ඉස්සර කාලයේ කාන්තාවකට අනුරාධපුරයේ සිට මාගම දක්වා මැණිකක් වුනත් අත රැගෙන තනිපංගලමේ ගමන් යන්න තිබුන හැකියාව අද ගැහැණු දරුවන්ට නැහැ. වෙනතක් තබා පොදු ප්‍රවාහන සේවාවක කිලෝමීටර් දෙක තුනක ගමන්වාරයේදී වුනත් ගමන්වාරය සමග ආත්ම ආරක්ෂාව සලසා ගන්නේ කොහොමද යන්න ගැන දැණුවත්වීම වඩාත් සුදුසුයි.

බසයකට ගොඩ වැදුන විට මුලින්ම තමන්ට ආරක්ෂාව ගැන සහතික විය හැකි තැනත අසුන් ගන්න. දුරගමනක යන්නේ නම් කාන්තාවක් සිටින අසුනක වාඩි වීම බොහෝ සෙයින් සුදුසුයි. මිතුරියන් දෙතුන් දෙනෙක් සමග යන‍්නේ නම් ඊට පිරිමහින අසුනක් තෝරා ගැනීමත් ඉතාම වැදගත්.ආසනයක හිස් තැනක් ඇති විට නොමනා කටයුතු වෙනුවෙන්ම ලියාපදිංචිව සිටින පුද්ගලයන් මෙම හිස් තැනින් ප්‍රයෝජන ගනු ඇත.

මේ විදිහට පූර්ව ආරක්ෂාව සලසා ගත නොහැකි අවස්ථාවකදී අසල සිටින අය ගැන අවධානයෙන් සිටීම ඉතා වැදගත්. ගොනා ඇදෙන්නේ පොල් පැලයටද එහෙම නැත්නම් තැඹිලි පැලයටද යන වග තේරුම් ගත යුතුයි. අනවශ්‍ය විදිහට බලපෑමක් ඇති වෙනවා නම් වඩාත්ම ගැලපෙන කටයුත්ත වෙන්නේ එම ස්ථානයෙන් වෙනස් වීමයි. ආසනයක් නොමැති නම් හිටගෙන යෑම හැර වෙනත් විකල්පයක් නැහැ. ඇතැම් ගැහැණු දරුවන් මේ වගේ අවස්ථාවන්හිදී සෙරෙප්පුවෙන් කුඩයෙන් ගසන්නට තරම් ආවේගශීලි වෙනවා. එහෙම නැත්නම් මහත් ශබ්ද නගමින් බැන වදිනවා.අවිනීත පිරිමින් වෙනුවෙන් මෙය සාධාරණ වුනත් ඇතැම් අවස්ථාවලදී ඔවුන් තමන්ට වුන අපහසුතාවයට පලිගන්න පුලුවන්. මේ නිසා බොහෝ සෙයින් බුද්ධිමත්ව කළ යුතු දෙය වන්නේ එතැනින් වෙනස් වීමයි. එය සෙරෙප්පුවෙන් ගැසුවාට වඩා තදින් දැනෙන්නට පුළුවන්.

සමහර අවස්ථාවලදී සල්ලාල පිරිමින් ගැහැණු දරුවන් පසුපස පැමිණෙමින් අතවර කරන අවස්ථා තිබෙනවා. මේ අන්දමින් දියණිය පසුපස කවරෙකු හෝ පැමිණෙන බව දැනෙනවා නම් වැඩිහිටියෙකුගේ සහය ලබා ගන්න. එම ස්ථානයේ කඩයක් හෝ තිබේ නම් එතැනට ගොස් ඔහු මගහරින්න.තවත් අවස්ථාවලදී මෝටර් බයිසිකල්වලින් පැමිණ ලිපිනයක් විමසන මුවාවෙන් කණ කර පැහැර ගන්නා අවස්ථාවන්ද ඇත. ඔබේ දියණියගෙන් එසේ විමසා සිටින විට ඉතා කාරුණිකව ඒ ගැන නොදන්නා බව කියනු විනා අනවශ්‍ය විදිහට එම ලිපිනයට අදාල තොරතුරුු ලබා දීමට උත්සාහ නොකරන්න.

පොදු ප්‍රවාහනසේවාවකදී අසල සිටින කාන්තාවක් වුනත් දෙන ටො‍ෆි චොකලට් හෝ බීම වර්ග පානයෙන් වලකින ලෙස දියනියට උපදෙස් දෙන්න. එක්තරා බසයකදී තරුණ දියණියට අසුනේ සිටි කාන්තාව විසින් චොකලට් පෙත්තක් ආහාරයට ලබා දී ඇත. ටික වේලාවකින් දියනිය ක්ලාන්ත වූ අතර මුල් කී කාන්තාව මෙම දියනියද වත්තම් කර ගෙන බසින්නට සැරසෙත්ම ඇගේ මිතුරිය වහාම නැගිට කියා සිටියේ මේ කාන්තාව ඔවුන් නොදන්නා බව සහ මිතුරිය තමා සමගම වූ බස්නැවතුමේ බසින්නට මිස මෙම ස්ථානයේ බසින්නට හේතුවක් නැති බවයි. මේ අන්දමින් කාන්තාවන් මගින් වුනත් අවදානම් ඇති බැවින් දියණියට කිසිම නාඳුනන කාන්තාවක් වුනත් කරුණාවෙන් දෙන දෙයක් වුවද ආහාරයට නොගත යුතු බවයි.

අද දරුවන් පයින් ගමනට කොහෙත්ම මනාප නැත. කෙටි දුර වුනත් ත්‍රිරෝද රථයකින් සපුරා ගැනීම ඔවුන්ගේ අරමුණයි.ත්‍රිරෝද රථයක වුනත් ගමන්ගැනීමේදී නොදන්නා රථයක තනියෙන් ගමන් නොගත යුතු බව අවධාරනයෙන්ම දන්වා සිටින්න. අද බොහෝ තරුණ දරුවන් පහසුව වෙනුවෙන් නොදන්නා ත්‍රිරෝද රථ ගමනට දක්වන නැඹුරුතාවය සමගම ලුහුබඳින අවදානමක්ද ඇති බව දන්වා සිටින්න. එක් ආයතනයක තරුණ සේවිකාවක් ආයතනය පසු කර ගෙන යන ත්‍රිරෝද රථයකට නැගුනේ ඉක්මනින් කාර්යාලය වෙත ගමන් කිරීම සඳහාය. දුර ගමනක් ගොසින් එන ත්‍රිරෝද රථය ඇයට සුපුරුදු එකක් නොවේ. මේ අන්දමින් වෙනත් ගමන්වාර අවසාන කොට නැවත පැමිණෙන ත්‍රිරෝද රථයකින්පැමිණෙන විට මුදල් පිලිබඳව ලැබෙන වාසිය නිසා මෙම ආයතනයේ උදවිය මේ අන්දමින් කටයුතු කිරීම සාමාන්‍ය තත්වයක්ව ඇත.

එහෙත් ඇයට වූ අනතුර සුලුපටු නැත සිහිය ඇවිත් බලන විට ඇය සිටියේ ආයතනය පසු කොට කිලෝමීටරයක් පමණ දුරින් වූ පාලු තැනකය. අත්බෑගයේ මුදල් සහ කණකර අබරණ සියල්ල නොමැති වුනත් වෙනත් අතවරයක් සිදුව නොතිබුනේ වාසනාවකට මෙන්ය. මේ නිසා දියණිවරුන් ත්‍රිරෝද රථයකින් ගමන්ගන්නේ නම් තවත් අයෙකු නොමැත්තේ නම් දන්නා හඳුනන රථයකින් හැර ගමන් නොයන තරමටම ආරක්ෂාව උපරිම වේ.

තරුණ දියනිවරුන්ගේ ඇ‍තැම් ඇදුම් පැළඳුම් පවා ඔවුන්ගේම අනාරක්ෂිත බවට හේතු වේ. ගවුමට වඩා කලිසම සංවර යැයි කීයද එය අඳින ආකාරයට අනුව අපචාරයන්ට අත වනන තත්වයක් නොදැනම ගොඩ නැගේ. කලිසමට අදාල කමිසය හෝ වෙනත් ඇඳුමකින් අවයව නොපෙනෙන ලෙසින් හෝ ඉස්මතු නොවන අන්දමින් තෝරා ගැනීමට උපදෙස් දෙන්න. ඇතැම් ඇඳුම් නිසාත් දරුවන්ට අනවශ්‍ය ලෙසින් අවධානය යොමු වෙන අවස්ථාවන් ඇත.සංවර බව ඇඳුමෙන්ද ගොඩ නගා ගත යුතුය. මේ වෙනුවෙන් මව්වරුන් තම දරුවන්ට ලබා දෙන අවවාද ඉතා වැදගත්ය.සිංහල කුලසිරිත් අනුව පැවැති ඇඳුමේ සංවර බව ආත්මාරක්ෂාව වෙනුවෙන්ද ඉතා වැදගත් මෙහෙවරක් ඉටු කරනු ඇත.

නිවසෙන් පිටව යන දියණිය නැවත නිවසට එන තෙක් මාර්ගයේ ඇගේ ආරක්ෂාව පිලිබඳ ව වූ අවදානම අද සමාජයේ සුලුපටු නැත.කාර්යබහුල සමාජයේදී අම්මා තාත්තා පැය විසිහතර පුරාවටම ආරක්සාව සපයන්නන් ලෙසින් පෙනී සිටීමට හැකියාවක්ද  නැත. දෛනික කටයුතු සහ අනාගත අපේක්ෂාවන් වෙනුවෙන් ඇයට හුකෙලාව සිටින්නටද නොහැක. මෙම සියල්ල සමතුලිත ලෙසින් ඉටු කර ගෙන ඉදිරියට යන්නට නම් දරුවන්ට ලබා දෙන දැණුවත් බව ඉතාම වැදගත් බව මව්පියන් වශයෙන් මතකයේ තබා ගන්න.

මේ ලෝකයේ ජිවත් වන ඕනෑම කෙනෙකුට ආත්ම අභිමානයක් ඇත. කවුරුත් සමාජයේ පැසසුම් ලැබීමට කැමතියි. කිසිවෙකු වැරදි ඇසීමට  කැමති වන්නේ නැත. එය ඔබේ දරුවාටද ඒ ආකාරයෙන්ම බලපානු ලබන්නේය. බොහෝ දෙමාවුපියන් සිදු කරනු ලබන වැරදි ක්‍රියාවක් වනුයේ තම දරුවාගේ වැරදි දරුවා ලග තබා ගෙන පිට අය ඉදිරියේ ප්‍රකාශ කිරීමයි. තම දරුවා අසල සිටින්නේ නම් සිහි බුද්ධියෙන් යුතුව කතා කිරීම දෙමවුපියන් සතු වගකීමක්. විශේෂයෙන්ම බොහෝ පියවරුන්ට වඩා මව්වරුන් මෙම වැරැද්ද නිතර නිතර සිදු කරනු ලබයි.

” මෙයා නම් හරිම හිතුවක්කාරයි. ඉගෙන ගන්න කිසිම උවමනාවක් නෑ. කරොත් කරන්නේ මෝඩ වැඩක්. හැමදාම පන්තියේ අන්තිමයා. කොච්චර කිව්වත් පාඩම් කරන්නේ නෑ.”

මෙවැනි ප්‍රකාශ බොහෝ දෙමාවුපියන්ගේ මුවින් පිට වනු ඇත. එවැනි අවස්ථාවල ඔබේ දරුවා නිහඩව සිටියත් සිත යටින් බොහෝ කම්පා වනු ඇත. ඔබේ දරුවා ඔබ කියන දේ නොඅසන්නේ නම් එය පිට අය ඉදිරියේ පවසා පලක් නැත. එවිට දරුවා වැඩි වැඩියෙන් එවැනි ක්‍රියාවලට යොමු වනු ඇත. ඇතැම් මවුවරුන් තම මිතුරියන් සමග එක් වූ විට තම දරුවන් පිලිබදව කතාබහ කරනු ලැබේ. එවැනි අවස්ථාවල දරුවාද ඒ අසලින් සිටිය හැකිය. නමුදු දෙමාවුපියන් ඒ පිලිබදව කිසිම තැකීමක් සිදු නොකරයි. දරුවාගේ වැරදි සියල්ල පිට අයෙකු ඉදිරියේ පවසන විට දරුවා මහත් අපහසුතාවයකට ලක් විය හැකිය. ඇතැම් විට එවැනි අවස්ථාවක එම දරුවාගේ වයසේ පසුවන දරුවන් ද සිටිය හැකිය. එවිට ඔහු පාසලේදී අනෙක් දරුවන්ගේ විහිලුවට ලක් විය හැකිය. කුඩා දරුවන් එක් වූ විට අනෙකාගේ අඩුපාඩු වලට විහිලුතහළු කරනු ලැබේ. එය දරුවන්ගේ ස්වභාවයයි. එම නිසා වැඩිහිටියෙකු වශයෙන් ඔබ දරුවාගේ වැරදි පිට අය ඉදිරියේ පවසන්න එපා.

දරුවන් දගකාරය. ඇතැම් දරුවන් දෙමවුපියන් කියන දේ අසන්නේ නැත. එවැනි දරුවන්ගේ වැරදි පිට අය ඉදිරියේ පැවසීමෙන් දරුවා තව තවත් මුරණ්ඩු විය හැකිය. එම නිසා ඔබේ දරුවා නිතර නිතර වැරදි වැඩ සිදු කරනු ලබන්නේ  නම් ඔබේ ආදරය හා සෙනෙහස වැඩි වශයෙන් පෙන්වා එවැනි කටයුතු වලින් දරුවා ඈත් කර ගැනීමේ හැකියාවක් ඔබට තිබිය යුතුය. එසේම දරුවන් යහපත් ක්‍රියාවලට යොදවන්න. නිතරම ආදරය, සෙනෙහස ලබා දෙන්න. ඔබ නිතරම දරුවා පිලිබදව සැලකිලිමත් වන බවත් ඔබේ ලෝකය දරුවා බවත් දරුවාට ඒත්තු ගන්වන්න. එවිට ඔබේ වචනෙට දරුවා කීකරු වනු ඇත.

බොහෝ දෙමාවුපියන් අද ගත කරනු ලබන්නේ කාර්යබහුල ජිවිතයක්. ඔවුන්ට තම දරුවා සමග කාලය ගත කිරීමටවත් කාලයක් නැත. ඔවුන්ගේ මුළු ජිවිතයම මුදල් බවට පත් වී ඇත. එවිට දරුවා නිතර නිවසේ හුදෙකලා වනු ලැබේ. දෙමාවුපියන්ගේ සෙනෙහස අඩු වන විට දරුවන් මුරණ්ඩු වනු ඇත. දෙමාවුපියන්ගෙන් ආදරයෙන් ගිලිහෙන දරුවා තමාට අවශ්‍ය ආදරය, සෙනෙහස සොයන්න අනියම් මාර්ග සොයන්න පටන් ගන්නවා. එය දරුවාට දොස් නැගිය නොහැකිය.

මවක් තම දරුවා බිහි වී ටිකෙන් ටික වර්ධනය වන විට තම දරුවාගේ රූපය අනෙක් දරුවන් සමග සංසන්දනය කරන්න පටන් ගන්නවා. විශේෂයෙන්ම දියණියක් නම් මව සෑම විටම තම දියණිය ලස්සන කරන්න උත්සහා කරනවා. රූපය කියන සංකල්පයට සමාජය තුල විශාල පිළිගැනීමක් තිබීම ඊට හේතුවයි. බොහෝ වැඩිහිටියෝ විරූපී දරුවන්ට වඩා රුවැති හුරු බුහුටි දරුවන්ට දරුවන්ට දක්වන ඇල්ම, ආදරය, සෙනෙහස වෙනස්ය. අද වන විට පර්යේෂණ මගින් පෙන්වා දෙනු ලබන්නේ රූපය කෙනෙකුට ඉහල තැනකට යෑමට මහත් ආශීර්වාදයක් වන බවයි. එබදු සොයා ගැනීම් කිහිපයක් නම්,

වඩාත් ලස්සන දරුවන්ට පන්ති විභාග වලදී ගුරුවරුන්ගෙන් වැඩි ලකුණු ලැබෙන බවට සාක්ෂි ලැබී ඇත

ලස්සන රූපයක් නොමැති දරුවන් කරදරකාරයන් ලෙස වැඩිහිටියන් සලකා ඇත. දරුවන් කිහිප දෙනෙකුගේ ජායාරූප රැසක් පෙන්වා ඉන් දගකාර, නරක දරුවන් කවුරුන් දැයි හදුනා ගන්නා ලෙස වැඩිහිටියන්ට පැවසීමෙන් ඔවුන් බොහෝ විට  තෝරා ගෙන තිබෙන්නේ එතරම් ප්‍රසන්න පෙනුමක් නැති අප්‍රසන්න පෙනුමක් ඇති දරුවන්ය.

විරූපී දරුවන් ලස්සන දරුවන්ට වඩා මෝඩ යැයි වැඩිහිටියන් පිළිගන්නා බවට මෙම පර්යේෂණයෙන් හෙළි වී ඇත

දරුවන්ට දඩුවම් කිරීමේදී ලස්සන දරුවන්ට විරූපී දරුවන්ට වඩා ලබා දෙන දඩුවම් තරමක් ලිහිල්ය. එසේම මෙවැනි දරුවන් වැඩිහිටියන්ගේ නිතර සෙනෙහස, ආදරයට ලක් වෙති.

වැඩිහිටියන් පමණක් නොව කුඩා දරුවන්ද ලස්සන අයට කැමතිය

ප්‍රසන්න පෙනුමක් ඇති දරුවන් අනෙක් ළමුන්ට වඩා පාසලේදී වුව ඉක්මනින්ම  වන  ජනප්‍රිය වන බව තවදුරටත් මෙම පර්යේෂණය මගින් පෙන්වා දෙනු ලැබේ.

මෙකි රූපය නැමැති ආකල්පය පිරිමි දරුවන්ට වඩා බලපාන්නේ ගැහැණු දරුවන්ටය. නමුදු රූපය නැමැති සංකල්පය සියලු දරුවන්ට එක හා සමානව පිහිටන්නේ නැත. ඒ බව වැඩිහිටියන් අවබෝධ කර ගත යුතුය. ඔබේ එක් දරුවෙක් රූපයෙන් අඩු වී අනෙක් දරුවා තරමක් ඉහල ගනයේ රූපයක් ඇතිව ඉපදුනහොත් එවිට ඔබ නොදැනුවත්වම රූපයෙන් ඉහල දරුවා වර්ණනා කරනු ඇත. එවිට අනෙක් දරුවා මානසික වශයෙන් කඩා වැටීමකට ලක් විය හැකිය.

රූපය මෙන්ම බුද්ධිය ද දරුවෙකුගේ අගය මැනීමට යොදා ගන්නා ගුණාංගයක් බවට අද වන විට පත් වී ඇත. දෙමවුපියෝ බලාපොරොත්තු වූ තරම් දරුවා ඉගෙනීමට දක්ෂ නොවන්නේ නම් මවුපියන් පසුතැවෙයි. ” මගේ දරුවාට කිසිම දෙයක් බෑ. හරිම හිතුවක්කාරයි. ” ආදී ලෙස පවසමින් මවුපියන් මැසිවිලි නගයි. බොහෝ දෙමාවුපියන් බලාපොරොත්තු වූ තරමටම දරුවන් ඉගෙනීමට දක්ෂ නොවන විට දෙමාවුපියන් දැඩි ලෙස කම්පාවට පත් වනු ලැබේ. නිතරම දෙමවුපියන් සිතනුයේ තම දරුවා අනෙක් දරුවාන්ට වඩා දක්ෂ විය යුතු බවයි. පන්තියේ සෑම විටම තම දරුවා පළමුවැනියා විය යුතු යැයි මවුපියන් සිතයි. ඒ තරමටම දෙමාවුපියන්ට අවශ්‍ය වන්නේ තම දරුවා ඉහලින් සිටිනවා දකින්නටය.

ඇතැම් දරුවන් කොතරම් පාඩම් කලත් මතක් සිටින්නේ නැත. එවැනි දරුවන්ට ගුරුවරයාගෙන් කිසිදා හොදක් ඇසීමට නොහැකිය.මෙසේ දිගටම සිදුවීමෙන් දරුවා තුල සැගවී ඇති හැකියාවන් සිදී යන්නේය. එම නිසා දරුවන්ගේ බුද්ධි මට්ටම එක හා සමාන මට්ටමක පවතින්නේ නැත. එවැනි දරුවන් වෙනත් මාර්ගවලට යොමු කල හැකිය.

මේ නිසා දරුවන්ගේ රූපය, බුද්ධි මට්ටම පිලිබදව වඩා සැලකිලිමත් වන දෙමාවුපියන් අවබෝධ කර ගත යුත්තේ මෙකි සංකල්ප සියලු දරුවන්ගේ එක හා සමානව පිහිටන්නේ නැති බවයි.

කාලය විසින් හැමදේම වෙනස් කරනවා. කාලයකට පෙර පෙම්වතකු ලෙස පෙම්වතියගේ සුසුනිඳු දෑත ආදරෙන් උණුහුමට අල්ලගෙන සැහැල්ලුවෙන් ඇවිද ගිය ඔබට දැන් ජීවීතේ බොහෝම කාර්්‍යය බහුල ඇති. ඇත්තෙන්ම කිව්වොත් ඔබ දෙදෙනට දොඩමලු වන්නටවත් කාලයක් නැතිව ඇති. ඇත්ත ජීවිතේ හරිම සටනක්. ඒ සටනට නිනව්වක් නැතිව දුවන අපිට අපිවම මග හැරෙන අවස්ථාවන් බොහෝමයි. මව්පිය පදවියන්ට උරුමකම් කියන විට ,නිවසේ කාර්යාලයේ, වැඩ කටයුතු වලින් දවස ගෙවෙද්දි ආදරය  අපි අතින් කොයි තරම් ගිලිහී යනවද? ඔබ දන්නවද ලංකාව තුල අනියම් සබඳතාවන් ඇති කරගැනීමේ ප්‍රවණතාවය වැඩි වී ඇති බව. මග තොටදී ඔබේ මුහුණු පොතෙන් මුණ ගැසුන කෙනෙකු හා ආදරය විඳින්න පුරුදු වනවාට වඩා දුරින් සිට පෙම් කරන අවදියේ ආදරය කලා සේම සැමියා බිරිඳටත් බිරිඳ සැමියාටත් ආදරය කරනවා නම් අනියම් සබඳතාවන් නිසා සුන්දර පවුල් දිවිය දෙදරා නොයනු ඇත. දික්කසාදය නම් රුදුරු ව්‍යවසනයට අප ගොදුරු කරන්නේ අපේ ජීවිත පමණක් නොව අපේම දරුවන්ගේද ජිවිතයි.

ආදරය කරන සමයේ සෑම පෙම් යුවලකගේම එකම සිහිනය තමන්ට වෙන් වූ ලොවක් තනා පවුල යන ඒකකය තුල ආදරයෙන් ජීවිතය බෙදා ගැනීමය. එහෙත් අපි නොසිතන සත්‍යයක් ඇත. දෙතැනක ජීවත් වු යුවලක් එක වහලක් යටට පිවිසි කල ගැටලු ඇතිවේ. අපි දෙන්නම එක්කෙනෙක් යැයි වචනයට කීවද පුද්ලයන් වශයෙන් අපට එක් පුද්ගලයකු විය නොහැකි බවයි මා නමි විශ්වාස කරමි. කිව යුත්තේ එකිනෙකා වෙනුවෙන් කැප කිරීම් කරමින්, දෙදෙනාගේ අදහස් උදහස් තේරුමි ගැනීමට උත්සහ කරමින්, තැනට සුදුසු නුවණ භාවිත කරමින් ආදරය පලුදුවන්නට ඇති ඉඩ කඩ අවුරාලීම විවාහයේ සාර්ථකත්වය හේතුවන බවය. විවාහ ජීවිතයත් හරියට පන් පැදුරක්ය. රටාවකට වියමන සිදු නොකලහොත් එහි සුන්දරත්වයක් නැත. පාට පොඟවා වර්ණ ගැන්වූ පන් ගස් වියමනට නැති වූ කල එහි ලස්සනක් ඉස්මතු නොවේ.

එදා සමාජයත් අද සමාජයත් ගත් කල විවාහය දෙස බලන කෝණය වෙනස්ව ඇත. පෝරූ මස්ථකයේ සිට මියෙනතුරුම දුක සැප බෙදා ඕනෑම අභියෝගයක් හමුවේ එකට හිඳින්නට චාරිත්‍රාණුකූලව මෙන්ම නිතීමය වශයෙනුත් පොරොන්දු වේ. එදා සමාජය තුල කෙතරම් බාධක පැමිණියත් විවාහය යන බන්ධනය පලුදු කර නොගන්නට ඔවුන් උත්සුක විය. දෙන්නා දෙමහල්ලන්ගේ රණ්ඩු සරුවල් බත ඉදෙන තුරු පමණක්ම විය. එහෙත් අද වන විට  විවාහය වෙත පිවිසෙන්නේම බැරිවුණොත් දික්කසාද වෙනවා යන පටු හැඟීම පෙර දැරිවමය.

එවැනි මානසික මට්ටමක් ඇති වන්නට සමාජය තුලින් ලැබෙන ආකල්පත් බලාපානු ලබයි. අද බොහෝ නිවෙස් වල රන් හා වටින කාලය වැය කරන්නේ අගක් මුලක් නැති, පවුල් ප්‍රශ්න ගහනය වූ ,ඊර්ෂ්‍යාව හා වෛරය පිරුණු ඉන්දීය ටෙලි නාට්‍යහා ඉන්දීය සම්භවයෙන් යුතු සිංහල ටෙලි නාට්‍ය සඳහාය. නිවසේ වැඩිහිටියාගේ සිට බහ තෝරන දරුවා දක්වාම මෙම නාට්‍ය උන්මාදයෙන් පෙළෙයි. ඉතින් දරුවන්ගේ කුඩා මනසද කුඩා අවදියේ සිටම පෝෂණය වන්නේ මේ වැදගැම්මකට නොමැති ටෙලි සිත්තම් හරහාය. දෙමාපියන් වශයෙන් අපට වගකීමක් පැවරී ඇත. ඒ දරුවන්ට නිවැරදි මග පෙන්වීමය.

දරුවන් පෙරටු කරගෙන එවන් නිෂ්ඵල ටෙලි සිත්තමක් වෙනුවෙන් වැය කරන කාලය පවුලේ සියලුම දෙනා එක්ව පිළිසඳරක යෙදුනේ නම් එකිනෙකාගේ අදහස් හුවමාරු කරගන්නේ නම් පවුල තුල බැඳීම ශක්තිමත් වන්නා සේම තවත් කෙනෙකුට සවන් දීම මෙන්ම ගරු කිරීමද දරුවා කුඩා වියේ සිටම තම ජීවිත තුලට එක්කර ගනියි.

බොහෝ විවාහ දෙදරා යන්නට කාරණය කැත්තට පොල්ල න්‍යාය වන මම මොකටද එයාට දෙක වෙන්නේ? යන සිතුවිල්ලය. විවාහ ජීවිතයට පිවිසීමට අප දරුවන් පුරුදු පුහුණු කල යුත්තේ කුඩා අවදියේමය. තව කෙනෙකුට  ඇහුම් කන් දෙන්නට, අන්නෝන්‍ය වශයෙන් උදව් කරගැනීමට, පවුල යන බැදීමෙහි ඇති වැදගත්කම හා අවස්ථානුකූලව ජීවිතයට මුහුණ දීමට හැකි දරුවකු නිර්මාණය කල හැකි නම් දික්කසාදය නැමැති රුදුරු ව්‍යවසනයට ඉදිරි පරම්පරාව ගොදුරු නොවනුඇත. එවන් සමාජක් බිහි කිරීමේ ඒ භාර දූර කාර්්‍යය පැවරී ඇත්තේ ආදරණීය දෙමාපියන්ට බව අමතක නොකරන්න.