තමා ගර්භණීභාවයට පත්ව ඇති බව තම සේවා දායකයා දැන ගැනීමෙන්, ඔවුන් කෙසේ එයට ප්‍රතිචාර දක්වයිද යන්න රැකියාවක නිරත වන සියලුම මව්වරුන්ට පීඩාවක් ගෙන දෙන කරුණකි. මෙරට නීතියට අනුව අලුත් මව්වරුන් හට දින 84 ක කාලයක් දක්වා නිවාඩු ලබා ගත හැක. එහෙත් සේවා දායකයා තම කැමැත්තෙන්ම එකී නිවාඩු අනුමත කරන්නේද නැතහොත් ඔවුන් හුදෙක්ම නීතිමය රෙගුලාසි වලට එකඟ වීමක් හෝ යටත් වීමකින් කරන්නේද?

දෙවැනි කාරණය සත්‍ය බව මට පෞද්ගලිකව හැඟේ. දශකයකට වඩා වැඩි කාලයක් සමාගම් ශ්‍රේණියේ සේවා කර ඇති මා නීතිමය රෙගුලාසි වලට යටත්ව නිවාඩු ලබා දීම පිළිබඳව සේවා දායකයාට දොස් පවරන්නේ නැත. මීට හේතුව මම වැඩි දුරටත් විස්තර කිරීමට බලාපොරොත්තු වෙමි.

රැකියාවල නිරතවන අඹු සැමියන් බොහෝමයක් තමන්ට දරුවකු ලැබීමට යන බව දැන ගැනීමෙන් ඉමහත් සතුටට පත් වේ. එහෙත් ඉතා සුළු කොටසක් මෙම පුවතින් විමතියට පත් වේ. මා විශ්වාසය කරන ආකාරයට, සැමියා හා බිරිඳ යන දෙදෙනාම ගර්භණීභාවයේ අත්දැකීම එකට අත් විඳිය යුතු ය. “අපට දරුවකු ලැබෙන්නයි යන්නේ” යන කියමන ඔවුන්ගේ මුවින් පිටවන්නේ මේ නිසාවෙනි.

ගැබ්ගත් බව දැනගැනීමෙන් අනතුරුව පළමුව ඇතිවන ප්‍රීතිය සහ උද්යෝගය කෙමන් පහවී යයි. ගර්භණීභාවයේ නියම ස්වභාවය ආරම්භ වන්නේ මින් මත්තෙනි. වැඩකරන අඹු සැමි යුවලක් නම්, ඔවුන්ගේ ඊලඟ පියවර වනුයේ මේ පිළිබඳව සේවා දායකයා දැනුම් දීම හා සේවා ස්ථානයෙන් නිවාඩු ලබා ගැනීම ආදියයි. සැලසුම් නොකරන ලද ගැබ් ගැනීමක් නම් මාස නවයකට පසු ඉපදීමට සිටින තම දරුවා වෙනුවෙන් තම ජීවන රටාව කෙසේ සකස් කර ගත යුතුද යන්න ඔවුන්ට තරමක අභියෝගයක් වනු ඇත. තමා සේවය කරන්නේ ඉතා තරඟකාරි සහ අභියෝගාත්මක පරිසරයක් නම් සේවා දායකයාට මේ පිළිබඳව දැන්වීම ඉතාමත් අපහසු කටයුත්තක් විය හැක. කෙසේ වෙතත් තම සේවා ප්‍රධානියා මේ සම්බන්ධයෙන් ඉතා තැන්පත් ව කටයුතු කරන පුද්ගලයෙකු නම් ඔබ නැවත සේවයට පැමිණීමේදි රැකියාවේ විශ්වාසය තහවුරු කරගැනීමට මෙය හොඳ සඥාවකි.

බොහෝ කාන්තාවන්ට තම ගර්භණීභාවයේ මුල් අවධියේ යම් අපහසුතාවයන් අත් විඳීමට සිදු වනු ඇත. ගර්භණී පළමු අවධියේ උදෑසන ඔක්කාර ගතිය හෝ අනෙකුත් අසහනකාරි රෝග ලක්ෂණ වලින් මිදී සිටින්නේ ඉතා අතලොස්සක් පමණි.
මුලු දවසම වමනය දැමීමෙන් තම සේවා ස්ථානයේ සේවය කිරීමේ ප්‍රති විපාක ඔබට සිතා බැලිය හැකිද? මෙම තත්තවය ඔබගේ ඵලදායිතාවයාට ඍණාත්මක ලෙස බලපායි. ගර්භණීභාවයේ වර්ධනයත් සමඟම ඉදිරි මාස කිහිපය සාපේක්ෂව අපහසුතාවයෙන් තොරව ගෙවී යා හැක. එහෙත් ඒ සමඟම ඔබට තෙහෙට්ටු ගතියක් දැනීමට ඉඩ ඇති අතර ඔබගේ උද්‍යෝගිමත් පෞර්ෂත්වය ද වෙනස් වීමට ලක්වේ. මෙයින් අදහස් කරන්නේ ඔබට මින් ඉදිරියට පෙර සේ ගමන් බිමන් වල නිරත විය නොහැකි බවයි. දරුවකු ලැබීම පිළිබඳව ඔබ ගත් තීරණය ගැන කිසිවකුටත් දොස් පැවරිය නොහැක.

ඉන්පසු ඉක්මණින්ම ඔබට ප්‍රශ්න රැසකට මුහුණ දීමට සිදුවේ. ඔබේ කකුල් ඉදිමීමට හා ශරීරයේ බර වැඩිවීමට පටන් ගැනේ. මෙහි ප්‍රතිඵලයක් ලෙස ඔබගේ ඔබගේ කාර්යක්ෂමතාවය අඩු වේ.ඔබගේ ඵලදායිතාවය කෙටි කාලීනව ඉතා උසස් මට්ටමක පැවතුනත්, මාස නවයක ගර්භණී අවධිය ඔබගේ රැකියා ඉතිහාසය හා සසඳා බලන විට අඩුම ඵලදායිතාවයක් ඇති කාලය වූ බව ඔබට පෙනී යයි. දරුවා ලැබීමෙන් පසු එළඹෙන මාස 3ක කාලය මාතෘ නිවාඩු වලින් ආවරණය වේ. මෙය අද ලෝකයේ පවතින සාමාන්‍ය දැනීමක් ලෙස මම සිතන්නෙමි.

පලමු වරට මවක් වීමේ අත්දැකීම මමත් විඳ ඇත්තෙමි. එහෙත් සෑම සුන්දර ගර්භණී මාතාවකටම මා වැදගත්කොට පවසන්නේ ඔබට ඔබේ රාජකාරිය තවමත් මැනවින් ඉටු කල හැකි බවයි. සම්පූර්ණ පරිශ්‍රමයක් දරා තම වැඩ කටයුතු වල නිරත වීමට උත්සාහ ගත යුතුයි. ඔබ සැමට අවශ්‍ය වන්නේ තමන්ගේ අභිප්‍රායයන් වැඩියෙන් සුරක්ෂිත කර ගනිමින් තමන් තුල ඇති ඉදිරියට යාමේ බලවේගය හඳුනා ගැනීමයි. ඔබගේ සාමාන්‍ය ගැම්මෙන් මෙය කල යුතුව ඇතැයි මා නොකියන නමුත් අඩුම වශයෙන් එසේ කිරීම සඳහා ඔබට වෑයම් කල හැක.

ඔබගේ සේවා ස්ථානයේ සමහර දිනයන් හිදී, ඔබට නිතරම ඔක්කාර ගතිය දැනීම, තමා අඳින කලිසම හෝ සාය දිනෙන් දින හිර වීම, කාර්යාලයේ විදුලි සෝපානයක් තිබීමේ අවශ්‍යතාව වැටහීම, ක්ෂණික , කෘතිම ආහාර වලින් වැළකී පෝෂ්‍ය ගුණයෙන් යුත් සෞඛ්‍යයට හිතකර ආහාර ගැනීම හේතුවෙන් නුරුස්නාවෙන් පසුවීම. ඔබගේ දෙපා ඉදිමීම නිසා ඔබගේ ප්‍රියතම පාවහන් කුට්ටම පැලඳීමට නොහැකි වීමෙන් කේන්ති යාම වැනි ආවේගශීලි හැඟීම් මේ අවධියේ පහල විය හැක. කෙසේ වෙතත් ගර්භනී කාලය අවසන් වී ඔබගේ කිරිකැටි ගැහැණු හෝ පිරිමි දරුවා ලැබීමෙන් පසු ඔහු හෝ ඇයව පළමු වරට වඩා ගැනීමෙන් ඉහත සඳහන් සිතිවිලි කිසිවක් ඔබේ මතකයට එන්නේ නැත. බොහෝ මව්වරු මෙම අත්දැකීම කෙතරම් කටුක හෝ අප්‍රසන්න වුවත් එය නැවත විඳගැනීමට බලාපොරොත්තුවෙන් සිටින බව මට සක්සුදක් සේ විශ්වාසයි.

සේවා දායකයාගේ පැත්තෙන් බලන විට කාන්තාවකගේ ගර්භණීභාවය් හේතුවෙන් ආයතනයට යම් පාඩුවක් වන බව මාගේ අවංක අදහසයි. කෙසේ වෙතත් ආයතනයෙන් තමාට ලැබෙන් වරප්‍රසාද හිතුමතේ භාවිතා නොකර තමාට හැකි පරිදි 100%ක දායකත්වයක් ආයතනයට ලබා දීම සේවකයාගේ වගකීමයි. ගර්භණී අවධිය ආරම්භ වීමෙන් පසු ඔබේ හැකියාවන් හි සීමාවන් තිබුණත් මේවා හුදෙක් ඇත්තේ ඔබගේ සිත් තුලය. මනස එක්තැන් කර ගැනීමෙන් ඔබට ඕනෑම කර්තව්‍යයක් සාර්ථකව ඉටු කල හැකි වේ. මෙය ඔබ තම රාජකාරිය වගකීමකින් ඉෂ්ට කරන බවත් රැකියාවේ ස්ථාවර බව පිළිබඳ ඔබ තුල ඇති උනන්දුව සේවා දායකයාට වටහා ගැනීමට ඉඩ සලසනු ලැබේ.

 කතුවරිය ගැන බිඳක් :
මාරි කෲස් යනු රැකියාවක නිරත වන කාර්ය බහුල මවකි. ඇයත් ඔබ වගේම වගකීම් සහ අභියෝග රැසක් සමඟ පොර බඳින කෙනෙකි. අලෙවිකරණ වෘත්තීයේ සාර්ථක ඉණිපෙත්තක් පසු කරමින් සිටින අතරේදි, ශ්‍රීලංකාවේ මව් පදවිය ලැබීමට නියමිත කාන්තාවන්ගේ අභිවෘද්ධිය වෙනුවෙන් මැය විසින් ඇය ප්‍රථම වරට මවක් වූ අත්දැකීම් පිළිබඳව ඔබත් සමඟ බෙදා හදා ගනියි. මාරි කෲස් ගේ තවත් ලිපි සඳහා Parenting.lk වෙබ් අඩවියේ ""First Time Mom" කොලම වෙත පිවිසෙන්න.

සංගීතය මිනිසාගේ මනස සංසිදුවන අතර අපට මතක ඇති කාලයක සිට මිනිසා පීඩාව හා දොම්නස නැති කිරීමේ පරිපූර්ණ සුවදායි අංගයක් ලෙස සංගීතය භාවිතා කර ඇත.
මවක් වශයෙන් මා, මාගේ දරුවන් නිදි කරවීම සඳහා හිත සන්සිඳවන වේගය අඩු රිද්මයක් ඇති සම්භාවනීය ශ්‍රී ලාංකික සංගීතය ඇසීමට සැලැස්වූ අතර එය බොහෝ අවස්ථාවලදී සාර්ථක වී ඇත. දරුවා එක්තරා සංගීත මාදිලියකට බෙහෙවින් ප්‍රතිචාර දක්වන බව මට ඉතා ඉක්මනින් වැටහිණි. මාගේ පුතා, ඔහු වැඩෙන වයසේ පසුවන සමයේදී, අඩු වේග රිද්මයක් ඇති පැරණි සංගීතයට මැනවින් ප්‍රතිචාර දැක්වූ අතර, විමතියට මෙන් මාගේ දෙවන ගැහැණු දරුවා රූපවාහිනියේ හා ගුවන් විදුලියේ වාදනය වූ වැඩි වේග රිද්මයක් ඇති ගීතවලට ප්‍රීතියෙන් ප්‍රතිචාර දක්වන ලදී. අප නිවසේදි, ළමුන්ගේ මනස එක්තැන් කර ගැනීමේ ක්‍රමයක් ලෙස තවමත් සංගීතය භාවිතා කරනු ලබනවා. මෙය අපට අත්දුටු හා ප්‍රත්‍යක්ෂ වූ ප්‍රතිකාරයක් විය.

මීට සති කිහිපයකට පමණ පෙර මා රූපවාහිනියේ නාලිකාවන් ගවේෂණය කරමින් සිටි විට අහම්බෙන් මෙන් Discovery Science නාලිකාවේ ඉතා සිත්ගන්නා සුලු වැඩ සටහනක් බැලීමට හැකි විය. එහිදී සාකච්ඡා වූ කරුණ අනුව මෑතකදී කරන ලද සමීක්ෂණයකින් හඳුනාගෙන ඇති පරිදි ගර්භණි කාලයේදි, සම්භාවනීය පැරණි සංගීතයට සවන් දුන් මව්වරුන්ගේ දරුවන් බුද්ධිමත් වීමේ ප්‍රවණතාවක් ඇති බවයි. ගර්භාෂය තුල සිටින සමයේදීත් දරුවා සමඟ සන්නිවේදන කටයුතු වල යෙදීම හොඳ යහපත් දරුවෙකු බිහි කිරීමට උපකාරි වන බව ශ්‍රී ලාංකික අප විශ්වාස කරන නිසා එය අපට පුදුමයට කරුණක් නොවීය.

මෙය පරම්පරාවෙන් පරම්පරාවට පැවතී ගෙන එන ඥානයකි. මෙම විශ්වාසය ඉහත සඳහන් කෙරුණු සමීක්ෂණයෙන් වැඩි දුරටත් තහවුරු වේ. මා පළමු වරට ගර්භණිභාවයට පත්වූ අවධියේ මාගේ ස්වාමි පුරුෂයා පැරණි රූපවාහිනි වෙළඳ දැන්වීමක (පියකු සිය පුතුට ගායනා කල ) කන්කළු සිංහල ගීතයක් ගායනා කල සැටි මගේ මතකයට නැගේ. ඔහු මෙම ගීතය ගායනා කල සෑම අවස්ථාවකම ගර්භාෂය තුල සිටින දරුවා එයට ප්‍රතිචාර දැක්වූවේය. පුතා ඉපදීමෙන් පසුවත්, අපි මෙම ගීතය දරුවාව නිදි කරවීම සඳහා ගායනා කලෙමු. දරුවා මෙම ගීතයට දක්වන ප්‍රතිචාරය අප විසින් ගායනා කරන ලද හෝ ගායනා කිරීමට සැලැස්වූ අනිකුත් ගීත වලට වඩා වැඩි බට අපට අවබෝධ වුණි. හෙල්සින්කි විශ්ව විද්‍යලයේ පවත්වන ලද සමීක්ෂණයකට අනුව දරුවන්ට ඔවුන් ගර්භාෂය තුල සිටින කාලයේ ඇසීමට සලස්වන ලද සංගීතයේ තාලය එම දරුවා මෙලොව එලිය දැක මාස කිහිපයකට පසුත් ඔවුන්ගේ මතකයේ රැඳෙන බව සොයා ගෙන ඇත. එම සමීක්ෂණයෙන්ම අනාවරණය කර ඇත්තේ, මව්වරුන් වීමට නියමිත කාන්තාවන් තම කුසෙහි වූ දරුවාගේ අභිවෘද්ධිය ප්‍රගුණ කිරීමේ බලාපොරොත්තුවෙන් පැරණි සම්භාවණීය සංගීතයට ඇල්මක් දැක්වීම නිශ්ඵල කාර්යයක් නොවන බවය.
දරුවා ඉපදීමට පෙර දරුවාට නිතර නිතර ගීතය ගායනා කිරීමේ හෝ වාදනය කිරීමට සැලැස්වීමේ තරමට දරුවාට එහි තාලය හඳුනා ගැනීමේ හැකියාව වැඩිවනු ඇත. ගර්භණි කාලය තුල ඔබ සැහැල්ලුවෙන් පසුවීම සඳහා සංගීතයට සවන්දීම, ඔබේ දරුවාටත් උපකාරි විය හැක. ගර්භණී අවධිය තුල ඔබ ආතතියෙන් පසුවන විට ඔබේ කුසෙහි සිටින දරුවාටත් එලෙසම හැඟෙන බැවින් ඔබගේ ප්‍රියතම ගීත වලට සවන් දීමට කාලය වෙන් කර ගන්න.
අමරදේව, නන්දා මාලිනි සහ වික්ටර් රත්නායක විසින් ගායනා කරන ලද සම්භාවනීය ගීත වලට වැඩියෙන් සවන් දීමට මම පුරුදු වී සිටියෙමි. “ආදරයේ උල්පත වූ අම්මා යන ගීතය මව් පදවියට පිය නගන අවස්ථාවේ පසුවන කෙනෙකුට කදිම තාලයකි. දේශීය සම්භාවනීය ගීත හැරුණු කොට මෝට්සාට් (Mozart) සහ බීතෝවන් (Beethoven) වැනි තවත් බොහෝ බටහිර සංගීතඥයින්ගේ සම්භාවනීය නිර්මාණ වලට සවන්දීමට උත්සාහ ගන්න.

ඔබ කුමන මාදිලියේ සංගිතය තෝරා ගත්තද එය ගර්භණි කාලය තුල ඔබගේ මනස සැහැල්ලුවෙන් තබා ගැනීමේ මනා ප්‍රතිකාරයක් ලෙස කටයුතු කරයි. සතුටින් සහ සැහැල්ලුවෙන් පසුවන මවකට සැමවිටම සතුටින් සහ සැහැල්ලුවෙන් සිටින දරුවකු බිහි කල හැක්කේ ඒ නිසාවෙනි. සමහර බටහිර සම්භාවනීය සංගීත BeeMp3 හෝ 4Shared වැනි වෙබ් අඩවි ඔස්සේ ඔබට නොමිලේ ලබා ගත හැක. 60, 70 සහ 80 දශකයේ සිටි ජනප්‍රිය ගායකයන්ගේ පැරණි සම්භාවනීය ගීත සමූහයක් Ananmanan.com වෙබ් අඩවිය ඔස්සේ ලබා ගැනීමට උත්සාහ කර බලන්න.