සාමාන්‍යයෙන් අප සිරුරේ වස ග්‍රන්ථි දෙසීයත් දෙසිය පනහත් අතර ප්‍රමාණයක් පිහිට ඇති බව කියවේ. මේ වස ග්‍රන්තිවලින් අප උගුරේ පිහිටා ඇති වස ග්‍රන්ථි යුගල සාමාන්‍ය ව්‍යවහාරයේදී අප හඳුන්වන්නේ සෙම්ගෙඩි ලෙසටයි. අපගේ සිරුර තුලට ඇතුළු වන විෂබීජ සමග සටන් වැද ඒවා විනාශ කිරීමේ මහගු කාර්යයට උර දෙන්නේ වසා ගැටිතිය. අපගේ උගුරේ පිහිටි වස ග්‍රන්ථි මුඛය හරහා ඇතුළුවන විෂබීජ විනාශ කරයි.  කෙසේ වුවද වෛරස /බැක්ටීරියා/දිලීර මගින් අසාධනයට ලක් වූ පසු කෙල ගිලිමටවත් නොහැකි වන පරිද්දෙන් වේදනා කාරී වේ. ඒවා ඉදිමෙන අතර රත් පැහැයෙන් යුක්තය. මේ තත්ත්වය අපි සාමාන්‍ය ව්‍යවහාරයේදී සෙම්ගෙඩි ලෙස හඳුන්වයි.

අඩු වැඩි වශයෙන් සංකුලතා ඇති කළ හැකි මෙම සෙම්ගෙඩි තත්ත්වය නිසා සාමාන්‍යයෙන්,

• ගිලීමේ අපහසුතාවය
• ඇඟපත වේදනාව/උණ
• බෙල්ලෙහි කුද්දටි ඉදිමීම
• හුස්ම ගැනීමේ අපහසුතා
• කටහඬ වෙනස්වීම වැනි තත්ත්වයන් ඇති විය හැකිය.

නමුත් සෙම්ගෙඩි අසධනයට ලක්කරනු ලබන වෛරසය/බැක්ටීරියාව/දිලිරයට අනුව තත්ත්වය උග්‍ර විය හැකිය. එවිට,

• රුමැටික් උණ
• වකුගඩු ප්‍රදාහය වැනි බරපතල තත්ත්වයන් වුවද ඇති විය හැකිය.

මෙවැනි තත්ත්වයන්හිදී සුදුසුකම්ලත් වෛද්‍යවරයෙකුගේ උපදෙස් හා ප්‍රතිකාර අත්‍යවශ්‍ය බව සලකන්න.

වෛද්‍ය උපදෙස් වෙත යොමු විය යුතු සෙම්ගෙඩි ආශ්‍රිත වෙනත් රෝගතත්ව 

• උගුරේ වේදනාව
• සෙම් ගෙඩි අවට ප්‍රදේශයේ ඇති සැරව ගෙඩි තත්ත්වයන්
• කතා කිරීම/මුඛය විවෘත කිරීම/ගිලීමට අපහසු වීම
• අධික උණ
• සෙම් ගෙඩි තුළ ඇතිවන ගල්/තෙල් ගෙඩි වැනි තත්ත්වයන්
• සෙම් ගෙඩි ආශ්‍රිතව කහපැහැ දුගඳකින් යුතු වී හාල් ඇටයේ හැඩැති කැබලි ඇතිවීම

ශල්‍යකර්ම මගින් සෙමගෙඩි ඉවත් කිරීමට සිදුවන්නේ

• නිතර නිතර සෙම් ගෙඩි ආසාදන ඇති වන විට
• රාත්‍රී නින්දේදී ගෙරවීම හා හුස්ම ගැනීමේ අපහසුතා ඇති විට
• එක් සෙම්ගෙඩියක් පමණක් අසධනයට ලක්වීම
• වැඩි වාර ගණනක් සෙම් ගෙඩි ආශ්‍රිත සැරව ගෙඩි ඇති වීම.

මෙවැනි තත්ත්වයන් ඔබට හෝ ඔබේ දරුවාට ඇත්නම් ඒ සඳහා සුදුසුම වෛද්‍යවරයා වෙත යොමු වී ලබාදෙන උපදෙස් මත ක්‍රියාත්මක වීම රෝග තත්ත්වය හේතුවෙන් ඔබට පීඩා විඳීමට සිදුවන ප්‍රමාණය අවම කරගත හැකිය.

වෛද්‍ය පර්යේෂණ ආයතනයේ දිලීරවේදී අංශයේ ජ්‍යෙෂ්ඨ ලේඛකාධිකාරී වෛද්‍ය එම්. එන්. ජයවර්ධන මහත්මිය සමග සකසන ලද ලිපියකි.

 

අසාත්මික තත්වයන් පිළිබඳව බොහොමයක් මව්වරුන් නොදැනුවත් කිව්වොත් නිවැරදියි. මන්ද බහුතරය සිත සිටින්නේ අසාත්මිකතාවයක් පිටතට පෙන්නුම් කරන්නේ කියන්නේ සම මත ඇති වන පලු හෝ ලප ලෙස පමණක් කියාය. ඒත් අසාත්මිකතාවයක් යනු ඊට වඩා බරපතල විය හැකි තත්ත්වයකි.

අසාත්මිකතාවයක් පෙන්නුම් කරනු ලබන රෝගතත්ව,

• ඇදුම රෝගය
• හතිය
• පීනස

සාමන්‍යයෙන් ඇතැම් ආහාර වර්ග, දූවිල්ල වැනි සාමාන්‍ය තත්වයන් වුවද අසාත්මිකතා ඇති වන පුද්ගලයන්ට රෝග ඇති කළ හැකියි. අන්න ඒ නිසාම මෙවැනි රෝගතත්ව දරුවන්ට දිගින් දිගටම ඇති වීමේදී විමසිලිමත් විය යුතුය. ඇතැම් නිවෙස්වල ඇතිකරන සුරතලුන් නිසා දරුවන්ට ඇදුම වැනි තත්ත්වයන් ඇති විය හැකිය. ඒ සරතලුන්ගේ ලොම් හේතුවෙනි. නමුත් ඇදුම රෝගය ඇතිවීමට හේතු වන මේ තත්ත්වය ඉවත් නොකර රෝගයට ප්‍රතිකාර කිරීම සාර්ථක නොවේ. එයින් රෝගය නිට්ටාවට සුව කිරීම කළ නොහැකියි.

දරුවන්ට අසාත්මිකතා ඇති විය හැකි බව හඳුනා ගන්නේ කොහොමද ?

මේ සඳහා භාවිත වන පරීක්ෂණය වන්නේ චර්ම රෝග පරීක්ෂණය (Skin Testing) යි.  මෙහිදී ඔබේ දරුවා යම් දෙයකට අසාත්මිකතාවයක් පෙන්වනවාද යන්න පරීක්ෂණයට ලක් කෙරෙයි. උදාහරණ වශයෙන් දරුවෙකුට දිගින් දිගටම යම් රෝග තත්වයක් පැවති නම් ඒ පිළිබඳව ඇති වෙන සැකය මත එය ඇති වන්නේ යම් ආහාරයක් නිසාද? නැතිනම් යම් පාරිසරික සාධකයක් නිසාද යන්න සොයා බැලීමට මෙම පරීක්ෂණය ඉවහල් වේ.

මේ පරීක්ෂණය සිදු කෙරෙන්නේ කෙසේද?

දිගින් දිගටම පවතින යම් රෝග තත්ත්වයක් ඇති විට දරුවාගේ වෛද්‍යවරයා විසින් ලබා දෙන උපදෙස් පරිදි තත්වය හට ගන්නෙ යම් ආහාර වර්ගයක් ලබා ගත් පසු ද යන්න පිළිබඳව සුපරික්ෂාකාරිව සිටිය යුතුය. එසේ සැක කෙරෙන ආහාර වර්ග සඳහා දරුවා අසාත්මිකතාවයක් පෙන්නුම් කරයිද යන්න පිළිබඳව චර්ම රෝග පරීක්ෂණයට යොමු කර ස්ථිර කර ගැනීම සිදුවෙනවා.

මෙම චර්ම රෝග පරික්ෂණයෙදී අසාත්මික හේතූන් වන ආහාර වර්ග සහ පාරිසරික හේතු මෙන්ම සත්වයන් යන අවස්ථා සඳහා වෙන් වෙන් වශයෙන් රසායන ද්‍රව්‍ය යොදා ගැනීම සිදු කෙරේ. එසේම පරීක්ෂණයට යොමු වීමට පෙර ද වෛද්‍ය උපදෙස් මත දරුවට ලබා නොදිය යුතු ආහාර/ඖෂධ වර්ගයන් පිළිබඳවද වෛද්‍යවරයා මව්පියන් දැනුවත් කරන අතරම ඒවා ඒ ආකාරයෙන්ම පිළිපැදිය යුතු වේ. නැතහොත් පරීක්ෂණයේ ප්‍රතිපලවල නිරවද්‍ය බව සහතික කළ නොහැකි බැවිනි.

මෙසේ යම් දරුවෙකු යම් දෙයකට අසාත්මිකතාවයක් පෙන්නම් කරන බවට පරීක්ෂණයෙන් සනාථ වූ පසු ද දරුවාට නොදිය යුතු ආහාර වර්ග, ඖෂධ වර්ග මෙන්ම දරුවා රැකගත යුතු පාරිසරි තත්ත්ව පිළිබඳවත් මව්පියන් දැනුවත් කිරීම සිදු කෙරේ.

පරීක්ෂණය සිදු කෙරෙන්නේ මෙහෙමයි

චර්ම රෝග පරීක්ෂණයට තම දරුවන් යොමු කිරීමට ඇතැම් මව්වරු තුළ අනියත බියක් ඇති නමුත් මේ පරීක්ෂණය වේදනාකාරී තත්වයක් නම් නොවේ. මෙහිදී සිදු කෙරෙන්නේ සම මත අසාත්මිකතා පරීක්ෂණය සඳහා යොදා ගන්නා රසායන ද්‍රව්‍ය සම මත එක් එක් ස්ථානවල තවරා සම මත ඉතා සුළු සීරීමක් ඇති කිරීමයි. ඉන් විනාඩි 25ක් පමණ කාලයකින් ප්‍රතිපල ලබා ගත හැකියි. එතැනදී ඔබේ දරුවාට අසාත්මිකතාවය ඇති වන්නේ කුමන හේතුවක් මතද යන්න වැටහ ගත හැකියි. මෙහිදී අසාත්මිකතාවයන් වලක්වා ගැනීමට උපදෙස් ලබා දීමද සිදු වේ.

වෛද්‍ය පර්යේෂණ ආයතනයේ දිලීරවේදී අංශයේ ජ්‍යෙෂ්ඨ ලේඛකාධිකාරී වෛද්‍ය එම්. එන්. ජයවර්ධන මහත්මිය සමග සකසන ලද ලිපියකි.

 

සමාජ ජාලා වෙබ් අඩෙවි මෙන්ම පුවත් විකාශ මගින් ද මේ දිනවල සීග්‍රයෙන් පැතිර යන වෛරස රෝගයක් පිළිබඳ පුවත ඔබේත් ඇස ගැටෙන්නට ඇති. දකුණු පළාතේ පමණක් රෝගය පැතිර ඇති බව කීවද මේ වන විට දිවයිනේ හැම පළාතකම වගේ මව්වරුන් මේ ගැන විමසිල්ලෙන් පසු වෙනවා. ඒ වගේම අනියත බියකින් පසුවෙනවා. අන්න ඒ නිසාම මේ පිළිබඳව ඔබව දැනුවත් කිරීමටයි අපගේ මේ සූදානම.

මොකද්ද මේ වයිරස් එක…?

දැනට ලැබී ඇති තොරතුරුවලට අනුව නම් දරුවන් කිහිප දෙනෙකුට මරු කැද වූ මෙම රෝග තත්ත්වයට හේතු වී ඇත්තේ ඇඩිනෝ සහ RSV නමින් හැඳින්වෙන වෛරස දෙකකි. ඇඩිනෝ වෛරසය ශ්වසන පද්ධතිය, ආහාර මාර්ග පද්ධතිය, ඇස්, මුත්‍රවාහිනී පද්ධතිය, ස්නායු පද්ධතිය වැනි පද්ධති ආසාධනයට ලක් කළ හැකි මට්ටමේ වෛරස් කාණ්ඩයකි.මෙම වෛරස දෙක මගින් අසාමාන්‍ය නිව්මෝනියා තත්ත්වයක් ඇති විය හැකි අතරම ඕනෑම වයසක පුද්ගලයෙකු මේ තත්ත්වයට ගොදුරු විය හැකි වුවත් වැඩි අවධානමක් පවතින්නේ,

• වයස අවුරුද්දට අඩු ළදරුවන් සහ 65ට වැඩි වැඩිහිටියන්
• දිගු කලක් මුලුල්ලේ ශ්වසනාබාධ ඇති දරුවන් හා වැඩිහිටියන්
• වකුගඩු රෝගීන් සහ පිළිකා රෝගීන් වැනි ප්‍රතිශක්තිය අවම රෝගීන්
• දියවැඩියා රෝගීන්
• ගැබිනි මව්වරුන් යන අයයි

රෝග ලක්ෂණ

සාමාන්‍යයෙන් දැකිය හැකි වන රෝග ලක්ෂණ පහත පරිදි වේ.

• තද බල ලෙස සෙම් සොටු ගලමින් ඇතිවන සෙම්ප්‍රතිශ්‍යාව
• කැස්ස
• උගුරේ අසාධන
• තද උණ (ෆැරන්හයි අංශක 102 – 103 දක්වා පමණ)
• දරුවන්ගේ ක්‍රියාකාරකම් අඩු වීම
• කිරි උරාබීම ප්‍රතික්ෂේප කිරීම
• ශ්වසන අපහසුතා
• වමනය

මීට අමතරව ඇඩිනෝ වෛරසය මගින් ආසාධනයට ලක්වන කොටස අනුව පෙන්නුම් කරන රෝග ලක්ෂණ වෙනස් විය හැකිය.

• පාචන තත්ත්වය
• ඇස් රෝස පැහැයක් ගැනීම
• ඇස්වලින් කබ/කඳුළු ගැලීම

ප්‍රතිකාර

මේ තත්ත්වයට ප්‍රතිකාර ලෙස ප්‍රතිජීවක ඖෂධ වර්ග ලබාදීම වැදගත් නොවන්නේ මෙය බැක්ටීරියා ආසධනයක් නොවන බැවිනි. මෙය වෛරස ආසාධනයක් බැවින් එය සිරුරෙන්ම සුව වීම සිදුවිය යුතුය.

• හැකි තරම් දියර වර්ග දරුවාට ලබාදෙන්න
• විවේකීව සිටීමට සලස්වන්න
• පිරිසිදුව තබාගන්න
• වෛද්‍ය උපදෙස් මත රෝහල් ගතකරන්න

මෙම වෛරස අසාධානය සාමාන්‍යයෙන් සතියක පමණ කාලයක් පවති.  නමුත් තදින් ඇති වූ ශ්වසන ආසාදන වන කැස්ස වැනි තත්ත්වයන් සුව වීමට දිගු කාලයක් ගත විය හැකිය. නිව්මෝනියා තත්ත්වය නම සුව වීමට සති දෙකක් හතරක් වැනි කාලයක් ගත විය හැකිය.

රෝහල්ගත විය යුතු තත්ත්ව

• වයස මාස තුනට අඩු / ගැබිනි මව්වරුන්/ වයස අවුරුදු 60ට වැඩි රෝගීන් වීම
• තද උණ දින කිහිපයකට වඩා වැඩි කාලයක් පැවතීම
• රෝගය වැළඳී සතියක් ගත වුවද රෝග ලක්ෂණ නරක අතට හැරීම
• හුස්ම ගැනීමේ අපහසුතා පෙන්නුම් කිරීම
• ඇසේ අසාධන තත්ත්වය උග්‍ර වීම/වේදනාකාරී වීම
• විජලනය තත්ත්වයට පත්වීම
• වෙහෙසකාරී බව/දුර්වල බව
• මුත්‍රා පිට කරන වාර ගණන අඩුවීම

රෝගය පැතිර යෑම වලක්වා ගැනීමට නම්

මෙම තත්ත්වය එක් අයෙකුගෙන් තවත් අයෙකුට බෝ විය හැකි රෝග තත්ත්වයකි.  මෙවැනි රෝග තත්ත්වයන්ගෙන් දරුවන් බේරා ගැනීමට නම් රෝගය පැතිරීම අවම කිරීම සඳහා අප සියලු දෙනා ක්‍රියාත්මක විය යුතුය.

ඒ සඳහා

• රෝගය වැළදුණු දරුවන් සම්පුර්ණයෙන් සුවය ලබන තෙක් වෙනත් දරුවන් අතරට එවීමෙන් වලකින්න
• රෝගි නම්, කහින හෝ කිවිසන විට තම මුඛය හා නාසය ආවරණය කර ගැනීමට කාරුනික වන්න. එමගින් අනෙක් අයට රෝගය බෝ වීමේ අවධානම අවම වේ
• ඔබේ දරුවාට අන් අයගේ ආහාර/වතුර බෝතල්/ලේන්සු භාවිතයෙන් වලකින ලෙසට තරයේ අවවාද කරන්න
• දරුවාට තම දෑත හොඳින් පිරිසිදු කිරීමට උපදෙස් දෙන්න. ඒ පිළිබඳව ඔබේ අවධානය යොමු කරන්න
• කෑම පිසීමට පෙරත් දරුවන්ට ආහාර ලබා දීමට පෙරත් වැඩිහිටි ඔබේ පිරිසිදු බව පිළිබඳව සැලකිලිමත් වෙන්න
• මෙම වෛරසය ජලය හරහා ද පැමිණිය හැකි බැවින් රෝගය පැතිරෙන කාලය තුළ නාන තටාක, ඇල දොළ ආදියෙන් දරුවන් ඈත් කරතබන්න. ජලය හරහා ඇති වන තත්ත්වයේදී ඇස් රෝස පැහැ වෙන තත්ත්වය දැකගත හැකිය
• සෙනඟ ගැවසෙන ස්ථාන වෙත දරුවන් රැගෙන යාමෙන් වලකින්න රෝහලක් වෙත ගියද තමන්ගේ වාරය එන තුරු හැකිතාක් වෙන්ව සිටීමට වග බලාගන්න

වෛද්‍ය පර්යේෂණ ආයතනයේ දිලීරවේදී අංශයේ ජ්‍යෙෂ්ඨ ලේඛකාධිකාරී වෛද්‍ය එම්. එන්. ජයවර්ධන මහත්මිය සමග සකසන ලද ලිපියකි

 

දරුවන්ගේ දත් රැකගන්න දෙමව්පියන් තරම් උනන්දු විය යුතු පිරිසක් නැහැ. මෙහිදී අපි හිතන්නේ සෑම ආහාර වේලකින් පසුව දත් මැදීමෙන් පමණක් දරුවාගේ දත් ආරක්ෂා වෙන බවයි. ඒත් දන්ත සෞඛ්‍යය වෙනුවෙන් වැදගත් ආහාර වගේම දත් දිරාපත් වීමට හේතු වෙන ආහාරත් තිබෙන නිසා දරුවනගේ දත්වල ආරක්ෂාව වෙනුවෙන් ඔබ විසින් සීමා කළ යුතු ආහාර ගැනත් රීඩර්ස් ඩයිජස්ට් සගරාවේ තිබුණා. එහි සිංහල පරිවර්තනයයි මේ…

පොප් කෝන්ස්

අපේ දරුවන් පොප්කෝන්ස් වලට පුදුම කැමැත්තක් දක්වනවා. මේ ආහාර සාදා ගන්නේ බඩඉරිගු පොරි විදිහට පුපුරවා ගෙනයි. නිව්යෝර්ක්හි දන්ත වෛද්‍ය ජොනතන් නේමන් සදහන් කරන අන්දමට පොප්කෝන් නිසා විදුරු මස් තුවාල වීමට ඉඩ තිබෙනවා. ඒ නිසා මෙවැනි ආහාර වලදී සීමාවක් තිබුනොත් හොදයි නේද…?

වියලි පළතුරු

පළතුරු වියලෙන විට එහි සීනි ප්‍රතිශතය ඉහළ යනවා. උදාහරණයක් විදිහට වියලි මිදි , අන්නාසි වියලෙන විට සීනි ප්‍රතිශතය ඉහලයි. ඒවා දත් දිරා යෑමට හේතුකාරකයන් වෙන බව වෛද්‍ය නේමන් පෙන්වා දෙනවා.

සීනි සහිත පාන වර්ග

පැණි බීම වගේම කිරි පානය කිරීමෙන් දත් අතර රැදෙන සීනි නිසා දත් දිරාපත් වීමට තිබෙන අවස්ථාව ඉහලයි. කෙළ නිපදවීමට ජලය පානය ඉතාම අවශ්‍ය බව අපි දන්නවා. මුඛයේ කෙළ නොමැති වුනාම සීනි සමග ප්‍රතික්‍රියා කරමින් අම්ල නිපදවන බැක්ටීරියා දත් දිරාපත් කිරීමට හේතු වෙන බව වෛද්‍ය නේමන් පෙන්වා දෙනවා. මේ කතාවටම තවත් අතුරු කතාවක් එකතු කලොත් අපේ අම්මලාට හොදයි කියල හිතුනා.පේරදෙණිය විශ්ව විද්‍යාලයේ ආහාර විද්‍යා හා තාක්ෂණ අංශයේ මහාචාර්ය සහ ශ්‍රි ලංකා පෝෂණ සංගමයේ සංස්කාරක ටෙරන්ස් මදුජිත් මහතා පෙන්වා දෙන අන්දමට සීනි නිරන්තරව ආහාරයට ගන්නා විට රුධිරගත සීනි සාන්ද්‍රනය ඉහල යෑම නිසා ශරීරය මගින් නිපදවන ඉන්සියුලින්වලින් රුධිරගත සීනි ඉවත්කර සෛලවලට යොමු කිරීමේ ක්‍රියාවලිය කාර්යක්ෂම කරන නිසා  type 11  Diabetes Mellitus  දියවැඩියා රෝග තත්වයන්ටත් ගොදුරු වීමේ අවදානම ඉහලයි. මේ නිසා වෙඝදපොලේ පැනීබීම, පළතුරු බීම එහි අඩංගු සීනි ප්‍රමාණය අනුව කොළ, තැමිලි හා රතු (Trafic Light System ) යනුවෙන් නම් කිරීමට උපදෙස් ලැබුනත් ඒ වෙනුවෙන් පාරිභෝගිකයන්ගේ පාර්ශවයෙන්ද එතරම් උනන්දුවක් නැහැ.

ආම්ලික පාන

ආම්ලික ආහාර නිරන්තරව ගැනීම නිසා දතේ එනැමලයට හානි සිදු වෙනවා. ඒ වගේම දත් කහ පැහැ ගැනීමටත් හේතු වෙනවා. එනැමලයට හානි වීම නිසා දත් සංවේදී වීමත් සිදු වෙනවා.

අයිස්කැට

කුඩා දරුවන් අයිස්කැට වෙනුවෙන් බොහොම උනන්දුයි. මේ නිසා සමහර අම්මලා ශීතකරනයේ අයිස්කැට තියන්නේවත් නැහැ. අයිස්කැට හපන විට දත්වල සංවේදීතාවය වැඩි වෙනවා පමණක් නොවෙයි, දතේ පැලීම් ඇති වීමටත් හේතු වෙනවා.

ශක්තිජනක පානයන්

අද දරුවන් අතර මෙම පාන වර්ග ඉතාම ජනප්‍රියයි. පාඩම් කරන දරුවන් මෙම පාන වර්ග වෙනුවෙන් යොමු වුනත් ඒ පිටුපසින් තිබෙන දත් දිරා යැමේ කතාන්දයත් දැන ගත්තොත් හොදයි. මෙම පාන වර්ගවල සීනි ප්‍රතිශතය ඉහල නිසා අනිවාර්යෙන්ම මෙම පානයන්ගෙන් පසුව මුඛය සෝදා ගන්න.

රසකැවිලි

ටොපි, ලොසින්ජර්, අයිස්ක්‍රම් වැනි රසකැවිලි දත්වලට අහිතකර බව අපි හොදාකාර දන්නා නිසා ඒ ගැන අමුතුවෙන් නොකිව්වත් සිහිතබා ගැනීම හොදයි.

පිලිස්සූ මස්

මස් පුලුස්සන විට ඒ වෙනුවෙන් සීනි සහ සෝස් එකතු කරනවා. මස් විකීම අපහසු බව අපි අත්දැකීමෙන්ම දන්නවා. මස්වල සීනි නිසා වගේම විකන විට ඇති වෙන පිපිරීම් දන්තාබාධ සඳහා හේතු වෙන බවත් මතකයේ තබා ගෙන දරුවන්ගේ දන්ත සෞඛ්‍යය නිවසේදීම පටන් ගැනීමට පුලුවන්.

බදුන් කළ ආහාර

බදුන් කරන ලද ආහාර කල් තබා ගැනීමට ආම්ලික ද්‍රව්‍ය එක් කරනවා. මස්. මාලු, පළතුරු සිරප් වර්ග මේ සෑම බදුන් කළ ආහාර වලම තිබෙන සාන්ද්‍රණ යුෂ දත් දිරාපත් වීමට හේතු වෙන නිසා එම යුෂ ඉවත් කිරීමෙන් ආහාරයට ගැනීම වඩාත් යහපත්.

පාසල් යන පුංචි දරුවන්ගෙන් තිබෙන ලොකුම කරදරය තමයි දිවා ආහාරයට රැගෙන යන ආහාර නැවත කෑම පෙට්ටියෙන්ම නිවසට පැමිණීම. මේ නිසා අම්මා ආවේශ වීම පුදුමයක් නොවෙයි. මොකද කිව්වොත් රසට, ගුණට උදෙන්ම නැගිටලා සකස් කරල දෙන ආහාර දරුවා බුත්ති වින්දේ නැති බව දැක්කාම ඒ ගැන හිත් තැවුලක් ඇති වීම සාමාන්‍ය මනුස්ස ගතියක්.

දරුවන්ගේ දිවා ආහාරය වෙනුවෙන් බත් පිළියෙල කර යැවීම ඉතාම සුදුසුයි. ඒත් දරුවා බත් ප්‍රතික්ෂෙප කරන අවස්ථා බොහොමයි. ඔවුන් ඉල්ලන්නේ කඩෙන් ගත් විවිධ කෙටි කෑම වර්ග. මේවායේ බැදුම් තෙල් ගැන අපිට සහතික වීමටත් බැහැ. ඒ නිසා දරුවාගේ කෑම පෙට්ටියට බත් වලට අතිරේක වෙනත් යම් යම් දේ ඇතුලත් කිරීම වැදගත්. එතකොට බත් නැතැත් එහි තිබෙන විවිධ කෑම වර්ග දරුවා ආහාරයට ගනීවි.

පළතුරු

දරුවාගේ කෑම පෙට්ටියේ බතට අතිරේකව කෙසෙල් ගෙඩියක්, දොඩම් බික් දෙක තුනක්, අන්නාසි කැබැල්ලක් හෝ ඇපල් ගෙඩියක් තබන්න. බත් කෑමෙන් පසුව ඔහු මෙය ආහාරයට ගනීවි. එසේ නැත්නම් බත් වෙනුවට මේ පළතුරෙන් සැනසෙන්නත් පුලුවනි. බතින් පසුව විටමින් සී අන්තර්ගත අතිරේකයක් ආහාරයට ගත් විට ඉක්මනින් පෝෂණය අවශෝෂනය වීම සිද්ධ වෙනවා. ඒ නිසා පළතුරු කීපයක් කෑම පෙට්ටියේ තබන්න. ඒවා විවිධ වර්ණයන්ගෙන් යුක්ත වීමත් ඉතා වැදගත්. එවිට දරුවාට ලැබෙන පෝෂණය විවිධ විදිහට ලැබෙනවා.

එලවළු

එලවළු පිස දෙනවාට අමතරව හුමාලයෙන් තම්බා ගෙන කෑම පෙට්ටියේ තබනන්. තක්කාලි පෙති නම් අමුවෙන් පුලුවනි. කැරට් , බෝංචි හුමාලයෙන් තම්බලා බිත්තර පලුවක් හෝ සලාද කොලයක් සමග තබන්න. බතට වඩා මෙය පහසුවෙන් ආහාරයට ගන්නත් පුලුවනි. දඩිබිඩියේ වුනත් තම්මා ගත් එළවලු වෙනුවෙන් දරුවා යොමු වීම සාමාන්‍ය දෙයක්.

කිරි

කුඩා බෝතලයකට රස කරන ලද කිරි ප්‍රමාණයක් තබන්න පුලුවනි. හැබැයි කිරි සිසිල් නොවී බොහෝ දෙනෙක් බීමට එතරම් ප්‍රිය නැහැ. කාලය සමග කිරි නරක් වීමටත් තිබෙන ප්‍රවනතාවය වැඩියි.ශීතල ආරක්ෂා වෙන කෑම පෙට්ටියක නම් කිරි මිලිලීටර් ප්‍රමාණයක බෝතලයක් තබන්න පුලුවනි. එහෙම නැත්නම් යෝගට්, හෝ පළතුරු යෝගට් එකක් වුනත් වරදක් නැහැ. හැබැයි ආරක්ෂිතව නම් පමණයි.

චීස් සහ බිස්කට්

අපේ රටේ නම් එහෙම සිද්ධ නොවුනත් බොහෝ රටවල නම් දරුවන් වෙනුවෙන් චීස් නිවසේම නිපදවා ගන්නවා. ඒ විදිහට නිවසේ පිළියෙල කර ගත් චීස් පෙත්තක් වගේම බිස්කට් දරුවාගේ කෑම පෙට්ටියට ගැලපෙනවා. විශේෂයෙන් දරුවන් කැමැත්තක් දක්වන ලුණු සහ මිරිස් අධික බිස්කට් වෙනුවට නිවසේ තනා ගත් බිස්කට් වෙතින් ඔවුන්ට සංග්‍රහ කරන්න. අධික ලුණු සිරුරට අහිතකර නිසා බාල කාලයේ පටන්ම දරුවාගේ දිව මේ අහිතකර රසයන්ගෙන් මුදවා ගන්න.

ක්ලබ් සැන්ඩ්විච්

පාන් දරුවාගේ ආහාරය වෙනුවෙන් අනුමත කරන්න බැරි වුනත් ක්ලබ් සැන්ඩ්විච් විදිහට පිළියෙල කළොත් යම් ගුණයක් ලබා ගැනීම අපහසු නැහැ. බීට්, කැරට්, සලාද කොළ සහ බිත්තරයක් වෙන වෙනම ගම්මිරිස් සහ ලුණු සංයෝග කර ගෙන සකස් කර ගන්න. දැන් පාන් වල බටර් තවරා එක් තටට්ුවක බීට්, අනිත් පෙත්ත මත කැරට්, අනිත් පෙත්තට බිත්තර සහ සලාද කොළ ලෙසින් තබන්න. එය දරුවාගේ ආහාරයේ ඉතා ආකර්ශනයක් ලැබෙනවා වගේම කාබොහයිඩ්ට්‍රෙට සමග එළවළුවලින් පෝෂණයක් ලබා ගනන් පුලුවනි.

කට්ලට් , පැටිස්, රෝල්ස්

ඉහත ආහාර ඔබ නිවසේදීම පිළියෙල කර ගැනීම නිසා අහිතකර තත්වයන්ගෙන් මිදෙන්න පුලුවනි. මේවායේ පිරවුමට සැමන්, සලාද කොළ, අල, බිත්තර , මස්, මාලු යොදා ගන්න පුලුවනි. ඒ වගේම බැදීම වෙනුවට ඇතැම් ආහාර බේක් කර ගෙන පිළියෙල කර ගත හැකියි.

කේක්

නිවසේ සකස් කර ගත් රටඉඳි කේක්, පළතුරු කේක් වැනි ආහාර දරුවා ඉතා මනාපයෙන් බුත්ති විඳින්න පුලුවනි. මේවා අතිරේක මිසක දරුවාගේ සම්පූර්ණ දිවා ආහාරය වෙනුවෙන් නම් නොවෙයි.

රොටී, පිට්ටු

රොටී , පිට්ටු පිළියෙල කරන විට පිටි සහ පොල්වලට අතිරේකව ගොටුකොල වැනි සිහින්ව ලියා ගත් පළා වර්ග, කැරට් , ලීක්ස්, ළූණු කොල සහ බෝංචි එකතු කර ගන්න පුලුවන්.

එහෙම නම් මේ විදිහට පුංචි පුංචි අතිරේක වෙනස් වෙනස් විදිහට කෑම පෙට්ටියට එකතු කරල පොඩ්ඩාගේ ප්‍රතිචාර අත්විඳලා බලන්නකෝ… පොඩ්ඩාට විතරක් ‍නොවෙයි, ලොකු බබාලටත් අගුණයක් වෙන්නේ නැහැ.