිටුව පිටුව අරගෙන බබාත් එක්ක එකතු වෙලා ගුලි කරල කොල බෝල ටික හදාගන්න.
- ඊටප්ස්සෙ බකට් එක දුරකින් තියල අර හදාගත්ත බෝල එකින් එක බකට් එකට වැටෙන්න විසිකරන්න,මුලින් බැරි වුනාට, එක එක බකට් එකට කොල බෝල වැටෙන කොට බබාලා ඉතා උනන්දුවෙන් සහභාගී වෙනව.ඊටප්ස්සෙ බකට් එකේ තියන කොල බෝල හැන්දෙන් අරගෙන ඇවිත් වට්ටන්නෙ නැතුව මුලින් තිබුණ භාජනයටම දාන්න දෙන්න.
- බලන්නකෝ හරි පරෙස්සමින් කොල බෝලෙ වට්ටන්නෙත් නැතුව හැන්දෙන් අරගෙන එන ලස්සන.
බබාලට බල කරන්නෙ නැතුව එයාලගෙම කැමැත්තෙන් මේ වගෙ ක්‍රියාකාරකම් කරන්න ඕන වෙන්නෙ පුංචි කැපකිරීමක් විතරමයි.තවත් මේ වගේ ක්‍රියාකාරකම් ගැන ඉදිරියේදී කතාකරමු.
අලුත උපන් ළදරුවෙකුගේ සම මත Vernix නමින් හැඳින්වෙන ඉටි වැනි ආවරණයක් ඇති අතරම එය සමේ ආරක්ෂාව වෙනුවෙන් ස්වාභාවිකවම හටගන්නකි. ළදරුවා ඉපිද සතියක් පමණ ගත වන විට ඉබේම එය ඉවත් වී යයි. ළදරුවෙකුගේ සම පිඩාවට පත්විය හැකි ආකාර දෙකක් ඇති අතරම එකක් රුධිරය හරහාද අනෙක බාහිර පාරිසරික හේතු නිසාද වේ. එසේම ප්‍රතිශක්තිකරණ පද්ධතියේ ඇති විය හැකි දුර්වලතා ළදරු සමේ එක් එක් අසාධන තත්ත්වයන් ඇති වීමට හේතු විය හැකිය. මෙවැනි එක් එක් හේතු මත කැසිම්, ඉරිතැලීම් මෙන්ම සම අවපැහැ ගැන්වීම වැනි තත්ත්ව ළදරු සමේද දැකිය හැකිය. අන්න ඒ නිසාම ඔබේ ළදරුවාගේ සමට බාහිර පරිසරයේ හේතු සාධක මත සිදුවන හානිදායක තත්වයන් වලක්වාගැනීම මවකගේ වගකීමයි.
