නාන කාමරය හා වැසිකිලිය දැන් හැම ගෙදරකම වගේ තියෙන්නේ නිවස තුලමයි. ඒ හැරෙන්නට ප්‍රධාන නිදන කාමරයට ඇඳු නාන කාමර දැන් බොහෝ ගෙවල් වල තියෙන නිසා දනගාගෙන යන,වැටි වැටි ඇවිදින ඔබේ සිගිත්තා නාන කාමරයට ඇතුළු වීම වළක්වාලන්න. ලිස්සා වැටි සිදුවන අනතුරුවලට වඩා බොහෝ අනතුරු නාන කාමරය ආශ්‍රිතව සිදුවෙන්න පුළුවනි. කොමෝඩ් එකට එබෙන්නට ගොස් සිදුවිය හැකි අනතුරු…. රස්නේ වතුරකරාමය  විවෘතකිරීම නිසා ඇතිවියහැකි පිළිස්සීම්…වතුර බේසම් වලට වැටීම් වැනි අනතුරුත් නාන කාමරයට ඇතුළුවීම වැළකීමෙන් නවතගන්නට පුළුවනි. මේ හැරුනාම නාන කාමරය කියන්නේ රසායනික ද්‍රව්‍ය බහුල ස්ථානයක්.පිරිසිදු කිරීම් සදහා යොදාගැනෙන රසායන ද්‍රව්‍ය බොහොමයක් ඔබේ දරුවට නිදහසේ අතපත ගන්නට හැකි තැනක්. මේ නිසා නාන කාමරය දරුවට තනිව ඇතුළුවිය නොහැකි තැනක් බවට පත් කරන්න.

ගෙදර භාවිතා කෙරෙන සියලු රසායනික ද්‍රව්‍ය , පිරිසිදු කිරීම් ද්‍රව්‍ය, ගම් වර්ග , ගෘහස්ත කෘමි නාශක , මදුරු විකර්ශන සියල්ල යතුරු ලන කබඩ් එකක උඩ තට්ටුවක අසුරා තබන්න.ගෙදර සියලු බෙහෙත්, කොලොන් වර්ග දරුවාට ලං වෙන්න බැරි උස කබඩ් එකක අසුරා තබන්න.

කුස්සිය කියන්නේ දරුවන්ගේ ඇස් දෙකට ඉමිහිරි ආකර්ශනීය ලෝකයක්. අඩි 1-2 අතර උසක සිට දකින විටදී  මේ අකර්ශනියත්වය තවත් දෙගුණ තෙගුණ වෙනවා.අම්මා දිය සහ ගිනි එක්ක යමා මහා පෙළහර පානවා දකින දරුවෙකුට කුස්සියට ඇතුල් වෙන්න ඇති කරවන්නේ නොඉවසිලි කුතුහලයක්. මේ නිසා කුස්සියේ දොරටුවට වැටක් හෝ ගේට්ටුවක් දැමිම ඉතා නුවණක්කාර වැඩක්.වැටක් තිබ්බත් නිතරම කුස්සියේ පිහි සහ ආයුද සියල්ල උඩ ලාච්චුවක දමා තබන්න. කෑම වළන් හොදි  භාජන, උණුවතුර ජොග්ගු සියල්ල counter ටොප් එකේ ඇඟ පැත්තට නොවන ලෙස තියන්න.

දන ගාගෙන ගිහින්, වැටි වැටි දුවගෙන ගිහින් කාමරේ දොරවහගන්න පුංචි දගයගේ චූටි ඇඟිලි දොරවල් වලට අහු නොවෙන්න දොරවල් දරුවට තනියම වහන්න බැරි වෙන රඳවුමක් මගින් දොර ඇර තබන්න. නැත්නම් කාමර දොරවල්වල එලිය පැත්තේ අගුලේ කුරුළු කොට්ට හෝ සොෆ්ට් ටෝයි ටිකක් දැමු බෑගයක් එල්ලන්න. පුංචි අය්යා දුවල ගිහින් මල්ලි එනවට කාමරේ දොර වහද්දි මල්ලිගේ හරි අය්යාගේ හරි චුටි ඇඟිලි දොරට අහුවෙන්න නැති වෙන්න එය උදව්වක් වේවි.

දරුවාට අනතුරු දායක තැන්වලට ලඟ විය නොහැකි වන පරිදි ගේට්ටු /වැටවල් දමන්න. තරප්පු පෙලට, නානකමරයට, කුස්සියට , ඉදිරිපසදොරටුවට ආදී ලෙසට ඔබේ නිවසේ පිහිටීම  අනුව ගලපා ගන්න.තියුණු දාර නැති සුමට නිමාවක් ඇති සිරස් අතට ගරාදි ඇති ,ඔළුව කකුල් සිර කරගත නොහැකිතරමේ පරතරය ඇති ගරාදි ඇති ගේට්ටු ගෙදරදී සාදාගෙන හෝ ළදරුවන්ගේ අවශ්‍යතා සඳහා ඇති වෙළඳ සලකින් මිලදීගන්න.

ඔබේ ගෙදර කාර් එක නවතා තබන ගරාජය ගෙදර ඉදිරිපස දොරටුවට අසලින් ඇත්නම් ප්‍රධාන දොරටුවට වැටක් දමන්න. මහත්තය උදේ ගෙදරින් පිටත් වෙද්දී ඔබ අලුත උපන් සිගිත්තට කිරිදිදී ඉන්නවා වෙන්න පුළුවනි. ඊයේ හවස සෙල්ලම් කරද්දී කාර් එක යටට විසිවුණු බොලේ දැකලා ඔබේ අවුරුදු 4 පුතා කාර් එක ලඟට දුවනවා අප්පච්චි උදේ පාන්දර කලබලේදී නොදකින්න පුළුවනි.පුතාලගේ අප්පච්චි හවස ගෙදර එනකොට අම්මා ගේට්ටුව අරින්න දුවද්දී අනිවාර්යයෙන්ම ගෙදර සියලු දරුවන් ප්‍රධාන දොරට යෙදු වැට ඇතුලෙන් තියලා ඉදිරිපස ගේට්ටුව අරින්න යන්න පුරුද්දක් ඇති කරගන්න.

සද්දේ එන කතා පොත් : සුබපැතුම් පත් , උත්සව සැරසිලි ,calculators,සෙල්ලම් බඩු , දුරස්ථපාලක වගේ දේවල් වල තියෙන බොත්තම් බැටරි ඉතා අනතුරුදායකයි.මේ බැටරි යෙදු දෑ ඉස්කුරුප්පු ඇණවලින් තදකොට වැසූ පියනක් සහිත නම් මිස පාවිච්චි කරන්න එපා. දිලිසෙන සුළු හුරුබුටි ස්වභාවය, බෙහෙත්පෙත්තක්/ කාසියක හැඩය ගැනීම නිසා දරුවා මෙලෙස ගැලවුණු බොත්තම් බැටරිය ගිලදමන්නට කන හෝ නහය තුලට දමාගන්නට පොළඹවන සුළුයි.මේ බොත්තම් බැටරි ශරීර ගත වුවිට විදුලිය කාන්දු වීමට හැකි නිසා එයින් දරුවට ඇති විය හැකි විපත ඉතා දැඩි වගේම ඉතා වේගවත්.බොත්තම් බැටරි පමණක් නොවෙයි ඕනෑම උපකරණයෙන් ඉහිල් වුන බැටරියක් දුටු විගස ඉවත් කරන්න. ඕනෑම බැටරි යෙදු උපකරණයක් දරුවාගේ පාවිච්චියට දෙනවා නම් ඒ ගැන නිරන්තර සැලකිල්ලෙන් සිටින්න.

බේබි පෘෆ් කරනවා කියන්නේ හුදෙක්ම උපායමාර්ග ස්ථාපනය කිරීමක් විතරක් නෙවි. ආරක්ෂාව සම්බන්ධව දරුවා තුළ පුංචි කලේ සිටම විනයක් පුරුදු පුහුණු කල යුතුවෙනවා. අපි හැමෝම අතින් වෙන ලොකු වරදක් තමයි ,”දරුවට තේරෙන්නේ නැහැ,”එපා” කියන එක තේරුම් ගන්න තරම් එයා පුංචි වැඩියි” කියා හිතන එක. ඒ නිසාම අපි බොහෝ දෙනෙක් භව්‍ය අනතුරුදායක අවස්ථාවලදීත් එයින් ඉවත් වෙන්න කියල කියා දෙන්නේ උත්සහ ගන්නේ නැහැ. ආරක්ෂාව වෙනුවෙන් උපාය මාර්ග ස්ථාපනය කරනවා වගේම පුංචිම කාලෙදිම දරුවට තේරෙන විදියට අනතුර ගැන කියා දෙන්න පටන් ගන්න. “පුතු ඒක දය්යා” “අල්ලන්න එපා මගේ පුතා ඌවා වෙයි” “එක අම්මගේ” වගේ දරුවට තේරෙන හැටියට කියල දෙන්න.ඔබ නොහිතුවට එය අනතුරු මග හරවා ගන්න උදව්වක්.එත් පුංචි හිත්වල තියෙන කුතුහලය නිසා දැනුවත් කිරීම පමණක් ප්‍රමාණවත් වෙන්නේ නැහැ ඔබේ නිරන්තර අවධානය තිබිය යුතුමයි.

දෙමාපියන් විතරක් නෙවි පව්ලේ සියලු දෙනාම මේ බේබි පෘෆ් සම්බන්ධයෙන් වගකීමෙන් විනයක බැදෙන්න.  පුතාලගේ අප්පච්චි සපත්තු පොලිෂ් කර කර ඉන්න වෙලාවේදී ඔබ තේ එක ගිහින් දුන්නාම… ඉස්සර වගේ සපත්තු පොලිෂ් කරලා ඉවර වෙනකල් ලඟට වෙලා ඉන්න වෙලාව නැත්නම්… ලිපේ හොද්ද බලන්න දුවන්න තියෙනවා නම් කිසිම වෙලාවක ළඟ තිබ්බ මේසේ උඩින් දුම් දාන තේ එක තියල එතනින් යන්න එපා… මේසෙට යන්තම් උස ඔබේ පුංචි පුතාට අම්ම ගෙනාව කෝප්පේ තියෙන්නේ මොනාද කියල බලන්න හිතෙන්නේ කොයි වේලාවේද කියලා ඔබටවත් ඔබේ මහත්තයටවත් හිතාගන්න පුළුවන් වෙන එකක් නැහැ. ඒ නිසා ගෙදර ජිවත් වෙන හැමෝම දරුවාගේ ආරක්ෂාව තහවුරු කරන්න හැම මොහොතකම හැම හැසිරිමකින්ම වගකීමෙන් බැදෙන්න.

කොයිතරම් උපායමාර්ගිකව ඔබේ ගෙදර බේබි පෘෆ් කළත් වැඩිහිටියකුගේ නිරන්තර සුපරික්ෂාව,දුර දැකීමේ නුවණෙහි තැන ගන්නට කිසිම බේබි ප්රුෆ් ක්‍රමෝපායක් සමත් වන්නේ නැහැ. ඒ නිසා හැම තත්පරයකම අනතුරක සේයාව දකින්න ඔබේ ඇස හුරුකරගන්න. එය ඔබේ රන්කැටියාට නිදහසේ හපන්කම් පාන්නටත් සුරැකිව වැඩෙන්නටත් රුකුලක් වෙවී.

 කතුවරිය ගැන

දීපිකා ගුණසේන මම ඉතා ඉහළ වගකීමක් දරණ, සම්පුර්ණ තෘප්තිමක් වෘත්තීයක පුර්ණකලිනව නියැලෙමි. තවම සේවා කාලය අවුරුදු 6කි. අවුරුදු තුනහමාරකට පෙර උසස්වීමක් ලදිමි. එයින් රාජකාරි කටයුතු දෙගුණයක් වුවා සේම දීමනා හා ප්‍රතිලාභද දෙගුණ විය. සේවා ස්ථානය මගේ උණුසුම් කැදැල්ලයි. සේවා ලාභීන් ඒ සුන්දර කැදැල්ලේ නිවැසියන්ය. තනතුර “අම්මා”. බඳවා ගැනීම් අයදුම් පතේ තනතුර තිබුනේ බිරිඳ ලෙස බවද මතකය.ගෙවුණු අවුරුදු 6 තුළ ඒ පුංචි ජිවිත වලින් නැවත ජීවිතය උගතිමි.මාගේ ළමා ජීවිතය නැවත මතකට නගමි.මේ සියලු දේ අතරේ ඉඩ තිබෙන හැටියට සිතුවිලි අකුරට පෙරලමි.

චුටියා දෝතට ලැබිලා… ඉස්පිරිතාලෙන් ගෙදර ආව දවසේ ඉඳන් කුක්කු බන්ඩිය පිරෙන්න කුක්කු දෙන ගමන් අම්මා  සිහින මවන්නේ පැටියා ඉක්මනට ලොකු වෙනවා දකින්න… හිනා කටක් පුරෝගෙන අම්ම එක්ක හිනා වෙනවා දකින්න… පුංචි අත් දෙක එකතු කරලා අත්පුඩි ගහනවා දකින්න…. බස බස ගාල දණ ගාගෙන යනවා දකින්න… අල්ලාගෙන හිට ගන්නවා දකින්න… අම්මගේ හීන වලට කෙළවරක් නෑ… ඒ තමයි අම්මගේ හැටි.

පැන්චා තොටිල්ලෙන් බිමට බැහැලා ගේ පුරාම රවුමක් යන්න සැරසෙද්දී පැන්චා වෙනුවෙන් ඔබ තැනු සුවැති උණුසුම් කැදැල්ල පැන්චාට ආරක්ෂාව සලසන්න සුදානම්ද? එහෙම නැතිනම් ඔබේ ගෙදර බේබි පෘෆ් ද? ඔබේ රන්කැටියට වැඩෙන්නට ඔබේ ගෙදර සුරැකි තැනක් ද? සුරැකි තැනක් බවට පත් කරන්න පටන් ගන්න ඕනේ කවද්ද?

පැන්චා දණ ගාන්න පටන් ගන්න කලින්ම දරුවාගේ ආරක්ෂාව තහවුරු කරන ක්‍රමෝපායන් යොදන්න අරඹන්න.

නිදන කාමරෙන් පටන් ගනිමු.

පැන්චාගේ ඇඳුම් – බඩු දාන්න කබඩ් එකක් මිලදී ගනිද්දී ඒක ගොඩක්ම උස නැති හයිය… ඝනකම..පළල පතුලක් ඇති කබඩ් එකක්ද කියලා බලන්න. කබඩ් එක ගන්න ගියාම සාප්පුවෙදීම උඩම ලාච්චුව පොඩ්ඩක් වේගෙන් ඇරලා බලන්න ලච්චුවත් එක්ක කබඩ් එක ඉස්සරහට (ඔබ දෙසට) ඇදිල එනවද කියල. ලාච්චු අරිද්දි ලේසියෙන්ම ලාච්චුව වැටෙන්න බලනවද කියල. ඔබ ගන්න කබඩ් එකත් එක්ක එන ආරක්ෂක උපදෙස් මොනවද කියල බලන්න.කබඩ් එක ගෙනාවට පස්සේ…. කබඩ් එක “L ” බ්‍රකට් එකකින් බිත්තියකට හා පොළවට සවිකරන්න. කිසිම වෙලාවක කබඩ් එක උඩ ඔබේ පැංචාට උඩට නැගල/ ඇදිලා ගන්න හිතෙන… කොහොම හරි ලං වෙන්න හිතෙන ආකර්ශනීය දේවල් (සෙල්ලම්බඩු/ පාට පාට දේවල් )තැබීමෙන් වලකින්න. උඩම ලාච්චුවල බර දේවල් (වැඩිපුර රෙදි/ බඩු)පුරවා තැබීමෙන් වලකින්න.අම්මා පැය ගණනක් තිස්සේ නවපු ඇඳුම් දණ ගාගෙන ගිහින් වාඩි වෙලා ඇදලා ඇදලා එලියට දාන්න පැන්චා හරිම ආසයි.මේ ලාච්චු වලට පුංචි ඇඟිලි අහුවෙන්න පුළුවන් නිසා ඒවා අරින්න බැරි වෙන්න යතුරු ලෑමක් හෝ උපක්‍රමයක් ඇති කරන්න.ඇඳ ගාව බිමට එළපු බුමුතුරුණ ලිස්සනවද බලන්න. non ස්ලිප් මැට් එකක් දාන්න.අල්ලාගෙන හිට ගන්න පටන් ගනිද්දී ලිස්සන සුළු බුමුතුරුණු අනතුරු වැඩි කරාවි.

මැද සාලයේ ඇති කොෆි ටේබල්… ටීපෝ… කෑම මේස වගේ තියුණු දාර ඇති ගෘහ භාණ්ඩ දණ ගාගෙන යන පුංචි කඩියට… විසිවේවි වැටි-වැටි යන ඔබේ පුංචි ආච්චි අම්මට අනතුරුදායක දේවල්. තියුණු  දාර ඇති ගෘහ භාණ්ඩ නිතර දරුවා ගැවසෙන තැන්වලින් ඉවත් කරන්න. නැත්නම් බබල් රැප් වලින් ඒ දාර ඔතන්න. කබඩ් ,පොත් රාක්ක “L” බ්‍රකැට් වලින් බිත්තිවලට සවිකරන්න. pedestal ෆෑන් බඳ යමකට ගැට ගසා තබන්න. දණගාගෙන ගොස් ඇඟට පෙරලගැනීම වළක්වා ගන්නට එය උපකාරී වේවි.සියලු ස්ථාවර නැති(සෙලවෙන /වැනෙන ) ගෘහ භාණ්ඩ… සැරසිලි කලකට ඉවත් කර තබන්න. රුපවාහිනිය ටි වී ස්ටෑන්ඩ් එකට හෝ බිත්තියට සවිකරන්න. එය රුපවාහිනිය ඇඟට පෙරලගෙන සිදුකරගතහැකි ඛේදනීය සිදුවීම් වළකා ගැනීමට උපකාරී වේවි.

අම්ම රෙසිපි හොයලා මහන්සි වෙලා හදල දෙන රස බත් තලාපෙ තු ගාල එලියට දැම්මට.. .බිම තියෙන පෑන් විල්ලක්,සෙල්ලම් කාර් එකක ගැලවුණු රෝදයක් කටේ ඔබා ගන්න මේ පුංචි චණ්ඩියට ගතවෙන්නේ ඇසි පිල්ලමක් ගහන වෙලවක් විතරයි.

අහුවෙන ඕනෙම දෙයක් කටේ ඔබා ගන්න එක මේ වයසේ දරුවෙකුගේ ලොකුම ක්‍රියාකරකමක්. ඒ නිසා දරුවා බිම තියන්න කලින් මුළු ගෙදරම තියෙන දරුවා කටේ දාගන්න පුළුවන් කියල හිතෙන හැම පුංචි දෙයක්ම අයින් කරන්න. පුංචි අය්යෙක්  අක්කෙක් ඉන්නවනම් “මල්ලි මේවා කටේ දා ගෙන ලෙඩ වේවි පුතේ… එයා පොඩ්ඩක් ලොකු වෙනකල් අපි මේ ටික හංගලා තියමු” කියලා පුංචි සෙල්ලම් බඩු… Lego කෑලි අරන් තියන්න.සෙල්ලම් බඩු වල ගැලවෙන්න පුළුවන් කොටස් ගැන නිරන්තර අවධානයක් දෙන්න.

අම්මා කන්තෝරු ගිහින් ආවම…. අත්තම්ම මහගෙදර ඉඳන් නැත්නම් පන්සල් ගිහින් ආවම අත්බෑගය තියන්නේ කොහෙද? අත්බෑගයක් මේතරම් උවදුරු කාරකද කියල හිතුනෙම නැහැ නේද? බෙහෙත්, සිල්ලර කාසි, විලවුන් , ආලේපන, කොන්ඩ කටු, ආයකටු, විටමින් වගේ අත්බෑගයක් තුල ඇති හැමදෙයක්ම දරුවෙකුට විපත්තිකාරකයි. බොහෝ විට වයස්ගත අයගේ බෙහෙත් බහාලන බෝතල් (non-childproof) ඉතා පහසුවෙන් අරින්න පුළුවන් පරිදි සකසා තිබීම අනතුරට තවත් රුකුලක්. බෙහෙත් පමණක් නෙවි වැඩිහිටියන්ට දෙන විටමින් පවා දරුවෙකුට විස වෙන්න පුළුවනි.

පුංචි පැටව් හරි ආසයි ප්ලග් වලට දේවල් ඔබන්න, මේ ඔබන දෙය විද්‍යුත් සන්නායකයක් උනොත් ඔබේ දරුවා විදුලි සැර වැදීමකට ලක් වේවි. සියලු ප්ලග් වහන්න. අවශ්‍ය වෙලාවට ගලවා ඉවත්කළ හැකි ප්ලාස්ටික් පේණු තුඩු වෙලදපොලේ මිලදී ගන්න පුළුවනි. වාඩි වෙලා…හෙමින් සැරේ පොපියන විදුරු මසින් වයර් එකක් හප හපා ඉන්න බැරි වෙන්න බිත්ති අයිනේ බිම ඇති වයර් ටේප් වලින් වසන්න.නැත්නම් දරුවට ළඟා විය නොහැකි පරිදි ගෘහ භාණ්ඩ වලින් මුවා කොට තබන්න.

ඔබේ නිවස මහල් එකකට වැඩි නම් ඉහල මහල්වල දරුවට ළඟ විය හැකි ජනෙල් වල ජනෙල් පියන් අගුලු ලා තබන්න. නැත්නම් ඒ ජනේලවල ආරක්‍ෂිත ගරාදි සවිකරන්න. පුටු ,සෝෆා වැනි දෑ ජනේල වලට ඉතා ලංකොට තැබීමෙන් වලකින්න. උඩ නගින්න පටන් ගන්න වයසේදී ඒවාට නැගලා ජනේලෙන් එලියට පනින්නට හෝ වැටෙන්න පුළුවනි.

ගෙදරක් බේබි පෘෆ් කිරීම ගැන ලියන්න කාරණා අතිවිශාල ප්‍රමාණයක් ඇති නිසා ඒ කරුණු මීලග ලිපියෙන් ගෙනෙන්නම්. නොවැරදීම දෙවෙනි කොටස බලන්න.

 කතුවරිය ගැන

දීපිකා ගුණසේන මම ඉතා ඉහළ වගකීමක් දරණ, සම්පුර්ණ තෘප්තිමක් වෘත්තීයක පුර්ණකලිනව නියැලෙමි. තවම සේවා කාලය අවුරුදු 6කි. අවුරුදු තුනහමාරකට පෙර උසස්වීමක් ලදිමි. එයින් රාජකාරි කටයුතු දෙගුණයක් වුවා සේම දීමනා හා ප්‍රතිලාභද දෙගුණ විය. සේවා ස්ථානය මගේ උණුසුම් කැදැල්ලයි. සේවා ලාභීන් ඒ සුන්දර කැදැල්ලේ නිවැසියන්ය. තනතුර “අම්මා”. බඳවා ගැනීම් අයදුම් පතේ තනතුර තිබුනේ බිරිඳ ලෙස බවද මතකය.ගෙවුණු අවුරුදු 6 තුළ ඒ පුංචි ජිවිත වලින් නැවත ජීවිතය උගතිමි.මාගේ ළමා ජීවිතය නැවත මතකට නගමි.මේ සියලු දේ අතරේ ඉඩ තිබෙන හැටියට සිතුවිලි අකුරට පෙරලමි.