දරුවෙකු ලෝකයට බරක් නොවන යහපත් චරිතයක් ලෙසින් දායාද කිරීමට නම් මව්පිය භුමිකාවත් කාලයෙන් කාලයට වෙනස් විය යුතුයි. පුංචි දරුවෙකු මෙල්ල කර ගැනීම පහසු වුනත් දරුවන් වැඩෙන විට සමාජය සමග සම්බන්ධතාවයන් ගොඩ නගා ගන්නා විට මව්පියන් ලෙස ඔබේ  භුමිකාවත් වෙනදාට වඩා වෙනස් විය යුතුයි.

නයෙක් වුනත් පෙනය පෙන්වන්න ඕන..

සාමාන්‍ය ජනවහරට අනුව කතාවක් තියෙනවා. නයෙක් වුනත් පෙනය පෙන්නුවේ නැත්නම් දර මිටියක් බදින්න වුනත් යොදා ගන්න පුලුවනිලු. එයින් කියැවෙන්නේ ”නයා ” කියන බලගතු පෞරෂය පවත්වා ගත යුතු  බවයි. දෙමව්පියන් වුනත් තමන්ගේ භුමිකාව පවත්වා ගැනීම වැදගත්. ඔබ දරුවන්ගේ හොදම මිතුරා විය යුතු බැව් ඇත්ත. ඒ මිත්‍රත්වයේදීත් යම් සීමාවක් අවශ්‍ය වෙනවා. ඔබ දරුවාගේ සමීපතමයා  වීම ඊට වඩා වැදගත්.එවිට දරුවාට ඔබ සමග ඒනෑස දෙයක් කතා කරන්න පුලුවනි. ඔබ හොඳම සවන්දෙන්නා වීමත් අවශ්‍ය වෙනවා.අන්න එතැනදී මිතුරාට වඩා සමීපතයාගේ භුමිකාව වැදගත්.

අවශ්‍ය තැනදී මව්පියන්ගේ පෞරෂයත් අවශ්‍ය වෙනවා

අම්මා,තාත්තා විදිහට ඔබ දරුවාට මිත්‍රත්වයේ දෑත දිගු කරන අතරවාරයේදීම ඇතැම් අවස්ථාවලදී දරුවන් වෙනුවෙන් යම් නීති රීති සහ සීමාවන් පැනවීමටත් සිදු වෙනවා. එවැනි අවස්ථාවකදී ඔබේ මව්පිය භුමිකාව වඩාත් වැදගත්.මිතුරෙකුට වඩා ඔබ්බට ගිය දෙමව්පියන්ගේ තීන්දු තීරණ දරුවාගේ ජීවිතය යහපත් අතට යොමු කරවන බවත් අමතක කරන්න එපා. ඒ වගේම දරුවා ඔබේ අවවාද පිලිගන්නා තැනට පත් වෙන්නේ ඔබ විසින් දරුවාගේ ලෝකයේ දෙමව්පියන් ලෙස ඔබ මුල් කර ගෙන ගොඩ නගා ඇති චිත්‍රයට අනුවයි.

හොඳම සවන්දෙන්නා වෙන්න

දරුවාගේ ප්‍රශ්නවලදී දෙමව්පියන් ලෙස ඔබ හොඳ සවන්දෙන්නෙක් බව ඇත්ත. බොහෝ විට දරුවාගේ දවසේ සියලු ප්‍රශ්න ඔබ සමග කතා කිරීමට කාලය එලැඹෙන තුරු බලා සිටිනු ඇත. ඒ නිසා දරුවා ඔබ සමග කතා බහට සූදානම් අවස්ථාවලදී ඔවුන් මග හරින්න එපා.

කාලය නැති බව ඇත්ත..

උදේ පටන් රාත්‍රිය වන තුරු ජීවිතයේ විවිධ ගැටලු සහ ගැටුම් දෙමව්පියන් විදිහට ඔබටත් ඇති.ඒ වුනත් කිසිම දිනක දරුවා දවසේ කාලය ගෙවූ අන්දම කතා බහ කිරීම මග අරින්න එපා.දරුවන්ට ඔබ සමග කතා බහට කාලයක් නොවුන තැන ඔවුන්ගේ ප්‍රශ්න හිතේ සිරගතව තිබෙන නිසා එය පුපුරා යන තෙක් දෙමව්පියන් හෝ නොදන්නා තැනට පත් විය හැකියි. ඒ නිසා දරුවාගේ මිතුරාට වඩා හොදම සමීප හිතවතා වුන තැනදී දරුවන් ඔබ සමග ඔවුන්ගේ හිතේ ඇති සියල්ල නොවලහා කීමට මැලි වෙන්නේ නැහැ.ඒ සමගම දරුවාගේ ගැටලුවලට නිසි මාර්ගයක්ද කියා දෙන්න. කළ යුතු දෙය සහ නොකළ යුතු දේ ගැන දැණුවත් බව දෙමව්පියන් විදිහට ඔබේ අත්දැකීමෙන් ලබා ඇති දැණුමෙන් දරුවන්ට යා යුතු මග නොමග කියා දෙන්න.

 දරුවන්ට ආදර්ශමත් වෙන්න

ඔබේ දරුවා උස් මහත් වෙන විට දෙමව්පියන් ලෙස ඔබ පුර්වාදර්ශ චරිතයක් විය යුතුයි. දරුවන් බොහෝ විට ආදර්ශය ලබන්නේ දෙමව්පියන්ගෙන්. එය වචන ලක්ෂ ගණනින් වැය වෙන අවවාදයන්ට වඩා වැදගත්

ඔවා දෙනු පරහට- තමා සම්මතෙහි පිහිටා සිට

දුසිරිත දනන් දෙන- ඔවා වැද්දන් දෙසන බණ මෙන

මෙය ඔබ මුල් කර ගෙන හිතන්න. දරුවන් මෙතැනදී ඔබට ඇඟිල්ල දිගු කිරීමට ඉඩ තබන්න එපා. ඔබ දරුවාට එක් ඇඟිල්ලක් දිතු කරන විට තවත් ඇඟිලි හතරක් ඔබ වෙතට එල්ල වී තිබෙනවා. ඔබ සැබෑම ආදර්ශමත් දෙමව්පියෙකු නොවුනේ නම් දරුවා විසින්ම ඔබේ වැරදි ගැන පාරාවළල් ඔබ වෙතට එල්ල කිරීමට පුලුවනි. ඒ නිසා නිතරම අවවාදයට වඩා ආදර්ශය උතුම්. විශේෂයෙන් හය හතර තේරෙන විට දරුවා දෙමව්පියන්ගේ චරිතය පාදක කර ගෙන මවා ගන්නා ප්‍රතිරූපය ඔවුන්ගේ ජීවිතය සැලසුම් කර ගැනීමට ප්‍රබල අන්දමින් බලපාන්න පුලුවනි.

පවුලක් වුනොත් රහස් නැහැ.

පවුලක් වුනොත් අම්මා මුළුතැන්ගෙයි..තාත්තා කන්තෝරුවේ…දුවයි පුතයි ඔන්ලයින්..මෙන්න මේ හැසිරීම ඔබේ පවුලෙන් දුරස් වීම වැදගත්. පවුලේ සාමාජිකයන් විවිධ හේතු මත විවිධ අවස්ථාවල වෙන් වෙන් කාර්යන්හි නිරත වෙන්න පුලුවනි. එය සාමාන්‍යයි. ඒත් පවුලක තිබිය යුතු සහජිවනය මේ කාර්යන් සමග පවා සම්බන්ධ කර ගැනීම වැදගත්. දරුවන් කරන දේ අම්මා වගේම තාත්තා දැන ගෙන සිටිම වැදගත්. අම්මා,තාත්තාගේ කටයුතු දුව වගේම පුතාද දැන ගෙන සිටීම අවශ්‍යයි.පවුලක අම්මා නොදන්නා රහස් වගේම දරුවන් නොදන්නා රහස් තිබිම එතරම් සුදුසු නැහැ.ඒ නිසා පවුලේ හැම දෙනාම එකට එක්ව එකම මාවතක ගමන් ගැනීම ඉතාම වැදගත්.පවුලක පැවැත්ම ඇත්තේ එතැනයි.

 විශ්වාසය පෙන්වන්න හැබැයි විපරමින් ඉන්න..

ඔබ දරුවන් අවිහ්වාස නොකරන බව පෙන්වුවත් ඒ අතර විපරමින් සිටීම වැදගත්. දරුවන් වුනත් අපට සියයට සියයෙන්ම විහ්වාස කරන්න බැහැ. ඇතැම් විට ඔවුන් බොරු කියන්න පුලුවනි. පාසල අවසානයේදී මිතුරෙකු සමග වෙනත් ගමනක් යා හැකියි. ඒ නිසා පාසල අවසානයේ සහ නිවසට පැමිනෙන වේලාව අතර කාලය ගලපා ගෙන ඔබට යම් බොරුවක් කියනවා නම් ඒ ගැන සොයා ගන්න. මුලින්ම දරුවාගේ යම් වැරැදි මගක යනවා නම් එය හසු කර ගැනීමට ඔබේ උකුසු ඇස වැදගත්.

අපේ පුතා එහෙම නැහැ.

ඇතැම් දෙමව්පියන් තමන්ගේ දරුවන් ගැන උපරිම විශ්වාස තබනවා. අද සමාජය බොහොම විෂමයි. දරුවන් ගිල ගන්නා අකටයුතු දරුනුයි. විෂ මත් ද්‍රව්‍යන්ට දරුවන් ගොදුරු වෙන වාතාවරණයකදී ඔබේ දරුවා ගැන යම් පනිවිඩයක් ලැබුනොත් එය කියන ලද තැනැත්තට ස්තුතිවන්ත වෙන්න. එතැනින් පසුව ඒ ගැන සොයන්න. අනවශ්‍ය අන්දමින් දරුවන් විශ්වාස කරන්නත් එපා.

තොරතුරු දුන් අය ආරක්ෂා කරන්න

ඇතැම් දෙමව්පියන්ට මෙවැනි තොරතුරක් ලද විට එය ලබා දුන් තැනැත්තා ගැනත් දරුවා කියනවා.මේ අන්දමින් තොරතුරු දුන් අය ගැන දරුවාට කියන්න එපා. එය තවත් ප්‍රහ්නයටක මුල පිරීමක්. නව යොවුන් දරුවන්ගේ ඉවසීම අඩුයි. ඔවුන් මේ තොරතුරු ලබා දුන් පුද්ගලයන් සමග අනවශ්‍ය අන්දමින් පැටලෙන්න පුලුවනි. ඒ නිසා මේ තොරතුරු වටිනා බව පමණක් සිතන්න.සමහර විට තොරතුරු අසත්‍ය නම් දරුවාගේ ආවේග තවත් දරුණු විය හැකියි. ඒ නිසා කියන්නා කෙසේ කිව්වත් අසන්නා සිහි බුද්ධියෙන් ඇසිය යුතු බව සිතා ඒ අනුව කටයුතු කරන්න. එය හොඳම විසඳුමක්.

එහෙමනම්…දරුවන් විශ්වාස කරන බව කියන්න. දෙමව්පියන්ගේ විශ්වාසය බිඳ වැටුන විට එය ගොඩ නැගීමත් පහසු කාර්යක් නොවන බවත් කියා දෙන්න.ඒ නිසා ඔබ නිතරම දරුවාගේ මිතුරා නොව විශ්වාසවන්තයා වෙන්න. එවිට දරුවාගේ ලෝකයේ  ඔබ තරම් විශ්වාසවන්ත තවත් පුද්ගලයෙකු නොමැති බව රහසක් නොවේ.

අපේ අත්තම්මාටවත් නොතිබුන ලෙඩ රෝග දැන් කාලයේ තරුණ දරුවන්ට..ඔන්න හැම තැනින්ම ඇහෙන ප්‍රශ්න. මේ අතර එක් වෛද්‍යවරයෙකු විසින් මේ අන්දමේ ඉතාම කනගාටුදායක සටහනක් තබා තිබුනා.

අනාගතයේදී බොහෝ දෙමව්පියන්ට ඔවුන්ගේ දරුවන්ගේ අවමංගල්‍යයන්ට සම්බන්ධ වීමට තරම් අවාසනාවන්ත තත්වයක් ඇති වෙනවා. ඉතින් මේ තරම් ඛේදනීය තත්වයක් වෙනුවෙන් අපේ දරුවන් යොමු වීමේ අවාසනාව දෙමව්පියන්ගේද…එහෙම නැත්නම් දරුවන්ගේද..?

අකමැත්තෙන් වුනත් කියන්න වෙන්නේ…” මේ දෙගොල්ලන්ගේම ” කියන පිලිතුරයි.

ඉතින් ඇයි එහෙම වෙන්නේ..?

මෙවැනි අනතුරක් ඉදිරියේ අප සිටිනවා නම් එතැනින් මිදෙන්න අපි උනන්දු වීම වැදගත් නේද…? මෙහෙම වේවි.. අනේ අපොයි කියවනවාට වඩා විසඳුමක් සොයා බලද්දී මේ ගැන අපි හිතුවොත් නරකද..?

රජෙක් වගේ ගත යුතු උදේ ආහාරය…

අපේ උදේ ආහාරය රජෙක් වගේ ගත යුතු වුනත් අද කාලයේ දරුවන්ගෙන් වැඩියෙන්ම මග හැරෙන්නේ උදේ ආහාරය කිව්වොත් ඔබත් එකඟ ඇති..දරුවන් පාසල් යවන්න…සැමියා කන්තෝරු පිටත් වෙන්න..දවල් ආහාරය පිලියෙළ කරන්න.. මේ සියළු වැඩ රාජකාරි සමග උදේට බත්, ව්‍යංජන සකස් කරන්නේ කොහොමදෑ…කියල ඔබ සිතුවත් අනිවාර්යෙන්ම පවුලේ සාමාජිකයින් වෙනුවෙන් උදේ ආහාර මග හරින්න නම් ඉඩ දෙන්න එපා.

• අපි පේස්ට්‍රි ෂොප් එකෙන් උදේට මොනවා හරි ගන්නවා..

ඔබ එහෙම සිතුවත් ”මොනවා හරි ” කියන්නේ විසඳුමක් නොවෙයි. ඇත්ත…. ඔබ යන අතරමග තිබෙන පේස්ට්‍රි ෂොප් එකකින් සොසේජස් බනිස් එකක්,කේක් එකක්, එහෙම නැත්නම් බයිට් පැකැට් එකක් මිලට ගන්නවා වෙන්නැති. ඒත් මේ ආහාරවලින් ඔබේ සිරුරට එකතු වෙන්නේ තෙල්, සීනි සහ ලුණු විතරයි.

උදේට බීම එකකුත් ගන්නවා..

ඇත්ත..ඒත් මේ සකස් කළ බීම කියන්නේ සීනි ගබඩාවක් පමණයි. වර්ණ වලින් සීනි ප්‍රතිශතය දක්වලා තිබුනත් ස්වභාවික පළතුරකින් හෝ බත් කැඳ කෝප්පයකින් සිරුරට ලැබෙන පෝෂණය නම් ඔය කියන පැණි බීම පැකට්ටුවකින් ලබා ගැනීම බොරුවක්.

උදේ ආහාරය මග හැරීමෙන් සිදු වෙන දේ මෙන්න…

ඔබ සහ දරුවන් විසින් උදේ ආාහරය මග හැර වෙනත් විවිධ තෙල්, ලුණු සහ සීනි අධික නිසරු ආහාර වෙනුවෙන් යොමු වු‍නොත් එයින් සිදු වෙන අහිතකර ප්‍රතිඵල බොහොමයක් තිබෙනවා.

අනවශ්‍ය අන්දමින් කැලරි ගබඩා වීම- 

නිසරු ආහාරවල පෝෂණීය තත්වය කෙසේ වෙතත් තෙල් සහ පිටි නිසා ඔබේ සිරුරට අනවශ්‍ය අන්දමින් කැලරි ගබඩා වෙනවා. ඒ වගේම දරුවන් වාහනයෙන් පාසලට…පාසලෙන් වාහනයට නිසා මේ කැලරි දහනය වීමකුත් නැහැ. ඒ නිසාම දරුවන් බෝ නොවන රෝගවල ගොදුරක් වීමත් ඉතාම පහසුයි.

පෝෂණය පිලිබඳ ගැටළු

උදේ ආහාරය පමණක් නොවෙයි, අද දරුවන්ට ගුණාත්මක බවෙන් යුක්ත ආහාර වෙනුවෙන් ඉඩක් ඇත්තේම නැහැ.ඒ නිසා අද දරුවන් අතර පහත දැක්වෙන රෝග තත්වයන්ද බහුලයි.

• තරබාරුව
• යකඩ ඌනතාවය
• පෝෂණ ඌනතා
• අඩු වයසේදී මල්වර වීම
• මල්වර වෙන වයසේදී මල්වර නොවීම
• ඔසප් චක්‍රය අක්‍රමවත් වීම
• වැඩිහිටි අවධියේදී බෝ නොවන රෝගවලට ගොදුරු වීම

දරුවන් කියල නිදහස් කරන්න බැහැ..

අපි ගන්න ආහාර රටාව නිසාම අපේ දරුවන් බෝ නොවන රෝගවල ගොදුරක් බවට පහසුවෙන්ම පත් වෙනවා.

ලෝක සෞඛ්‍ය සංවිධානය සඳහන් කරන අන්දමට බෝ නොවන රෝග

• දියවැඩියාව
• කොලස්ටරෝල් ගබඩා වීම සහ එහි අතුරු ප්‍රතිඵලයක් ලෙස හදවත් රෝග ආශ්‍රිත සංකුලතා.
• පිළිකා
• රුධිරපීඩනය
• ආඝාතය
• වකුගඩු ආබාධ

පංතියේ ක්ලාන්ත වීම

ඉස්සර දරුවෙක් පංතියේ ක්ලාන්ත වුනොත් බොහෝ දෙනා ඒ ගැන අනුකම්පාවෙන් කතා කළා. ගෙදර මිළ මුදල් ප්‍රශ්න ඇති. බඩගින්නේ ඇවිත්…එදා එහෙම වුනත් අද දවසේ නම් දරුවන් නිරාහාරව පාසල් යන්නේ නැති බැරිකමට නොව උදේ ආහාරය ගැන ඕනෑ නැති කම නිසයි.නමුත් උදේ ආහාරය මග හැර නිරාහාරව පාසල් ගියොත් සිදු වෙන විපාකත් තිබෙනවා.

• කුසගින්න නිසා ඉගෙනුම් කටයුතු වෙනුවෙන් ශක්තිය නැහැ.
• ධාරණය කර ගැනීම අපහසුයි.
• දැනෙන අපහසුතාවයන් නිසා ඇති වෙන පීඩනය
• දිගින් දිගටම කුසගින්නේ සිටීම සමග ඇති වෙන පෝෂණ ඌනතාවයන් නිසා අධ්‍යාපනයේදී පසුගාමී වීම.

කිව්වට කන්නේ නැහැ කියල නිහඩ වෙන්නත් එපා

දරුවන්ගේ ආහාර රටාව අපට අවශ්‍ය අන්දමින් ගලපන්න බැහැ. ඒක ඇත්ත. නමුත් එහෙම කියල දරුවන්ගේ ආහාර පිලිවෙත ඔවුන්ගේ නිරෝගිතාවයට නුසුදුසු අන්දමින් සිදු වෙනවා නම් ඒ භයානක තත්වයෙන් දරුවන් මුදවා ගැනීම දෙමව්පියන්ගේ වගකීමක් විය යුතුයි.

දරුවන්ගේ ආහාර ගැන සැලකිලිමත් වෙන්නේ කොහොමද..?

දරුවන්ගේ ආහාර ගැන කිව්වොත් අම්මා..තාත්තා ගැන කතා නොකරම බැහැ. ඒ නිසා දරුවන්ගේ ආහාරවේල පෝෂණීය අන්දමින් සකස් කිරීමට දෙමව්පියන්ගේ දායකත්වය  අවශ්‍යයි. එහෙමනම් මේ දාහක් වැඩ කටයුතු සමග අපි දරුවන්ගේ ආහාර ගැනත් අවධානයක් දෙන්නේ කොහොමද…?

පෙර සූදානම..

ඔබට කලබල උදෑසන සමග දරුවන්ගේ ආහාර සකස් කිරීම පහසු කාර්යක් නොවෙනවා නම් ඒවා කල් තබා සූදානම් කරන්න. උදේට පලා වර්ග තෝරන්න අපහසු නම් පෙරදා ඒවා තෝරා පිරිසිදු කරන්න.

කාලය වැය වෙන ආහාර උදේට අවශ්‍ය නැහැ. නිතරම කාලය අඩුවෙන් වැය වෙන නමුදු පෝෂණයෙන් යුක්ත ආහාර ගැන අවධානය දක්වන්න.

බත් පමණක් නොවෙයි..

ඔබේ දරුවාට උදේට බත් පිලියෙල කිරීම අපහසු විය හැකියි. සමහර විට ඒ වෙනුවෙන් ව්‍යංජනත් අවශ්‍ය නිසා කඩල, මුංඇට, කව්පි වැනි දේවල් වුනත්උදේ ආහාරයට යෝග්‍යයි. ඒ වගේම එලවලු බතක්, බිත්තර බතක්, ඕට්ස් එහෙම නැත්නම් එළවලු පෑන් කේක් එකක් ,හබල පෙති ආදියෙන් විවිධ දේ වෙනුවෙන් යොමු වෙන්න. ඒ හැම අවස්ථාවකදීම දරුවාගේ කුස පිරෙන, අනවශ්‍ය තෙල්,ලුණු සහ සීනි නොමැතිව සකස් කර ගත හැකි දේවල් වෙනුවෙන් යොමු වෙන්න.

නිවාඩු දවසුත් තියෙනවානේ…

ඔබට රටාවක් ලෙසින් හැම උදේකම යම් අන්දමකින් පෝෂණීය ආහරයක් ලබා දීමට අපහසු විය හැකියි.ඒ වගේම දරුවාට උදේ කාලයේ ඇති සීමිත කාලයේදී  මේ සියල්ල ආහාරයට ගැනීමත් අපහසුයි. විශේෂයෙන් කෝප්පයක් බිව්වොත් එදාට නැවත පරිපූර්ණ උදේ ආහාරයක් ගැනීම අපහසුයි. ඒ නිසා නිවාඩු දිනයන්හිදී විරාමයක් තබා දරුවාට ආහාර ගත හැකි නිසා එදිනට ඔබ පවුලේ ආහාර ගැන වැඩි අවධානයක් ලබා දෙන්න.

නිදහස් සෞඛ්‍ය සේවාවක් ස්ථාපිතව ඇති අප රටේ මෙම සෞඛ්‍ය සේවාව රෝගී සත්කාරක සේවාව හා රෝග නිවාරණ අංශය නමින් කොටස් දෙකකට බෙදේ. මින් රෝහල් පද්ධතිය රෝගී සත්කාරක සේවාව සපයන ආයතනය වන අතර රෝග නිවාරණ සේවාවේ මූලික කොඳු නාරටිය සෞඛ්‍ය වෛද්‍ය නිලධාරී කාර්යාලයයි.(Medical Officer of Health)

සෞඛ්‍ය වෛද්‍ය නිලධාරිවරයෙකුගේ පරිපාලනය ස්ථාපිතව ඇති මෙහි අතිරේක සෞඛ්‍ය වෛද්‍ය නිලධාරීවරයෙකු, මහජන සෞඛ්‍ය හෙද සොයුරිය, පරිපාලන පවුල් සෞඛ්‍ය සේවා නිලධාරිනිය, පරිපාලන මහජන සෞඛ්‍ය පරීක්‍ෂක, මහජන සෞඛ්‍ය පරීක්‍ෂක හා පවුල් සෞඛ්‍ය සේවා නිලධාරිනියන් ඇතුළත් ක්‍ෂෙත‍්‍ර කාර්ය මණ්ඩලයක් හා කළමනාකරණ සහකාර සංවර්ධන නිලධාරී මඩුල්ලකින් ද සමන්විතය. 

ක්‍ෂෙත‍්‍ර කාර්ය මණ්ඩලය ප‍්‍රජාවේ මූලික ඒකකය වන පවුල වෙතටම ගොස් ඔවුන්ගේ සෞඛ්‍ය ආරක්‍ෂාව පිළිබඳව සොයා බලමින් අවශ්‍ය පරිදි මැදිහත් වීම් සිදුකර ඔවුනගේ සෞඛ්‍යය නංවාලීමට කටයුතු කරන අතරම සායනික සංරක්‍ෂණය අවැසි අවස්ථාවන්හිදී ඔවුන් සායනයන්ට යොමු කර වෛද්‍ය පරීක්‍ෂාවන් සිදු කිරීමත් වෛද්‍ය පරීක්‍ෂාවට ලක්කර විශේෂඥ වෛද්‍ය ප‍්‍රතිකාර සඳහා යොමු කිරීමත් මේ හරහා ජනතාවගේ නිරෝගී බව සුරැකීමට සිදුකරන එක් ක්‍රියාවකි. 

නිවාරණ සෞඛ්‍ය සේවාවේ මූලිකම ඒකකය යෝග්‍යතා පවුල වේ. ක්‍ෂෙත‍්‍රය තුළ ඇති සියලු පවුල් හඳුනාගැනීමත් එම පවුල් ලියාපදිංචි කිරීමත් ඔවුනට අවශ්‍ය සෞඛ්‍ය සේවාවන් සැපයීමත් මෙහිදී සිදු කෙරේ. මේ අනුව අලුත විවාහ වූ සියලු යුවළවල් ලියාපදිංචි කර ඔවුන් නවදිවි සුව සත්කාර සේවාව වෙත යොමු කිරීම ප‍්‍රාථමික සෞඛ්‍ය කාර්ය මණ්ඩලයේ වගකීමකි. නව යුවලගේ ජීව දත්ත ලබාගැනීමත් ඔවුනගේ රෝගී තත්ත්ව ඇති නම් ඒවා හඳුනාගැනීමත්, ලිංගික හා ප‍්‍රජනක සෞඛ්‍ය පිළිබඳ තොරතුරු සොයා බැලීමත්, ඔවුන්ගේ පවුල්වල සෞඛ්‍ය තොරතුරු ඔවුනට ජීවිතයට බලපාන අන්දම පිළිබඳව සාකච්ඡා කිරීමත්, පෝෂණය, ජීවන රටාව, නිවස හා රැකියා ස්ථානය සම්බන්ධ සෞඛ්‍ය ගැටළු හඳුනාගැනීමටත් මේ නව දිවි සුව සත්කාරක තුල වේ. මෙම යුවල් වෛද්‍ය පරීක්‍ෂාවකට ලක් කිරීම පවුල් ජීවිතය සඳහා අවශ්‍ය දැනුමින් සන්නද්ධ කරමින් පුහුණු සැසි පැවැත්වීමත් මෙහිදී සිදු කෙරේ. මින් බලාපොරොත්තු වනුයේ ආරක්‍ෂිත මාතෘත්වයකට බලපාන මූලික කරුණු හඳුනා ඒවා නිවැරදි කරමින් ඔවුනට සැලසුම් සහගත දරු උපත් සඳහා මගපෙන්වීමයි. 

කාන්තාවක් ගර්භනී වූ බව දැනගත් වහා ඇයගේ ගර්භනීභාවය ලියාපදිංචි කර ඇය හා ඇගේ දරුවා වෙනුවෙන් සුරක්‍ෂිත මාතෘත්වයක් ඇති කරන්නට සියලු වගකීම් කරට ගෙන මෙම කාර්ය මණ්ඩලය ක‍්‍රියා කරනු ලැබේ. 

මවගේ පෝෂණයෙන් පටන් ගෙන සෞඛ්‍යට අදාල එනම් කායික, මානසික, සමාජීය හා අධ්‍යාත්මික නිරෝගීතාවයට බලපාන සියලු කරුණු සොයා බලමින් අවැසි සියලු මැදිහත් වීම් සිදුකර ආරක්‍ෂිත පුහුණු ප‍්‍රසූතියක් කරා මව රැගෙන යාමේ සියලු වගකීම් පැටවී ඇත්තේ සෞඛ්‍ය වෛද්‍ය නිලධාරී කාර්යාලයටයි. ගර්භනී සමය තුළ මව වෛද්‍ය පරීක්‍ෂාවට ලක් කරමින් ක්‍ෂෙත‍්‍රය තුලදීත් මේ පිළිබඳව සොයා බලමින් වාර්තා පවත්වා ගැනීම මේ කාලය තුලදී සිදුවනවා සේම අවධානම් තත්ත්ව වලදී ක්‍ෂණික මැදිහත් වීම් සිදු කර මවව රෝහල් ගත කිරීමටත් අවශ්‍ය කටයුතු සිදු කෙරේ. 

මාතෘ සංරක්‍ෂණය සෞඛ්‍ය වෛද්‍ය නිලධාරී කාර්යාලයේ මූලිකම සේවාවයි. ඒ අනුව යමින් ගර්භනී සමයේ පූර්ව ප‍්‍රසව රැකවරණය ලබාදීම මවට දැනෙන හිතෛෂී ලෙසින්ම සිදුවන අතර ප‍්‍රසව සත්කාරය සඳහා රෝහලට යොමු කිරීමත් ප‍්‍රසූතියෙන් පසුව පසු ප‍්‍රසව සංරක්‍ෂණ කටයුතු ලබාදීමත් සිදුකෙරේ. 

මෙලොව එළිය දුටු ජන්මයාගේ ළදරු ළමා සංරක්‍ෂණ කටයුතු සඳහාද මැදිහත් වීම සිදුකෙරෙන අතරම එම දරුවන්ගේ වර්ධන සුපරීක්‍ෂණය, මුල් ළමාවියේ සත්කාරය, ප‍්‍රතිශක්තීකරණය ආදී කටයුතු සඳහා මූලිකත්වය ගනු ලබන්නේ සෞඛ්‍ය වෛද්‍ය නිළධාරී කාර්යාලයයි. පවුල් සෞඛ්‍ය සේවා නිලධාරිනිය භාරයේ පසුවන මේ දරුවන් පෙර පාසැල් අවධියේදීත් පාසැලට එකතු වන විට පාසැල් සෞඛ්‍ය වැඩසටහන් හරහා එම දරුවන් පිළිබඳව සොයා බැලීම සිදු කෙරේ. 

පෙර පාසැල් මෙන්ම පාසල්ද සෞඛ්‍ය ප‍්‍රවර්ධන පාසැල් බවට පත් කිරීම සඳහා අධ්‍යාපන අමාත්‍යංශය හා ඒකව කටයුතු කරනු ලැබේ. දරුවන් සඳහා ප‍්‍රතිශක්තීකරණ වැඩසටහන් දන්ත සෞඛ්‍ය වැඩසටහන්, වෛද්‍ය පරීක්‍ෂණ කටයුතු, යොවුන් සෞඛ්‍ය වැඩසටහන්, ජීවන නිපුණතා වැඩසටහන් තුලින් දරුවන්ගේ අනාගත දිවිමග ශක්තිමත් කිරීමට අවැසි ලෙස මැදිහත් වෙමින් පාසැල් පද්ධතියේ සෞඛ්‍ය නංවාලීමේ කර්තව්‍යය සඳහා මූලිකත්වය ගනු ලබන්නේද සෞඛ්‍ය වෛද්‍ය නිලධාරී කාර්යාලයයි. 

පාසැල් තුලින් සමාජයට පිවිසි ප‍්‍රජාවේ පවුල් ජීවිතය තුලත් රැකියා ස්ථාන තුලත් සෞඛ්‍ය පිළිබඳ සොයා බලමින් මිනිස් දිවියට බලපාන ආහාර සෞඛ්‍ය පාරිසරික සෞඛ්‍ය වෘත්තිය සෞඛ්‍ය පිළිබඳවද බෝවන රෝග පාලන කටයුතු සඳහා සිදු කරනු ලබන සක‍්‍රීය මැදිහත් වීමද සෞඛ්‍ය වෛද්‍ය නිලධාරී කාර්යාලය සිදු කරනු ලබයි. 

වසංගත පාලනයේදී ප‍්‍රමුඛ මැදිහත්වීම රෝග නිවාරණය සෞඛ්‍ය වෛද්‍ය නිලධාරී කාර්යාලය සතු තවත් ප‍්‍රබල කාර්යභාරයකි. පැපොල, සරම්ප, සෙංගමාලය, මොළේ උණ ආදී රෝග මෙන්ම ඩෙංගු, මී උණ, ජලභීතිකාව ආදී කොට ඇති බෝවන රෝග පාලනය සඳහා විවිධ වූ ක‍්‍රියාමාර්ග ගනිමින් ප‍්‍රජාව හා ඒකව කටයුතු කරනු ලබයි. 

රාජ්‍ය සේවයට පිවිසෙන අය සඳහා වෛද්‍ය පරීක්‍ෂණයේදී මයික්‍රොයිඞ් එන්නත ලබාදීමත් බෝවන රෝග සඳහා අවශ්‍ය වෛද්‍ය සහතික නිකුත් කිරීමත් සිදු කෙරෙනුයේ සෞඛ්‍ය වෛද්‍ය නිලධාරී කාර්යාලය මගිනි. ව්‍යාපාර ලියාපදිංචියේදී ඒ පිළිබඳව සොයාබලා යෝග්‍යතාවය නිර්ණය කිරීමත් සෞඛ්‍ය වෛද්‍ය නිලධාරී කාර්යාලය මගින් කරනු ලබයි. 

පාරිසරික කටයුතු, වෘත්තීය, සෞඛ්‍ය හා ආහාර සෞඛ්‍ය කටයුතුවලදී මෙන්ම ඩෙංගු ආදී බෝවන රෝග පාලනයේදී පරීක්‍ෂාවන්ට ලක් කිරීමෙන් අවශ්‍ය පරිදි මැදිහත් වීම් සිදු කර ඒවා නිවැරදි කිරීමට මගපෙන්වීමත්, නිවැරදි වීම් සිදු නොවුන විට නීති ක‍්‍රියාමාර්ග වෙතට යොමු කර දඩ ගැසීම් හෝ අධිකරණ ක‍්‍රියාවලි දක්වා යොමු කිරීමේ බලතලද සෞඛ්‍ය වෛද්‍ය නිලධාරී කාර්යාලයට හිමිව ඇත්තේ මිනිස් ජීවිතය සඳහා බලාපන මිනිස් ක‍්‍රියාකාරකම් නිවැරදි කිරීමේ මෙන්ම මානුෂීය අයිතීන් සුරක්‍ෂිත කිරීමේ වගකීමද පැවරී ඇති හෙයිනි. 

මෙසේ මව්කුස පිළිසිඳ දරුවාගෙන් පටන් ලෙන ජීවිතයේ පසු කරන සියළු අවධි වලදී සෞඛ්‍ය නංවාලීමේ අරමුණින් ඔවුන්ගේ ජීවිත සැලවත් කිරීම සඳහා දේශයට හිතවත්ව, ජාතියට ලෙන්ගතුව, ආගමට ගරු සරුව අභියෝග අබියසදී අභිමානයෙන් නැගෙන නිරෝගී ශක්තිමත් ගුණගරුක පරපුරක් ලක්මවට උරුම කරවීමේ අරමුණින් ක‍්‍රියාකරන්නා වූ ස්ථානයයි. 

විශේෂඥ මතය, අදහස සහ මූලික සටහන:

අයිරාංගනී ගගලගමුව මහත්මිය

පවුල් සෞඛ්‍ය සේවා නිලධාරිනී

බුලත්සිංහල සෞඛ්‍ය වෛද්‍ය නිලධාරී කාර්යාලය 

අපේ දෙමාපිය වැඩිහිටියෝ මේ වෙද්දී වයස් ගත වෙලා. ඔවුන් එක එක විදියේ රෝග තත්ත්වවලට මුහුණ දෙනවා. ඒ විතරක් නෙවෙයි වැඩිහිටියන් වන අපිටත් මෙවැනි අත්දැකීම් ටිකෙන් ටික දැනෙනවා වෙන්න බැරි නැහැ. සමහර වෙලාවට සමහර රෝග ගැන නම් අපි අහලත් නැහැ. ඒත් ඕනෙම ගෙදරක වැඩිහිටියෙක් ඉන්න නිසා තොරැසික් ඉන්ලට් සින්ඩ්‍රෝමය කියන මෙන්න මේ වේදනාකාරී තත්ත්වය ගැන දැනුවත් වීම වඩාත් සුදුසුයි.

මොකද්ද මේ  තොරැසික් ඉන්ලට් සින්ඩ්‍රෝමය (Thoracic Inlet Syndrome) 

වැඩිහිටි වියට එළැඹීමත් සමග බොහෝ දෙනෙක් මුහුණ දෙන ටිකක් වේදනාකාරී තත්ත්වයක් විදියට හැඳින්විය හැකි මේ තොරැසික් ඉන්ලට් සින්ඩ්‍රෝම තත්ත්වය දෑත්වල වේදනාකාරී බවක් ඇති කරන රෝග තත්ත්වයක්. 

වියපත් වීමත් සමග මාංශ පේශීන් දුර්වල තත්ත්වයට පත්වන නිසාම ක්‍රමක්‍රමයෙන් උරමේඛලාව ගුරුත්වාකර්ෂණයට එරෙහිව දරා සිටීමට අපහසු තත්ත්වයක් ඇති වන අතරම එය පහතට බර වෙන නිසා අතිරේක ශෛ‍්‍රවී පර්ශුවේ ගැටලුකාරී තත්ත්වයන් මතු වෙනවා. එනම් සබ්ක්ලේවියන් ධමනිය සහ ලෝවර් ට‍්‍රන්ක් ස්නායුව තෙරපීමකට ලක්වෙලා තමයි මේ රෝග තත්ත්වයට අදාල රෝග ලක්ෂණ මතුවෙන්න පටන් ගන්නේ. උදාහරණයක් විදියට ගොඩක් බර බඩු මල්ලක් අත්වලින් ඔසවද්දී උරහිස පහතට ඇදෙන නිසා සබ්ක්ලේවියන් ධමනිය සහ ලෝවර් ට‍්‍රන්ක් ස්නායුව තෙරපීම වැඩි වීමෙන් වේදනාකාරී අත්දැකීමකට මුහුණ දෙන්න සිදු වෙනවා. 

තොරැසික් ඉන්ලට් සින්ඩ්‍රෝම තත්ත්වයේදී පෙන්නුම් කරන රෝග ලක්ෂණ

• දෑත්වල ඇතුළු පැත්තේ පහළට දිවයන වේදනාව
• දෑත්වලට බරක් ගත් පසු එම වේදනාව වැඩිවීම
• අල්ලේ මාංශ පේශී සිහින් වීම සහ දුර්වල වීම
• දෑතේ ඇතුළු දාරයේ සංවේදන අඩුවීම
• ඇඟිලි සීතල වීම/නිල්පාට වීම  

මෙහිදී සබ්ක්ලේවියන් ධමනිය (Subclavian Artery) සහ ලෝවර් ට‍්‍රන්ක් ස්නායුව (Lower trunk) තෙරපීමට ලක්වන නිසා ඉහත දැක්වූ තත්ත්වයන් ඇති වන අතරම මෙම සබ්ක්ලේවියන් ධමනිය සහ ලෝවර් ට‍්‍රන්ක් ස්නායුව තෙරපීමට අතිරේක ශෛ‍්‍රවී පර්ශුවක් (Extra Cervical Rib) තිබීමත් ඊට අමතරව ස්කැලීනස් මීඩියස් (Scalenus Medius) නම් වූ පේශිය ඝන වීමත්, පෙනහලුවල ඉහළ කුටීරයේ ඇති අර්බුද මගිනුත්, 7 වෙනි ශෛ‍්‍රවී කශේරුකාවේ පාර්ශ්වික දාරය මගිනුත්, ෆයිබ‍්‍රස් බෑන්ඩ් (Fibrous band)මගින් මෙම තෙරපීම වැනි තත්ත්ව ප‍්‍රධාන වශයෙන් හේතු වෙනවාි. 

තොරැසික් ඉන්ලට් සින්ඩ්‍රෝම තත්ත්වයට වෛද්‍ය, ශල්‍ය ප‍්‍රතිකාරවලට අමතරව භෞතචිකිත්සක ප‍්‍රතිකාරද අවශ්‍ය වන අතරම මෙම රෝගීන් භෞතචිකිත්සකවරයා වෙතට යොමු වූ පසු ඔවුන් රෝගියා ඇගැයීමකට ලක් කර කළ යුතු භෞතචිකිත්සක ප‍්‍රතිකාර තීරණය කරනවා. 

තොරැසික් ඉන්ලට් සින්ඩ්‍රෝම තත්ත්වයට භෞතචිකිත්සාවේදී යොදාගන්නා ප්‍රතිකාර ක්‍රම

• තාප ප‍්‍රතිකාර (Heat Therapy)
• විද්‍යුත් උත්තේජන මගින් වේදනාව අඩු කරන ඉන්ටර්ෆැරැන්ෂල් ප‍්‍රතිකාරය (Interferential therapy)
• ටේපින් ක‍්‍රම (Taping)
• උරහිස හා උරමේඛලාව අවට මාංශ පේශී ශක්තිමත් කරන ව්‍යායාම (Strengthening exercises)

මෙවැනි තත්ත්වවලදී සුදුසුකම්ලත් භෞතචිකිත්සකවරයෙකු හමුවීම මගින් මෙවැනි වූ වේදනාකාරී තත්ත්වයන්ගෙන් ඔබට හෝ ඔබේ මව පියාට සුවදායී බවක් ලබා ගත හැකි අතරම එය එදිනෙදා වැඩකටයුතුවලදී ඔබේ මුළු පවුලටම සහයක් වනු නිසැකය. 

මෙවැනි වේදනාකාරී තත්ත්වයක් පාලනය කරගෙන සිටීමට නිවැරදි මෙන්ම වේදනාවෙන් තොර ඉරියව් කීපයක් භෞතචිකිත්සකවරයා විසින් හඳුන්වා දෙන අතරම මෙවැනි රෝගීන්ගේ වේදනාව අවම කරගැනීමට, අතට උරමාවක් දමා අත රඳවා ගැනීම වගේස අත ඉහළට ඔසවා තබාගැනීමද සිදුකළ හැක.

තොරැසික් ඉන්ලට් සින්ඩ්‍රෝම තත්ත්වයට ගොදුරු වූ රෝගියෙක්, 

• වේදනාකාරී අතෙන් බර ඔසවා ගෙන යෑම
• එම අතට බරදීම
• බසයේ හෝ දුම්රියේ ගමන් කිරීමේදී එහි අතෙන් එල්ලී යාම  කිසිවිටකත් නොකළ යුතුය.

කෙසේ වුවද වේදනාවන් සමග අමිහිරිව ගත කරන මෙවැනි තත්ත්ව වේදනාව අවමව පවත්වා ගැනීමට බොහෝ පිළියම් ඇති බව දැන් ඔබට වැටහෙනවා ඇති. අන්න ඒ නිසාම මෙවැනි තත්ත්වයකදී විශේෂඥ අපදෙස් වෙත යොමු වීම වඩාත් වැදගත් වේ. කෙසේ වුවද අද වන විය රටපුරා ව්‍යාජ භෞතචිකිත්සකයන් විශාල ප‍්‍රමාණයක් සිටින බැවින් ඔවුන්ගේ වෛද්‍ය සභාවේ ලියාපංදිචි අංකය විමසීමට රෝගී ඔබට අයිතියක් ඇති අතරම එවැනි සොයා බැලීම් සමගම ඔබ යොමු විය යුතුතේ සුදුසුම් සහිත පලපුරුදු භෞත චිකිත්සකවරයෙකු වෙත බව තරයේ සිහිතබා ගත යුතුමය. 

විශේෂඥ මතය, අදහස සහ මූලික සටහන:

ආචාර්ය ජාලිය උඩුවැල්ල

– භෞතචිකිත්සක අධිකාරී, රිජ්වේ ආර්යා ළමා රෝහල, කොළඹ

දෙමව්පියන් හට දරුවන් යනු මෙලොව දී හිමි වන විශාලතම ත්‍යාගය ලෙස හැදින්විය හැකිය. එවන් වටිනාකමක් ඇති දරුවා භාෂාව, කතාව ඉගෙන ගනු ලබන්නේ කෙසේ දැ යි ඔබ මොහොතකටවත් සිතුවාද? 

සරල ප්‍රශ්නයක් අසන්නම්. ඔබේ දරුවා කුඩා අවධියේ සිට මිනිසුන් නොමැති පරිසරයක තනියම වැඩෙනවා යැයි මොහොතක ට සිතන්න.  එවිට ඔබේ දරුවාගේ භාෂාව, කතාව කෙසේ වේවිද? ඔබට සිතා ගැනීමට පුලුවන්ද? එමෙන් ම ඔබේ දරුවා අප රටේ ඉපදුනු නිසා සිංහල, දෙමළ හෝ වෙනත් අපේ රටේ පවතින භාෂාවක් භාවිතා කරනවා මෙන්ම ඔබේ දරුවා වෙනත් රටක වෙනත් භාෂාවක් කතා කරන පිරිසක් සමඟ වැඩෙනවා නම් දරුවා කුමන භාෂාවක් කතා කරාවි ද? ඉගෙන ගනීවි ද? අද අප කතා කරන්නට යන්නේ ඒ පිළිබඳවයි.

දරුවෙකු තම භාෂාව ඉගෙන ගනු ලබන්නේ කෙසේද? එය කවුරුන් හෝ විසින් ඉගැන්විය යුතු ද? සරල ම  පිළිතුර නම් “නැත” යන්නයි. මන්ද බොහෝ දරුවන් කුඩා කල සිට තමන්ගේ භාෂාව ඉතා ඉක්මනින් සාමාන්‍ය ඉගෙනුම් ඉගැන්වීම් ක්‍රියාවලියකින් තොරව, දෙමාපියන්ගේ ඉගැන්වීමකින් තොරව නිරායාසයෙන්ම ඉගෙනීමට හැකියාව ඇති ව  උපත ලබයි.

නමුත් දෙමාපියන් සෘජුව ගුරුවරුන් මෙන් දරුවන්ට භාෂාව ඉගැන්වීම නො කළ ද ඔවුන් දරුවන්ගේ භාෂා වර්ධනය අලලා ඉතාමත් ප්‍රධාන චරිතයකට පණ පෙවීම සිදුකරයි. මන්ද, ඔබ දරුවා සමඟ කුළුපගව කටයුතු කිරීම හා දරුවා සමඟ හැසිරෙන ආකාරය මඟින් දරුවාගේ භාෂා වර්ධනය වෙනස්වීමට හා ඉතා වේගයෙන් වර්ධනය වීමට ඉඩකඩ පවතී. 

කුඩා කාලයේදී දරුවා සමඟ කතා කිරීම, ගීත ගායනා කිරීම, නිතර සෙල්ලම් කිරීම, ශබ්ද නැගීම වැනි දේ කරනවාත් සමඟම දරුවා ඔබ සමඟ කුළුපග වීම ආරම්භ කරයි. මෙහිදී දරුවා තම දෙමව්පියන් හා නිවසේ වෙනත් වැඩිහිටියෙකු නැතහොත් වෙනත් කුඩා දරුවන්, සහෝදර සහෝදරියන් සමඟ සම්බන්ධතාවය ආරම්භ කරනු ලබයි. 

කුඩා කාලයේ වැඩෙන දරුවාගේ භාෂා පරිසරය වාචික සංවාද වලින් පිරුණු තැනකි. මන්ද දරුවා නිවසේ සිටින විට, නිදි යහනේ සිටින විට ඔහුට හෝ ඇයට ඇසෙනුයේ තම දෙමව්පියන් නිවසේ කතා කරන ආකාරය, තම වැඩිමල් සහෝදර සහෝදරිය සමඟ නිවැසියන් කතා කරන දෙබස් ආදී විශාල වාචික සංවාද ප්‍රමාණයකි. දරුවාට මේ සියල්ල නොතේරුණත් දරුවාගේ පරිසරයේ සුලභව ඇසෙන භාෂාව ට අදාළ ශබ්ද වචන ක්‍රමයෙන් දරුවා ග්‍රහණය කර ගැනීමට පටන් ගනී. ඔබ සිංහල භාෂාව භාවිතා කරනවා නම්, දරුවා ද සිංහල භාෂාව ඉගෙන ගනු ලබන්නේත්, ඔබ දෙමළ, ඉංග්‍රීසි හෝ වෙනත් භාෂාවක් භාවිතා කරනවා නම් දරුවා ද එම භාෂාවට අදාළ ශබ්ද හා වචන ප්‍රකාශ කිරීම ආරම්භ වන්නේත් ඒ හේතුව නිසාවෙනි. 

ඒ හේතුව නිසාම ඔබ දරුවා සාමාන්‍ය වර්ධනයක් සහිත දරුවකු නම් භාෂා දෙකක් හෝ කීපයක් භාවිතා කළ ද දරුවා භාෂා වර්ධනය ට ප්‍රශ්නයක් නොවන බව පවසන්නේ මෙම තර්කය පදනම් කර ගනිමින් ය. 

තව ද  ඔබ කුඩා දරුවකු සුරතල් කරන විට, කුඩා දරුවෙකු ට කතා කරන විට ඔබගේ කතා විලාශය වෙනස් කිරීම සුලභ දෙයකි.  ඇතැම් විට ඔබ ඒ පිළිබඳ නොසිතුවා විය හැකිය. ඔබ කුඩා දරුවෙකු සමඟ කතා කරන විට ඇද පැද, ලයාන්විතව ළමා උච්චාරණ ස්වරූපයකින් ( Baby talk) කතා කරනුයේ දරුවා නලවා ගැනීම ට වුවත් එහි විද්‍යාත්මක පැතිකඩ තරමක් වෙනස් වුවකි. එමගින්  සිදුවන වැදගත් ම දේවල් නම් දරුවා සමඟ ද්වි පාර්ශවීය සන්නිවේදනය ආරම්භ කිරීම මෙන්ම දරුවාගේ වැඩි අවධානයක් ඔබට ලබා ගැනීම හා ඔබ භාවිතා කරන භාෂාව දරුවා ට ලබා දීම බව ඔබ නොදැන සිටියා විය හැකි ය.

Baby talk දරුවා ගේ භාෂාව ඉගෙනීමට මහත් රුකුලකි. මන්ද ඔබ එලෙස කතා කරන විට වචන වල වැඩි ප්‍රමාණයක් සරල වචන ගැබ් වී තිබීම, විවිධ ශබ්ද අන්තර්ගත වීම, මුහුණ දෙස බලමින් දරුවා සමඟ කතා කිරීම හරහා දරුවාගේ ඇසට ඇස බැලීම වර්ධනය වීම, සරල ව්‍යාකරණ පැවතීම, විවිධ ස්වර පරාස වලට යමින් කතා කිරීම කතාකිරීම, දරුවා ගෙන් ප්‍රශ්න නැගීම, දරුවාට මුහුණේ ඉරියව් හා හරහා අවාචික සන්නිවේදනය ඇතිවීම ආදී බොහෝ භාෂාමය කුසලතා වර්ධනය වීම ද මේ හරහා සිදුවන බව වර්තමානයේ පර්යේෂණ වලින් තහවුරු වී ඇත.

කථන හා භාෂා චිකිත්සක සජිනි පෙරේරා මහත්මිය විසිනි.